Read Yamano 2 Kɔ̀léĩ́tĩ̀ã̀ 2 Bible Online

2 Kɔ̀léĩ́tĩ̀ã̀ 2 - Yamano bible

2 Kɔ̀léĩ́tĩ̀ã̀ 2

¹À mɔ́ɔ̀ wɔ̃̀ mɔ̀ɔ, ma yà gbaa m gé yékɛ̀ ḿ nu ka píé yi, yékɛ̀ yà-yéĩ̀zɛ̀ é kɛ ka mɔ̀.

²Ƃii yé maà kɛ kaà yà yéĩ̀zɛ̀ɛ, dé è lo à kɛɛ̀ kɛ m gé é li? Mia nɔ́ m o kɛ lɛ́ o yà yéĩ̀zɛ̀ɛ lɛ́ nɔ́ ò lo m kɛɛ̀ géli zɛ̀ɛ.

³Pɛ́ a kɛ lɛ́ m kíí e yía bɛ̃̀ɛ̃ ka píéa lɛ́ ɓɛ. M̀ḿ gbaa naa kɛ ḿ nu ka píé kɛ mia lɛ́ lɛ o mɔ̀ ó m kɛ géli zɛ̀ɛ, ó m kɛ yà yéĩ̀ yí mì ká. Ƃii ḿm̀ à yí dɔ kpó-kpó ɓo kélɛ̀ yé maà kɛ géli zɛ̀ɛ, kɛɛ ka séĩ́-séĩ́ kaà kɛ géli-mìà ká nɔ́ kíli.

⁴Lɛ̀ m kiia bɛ̃̀ɛ̃ ka píéa, m zò e wàa ɓèlè m gé, ɛ̃́ɛ̃́ zò-dà-zízàá e kɛ m mɔ̀ nyɔ́ɔ̀ɔ. M kíía bɛ̃̀ɛ̃ m nyìɛ-yíí bà. M̀ḿ gbaa kɛ kíli kɛɛ ká yà yéĩ̀zɛ̀. Kɛɛ ma kɛ kíli kɛɛ ká zi lɛ́ ka séĩ́ ka lɔ̀ kpɔ́ɔ̀ lɛ à ká m mɔ̀ kpó-kpó ɓoa dɔ.

⁵Kɛɛ yé mi aà mi dò kɛ aà yà yéĩ̀zɛ̀ɛ, kɛɛ lɛ̀ɛ́ gbaa kɛ m mɔ̀. Kɛɛ ka lɛ́ a kɛ ka mɔ̀ɔ. Kɛɛ lɛ̀ɛ́ gbaa à kɛ ka séĩ́ ka mɔ̀. Ma gèe kíli ɓii m̀ḿ naa ḿ à kṹ gágà wɔ̃́ e kília wɛ̃́ĩ̀.

⁶Wàa sùu e ké lɛ́ ka kù gbɔ́ù zɛ̀ aà kɛ lɛ́ mí e kéa aà ɓèlèa, à bɛ̀iì lɛ gbaa à mɔ̀.

⁷À mɔ́ɔ̀ wɔ̃̀ mɔ̀ɔ, lɛ sɛ̀ ká die à zì kɛ-wɔ̃̀ yɔɔ lɛ́ a kɛɛ là. Ɛ́ɛ̃́ kà à kɛ à zò é yà à gé, yékɛ̀ zò-dà-zízàá wɔ̃̀ búnùzɛ̀ é ló à ká.

⁸À mɔ́ɔ̀ wɔ̃̀ mɔ̀ɔ, kà kpé lɛ sɛ̀, kà à kɛ á yí dɔ kélɛ̀ à lɔ̀ kpɔ́ɔ̀ lɛ ka mɔ̀ kpó-kpó ɓo.

⁹Pɛ́ a kɛ lɛ́ m kíí e yía bɛ̃̀ɛ̃, gɛ̃̀ e ké. Ma naa ḿ ka yí dã́, kɛ é kɛ̀á káà nàà ká m wè kɛ zi séĩ́ káa, kɛ ḿ à yí dɔ.

