Read Yamano Gɛ̀lésìà 4 Bible Online

Gɛ̀lésìà 4 - Yamano bible

Gɛ̀lésìà 4

¹Wɔ̃́ m kɛ à gèepìàa, gɛ̃̀ e ké. Nɛ́ yé à dàa là pɔɔ̀ è lo tóò à kɛ̀lɛ̀ɛ, ye wá bɛ̃̀ɛ̃ fìa lùò mɔ̀, lɛ̀ lɛ tĩã́ nɛ́fú káa ká, yé bɛ̃̀ɛ̃ pɔɔ̀ séĩ́ lɛ là pɛ káa ká.

²Lɛ̀ lɛ tĩã́ nɛ́fú káa, mia o ɓe wáà o yɛ́lɛ́ kɛ̀ à mɔ̀, tó là pɔɔ̀ɔ lɛ mia kɔ̀ là é tóá kíli lúó lɛ́ à dàa aà à kpɔ́ à lɛ̀ɛ é ɓɔ.

³Zi nɔ́ doóa lɛ́ lɛ à ká ko káa. Kɛ kó tĩã́ kɛɛ̀ gɔ̃à ká ko dìè mɔ́ɔ̀ wɔ̃̀ mɔ̀ɔ, ko kɛ lùò ká pɛ vɔ̀ lɛ́ o kpóṹ là zèe líé sípìàa kɛ̀lɛ̀.

⁴Kɛɛ lɛ̀ lɛ́ à lúó kpó-kpó e ɓɔɔ, Wálà e e Gbe vɔ. Lee e à ye nɛ́ ká. E kɛ Zúù-mìà wà Lɔ́ɔ̀ɔ wì,

⁵kɛ é mia yé o kɛ Lɔ́ɔ̀ɔ wìa, é o ɓo wɔ̃́ yí, kɛ kó kɛ Wálà gbe nì ká.

⁶Ka kɛ̀ à gbe nì káa mɔ́ɔ̀ wɔ̃̀ mɔ̀ɔ, Wálà e e Gbe Gɛ̀ɛ̀ vɔ ko zò píé. Gɛ̀ɛ̀ e kília lɛ́ɛ̀ gbɛ̀ɛ̀ weeá kélɛ̀, “M Dàa, m Dàa.”

⁷Yé lɛ kília, ɓi wá gbaa lùò nɔ́ɔ fé dò ká. Kɛɛ i gbaa à gbe ká. Yé mɔṹ i à gbe káa, Wálà lɛ́ɛ̀ lo pɛ séĩ́ lɛ́ lɛ à kɛ̀lɛ̀ e gbe lɛ̀ɛ nɔɔ̀ i lɛ̀ɛ.

⁸Lúó lɛ́ aà diea píéa, kàá gbaa kɛ Wálà dɔpìà. À mɔ́ɔ̀ wɔ̃̀ mɔ̀ɔ, ka kɛ lùò ká pɔɔ̀ lɛ́ òó gbaa kɛ wálà vɔ̀ káa lɛ̀ɛ.

⁹Kɛɛ lɛ̀ kaà Wálà dɔ gbaa — ḿ pe, lɛ̀ Wálà aà ka dɔ gbaa — mɛ́ e kɛ mɔṹ lɛ́ kà nàà ká nìɛ̀ ka mɛ̀ĩ́ pɛ fĩ́ĩ́-nyɛ zɛ̀ ɛ̃́ɛ̃́ yéĩ̀zɛ̀ lɛ́ o kɛ ka líé sípìàa píé ɓɛ? Mɛ́ e kɛ lɛ́ kà nàà ká kɛ wà lùò ká zeĩ́ dɛɛ ɓo ɓɛ?

¹⁰Ka yɛ́lɛ́ kɛɛ̀ lɛ lúó dò, ɛ̃́ɛ̃́ mɛnɛ dò, e bɛ̀i lúó kpànazɛ̀ dò wà kɛ̀ɛ̀ dò píé.

