Read Yamano 2 Kɔ̀léĩ́tĩ̀ã̀ 11 Bible Online

2 Kɔ̀léĩ́tĩ̀ã̀ 11 - Yamano bible

2 Kɔ̀léĩ́tĩ̀ã̀ 11

¹Ḿm̀ nàà zò-kũ̀-tã́ã̀ é kɛ ka kɛ̀lɛ̀ m zì kɛ-wɔ̃̀ mɔ́ɔ̀ wɔ̃̀ mɔ̀, yé bɛ̃̀ɛ̃ m wũ ɓéĩ́ nyɛɛ̀ lɛ m mɔ̀ɔ ká. Kà à kɛ kíli m lɛ̀ɛ wɛ̀.

²Ḿm̀ fɔ̃̀ɔ̃́-là kɛ̀ ka mɔ́ɔ̀ wɔ̃̀ mɔ̀, lɛ̀ zí nɔ́ Wálà è à kɛ̀áa lɛ́ ɓe. Ka kélɛ̀ lee lɛ́ lɛ̀ɛ́ gɔ̃-wɔ̃̀ yí dɔ nɛ́, ɛ̃́ɛ̃́ lɛ́ lɛ̀ɛ́ péléĩ̀-péléĩ̀ kṹ gɔ̃ã̀ mɔ̀ɔ lɛ́ ɓe. Maà m wè dɔ kélɛ̀ káà lo gɔ̃ doó kpã́ã́ síì. Gɔ̃́ e kília lɛ́ e Kɛ́lɛ̀ì káa.

³Pɛ́ m̀ tùò à wɛ̃́ĩ̀a, ye lɛ́ e kélɛ̀, ka wũ-kèlè yí lɛ́ɛ̀ lo sìè, tó a kɛ ka kã́ zi lɛ́ kaà Kɛ́lɛ̀ì kṹá ka zɔ̃̀ɔ̃̀ ká e wánà zɛ̀ káa lɛ̀ɛ, lɛ̀ zí nɔ́ mɛ̀nɛ e Íì bèkɛ̀ ɓoá e zì gíkã́ káa lɛ́ ɓe.

⁴Ƃii yé mi gbɛɛ aà nu ka píé, áà Zízɛ̀ gbɛɛ lɛ́ ye wá Zízɛ̀ yé kò à wɔ̃̀ gèe ka lɛ̀ɛ káa wɔ̃̀ gèè ka lɛ̀ɛ, zò-kũ̀-tã́ã̀ lɛ ka kɛ̀lɛ̀ e yiè ká à zì kɛ-wɔ̃̀ e kília mɔ́ɔ̀ wɔ̃̀ mɔ̀. Ɛ́ɛ̃́ Gɛ̀ɛ̀ wà wɔ̃́ làṹ yiè lɛ́ lɛ dóo gbɛɛ à yé ka sɔ̀lɔ̀ ɓo ko kɛ̀lɛ̀ɛ píéa, káà ka kɔ̀ yà o wì.

⁵Ḿm̀ yí dɔ kélɛ̀ m kpànazɛ̀ lɛ̀ zí nɔ́ àpɔ́sɔ̀lɔ̀ vɔ̀ kpàna-kpànazɛ̀ o yía o à ká kpànazɛ̀ɛ lɛ́ ɓe.

⁶Yé bɛ̃̀ɛ̃ m gbɛ̃̀ wéé mɛ́ dã́ã̀ mɔ̀ dɛɛ, m zì wɔ̃́ yí-dɔ-kɔ̀ yee aà gbɛ̃̀ mɔ́ pɛ́lɛ̀. Kɔaà wɔ̃́ e kéa zɔ̃̀ɔ̃̀ ka lɛ̀ɛ e yí púlú zɛ̀ ká lúó séĩ́ ká, ɛ̃́ɛ̃́ wɔ̃́ séĩ́ kɛɛ̀ yí.

⁷Lɛ̀ lɛ́ m Wálà zì wɔ̃́ làṹ yièa gèe ka lɛ̀ɛ, m̀ḿ gbaa gèe ká à fɔ̀nɔ̀-nɔ nɔ́ɔ fé dò kɛ. M m dìè sí péĩ́ kɛ ká kɛ kpànazɛ̀. Lɛ wɔ̃́ yɔɔ ká lɛ́ ma kɛɛ?

