Read Yamano Ìfísɔ̃̀ 4 Bible Online

Ìfísɔ̃̀ 4 - Yamano bible

Ìfísɔ̃̀ 4

¹À mɔ́ɔ̀ wɔ̃̀ mɔ̀ɔ, má m ké, lɛ́ m bĩ́-kɛ̀ì mì ká ɓii m yɛɓo kɛ ko Dàa-mì lɛ̀ɛ mɔ́ɔ̀ wɔ̃̀ mɔ̀ɔ, ḿm̀ kpé kã ka lɛ̀ɛ. Kà kɛ ɓe wɔ̃́ kɛ-zì lɛ́ Wálà à nàà ká wɔ̃́ kɛ à ká, lɛ́ a mɔ́ɔ̀ ka súo kɛ ɓoa píé.

²Kà ka dìè sí péĩ́, káà ka kpóló kpɔ̀ ka mɔ̀, ɛ̃́ɛ̃́ kà kɛ zò-kũ̀-gé zɛ̀ teele. Ka kíe nì lɔ̀ è kpɔ́ ka mɔ̀ ka kíe nì kɛ-wɔ̃̀ kàà ka píé ká.

³Kà dɔ gágà ká kɛ ká ka kɛ̀ doó lɛ́ Gɛ̀ɛ̀ Púlú à nɔ ka lɛ̀ɛ, kɛ ká ka nyìɛ kɛ à mɔ̀. Gɛ̀ɛ̀ Púlú lɛ́ɛ̀ kɛ̀ doó e kília nɔ zò-yà-gé lɛ́ è ka nɔ̀ɔ̀ ka kíe mɔ̀ɔ kolo là zàá.

⁴Gbĩ-kpàla lɛ nɔ́ doó, ɛ̃́ɛ̃́ Gɛ̀ɛ̀ Púlú bɛ̃̀ɛ̃ lɛ nɔ́ doó, zi nɔ́ zò-kɛ̀-pɛ-mɔ̀ lɛ́ Wálà aà mɔ́ɔ̀ ka súo kɛɛ lɛ à ká doóa, lɛ́ ɓɛ.

⁵Mia Dàa-mì lɛ nɔ́ ɓe doó. Zò-dɔ̀à-mɔ̀ bɛ̃̀ɛ̃ lɛ nɔ́ doó kíli. Ɛ́ɛ̃́ zeĩ́, mia bàtáì kɛɛ̀ lɛ doó nɔ́ kíli.

⁶Wálà lɛ doó, ɛ̃́ɛ̃́ à ye lɛ́ e mia séĩ́ Dàa káa. Lɛ mia séĩ́ là. Ɛ́ɛ̃́ zeĩ́, lɛ́ɛ̀ kpɔ mia séĩ́ yí, áà yɛɓo kɛ̀. E bɛ̀i, lɛ mia séĩ́ yí.

⁷Míá ko kéa, nɔ̀-lɛ̀ɛ-pɛ̀ kpànazɛ̀ nɔɔ̀ lɛ ko lɛ̀ɛ ko tɔ̀ là doó doó. À nɔɔ̀ lɛ ko lɛ̀ɛ zí Kɛ́lɛ̀ì è pɛ nɔá mia lɛ̀ɛ ká.

⁸Wálà kíía lɛ́ɛ̀ à gèe kélɛ̀, “Lɛ̀ e ló lɛ̀í gbèkènia, e ló mia búnùzɛ̀ lɛ́ e o kṹ gèlè námá káa ká. E nɔ̀-lɛ̀ɛ-pɛ̀ nɔ mia lɛ̀ɛ.”

⁹Yé aà gèe e ló lɛ̀ía, à yí lɛ́ mɛɛ ká? À yí lɛ́ e kélɛ̀, bèĩzɛ̀ɛ e nu tã́ã̀ áà lò gìè gbèkèni.