¹¹Ḿm̀ tùò ka mɔ́ɔ̀ wɔ̃̀ mɔ̀, yékɛ̀ yɛɓo séĩ́ lɛ́ maà à kɛ ka lɛ̀ɛ, é kɛ wɔ̃́ dà tã́ã̀ zɛ̀ ká.

¹²M lèe-gé vɔ̀, kà kpé lɛ sɛ̀, kà kɛ lɛ̀ ma lɛ́ ɓe. Ƃii é kã́ sã̀ã ɓo mɔ̀ɔ, m kélɛ̀ ka lɛ́ ɓe. Kàá wɔ̃́ yɔɔ gbɛɛ kɛ nɛ́ m ká.

¹³Wɔ̃́ lɛ́ ma mɔ́ɔ̀ wɔ̃́ làṹ yièa gèe ɓo ka lɛ̀ɛ bèĩzɛ̀ɛ, káà dɔ. Ye lɛ́ e kélɛ̀, m kɛ kɔ̃́ṹ-kɔ̃̀ũ̀.

¹⁴Kɛɛ ka nyìɛ lɛ̀ɛ́ gbaa fɔ̃́ m yí, kɛ bɛ̃̀ɛ̃ ká ka wũ ɓo m wì, yé bɛ̃̀ɛ̃ zí m kɛá m gbĩ-kpàla yía e kɛ yí-dã́ gbùò ká ka lɛ̀ɛ ká. Kɛɛ ka ka kɔ̀ yà m wì, lɛ̀ zí lɛ́ káá ka kɔ̀ yàà à ká Wálà zì vɔ-mì wìa lɛ́ ɓe. Ka ka kɔ̀ yà m wì zi lɛ́ káá ka kɔ̀ yàá Kɛ́lɛ̀ì Zízɛ̀ wìa ká.

¹⁵Ka gé kpó-kpó liì e kɛá. Kɛɛ mɛ́ e kɛ gbaa? M dìè ḿm̀ bɛ̀i à mɔ̀ m kà kélá-wè ɓo. È kɛ̀á bɛ̀i e kɛ ka mɔ̀ɔ, káá ka nyìɛ ɓoò e kèlè yí, káà nɔ̀ m lɛ̀ɛ.

¹⁶Maà kɛ gbaa ka dàa-gbe ká wánà-wɔ̃̀ gèè ka lɛ̀ɛ kolo là?

¹⁷Mia yé o tóa, óò ka kũ sɛ̀, kɛɛ o gé lɛ gbèkèni ka mɔ̀. Wɔ̃́ ò nàà à káa lɛ́ e kélɛ̀, ó ka ɓo m píé, kɛɛ ka bɛ̃̀ɛ̃ ká o kṹ sɛ̀.

¹⁸Lɛ sɛ̀ kɛ ó mi kṹ sɛ̀ yé à kũ̀-sɛ̀ yí aà kɛ kpeĩa ká. Wɔ̃́ e kéa lɛ wánà ká teele, yé bɛ̃̀ɛ̃ ma wá ka píéa ká.

¹⁹M̀ nɔ́ɔ̀ɓé, wàa lɛ́ m̀ ɓèlè zénií ka mɔ́ɔ̀ wɔ̃̀ mɔ̀ɔ, wà wàa lɛ́ lee à ɓèlè nù nɛ́ ká pɛlɛí pìàa, o nɔ́ à yí doó. À tíé lɛ tĩã́ m kṹpìà é tóá kíli Kɛ́lɛ̀ì zì wɔ̃́ kɛ-kɔ̀ kɛɛ̀ é kɛá ka yí.

²⁰È kɛ̀á m ka píé dɛɛ káa, zi sùu kpɛɛ̀ lɛ́ áá kɛɛ̀á m lɛ̀ɛ sɛ̀ ké. M̀ kɛ̀á yia, m̀ḿ gɔ̃̀ wéè kíli. M lè lɛ́ɛ̀ dũ ka mɔ́ɔ̀ wɔ̃̀ mɔ̀.

