Read Yamano 2 Kɔ̀léĩ́tĩ̀ã̀ 3 Bible Online

2 Kɔ̀léĩ́tĩ̀ã̀ 3 - Yamano bible

2 Kɔ̀léĩ́tĩ̀ã̀ 3

¹Káà yí dɔ wɔ̃́ kò gèea láà zɔ̃̀ɔ̃̀ kélɛ̀ ko ko dìè sípìà gbùò zeĩ́? Lɛ ko mɔ̀ kɛ kó nu kii lɛ́ è lo ko zɔ̃̀ɔ̃̀ ka lɛ̀ɛ ká ka píé, ɛ̃́ɛ̃́ lɛ ko mɔ̀ kó dò sí ka kɛ̀lɛ̀, lɛ̀ zí mia gbṹũ̀ ò kɛ̀áa lɛ́ ɓe?

²Ka dìè lɛ́ nɔ́ ka kii lɛ́ e ko kɛ̀lɛ̀ɛ káa. Ka bɛ̃̀ɛ̃ɛ̃̀ lɛ à ká ko zò píé, kɛ mia séĩ́-séĩ́ ó à dɔ wáà gèè.

³Lɛ dóo séŋé-sèŋè lɛ́ Kɛ́lɛ̀ì dìè-tĩ́ e kii e kéa bɛ̃̀ɛ̃, lɛ́ a dɔ̀ kɛ ko kɛ̀lɛ̀ kó nu à káa. À bɛ̃̀ɛ̃ɛ̃̀ wá pɛ-bɛ̃̀ɛ̃-pɛ̀ ká gɛ̀lɛ̀ pɛ̃́ɛ̃́ là, kɛɛ à bɛ̃̀ɛ̃ɛ̃̀ lɛ mia zò píé Wálà ɓéèea zì Gɛ̀ɛ̀ ká.

⁴Kóò wɔ̃́ e kéa gèe kíli, ɓii ko zò dɔɔ̀ lɛ Wálà mɔ̀ Kɛ́lɛ̀ì tɔ́ yí zàá.

⁵Yíkɛ̀ gáàa wá ko kɛ̀lɛ̀ kɛɛ kó wɔ̃́ e kéa kɛ. Kòó bɛ̀i à mɔ̀ kó gèe pɛ dò lɛ ko yí wɔ̃́ e kéa kɛɛ̀ mɔ́ɔ̀ wɔ̃̀ mɔ̀. Yíkɛ̀ gáàa nì lɛ́ lɛ ko mɔ̀ kɛ kó wɔ̃́ nì e kéa kɛ à káa lɛ́ɛ̀ go Wálà kɛ̀lɛ̀.

⁶À ye lɛ́ e ko kɛ lɛ́ kò bɛ̀i à mɔ̀ kɛ kó yɛɓo kɛ wè-dɔ-wè dɛɛ mɔ́ɔ̀ wɔ̃̀ mɔ̀ɔ. Wè-dɔ-wè dɛɛ e kília, ye wá lɔ́ɔ̀ yé à bɛ̃̀ɛ̃ɛ̃̀ lɛɛ ká. Kɛɛ Gɛ̀ɛ̀ Púlú lɛ́ e wè-dɔ-wè e kília káa. Lɔ́ɔ̀ yé à bɛ̃̀ɛ̃ɛ̃̀ lɛɛ, lɛ́ɛ̀ nu ga ká. Kɛɛ Gɛ̀ɛ̀ Púlú lɛ́ɛ̀ kɛ̀ɓe nɔ mia lɛ̀ɛ.

⁷Lɔ́ɔ̀ɔ bɛ̃̀ɛ̃ɛ̃̀ e kɛá gɛ̀lɛ̀-pɛ̃́ɛ̃́ là fòoòo zɛ̀ là. Lɛ̀ lɛ́ míáa o Lɔ́ɔ̀ɔ sɔ̀lɔ̀ ɓoa, Wálà zì lɛ̀-fɔ̀nɔ-kɔ̀ e ɓíé gbaa o là. Yé bɛ̃̀ɛ̃ lɛ̀-fɔ̀nɔ-kɔ̀ sùua à bĩ́ lɛ́ e kɛ Móózè wɛlɛ yía, e kɛ kɛpìà ɓɛ́í-ɓɛ̀ìa, à yí e kɛ tĩã́ gágà, tó áà kɛ̀ tó Éézɛ̀lɛ̀-mìà òó o nyìɛ gbɛ̃̀ à wɛlɛ yí. Yé Lɔ́ɔ̀ yé à zì kɛ-wɔ̃̀ lɛ nù ga ká káa aà nu lɛ̀-fɔ̀nɔ-kɔ̀ sùua yía,

⁸kɛɛ lɛ̀-fɔ̀nɔ-kɔ̀ lɛ́ è lo nuù Gɛ̀ɛ̀ Púlú zì kɛ-wɔ̃̀ kɛɛ̀ kolo là zàáa, zi sùu kpɛɛ̀ lɛ́ è lo kɛɛ̀á kpànazɛ̀ ké?

