Read Yamano 2 Kɔ̀léĩ́tĩ̀ã̀ 9 Bible Online

2 Kɔ̀léĩ́tĩ̀ã̀ 9 - Yamano bible

2 Kɔ̀léĩ́tĩ̀ã̀ 9

¹Ye wá bɛ̃̀ɛ̃ m mɔ̀ kɛɛ ḿ kii bɛ̃̀ɛ̃ ka píé nɔ̀-lɛ̀ɛ-pɛ̀ lɛ́ mia o à vɔpìà Wálà-mìà píéa mɔ́ɔ̀ wɔ̃̀ mɔ̀.

²Mm̀ à yí dɔ kélɛ̀ ka wéè lɛ à mɔ̀ kɛ ká gbũ o mɔ̀. Maà lé-gbùò-là kɛ mia lɛ́ o Masèdónàa o là ka mɔ́ɔ̀ wɔ̃̀ mɔ̀. Ma gèe o lɛ̀ɛ kélɛ̀ mia lɛ́ ka Àkéyàa, kaà ka dìè pɛ̀ kɛ kɛ̀ɛ̀ e diea yí kɛ ká gbũ o mɔ̀. Ɛ́ɛ̃́ ka zì fã̀ã́-wàà kɛɛ̀ kolo là zàáa, kaà tíé kpaa à ká o búnùzɛ̀ là.

³Dɛɛ káa, m ko lèe-gé vɔ̀ o kéa vɔpìà gbaa ka píé, kɛɛ ko zì lé-gbùò-là lɛ́ kɔa kɛ wɔ̃́ e kéa yía, yékɛ̀ é kɛ wɔ̃́ ɓɔ̀ɔ ká kɛ kó à gèe. Kɛɛ ka dìè pɛ̀ kɛɛ̀ lɛ́ɛ̀ lo kɛɛ̀ à ká, lɛ̀ zí nɔ́ ma gèe à káa lɛ́ ɓe.

⁴Yé ye wá kíli lɛ́ kò mia lɛ́ ò go Masèdónàa kò ye nì kɔaà nu, lɛ́ kɔaà ka gɛ̃̀ lɛ́ ka pɛ̀ kɛɛ̀ wáa, yɛ́lɛ̀ lɛ́ɛ̀ lo kpɔ́ɔ̀ ko là ko zì zò-kɛ̀-ka-mɔ̀ kolo là zàá. Ɛ́ɛ̃́ yɛ́lɛ̀ lɛ́ɛ̀ lo ka bɛ̃̀ɛ̃ ka kɛɛ̀ nɔ́ kíli.

⁵À mɔ́ɔ̀ wɔ̃̀ mɔ̀ɔ, ma yà m gé kélɛ̀ lɛ dóo wánà zɛ̀ kɛɛ ḿ wɔ̃́ gèe ko lèe-gé vɔ̀ o kéa lɛ̀ɛ kɛɛ ó dɔ líé m mɔ̀ ó nu ka píé, kɛ ká nɔ̀-lɛ̀ɛ-pɛ̀ lɛ́ kaà ka wè dɔ ká nɔɔ, kɛɛ ká à pɛ̀ kɛ líé. Yé aà kɛ kília, à pɛ̀ kɛɛ̀ lɛ́ɛ̀ lo kɛɛ̀ à ká yé maà nua ká. Ɛ́ɛ̃́ lɛ́ɛ̀ lo kɛɛ̀ nɔ̀-lɛ̀ɛ-pɛ̀ lɛ́ ka zò e wéé à mɔ̀ kɛ ká tĩã́ à nɔɔ̀ɔ ká. Kɛɛ lɛ̀ɛ́ ló kɛɛ̀ nɔ̀-lɛ̀ɛ-pɛ̀ yé à zì nɔɔ̀ɔ lɛ̀ɛ́ gó ka zò píéa ká.

⁶Kà wɔ̃́ e kéa kpɔ́ ka yɛ́lɛ́ píé. Mi lɛ́ è pɛ-wɛ́lɛ́ ɓéĩ́ tààa, lɛ̀ɛ́ ló à ɓɛɛ ɓoò gbùò. Kɛɛ mi yé è à tàà gbùòa, lɛ́ɛ̀ lo à ɓɛɛ ɓoò gbùò.

⁷Zi lɛ́ mia ò yàá o gé píé doò do kɛ ó gba-ɓo kɛáa, à zi lɛ́ nɔ́ lɛ o mɔ̀ ó kɛ à káa. Á kɛá kília, yékɛ̀ á kɛ e zò-kpo ká. Ɛ́ɛ̃́ yékɛ̀ ó o kṹ gágà à nɔɔ̀ mɔ́ɔ̀ wɔ̃̀ mɔ̀. Ƃii mi lɛ́ è gba-ɓo kɛ̀ géli káa, à lɔ̀ kpɔ́ɔ̀ lɛ Wálà mɔ̀.