²¹Tó ḿ wɛ̃́ĩ́-lɔ̀ɔ e kéa kɛ mia lɛ́ kà nàà ká kɛ Lɔ́ɔ̀ɔ wìa kɛ̀lɛ̀. Kàá wɔ̃́ lɛ́ Lɔ́ɔ̀ɔ à gèea ma?

²²Lɛ́ɛ̀ à gèe kélɛ̀ Éɓɔ́lɔ́hã́ã̀ gbe nì o kɛ pèèlɛ. À doó e kɛ lùò lee zɛ̀ là nɛ́ ká. À doó bɛ̃̀ɛ̃ e kɛ lee lɛ́ lɛ̀ɛ́ gbaa kɛ lùò káa là nɛ́ ká.

²³Lùò lee zɛ̀ɛ là nɛ́ɛ a ye nɔ́ nɛ́ ye-zì ká. Kɛɛ lee yé lɛ̀ɛ́ gbaa kɛ lùò káa, là nɛ́ɛ a ye ɓii Wálà e e wè dɔ é kɛ kília mɔ́ɔ̀ wɔ̃̀ mɔ̀.

²⁴Wɔ̃́ e kéa óò bɛ̀i à mɔ̀ o wɔ̃́ gɔ̃̀á zɔ̃̀ɔ̃̀ à ká. Loà pèèlɛɛ o wè-dɔ-wè pèèlɛ ká. Wè-dɔ-wèa doó-mì yé e Hégà káa, e gó Sáyã̀-tɔ̃̀ũ̀ wĩĩ́. Nɛ́ lɛ́ e o yea o lùò ká.

²⁵Hégà lɛ́ e Sáyã̀-tɔ̃̀ũ̀ lɛ́ e Alébìàa káa. À ye lɛ́ e sɛ́lɛ́ lɛ́ e Zùlúsàlɛ̀ ká dɛɛ káa bĩ́ káa. Zùlúsàlɛ̀ wà e yí-mìà séĩ́ o lùò ká.

²⁶Kɛɛ Zùlúsàlɛ̀ yé e lɛ̀ía, ye wá lùò ká. À ye lɛ́ e ko lèe káa.

²⁷Ƃii à bɛ̃̀ɛ̃ɛ̃̀ lɛ Wálà là kiia yí kélɛ̀, “Lee lɛ́ i kpómá ká lɛ́ ìí nɛ́ ye doa, i gé è li. Lee lɛ́ ìí wàa lɛ́ ò ɓèlè nù nɛ́ ká pɛlɛí pìàa ɓèlè doa, ì gbɛ́ɛ́ géli kɛɛ̀ ká. Ƃii lee lɛ́ waà à tó dàáa, lɛ́ɛ̀ lo nɛ́ yeè, é diá lee lɛ́ lɛ e dɛ̃ píé fɔ̃̀ɛ̃́ lea là.”

²⁸M lèe-gé vɔ̀, ka kélɛ̀ Áázè lɛ́ ɓe. Ka bɛ̃̀ɛ̃, ka Wálà là nɔ́ɔ̀ ká, ɓii Wálà aà e wè dɔ kília mɔ́ɔ̀ wɔ̃̀ mɔ̀.

²⁹Lúó e kília káa, nɛ́ lɛ́ à yeè e kɛá nɛ́ ye-zì káa, e nɛ́ yé à yeè e kɛá Wálà zì Gɛ̀ɛ̀ kolo là zàáa sã̀ dɔ. Zía lɛ́ lɛ à ká dɛɛ káa.

³⁰Kɛɛ Wálà kiia láà gèe kpɛ? Lɛ́ɛ̀ à gèe kélɛ̀, “Ì lùò leea kpɔ́ là nɛ́ mɔ̀, í o yí lúó. Ƃii lùò leea gbe wà lee lɛ́ ye wá lùò káa gbe, òó ló dɔɔ̀ o dàa kɛ-pɔ̀ɔ̀ yí.”

³¹À mɔ́ɔ̀ wɔ̃̀ mɔ̀ɔ, m lèe-gé vɔ̀, ko wá lùò-lɛ̀ là nɔ́ɔ̀ ká. Ko lee lɛ́ ye wá lùò káa là nɔ́ɔ̀ ká.