⁹Lɔ́ɔ̀ɔ zì kɛ-wɔ̃̀ yé è mɛ̀ĩ́-sà kàà mia wĩĩ́ kília, wà lɛ̀-fɔ̀nɔ-kɔ̀ o kɛ o kíe là. Lɛ̀ lɛ́ lɛ kília, zi sùu kpɛɛ̀ lɛ́ wɔ̃́ yé è mɛ̀ĩ́-sà ɓo mi wũ mɔ̀ɔ, à zì lɛ̀-fɔ̀nɔ-kɔ̀ è lo kɛɛ̀ à ká kpànazɛ̀ ké?

¹⁰Kóò bɛ̀i à mɔ̀ kó gèe gbaa kélɛ̀ lɛ̀-fɔ̀nɔ-kɔ̀ yé e kɛ kpó-kpó ɓo fɔ̀nɔpìà bèĩzɛ̀ɛ, aà kɛ túɛ́-tùɛ̀. Ƃii lɛ̀-fɔ̀nɔ-kɔ̀ yé lɛ dɛɛ ká ɓea, à zì fɔ̀nɔ-kɔ̀ɔ lɛ dóo kpó-kpó ɓo kpànazɛ̀.

¹¹Yé pɛ yé è lo kɛɛ̀ ɓe lúó zààle píéa, zì lɛ̀-fɔ̀nɔ-kɔ̀ aà kɛ kéa, kɛɛ pɛ yé è lo kɛɛ̀ ɓe tòá kíli káa, zi sùu kpɛɛ̀ lɛ́ à zì lɛ̀-fɔ̀nɔ-kɔ̀ lɛ à ká mɔṹ kpànazɛ̀ ké?

¹²Pɛ́ à kɛ̀ lɛ́ kòó túó wɔ̃́ gèeè yía lɛ́ e kélɛ̀, ko zò lɛ wɔ̃́ e kília mɔ̀.

¹³Ko wá kélɛ̀ Móózè lɛ́ e e wɛlɛ bĩ̀ĩ̀ sɔ ká yékɛ̀ Éézɛ̀lɛ̀-mìà ó lɛ̀-fɔ̀nɔ-kɔ̀ lɛ́ e kɛ à wɛlɛ yí lɛ́ e kɛ kɛpìà ɓɛ́í-ɓɛ̀ìa, nyɛpìà gɛ̃̀ɛ lɛ́ ɓe.

¹⁴Kɛɛ o wũ-kèlè yí e kɛ yɔɔ. É tó kíli é ɓɔá pɛ́nɛɛ mɔ̀ɔ, lɛ lɛ̀ pɛ lɛ́ sɔ nɔ́ doóa bɔ́nɔ̀ lɛ o zì wɔ̃́ yí-ma-kɔ̀ ká, yé waà kɛ kii lɛ́ à gbɛ̃̀ɛ̃̀ lɛ wè-dɔ-wè ziia mɔ̀ɔ gèepìàa ká. Lɛ à mɔ̀ Kɛ́lɛ̀ì wà mi ó kɛ doó, kɛɛ sɔ́ e kília é tĩã́ ɓoò yi.

¹⁵É kɛ bɛ̃̀ɛ̃ pɛ́nɛɛ káa, yé waà kɛ Móózè là Lɔ́ɔ̀ɔ gèepìàa, sɔ bɔ́nɔ̀ lɛ tĩã́ o zì wɔ̃́ yí-ma-kɔ̀ ká.

¹⁶Kɛɛ yé mi aà nìɛ̀ ko Dàa-mì píéa, sɔ́ e kília lɛ́ɛ̀ ɓo à zì wɔ̃́ yí-ma-kɔ̀ là.

¹⁷Ko Dàa-mì e kília lɛ́ e Gɛ̀ɛ̀ Púlú káa. Ɛ́ɛ̃́ lɛ̀ lɛ́ ko Dàa-mì zì Gɛ̀ɛ̀ e kília lɛ yía, tò-dìè-là lɛ yí.

¹⁸Pɛ gbɛɛ wá gbaa ko wɛlɛ yí kɛɛ é ko wɛlɛ bĩ̀ĩ̀. Ko séĩ́-séĩ́ kóò ko Dàa-mì zì lɛ̀-fɔ̀nɔ-kɔ̀ɔ bĩ́ zɔ̃̀ɔ̃̀. Lɛ̀-fɔ̀nɔ-kɔ̀ nɔ́ doó e kíli lɛ́ è go ko Dàa-mì lɛ́ e Gɛ̀ɛ̀ Púlú káa kɛ̀lɛ̀ɛ, lɛ́ɛ̀ ko mɛ́ vɔ̀ɔ, tó kɔ́áà ɓɔ̀ à bà. Ɛ́ɛ̃́ lɛ̀-fɔ̀nɔ-kɔ̀ e kília là lɛ kpɔ́pìà teele.