Read Yamano 2 Kɔ̀léĩ́tĩ̀ã̀ 6 Bible Online

2 Kɔ̀léĩ́tĩ̀ã̀ 6 - Yamano bible

2 Kɔ̀léĩ́tĩ̀ã̀ 6

¹Mia lɛ́ kò Wálà nì ko yɛɓo kɛ̀ɛ, kóò kpé kã ka lɛ̀ɛ. Kaà Wálà zì zò-kɛ̀-sɛ̀ɛ sɔ̀lɔ̀ ɓo. Yékɛ̀ ká kɛ é kɛ pɛ yí sìeèe zɛ̀ ká.

²Wɔ̃́ lɛ́ Wálà à gèea, gɛ̃̀ e ké. “M ka wéè ma lúó lɛ́ máá yɛɓo kɛɛ̀á ka lɛ̀ɛ ɓɔ̀ɔ ká. M gbũ ka mɔ̀ kà la-ɓo sɔ̀lɔ̀-ɓo-lùò ká.” Kà ka tóó dɔ. Lúó lɛ́ káá Wálà là yɛɓo ɓɔ̀ɔ kɛ̀ mia lɛ̀ɛ sɔ̀lɔ̀ ɓoò à káa, gɛ̃̀ e ké. Pɛ́nɛɛ lɛ́ e la-ɓo sɔ̀lɔ̀-ɓo-lùò káa.

³Kóò à kɛ-zì nàà yékɛ̀ kó pɛ kpɔ́ mi dò gɛ̀nɛ̀ é pèlè, yékɛ̀ mi nɔ́ɔ fé é kò yɛɓoa vɛ̀ì zɛ.

⁴Kɛɛ wɔ̃́ nɔ́ɔ fé lɛ́ kò kɛ̀ɛ, kóò à zɔ̃̀ɔ̃̀ kélɛ̀ ko Wálà là yɛɓo-kɛ-mìà ká. Kóò wɔ̃́ nyɔ́ɔ̀ɔ gɛ̃̀, tó ko sã̀ áà dɔ̀, e bɛ̀i wɔ̃́ kɛɛ̀ gágà zɛ̀ áà ɓɔ̀ ko là, tó ko fã̀ã́-wàà lɛ kpó-kpó ɓo yé kɔaà o gɛ̃̀ɛ ká.

⁵O ko mɛ̀ wáà ko dùò kɛ́ì, ɛ̃́ɛ̃́ wáà tɛ̀lɛ̀ ko wũ mɔ̀. Yɛɓo nɔ́ e ko lìi káa, lɛ́ nɔ́ ko kɛ à kɛpìàa. Lúó gbú káa, kòó kɛ yi zɛpìà, ɛ̃́ɛ̃́ kòó kɛ pɛ ɓèlèpìà.

⁶Kóò ko kɛ̀ Wálà là yɛɓo-kɛ-mìà ká zɔ̃̀ɔ̃̀ ko zì kɛ̀-púlú, ɛ̃́ɛ̃́ ko zì wɔ̃́ yí-dɔ-kɔ̀, e bɛ̀i ko zì zò-kũ̀-tã́ã̀ wà ko sɔ̃̀ɔ̃ kɛ̀ mia ká sɛ̀ kolo là zàá. Kóò à zɔ̃̀ɔ̃̀ zeĩ́ Gɛ̀ɛ̀ Púlú, ɛ̃́ɛ̃́ mia lɔ̀-kpɔ̀-ko-mɔ̀ lɛ́ è go ko zò píé,

⁷ɛ̃́ɛ̃́ ko zì wɔ̃́ làṹ wánà zɛ̀, e bɛ̀i Wálà zì yíkɛ̀ gáàa kolo là zàá. Kɛ̀-kpeĩ-kɔ̀ɔ lɛ ko kɔ̀ pèèlɛ là ko zì gèlè-gɔ̃-pɔ̀ɔ̀ ká.

⁸Óò ko ɓɛ̀lɛ yà, tó wáà yɛ́lɛ̀ kpɔ̀ ko là. Óò lé kã́ kɛ̀ ko mɔ̀, tó wáà ko tɔ́ lì. Óò ko gɛ̃̀ mia bèkɛ̀-ɓo-mìà ká. Kɛɛ kóò wánà-wɔ̃̀ gèe.

⁹Óò ko kɛ̀ lɛ̀ pɛ lɛ́ mia òó ko dɔ. Kɛɛ mia séĩ́ óò ko dɔ mɔṹ. Óò ko kɛ̀ lɛ̀ pɛ lɛ́ ko gaà lɛ. Kɛɛ ko gɛ̃̀ ko ké. Ko tĩã́ ɓéèe. Óò ko sã̀ dɔ. Kɛɛ òó ko zɛ.