¹⁰Mí e nu tã́ã̀a, lɛ́ e mi nɔ́ lɛ́ e ló lɛ̀ía káa. E ló lɛ̀í-kii nì bɛ̃̀ɛ̃ là lɛ̀í pɔ̃ũ le, kɛ é pɛ séĩ́ pa e dìè ká.

¹¹Mí e nɔ̀-lɛ̀ɛ-pɛ̀ nɔ mia lɛ̀ɛ kília, lɛ́ e à káa. E mia gbṹũ̀ sí kɛ ó kɛ àpɔ́sɔ̀lɔ̀ vɔ̀ ká, ɛ̃́ɛ̃́ kɛ mia dò bɛ̃̀ɛ̃ ó kɛ dɔ̀-Wálà-lé-là-mìà ká. Ɛ́ɛ̃́ zeĩ́, e mia dò bɛ̃̀ɛ̃ sí kɛ ó kɛ wɔ̃́ làṹ yièa gèe-mìà ká. Zéniía, e mia dò bɛ̃̀ɛ̃ sí kɛ ó kɛ nyìɛ-kɛ̀-ɓáá-mɔ̀-mìà wà pɛ-zɔ̃̀ɔ̃̀-mìà ká.

¹²E wɔ̃́ e kília kɛ kɛɛ é Wálà-mìà pɛ̀ kɛ Wálà yɛ̀ɓo kɛɛ̀ mɔ́ɔ̀ wɔ̃̀ mɔ̀, kɛ Kɛ́lɛ̀ì gbĩ-kpàla mɛ́ é kɛ gágà.

¹³Zí e kéa káa, ko séĩ́ kóò lo nuù ko kíe là kɛ kó kɛ doó. Ko zì zò-dɔ̀à-mɔ̀ wà ko zì wɔ̃́ lɛ́ kò yí dɔ Wálà Gbe gbĩ mɔ̀ɔ, lɛ́ɛ̀ lo kɛɛ̀ doó. Kóò lo kɛɛ̀ mia mɛ́ kpálàa zɛ̀ ká. Kóò lo ɓɔɔ̀ lɛ̀ kpó-kpó lɛ́ Kɛ́lɛ̀ì zì kɛ̀-gbèĩ-kɔ̀ tèáà lɛ yía mɔ̀.

¹⁴Yé aà kɛ gbaa kília, kòó ló kɛɛ̀ nɔ́ɔ̀ɓé ká gbaa. Mɛ̀ĩ́ lɛ̀ɛ́ ló ko bìnì, ɛ̃́ɛ̃́ fã̀ã̀ lɛ́ è go zi gbɛɛ̀ gbɛɛ ká, lɛ́ e kélɛ̀ pɛ lɛ́ mia bèkɛ̀-ɓo-mìà ò zɔ̃̀ɔ̃̀ɔ, lɛ̀ɛ́ ló ko pìè kɛ é ko ɓo ko dɔ̀lɔ̀ mɔ̀. Míá o kília lɛ́ o mia lɛ́ ò mia líé si wáà lò o ká nɛ̀-wɔ̃̀ píé yɛ̀ì-yɛ́í lɛ́ wa nyáá pá e kíe mɔ̀ o dìè lɛ̀ɛ káa.

¹⁵Kɛɛ lɛ à mɔ̀ kɔ́á fàa zi séĩ́ ká, kɛɛ kɔ̀à Kɛ́lɛ̀ì lɛ́ e ko wũ káa, kò ye nì kó kɛ doó. Kóò à kɛ̀ kíli wánà-wɔ̃̀ gèeè ká lɔ̀-kɛ̀à-mɔ̀ yí.