¹⁰Yé kaà die mi dò zì kɛ-wɔ̃̀ yɔɔ lɛ́ aà kɛɛ làa, kɛɛ ma bɛ̃̀ɛ̃ maà die nɔ́ à là kíli. Yé maà die wɔ̃́ dò là, é kɛ̀á wɔ̃́ lɛ yí kɛ ḿ die à là bɛ̃̀ɛ̃, ḿm̀ à kɛ̀ kíli ka mɔ́ɔ̀ wɔ̃̀ mɔ̀ Kɛ́lɛ̀ì nyìɛ mɔ̀ zàá,

¹¹kɛɛ yékɛ̀ Sétɔ̃̀ kɔ̀ é die ko là. Ƃii kóò à zì kɛ-gbã́ã̀ dɔ.

¹²Lɛ̀ m ɓɔ Tólóyà-pɛlɛí kɛ ḿ wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ gèea, m ló kɛɛ ko Dàa-mì aà zi lé ɓo m lɛ̀ɛ yɛɓoa mɔ́ɔ̀ wɔ̃̀ mɔ̀.

¹³Kɛɛ m zò yàà lɛ̀ɛ́ gbaa kɛá m gé. Ƃii m̀ḿ gbaa m lèe-gé Tátɔ̀ gɛ̃̀ yi. À mɔ́ɔ̀ wɔ̃̀ mɔ̀ɔ, ma mɔ́ɔ̀ m wè dà ɓo míá o kɛ yía lɛ̀ɛ, máà lò gbaa Masèdónà.

¹⁴Kɛɛ kɔ̀à Wálà zúo ɓo. Mia lɛ́ kò Kɛ́lɛ̀ì nì ko doóa, ko ɓɛ̀lɛ̀ yi kɔ́áà tò Kɛ́lɛ̀ì píé à zì kɔ̀-dìè-kɔ̀-là gbũ yí, tó Wálà áà líé sì ko ká teele. Wálà lɛ́ɛ̀ yɛɓo kɛ̀ ko ká, tó áà kɛ̀ wɔ̃́ yí-dɔ-kɔ̀ lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, áà wɛ̃̀ĩ̀ lɛ̀ séĩ́ mɔ̀, lɛ̀ pɛ gĩĩ yiè zɛ̀ lɛ́ à gĩĩ è wɛ̃̀ĩa lɛ́ ɓe.

¹⁵Ko lɛ̀ pɛ gĩĩ yiè zɛ̀ lɛ́ Kɛ́lɛ̀ì è à gèlè Wálà lɛ̀ɛ lɛ́ ɓe. À gĩĩ lɛ́ɛ̀ wɛ̃̀ĩ mia lɛ́ o lapìà, ɛ̃́ɛ̃́ o yé o gínipìàa o fĩ̀ã̀.

¹⁶À gĩĩ lɛ mia lɛ́ o gínipìàa lɛ̀ɛ kélɛ̀ mi bílí gĩĩ lɛ́ ɓe. Ɛ́ɛ̃́ lɛ́ɛ̀ nu ga ká mia mɔ̀. Kɛɛ lɛ mia lɛ́ o lapìàa lɛ̀ɛ pɛ gĩĩ yiè zɛ̀ ká. Tó áà nù kɛ̀ɓe ká o lɛ̀ɛ. Deĩ̀ lɛ́ bɛ̀i lɛ à mɔ̀ wɔ̃́ nìa wɛ̃́ĩ̀?

¹⁷Ko wá kélɛ̀ mia búnùzɛ̀ yé ò yɛɓo kɛ̀ Wálà là wééa ká lɛ̀ mi lɛ́ è lɔ́ɔ́ dɔɔ lɛ́ ɓe. Kɛɛ Wálà aà ko vɔ, ɛ̃́ɛ̃́ wéé lɛ́ kò à gèe à wɛlɛ mɔ̀ɔ, lɛ́ɛ̀ go dóo ko zò mɔ̀, lɛ̀ zí mia lɛ́ wà Kɛ́lɛ̀ì nì o doóa, ò wɔ̃́ gèe à káa lɛ́ ɓe.