⁸Lɛ̀ lɛ́ m kɛ yɛɓo kɛpìà ka píé yía, Wálà-mìà lɛ́ o kɛ lɛ̀ gbɛɛ̀ gbɛɛ mɔ̀ɔ lɛ́ o kɛ m fɔ́nɔ́ nɔpìàa. M kɛ kã̀ã ɓopìà o mɔ̀ kɛ é gbũ ka mɔ̀.

⁹Lúó lɛ́ m kɛá ka píéa, m̀ḿ gbaa yèĩ yà ka kii yí gbũ̀-m-mɔ̀ mɔ́ɔ̀ wɔ̃̀ ká, lɛ̀ lɛ́ ma naa gbũ̀-mɔ̀ káa ká. Ko lèe-gé vɔ̀ lɛ́ o gó Masèdónàa, o nu pɛ séĩ́ lɛ́ à sã̀ã̀ dàaà e kɛá m mɔ̀ɔ ká m lɛ̀ɛ. Zi lɛ́ m wɔ̃́ kɛá lúó aà diea píéa, zi nɔ́ doóa lɛ́ m̀ lo wɔ̃́ kɛɛ̀ à ká líé zàáa. M̀ḿ ló kɛɛ̀ vũ gbííni ká ka là.

¹⁰Lɛ̀ lɛ́ Kɛ́lɛ̀ì zì wánà-wɔ̃̀ lɛ m yía, lé-gbùò-là lɛ́ m̀ kɛ̀ e kéa, à tèá-zì lɛ̀ɛ́ ló kɛɛ̀ ɓe Àkéyà-sɛ̀lɛ̀ lɛ̀ séĩ́ mɔ̀.

¹¹Mɛ́ e kɛ lɛ́ m̀ à gèe kíli? Ḿm̀ à gèe kíli ka lɔ̀ e nyɛ m mɔ̀ɔ mɔ́ɔ̀ wɔ̃̀ mɔ̀? Wálà láà yí dɔ kélɛ̀ ka lɔ̀ lɛ m mɔ̀.

¹²Ḿm̀ lo lóò m líé wɔ̃́ m̀ kɛ̀ e kéa kɛɛ̀ ká, yékɛ̀ ḿ lúó nɔ míá o kília lɛ̀ɛ ó lé-gbùò-là kɛ, wáà gèè kélɛ̀ óò yɛɓo kɛ̀ zi nɔ́ doó kò yɛɓo kɛ̀áa ká.

¹³Gɔ̃ã̀ o yía, o lɛ́ o tɔ́ àpɔ́sɔ̀lɔ̀ vɔ̀ nɛ̀ zɛ̀ɛ. Óò nɛ̀ kɛ̀ mia lɛ̀ɛ o zì yɛɓo kɛɛ̀ yí. Ɛ́ɛ̃́ óò o dìè kɛ̀ kɛ ó kɛ lɛ̀ Kɛ́lɛ̀ì zì àpɔ́sɔ̀lɔ̀ vɔ̀ wánà zɛ̀ lɛ́ ɓe.

¹⁴Wɔ̃́ nì o kéa lɛ̀ɛ́ gɔ̃̀ kɛɛ̀ ko lɛ̀ɛ wɔ̃́ kpàlézɛ̀ ká. Ƃii Sétɔ̃̀ dìè lɛ́ɛ̀ bɛ̀i à mɔ̀ é e dìè kɛ lɛ̀ Wálà là vɔ-mì yé è nu lɛ̀ fɔ̀nɔɔ̀ɔ káa lɛ́ ɓe.

¹⁵À mɔ́ɔ̀ wɔ̃̀ mɔ̀ɔ, yé Sétɔ̃̀ là yɛɓo-kɛ-mìà waà o dìè kɛ kɛ ó kɛ lɛ̀ wɔ̃́ kpeĩ kɛ-mìà lɛ́ ɓea, ye wá wɔ̃́ gbùò gbɛɛ ká. À líé nyɛpìàa óò lo pɛ lɛ́ waà yà mɔ́ à sɛ́nɛ́ ɓoò káa sɔ̀lɔ̀ ɓoò.