¹⁶Gbĩ-kpàlaa gbɛ̃ĩ̀-pɛ doò do nɔ̀ɔɔ̀ lɛ e kíe nì mɔ̀, ɛ̃́ɛ̃́ Kɛ́lɛ̀ì lɛ o là. Ɛ́ɛ̃́ gbĩ-kpàlaa bɛ̃̀ɛ̃ yàà lɛ e kíe mɔ̀ e kpo là lɛ́ à nɔɔ̀ lɛ à lɛ̀ɛ mɔ́ɔ̀ wɔ̃̀ mɔ̀. Kɛɛ yé gbĩ-kpàlaa gbɛ̃ĩ̀-pɛ e kília aà yɛɓo lɛ́ lɛ o mɔ̀ ó kɛ o tɔ̀ là doò doa kɛɛ, kɛɛ gbĩ-kpàla e kília lɛ̀ séĩ́ lɛ́ɛ̀ fàa, tó e e dìè mɛ́ kɛ gágà lɔ̀-kɛ̀à-mɔ̀ yí.

¹⁷Ko Dàa-mì tɔ́ yía, ḿm̀ wɔ̃́ e kéa gèe, tó máà lìè-wè dɔ̀á ka lɛ̀ɛ. Yékɛ̀ ka yìì-kɔ̀ é kɛ gbaa lɛ̀ mia lɛ́ òó Wálà dɔɔ yìì-kɔ̀ lɛ́ ɓe. O zì yɛ́lɛ́-tàà-yí-wɔ̃̀ lɛ wɔ̃́ dà tã́ã̀ zɛ̀ ká.

¹⁸O zì gíkã́ lɛ bĩ́ bà. O dɔ̀lɔ̀ gbɛɛ wá kɛ̀ɓe lɛ́ Wálà à nɔɔ mɔ̀, ɓii o wṹ gbɛɛ dɔɔ̀ wá à ká, ɛ̃́ɛ̃́ o wũ yí lɛ gágà.

¹⁹Yɛ́lɛ̀ kpɔ̀ o là kpàà wá o mɔ̀ gbaa. Waà o dìè nɔ mànaà zɛɛ̀ wà nɛ́ĩ̀ zɛɛ̀ nì o lɛ̀ɛ. O fã̀ã́-wàà lɛ wɔ̃́ lilì kṹã̀a sùu gbɛɛ̀ gbɛɛ zɛ̀ kɛɛ̀ mɔ̀.

²⁰Wɔ̃́ lɛ́ ka dã́ lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, ye wá kíli.

²¹Ḿm̀ yí dɔ kélɛ̀ ka wɔ̃́ lɛ́ à gbɛ̃̀ɛ̃̀ lɛ à mɔ̀ɔ wɔ̃̀ ma. Ɛ́ɛ̃́ zi lɛ́ ka à ká à yía, o wɔ̃́ wánà zɛ̀ lɛ́ lɛ Zízɛ̀ yía, wa zɔ̃̀ɔ̃̀ ka lɛ̀ɛ.

²²À mɔ́ɔ̀ wɔ̃̀ mɔ̀ɔ, kà mi lɛ́ ka kɛ à ká bèĩzɛ̀, lɛ́ e ka kɛ káà yìì lɛ̀ zí kà yìì mɔ́ à káa, kà ɓo ka mɔ̀. Mi lɛ́ ka kɛ à ká bèĩzɛ̀ɛ, wɔ̃́ kɛ-lɔ̀ lɛ́ e kɛ à kɛpìà, ɛ̃́ɛ̃́ áà à bèkɛ̀ ɓòa, e kɛ à yí sìèpìà.

²³Lɛ à mɔ̀ ka zò wà ka zì yɛ́lɛ́-táá kɛɛ̀ é kɛá dɛɛ kpó-kpó ɓo.

²⁴Lɛ à mɔ̀ ká mi dɛɛ lɛ́ kaà kɛ gbaa à káa, dà ka mɔ̀. Mí e kília à kɛɛ̀ lɛ nɔ́ lɛ̀ Wálà lɛ́ ɓe. Lɛ wɔ̃́ kpeĩ wà wɔ̃́ púlú kɛ-mì ká. Kɛ̀ɓe wánà zɛ̀ɛ lɛ́ ɓɛ.