⁸Wálà lɛ́ɛ̀ bɛ̀i à mɔ̀ é pɛ séĩ́ nɔ ka lɛ̀ɛ gbùò, kɛɛ pɛ séĩ́ lɛ́ lɛ ka mɔ̀ ká sɔ̀lɔ̀ ɓo zi nɔ́ɔ fé káa, é kɛ ka kɛ̀lɛ̀ teele. Ɛ́ɛ̃́ kɛ pɛ é kɛ ka kɛ̀lɛ̀ gbùò, káà wɔ̃́ yiè kɛ̀á mia lɛ̀ɛ déĩ́ le.

⁹Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Lɛ̀ɛ́ kpàa pɛ nɔ̀ mia lɛ́ pɛ wá o kɛ̀lɛ̀ɛ lɛ̀ɛ pìà. À zì sɔ̃̀ɔ̃-kɛ̀-sɛ̀ɛ lɛ ɓe tòá kíli ká.”

¹⁰Ɛ́ɛ̃́ Wálà lɛ́ è pɛ wɛ́lɛ́ nɔ pɛ taa-mìà lɛ̀ɛ, ɛ̃́ɛ̃́ lɛ́ è belè nɔ mia lɛ̀ɛ wáà ɓèlèa, lɛ́ɛ̀ lo nɔ́ zeĩ́ pɛ wɛ́lɛ́ séĩ́ lɛ́ kà nàà à káa nɔɔ̀ ka lɛ̀ɛ, ɛ̃́ɛ̃́ lɛ́ɛ̀ lo à kɛɛ̀ à là e kpɔ́, tó pɛ lɛ́ ka zì sɔ̃̀ɔ̃-kɛ̀-sɛ̀ɛ a kɛɛ, tó a kɛ e kɛ kpànazɛ̀.

¹¹Ɛ́ɛ̃́ Wálà lɛ́ɛ̀ lo ka kɛɛ̀ tó káà kɛ̀ wɔ̃́ nɔ́ɔ séĩ́ kɛɛ̀ yí kpànazɛ̀, kɛɛ ka zì pɛ̀-nɔ̀-mia-lɛ̀ɛ yía, yékɛ̀ ká kpàa teele. Ɛ́ɛ̃́ mia búnùzɛ̀ óò lo Wálà zúo ɓoò ka zì nɔ̀-lɛ̀ɛ-pɛ̀ lɛ́ ò lo à gɛ̃̀ɛ̃̀ áà gò ko kɛ̀lɛ̀ɛ kolo là zàá.

¹²Ƃii gbũ̀-mɔ̀ lɛ́ kà nɔ mia lɛ̀ɛ lɛ́ɛ̀ à kɛ̀ tó Wálà là mia nì wáà pɛ lɛ́ lɛ o mɔ̀ ó sɔ̀lɔ̀ ɓoa sɔ̀lɔ̀ ɓò. Ye wá à doó ká. Kɛɛ láà kɛ̀ tó zúo ɓo lɛ́ Wálà à sɔ̀lɔ̀ ɓoa, áà kɛ̀ gbùò.

¹³Ka zì gbũ̀-mɔ̀ e kília lɛ wɔ̃́ gɔ̃̀á ká. À mɔ́ɔ̀ wɔ̃̀ mɔ̀ɔ, mia búnùzɛ̀ óò lo tɔ́-ɓɔ nɔɔ̀ Wálà lɛ̀ɛ zí kà Kɛ́lɛ̀ì wɔ̃̀ làṹ yiè lɛ́ kà wèè à mɔ̀ɔ wɔ̃̀ kũá tã́ã̀a kolo là zàá. Ɛ́ɛ̃́ óò lo zeĩ́ Wálà tɔ́ ɓɔɔ̀ zi lɛ́ ka pɛ nɔá o lɛ̀ɛ, ɛ̃́ɛ̃́ mia gbɛɛ lɛ̀ɛ, zò wɛ́lɛ́-wɛ̀lɛ̀-là káa kolo là zàá.

¹⁴Ɛ́ɛ̃́ yé waà kɛ sɛ̀nɛ ɓopìà ka mɔ́ɔ̀ wɔ̃̀ mɔ̀ɔ, o zò lɛ́ɛ̀ lo kɛɛ̀ ka píé Wálà zì zò-kɛ̀-sɛ̀ kpànazɛ̀ lɛ́ aà kɛ ka káa kolo là zàá.

¹⁵Kóò Wálà zúo ɓo à zì nɔ̀-lɛ̀ɛ-pɛ̀ kpàna-kpànazɛ̀ɛ mɔ́ɔ̀ wɔ̃̀ mɔ̀.