¹⁰Yé bɛ̃̀ɛ̃ ko kɛɛ̀ lɛ yéĩ̀zɛ̀ɛ, ko gé liì lɛ teele. Óò ko gɛ̃̀ mia lɛ́ pɛ wá o kɛ̀lɛ̀ɛ ká. Kɛɛ kóò mia búnù-búnùzɛ̀ kɛ̀ kpànazɛ̀. Ko lɛ̀ pɛ lɛ́ pɛ wá ko kɛ̀lɛ̀, kɛɛ pɛ séĩ́ kɛɛ̀ lɛ kò pɛ ká.

¹¹Mia lɛ́ ka Kɔ́lèĩ̀ ɓɛ, kɔaà wɔ̃́ séĩ́ gèe ka lɛ̀ɛ gbaa e yí púlú zɛ̀ ká. Kɔaà ko zò lé ɓo ka lɛ̀ɛ gbáà le.

¹²Kòó gbaa ko zò lé taa ka lɛ̀ɛ. Kɛɛ ka lɛ́ ka zò lé taà lɛ ko lɛ̀ɛ.

¹³Ḿm̀ wɔ̃́ e kéa gèe lɛ̀ pɛ lɛ́ ka m̀ nɔ́ɔ̀ ká. Wɔ̃́ lɛ́ kɔa kɛ ka lɛ̀ɛ, ka bɛ̃̀ɛ̃ kà à kɛ ko lɛ̀ɛ gbaa. Kà ka zò lé ɓo gbáà le.

¹⁴Yékɛ̀ kà mi lɛ́ à zò dɔɔ̀ wá Wálà mɔ̀ɔ nì ká kɛ à yí doó. Zi sùu kpɛɛ̀ lɛ́ wɔ̃́ kpeĩ wà wɔ̃́ lɛ́ ye wá kpeĩa ò bɛ̀i à mɔ̀ ó tàà-kíe-píé kɛ à ká? Zi sùu kpɛɛ̀ lɛ́ lɛ̀ púlú wà bĩ́ tii ò bɛ̀i à mɔ̀ ó kɛá o kíe là?

¹⁵Zi sùu kpɛɛ̀ lɛ́ Kɛ́lɛ̀ì wà Dɛ́ɓò ò bɛ̀i à mɔ̀ o wè é ló à ká e kíe píé? Mɛ́ mi lɛ́ à zò dɔɔ̀ lɛ Wálà mɔ̀ɔ, wà mi lɛ́ à zò dɔɔ̀ wá Wálà mɔ̀ɔ, ò bɛ̀i à mɔ̀ ó dɔ à yí?

¹⁶Wè-dɔ-wè kpɛɛ̀ lɛ́ è bɛ̀i à mɔ̀ é kɛ Wálà-kà wà kɛ̀ɛ̀-wɛ́lɛ́ o fĩ̀ã̀? Ƃii ko Wálà ɓéèa zì ká ká. Wɔ̃́ Wálà a gèea, gɛ̃̀ e ké. “Ḿm̀ lo m yàlà kṹũ̀ m̀ mia nì yí, ɛ̃́ɛ̃́ ḿm̀ lo kɛɛ̀ o bà. Ḿm̀ lo kɛɛ̀ wà Wálà ká. O bɛ̃̀ɛ̃ óò lo kɛɛ̀ m̀ mia nì ká.”

¹⁷À mɔ́ɔ̀ wɔ̃̀ mɔ̀ɔ, ko Dàa-mì láà gèe kélɛ̀, “Lɛ ka mɔ̀ ká gó o lɛ̀ɛ, ɛ̃́ɛ̃́ ká ka yí ɓo o mɔ̀. Yékɛ̀ ká ka kɔ̀ pá pɛ nɔ́ɔ fé lɛ́ à mɛ́ lilì kṹũ̀ lɛɛ mɔ̀. Ɛ́ɛ̃́ ḿm̀ lo m kɔ̀ yàà ka wì.

¹⁸Ḿm̀ lo kɛɛ̀ ka dàa ká. Ka bɛ̃̀ɛ̃ káà lo kɛɛ̀ m gbe wà m lú nì ká. Wɔ̃́ lɛ́ ko Dàa-mì lɛ́ yíkɛ̀ gáàa séĩ́ laa kɛ̀lɛ̀ɛ à gèea, lɛ́ ɓɛ.”