²⁵À mɔ́ɔ̀ wɔ̃̀ mɔ̀ɔ, kà kã́ nɛ̀ kɛɛ̀ lɛ̀ɛò. Lɛ à mɔ̀ mi séĩ́ é wánà-wɔ̃̀ gèe e ɓɛ́ɛ-mì lɛ̀ɛ. Ƃii ko séĩ́ ko gbĩ-kpàla doó gbɛ̃ĩ̀-pɛ káa mɔ́ɔ̀ wɔ̃̀ mɔ̀.

²⁶Wɔ̃́ é ka wàáa, yékɛ̀ ká tó wɔ̃́à-wàa-kɔ̀ e kília é ló ka ká kɛ-wɔ̃̀ yɔɔ yí. Yékɛ̀ ká tó wɔ̃́à-wàa-kɔ̀ é tó ka yí, nyɛ́nɛ́ é ló à ká.

²⁷Yékɛ̀ ká lúó lɔ́ɔ́-lɔ̀ɔ̀ nɔ Dɛ́ɓò lɛ̀ɛ.

²⁸Mi lɛ́ è kã̀ã ɓo mɔ́ɔ, lɛ à mɔ̀ é tèá kã̀ã ɓoò ká é gbɛ̃̀ gbaa áà yɛɓo kɛ̀, kɛɛ é kɛ ɓe kɛ̀ɓe zì kpeĩ píé, kɛ bɛ̀i é kɛ à mɔ̀ kɛ é gbũ mia lɛ́ pɛ gbɛɛ wá o kɛ̀lɛ̀ɛ mɔ̀.

²⁹Yékɛ̀ ká wéé yɔɔ gèe. Kɛɛ kà kɛ wéé yiè lɛ́ lɛ gbũ̀-mɔ̀ zɛ̀, lɛ́ è mia mɛ́ kɛ̀ gágà, tó áà pɛ lɛ́ lɛ mia mɔ̀ ó sɔ̀lɔ̀ ɓoa nɔ̀ɔ gèe-mìà ká. Zí e kéa káa, wɔ̃́ lɛ́ ka gèea, lɛ́ɛ̀ lo wɔ̃́ yiè kɛɛ̀ mia lɛ́ o ka wéè maa lɛ̀ɛ.

³⁰Yékɛ̀ ká Wálà là Gɛ̀ɛ̀ Púlúa kɛ é yà yéĩ̀zɛ̀. Ƃii Gɛ̀ɛ̀ Púlúa lɛ́ e Wálà dɔ̀á ká ka mɔ̀ é tóá kíli lúó lɛ́ è lo nuù kɛ Wálà é ka ɓo wɔ̃́ yía, é ɓɔɔ káa.

³¹Ka zò è tèá kɛ̀ nyɔ́ɔ̀ɔ ká. Ɛ́ɛ̃́ ka kɛ̃̀ĩ̀ è tèá wì ka zò píé mɔ̀. E bɛ̀i, yékɛ̀ wɔ̃́ é ka wàa. Yékɛ̀ ká gbɛ́ɛ́ gbaa mia là. Ɛ́ɛ̃́ yékɛ̀ ká lé-kã́ kɛ. E bɛ̀i, yékɛ̀ ka zò é sìè ka gé zi nɔ́ɔ fé ká.

³²Kɛɛ ka sɔ̃̀ɔ̃ è kɛ sɛ̀ ka kíe nì ká. Ka zò è kɛ yéĩ̀zɛ̀ ka ɓɛ́ĩ̀ nì mɔ́ɔ̀ wɔ̃̀ mɔ̀. Ɛ́ɛ̃́ kà kã́ ka ɓɛ́ĩ̀ nì kɛ-wɔ̃̀ mɔ̀, káà kàà tã́ã̀, lɛ̀ zí Wálà e kã́ à ká ka zì kɛ-wɔ̃̀ mɔ̀, áà kàà à ká tã́ã̀ Kɛ́lɛ̀ì yí zàáa lɛ́ ɓe.