¹⁶Ḿm̀ lo à gèeè zeĩ́. Yékɛ̀ mi nɔ́ɔ fé é m gɛ̃̀ bè-mì ká. Kɛ káà m gɛ̃̀á kília, kà ka kɔ̀ yà m wì zi lɛ́ kà ka kɔ̀ yàá bè-mì wìa ká, kɛɛ ma bɛ̃̀ɛ̃ ḿ lé-gbùò-là ɓéĩ́ yee kɛ.

¹⁷Wɔ̃́ m̀ gèe dɛɛ káa, ye wá wɔ̃́ lɛ́ ko Dàa-mì à nàà ḿ gèea ká. Lé-gbùò-là kɛɛ̀ yé m̀ wɔ̃̀ gèe e kéa, ḿm̀ gèe kpó-kpó ɓo lɛ̀ bè-mì lɛ́ è wèè.

¹⁸Kɛɛ lɛ̀ lɛ́ mia búnùzɛ̀ ò lé-gbùò-là kɛ̀ kpóṹ là zèe mɔ́ɔ̀ wɔ̃̀ mɔ̀ɔ, ḿm̀ lo wɔ̃́ nɔ́ doóa kɛɛ̀.

¹⁹Ka dìè-tĩ́ ka dóo gí kã́ã̀a zɛ̀, tó káà ka zò kũ̀ ka gé mia bè zɛ̀ zì kɛ-wɔ̃̀ mɔ́ɔ̀ wɔ̃̀ mɔ̀ géli ká.

²⁰Mia lɛ́ ò ka lùò-là kɛ̀ ɓo, ɛ̃́ɛ̃́ lɛ́ ò pɛ ɓèlè ka bà, e bɛ̀i, lɛ́ ò pɛ́lɛ́ yà ka gɛ̀nɛ̀, ɛ̃́ɛ̃́ lɛ́ ò o dìè si gbùò ka là, e bɛ̀i lɛ́ ò ka mɛ̀ ka wɛlɛ yía, káà ka zò kũ tã́ã̀ o zì kɛ-wɔ̃̀ mɔ́ɔ̀ wɔ̃̀ mɔ̀.

²¹Yɛ́lɛ̀ lɛ́ɛ̀ m kɛ̀ kɛ ḿ gèe kélɛ̀ ko yí lɛ̀ɛ́ gbaa kɛ gágà wɔ̃́ nì sùua kɛɛ̀ mɔ̀. Kɛɛ yé mi dò zò aà kɛ gágà kɛ é lé-gbùò-là kɛ wɔ̃́ dò wɛ̃́ĩ̀a — wéé m̀ ɓoa, lɛ nɔ́ lɛ̀ bè-mì lɛ́ è wèè — m zò lɛ́ɛ̀ lo kɛɛ̀ gágà nɔ́ kíli.

²²O Hííbúlù-mìà ká? Ma bɛ̃̀ɛ̃ m à ká nɔ́ kíli. O Éézɛ̀lɛ̀-mìà ká? Ma bɛ̃̀ɛ̃ m nɔ́ à ká kíli. O Éɓɔ́lɔ́hã́ã̀ sùu là mìà ká? Ma bɛ̃̀ɛ̃ m à ká nɔ́ kíli.

²³O Kɛ́lɛ̀ì là yɛɓo-kɛ-mìà ká? M wéè lɛ kélɛ̀ mi yí gíniìa zɛ̀ wéè lɛ́ ɓe. Kɛɛ m yɛɓo-kɛ-mì kpeĩ ká, é diá o là. Maà yɛɓo kɛ dóo gágà, ɛ̃́ɛ̃́ waà m dùò bĩ́-kɛ̀ì lúó búnù-búnùzɛ̀ píé. Waà m mɛ̀ do yí gágà zɛ̀, ɛ̃́ɛ̃́ maà ɓɔ do ga sɔ́nɔ́ kɔ̀ɛ́ lúó búnù-búnùzɛ̀ ká. Wɔ̃́ nì o kéa séĩ́ kɛɛ̀ yía, maà kɛ maà diá o là.

