Read Yamano Ìfísɔ̃̀ 2 Bible Online

Ìfísɔ̃̀ 2 - Yamano bible

Ìfísɔ̃̀ 2

¹Bèĩzɛ̀ɛ, ka gaà e kɛá wɔ̃́ lɛ́ ye wá kpeĩa kɛ́ ka ɓo, ɛ̃́ɛ̃́ kɛ-wɔ̃̀ yɔɔ lɛ́ ka kɛɛ mɔ́ɔ̀ wɔ̃̀ mɔ̀.

²Lúó e kília káa, ka kɛ tópìà kpóṹ là zèe zì wɔ̃́ kɛ-kɔ̀ yɔɔ ɓɛ kpáá yí. Ka kɛ pɛ nì lɛ́ yíkɛ̀ gáàa lɛ o kɛ̀lɛ̀ lɛ̀í-kii yía, ka kɛ o wũ-là-mìa wéè kɛpìà. Pɛ́ e kília lɛ gbaa mia lɛ́ ò Wálà wéè toa yí áà lò o ká.

³Wánà kpó-kpó káa, ko séĩ́ ko kɛ nɔ́ lɛ̀ o lɛ́ ɓe. Ko kɛ táápìà ko zì nàà-ká-wɔ̃̀ kpáá yí. Ko kɛ wɔ̃́ séĩ́ lɛ́ à kɛ-lɔ̀ e kɛ ko gbĩ-kpàla wà ko zò kɛpìàa kɛpìà. Lɛ̀ ko kɛ ko dìè kɔ̀ mɔ̀ɔ, kò mia nì lɛ́ Wálà là wɔ̃́à-wàa-kɔ̀ e kɛ nupìà o làa, ko kɛ o dò ká.

⁴Kɛɛ Wálà zì mia yéĩ̀ kṹũ̀ kɛ̀ dóo yí gbùò zɛ̀, e bɛ̀i, ko zì lɔ̀-kpɔ̀ à mɔ̀ kɛ̀ dóo kpànazɛ̀ɛ,

⁵a kɛ lɛ̀ bɛ̃̀ɛ̃ ko gaà e kɛá wɔ̃́ lɛ́ ye wá kpeĩa kɛɛ̀ yía, e kò Kɛ́lɛ̀ì nì ko kɛ gbaa ɓéèe. Lɛ Wálà zì zò-kɛ̀-sɛ̀ kolo là ká lɛ́ ka la-ɓo sɔ̀lɔ̀ ɓoa.

⁶Kò Kɛ́lɛ̀ì Zízɛ̀ nì ko kɛ̀ doó yía, e kò ye nì ko wɛ̀lɛ̀ ga kɛ̀lɛ̀, kɛɛ kò ye nì kó kɛ yàá lɛ̀ doó mɔ̀ kɛɛ kó kɛ pɛ séĩ́ lɛ́ lɛ lɛ̀ séĩ́ mɔ̀ lɛ̀ía là.

⁷A kɛ kíli kɛɛ é à zɔ̃̀ɔ̃̀ mia lɛ̀ɛ lúó lɛ́ è lo nuùa ká kélɛ̀ à zì zò-kɛ̀-sɛ̀ lɛ́ e kɛ ko lɔ̀-kpɔ̀ à mɔ̀ ká, lɛ́ a zɔ̃̀ɔ̃̀ ko lɛ̀ɛ Kɛ́lɛ̀ì Zízɛ̀ yía, lɛ dóo kpànazɛ̀ yí gbùò zɛ̀.

⁸Ƃii Wálà zì zò-kɛ̀-sɛ̀ lɛ́ a kɛ lɛ́ ka la-ɓo sɔ̀lɔ̀ ɓo zò-dɔ̀à-mɔ̀ kolo là zàáa. Kɛɛ ye wá ka dìè-tĩ́ zì kɛ-wɔ̃̀ ká kɛ á kɛ. Kɛɛ lɛ Wálà zì nɔ̀-lɛ̀ɛ-pɛ̀ ká lɛ́ a kɛɛ.

⁹Ye wá mi nɔ́ɔ fé zì wɔ̃́ kɛɛ̀ kolo là ká. À mɔ́ɔ̀ wɔ̃̀ mɔ̀ɔ, wɔ̃́ gbɛɛ wá mɔṹ ɓe kɛɛ mi é lé-gbùò-là kɛ à wɛ̃́ĩ̀.

¹⁰Wálà lɛ́ e ko kɛ-mì káa. Ko kɛ̀ doó Kɛ́lɛ̀ì Zízɛ̀ yí zàáa, aà ko kɛ kɛɛ kó wɔ̃́ yiè kɛ. Wálà aà wɔ̃́ yiè nì e kília pɛ̀ kɛ mɔ́, kɛ kó o kɛ teele.

¹¹Sɛ́lɛ́ gbɛɛ yí-mìà lɛ́ o ka yea. Zúù-mìà óò ka si mia lɛ́ o bɔ̃́ɔ̃́ síì wáa. Óò o dìè si mia bɔ̃́ɔ̃́ síìa zɛ̀. À yí gbɛ̃̀ɛ̃̀ lɛ wɔ̃́ lɛ́ mia ò kɛ̀ o gbĩ-kpàla mɔ̀ɔ mɔ̀. Mia lɛ́ ka sɛ́lɛ́ gbɛɛ yí-mìà káa, ka zò è vùò zi lɛ́ ka kɛá bèĩzɛ̀ɛ ká.