²⁴Kpolà sɔ́ɔ́li zɛ̀ɛ, Zúù-mìà waà mɛ̀ ɓo vũ̀ yààka wɛ́lɛ́ sɛ́lɛ́ìsɛ ɓo do m mɔ̀.

²⁵Wólómà-mìà waà m mɛ̀ do yílí fèfé ká kpolà yààka zɛ̀. Lúó doó káa, mia dò o m pá gɛ̀lɛ̀ ká. Gɔɔ aà sìè do m ká kpolà yààka zɛ̀. Lúó doó káa, m kɛ yíí bà lɛ̀-kpɛ̀iì doó wà bĩ́míà doó píé.

²⁶Maà táá búnùzɛ̀ ɓo do. Aà tó do péĩ́ kɛ ḿ tó yíí bà. Kã̀ã-mìà, wà m ɓɛ́ĩ̀ Zúù-mìà, e bɛ̀i sɛ́lɛ́ gbɛɛ yí-mìà o kɛ à naapìà ó wɔ̃́ yɔɔ kɛ m ká. M ɓúó gaà pɛ́lɛ gbùò gbùò dò yí, e bɛ̀i yɛ̀í là, ɛ̃́ɛ̃́ mɛ̀ĩ́ là píé. Mia lɛ́ o kɛ à gèepìà o ɓɛ́ɛ lɛ́ m káa, o kɛ à naapìà ó wɔ̃́ yɔɔ kɛ m ká.

²⁷Maà yɛɓo gágà kɛ. Maà wɔ̃́ nyɔ́ɔ̀ɔ gɛ̃̀. Aà kɛ lúó búnùzɛ̀ ká, m̀ḿ yi zɛ. Lɔ̀ɔ wà yíí-mi-lɔ̀ waà m kɛ. Lúó gbṹũ̀ káa, léɓèlè e nyɛ m kɛ̀lɛ̀, e bɛ̀i, nɛ́nɛ́ e kɛ m kɛpìà, ɛ̃́ɛ̃́ sɔ lɛ̀ɛ́ gbaa kɛ m kɛ̀lɛ̀.

²⁸É kã́ wɔ̃́ yé e tóa séĩ́ mɔ̀ɔ, Wálà-mìà lɛ́ o lɛ̀ séĩ́ mɔ̀ɔ, o zũ̀ lɛ m là nyɔ́ɔ̀ɔ lúó séĩ́ ká.

²⁹Yé mi dò yí aà gaa, kɛɛ ma bɛ̃̀ɛ̃ m yí aà ga nɔ́ kíli. Yé waà kɛ mi dò aà pèlèa, kɛɛ waà m zò gèlè-m-gé-wɔ̃̀ kɛ.

³⁰Yé lɛ m mɔ̀ ḿ lé-gbùò-là kɛɛ, pɛ lɛ́ è m zì kɛ̀ yɔ̃́ṹ-yɔ̃̀ũ̀ là dà wáà-làa, lɛ́ m̀ lo lé-gbùò-là kɛɛ̀ à làa.

³¹Wálà lɛ́ e ko Dàa-mì Zízɛ̀ Dàa ká, lɛ́ mia ò lo à tɔ́ ɓɔɔ̀ wɔ́lɔ́-wɔ́lɔ́ káa, láà yí dɔ kélɛ̀ ma wá nɛ̀ kɛpìà.

³²Lɛ̀ m kɛ Dùmásà-pɛlɛía, gɔ̃ lɛ́ e kɛ sɛ́lɛ́ e kília líé sípìà sɛ́lɛ́ líé-sí-mì lɛ́ ò si Àlítàa wìa, e nyìɛ-kɛ̀-gàlà-lé-mɔ̀ mìà yà píé kɛ ó m kṹ.

³³Kɛɛ o m yà támé-kɔ̃̀ɛ̃̀ gbùò dò yí, o m yɔ̀ɔ́ ɓɛ̀lɛ̀ ká gàlà e kília bũ ká. M wàà zí e kéa ká à mɔ̀ gbaa.