¹²Lúó e kília káa, ka ɓoò e kɛá Kɛ́lɛ̀ì mɔ̀. Ka kɛ sɛ́lɛ́ gbɛɛ yí-mìà lɛ́ ka wá mia lɛ́ Wálà aà o sía dò káa ká. Ka dɔ̀lɔ̀ gbɛɛ lɛ̀ɛ́ gbaa kɛ wè-dɔ-wè lɛ́ à gbɛ̃̀ɛ̃̀ e kɛá wɔ̃́ lɛ́ Wálà e e wè dɔá là mia nì lɛ̀ɛ làa mɔ̀. Ka zì kɛ̀ kpóṹ e kéa làa, pɛ lɛ́ káá ka zò kɛɛ̀ à mɔ̀ɔ, lɛ̀ɛ́ gbaa kɛ ɓe ka lɛ̀ɛ. Ka zì kɛ̀ɓe yía, Wálà lɛ̀ɛ́ gbaa kɛ ka lɛ̀ɛ.

¹³Kɛɛ Kɛ́lɛ̀ì Zízɛ̀ wà mia nì o kɛ̀ doóa, aà à kɛ tó mia lɛ́ ka tóò lɛ mɔ́ luúa, kaà nu gbaa kɔ̀ɛ́ Kɛ́lɛ̀ì zì léà kolo là zàá.

¹⁴Ƃii Kɛ́lɛ̀ì dìè lɛ́ e kò zò-yà-gé káa. Lɛ à ká kíli Zúù-mìà wà sɛ́lɛ́ gbɛɛ yí-mìà o kɛ́ a ɓo mia doó káa mɔ́ɔ̀ wɔ̃̀ mɔ̀. Bèĩzɛ̀ɛ, gàlà ɓoò e kɛá o fĩ̀ã̀. Gàlà e kília e o fĩ̀ã̀ ɓo, tó áà kɛ̀ òó o nyìɛ dɔ o kíe mɔ̀. Kɛɛ Kɛ́lɛ̀ì e gàlà e kília wí tã́ã̀ e zì gbĩ-kpàla ká.

¹⁵E Lɔ́ɔ̀ɔ wà wɔ̃́ lɛ́ à gèeaò, wà wɔ̃́ kɛ-zì lɛ́ à zɔ̃̀ɔ̃̀ɔ tèá, kɛɛ é mia kpolà pèèlɛ zɛ̀ɛ kɛ mia doó ká wà ye nì ó kɛ doó e dìè yí zàá. Zí e kéa lɛ́ è zò-yà-gé kɛ̀ à káa.

¹⁶Kɛ́lɛ̀ì zì gá a ɓo kɔ́lɔ́sì mɔ̀ɔ, e wɛlɛ sìè kíe nì lɛ̀ɛ yí sìè à ká. Kɔ́lɔ́sìa kolo là zàáa, e mia kpolà pèèlɛ zɛ̀ɛ kɛ o kɛ gbĩ-kpàla doó ká, ɛ̃́ɛ̃́ a kɛ wà Wálà nì o li o kíe nì lɛ̀ɛ.

¹⁷Kɛ́lɛ̀ì e nu e wɔ̃́ làṹ yiè lɛ́ à gbɛ̃̀ɛ̃̀ lɛ zò-yà-gé mɔ̀ɔ gèe mia séĩ́ lɛ̀ɛ. A gèe mia lɛ́ ka sɛ́lɛ́ gbɛɛ yí-mìà ká, lɛ́ ka kɛ gbèĩ Wálà káa lɛ̀ɛ, ɛ̃́ɛ̃́ a gèe zeĩ́ Zúù-mìà lɛ́ o kɛ à ká kɔ̀ɛ́ɛ lɛ̀ɛ.

¹⁸Kɛ́lɛ̀ì zì kolo là zàá lɛ́ Zúù-mìà wà sɛ́lɛ́ gbɛɛ yí-mìà kò bɛ̀i à mɔ̀ kó nu Wálà nyìɛ mɔ̀ Gɛ̀ɛ̀ doó yía.

¹⁹À mɔ́ɔ̀ wɔ̃̀ mɔ̀ɔ, sɛ́lɛ́ gbɛɛ yí-mìà ka wá gbaa mia lɛ́ o wá kò sɛ́lɛ́ ye nɛ́ káa ká. Ɛ́ɛ̃́ ka wá gbaa lɔ̀ɔ̀-mìà ká. Kà Wálà-mìà nì ka gbaa sɛ́lɛ́ doó ye nɛ́ ká. Ka gbaa Wálà là mia nì dò ká.

²⁰Ka bɛ̃̀ɛ̃ ka dɔɔ̀ lɛ gbaa ká gã̀-gbɛ̃̀à-là gɛ̀lɛ̀ lɛ́ àpɔ́sɔ̀lɔ̀ vɔ̀ wà dɔ̀-Wálà-lé-là-mìà nì wa dɔɔ là. Ká e kília mɔ́ɔ̀ gɛ̀lɛ̀ kpànazɛ̀ kpó-kpó lɛ́ e Kɛ́lɛ̀ì Zízɛ̀ dìè káa.

²¹À ye lɛ́ è ká e kília lɛ̀ séĩ́ kũ tã́ã̀a. Lɛ́ɛ̀ à kɛ̀ áà fàà, kɛ é kɛ ká púlú ká ko Dàa-mì yí zàá.

²²Kà ye nì ka kɛ̀ doó yí zàáa, kà mia séĩ́ yé o tóa, o ka dɔpìà ka kíe bà, kɛ ká kɛ ká lɛ́ Wálà è bɛ̀i kɛɛ̀ à wì là Gɛ̀ɛ̀ kolo làa ká.