Read Yamano Fèlépĩ̀ã̀ 1 Bible Online

Fèlépĩ̀ã̀ 1 - Yamano bible

Fèlépĩ̀ã̀ 1

¹Ma Pɔ́ɔ̀, kò Témɔ́tè lɛ́ ko Kɛ́lɛ̀ì Zízɛ̀ là yɛɓo-kɛ-mìà káa, kóò wèè Wálà-mìà séĩ́ lɛ́ ka Félépà yi, lɛ́ kà Kɛ́lɛ̀ì Zízɛ̀ nì ka doóa bà, ɛ̃́ɛ̃́ zeĩ́ kóò wèè mia lɛ́ ka Wálà-mìà líé-sí-mìà, e bɛ̀i, gbũ̀-Wálà-mìà-mɔ̀ mìà káa bà nɔ́ kíli.

²Kɔa Dàa Wálà wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

³Ḿm̀ m̀ Wálà zúo ɓo ka mɔ́ɔ̀ wɔ̃̀ mɔ̀ lúó séĩ́ lɛ́ m̀ m yɛ́lɛ́ tàà ka mɔ́ɔ̀ wɔ̃̀ yía ká.

⁴Lúó séĩ́ lɛ́ m̀ sɛ̀nɛ ɓo ka séĩ́ ka mɔ́ɔ̀ wɔ̃̀ mɔ̀ɔ, m gé lɛ́ɛ̀ li yé maà kɛ sɛ̀nɛ e kília ɓopìàa ká,

⁵zi lɛ́ kaà gbũá m mɔ̀ wɔ̃́ làṹ yièa gèeè yí, é góá à gã̀-gbɛ̃̀pìà é ɓɔá pɛ́nɛɛ mɔ̀ɔ mɔ́ɔ̀ wɔ̃̀ mɔ̀.

⁶Ɛ́ɛ̃́ ḿm̀ wɔ̃́ e kéa gɛ̃̀ wánà kpó-kpó ká. Ye lɛ́ e kélɛ̀, Wálà lɛ́ e yɛɓo yièa kɛɛ̀ gã̀ gbɛ̃̀ ka yía, lɛ́ɛ̀ lo lóò à ká e líé, é tóá kíli à líé é nyɛ Kɛ́lɛ̀ì Zízɛ̀ zì Lúó ká.

⁷Ka wɔ̃̀ diè lɛ m zò ká teele. À mɔ́ɔ̀ wɔ̃̀ mɔ̀ɔ, lɛ kpeĩ dóo kɛ ḿ m yɛ́lɛ́ táá ka mɔ́ɔ̀ wɔ̃̀ yí zi sùu e kéa ká. Ƃii kɔ̀à ɓi nì kɔaà dɔ wɔ̃́ yiè lɛ́ Wálà aà nɔ m lɛ̀ɛ yí. Ka wɔ̃́ e kéa kɛpìà dɛɛ ká lɛ̀ lɛ́ m bĩ́-kɛ̀ìa ká, ɛ̃́ɛ̃́ ka kɛ zeĩ́ lɛ̀ lɛ́ m kɛ dɔpìà wɔ̃́ làṹ yièa là, ɛ̃́ɛ̃́ máà à zi dɔ-zì nààa ká.

⁸Wálà lɛ́ e m kélá ká à gèe m̀ ɓo ka séĩ́ ka lɔ̀ lɛ́ è m kɛ̀ e nyɔ́ɔ̀ɔ káa, à gã̀-gbɛ̃̀ɛ̃̀ lɛ Kɛ́lɛ̀ì Zízɛ̀ dìè zò píé.

⁹M zì sɛ̀nɛ m̀ ɓo ka mɔ́ɔ̀ wɔ̃̀ mɔ̀ɔ, gɛ̃̀ e ké. Ḿm̀ sɛ̀nɛ ɓo kɛɛ ka zì mia lɔ̀-kpɔ̀ ka mɔ̀ɔ à là é kpɔ́ teele, é dàá wɔ̃́ yí-dɔ-kɔ̀ wà mɛ́ĩ́-ɓo-kɔ̀ púlúa bà,

¹⁰kɛɛ bɛ̀i é kɛ ka mɔ̀ kɛ ká pɛ lɛ́ lɛ wánà zɛ̀ɛ dɔ, káà à sì à yé ye wá wánà zɛ̀ɛ bà. Yé aà kɛ kília, ka kɛɛ, e bɛ̀i wɔ̃́ kpɔ̀-ka-wĩĩ́ gbɛɛ lɛ̀ɛ́ ló kɛɛ̀ ka mɔ̀ Kɛ́lɛ̀ì zì Lúó ká.

¹¹Ka paà lɛ́ɛ̀ lo kɛɛ̀ à ká wɔ̃́ kpeĩ ká, tó áà ɓà e ɓɛɛ lɛ́ Zízɛ̀ Kɛ́lɛ̀ì doó è bɛ̀i à mɔ̀ é à kɛɛ ká ka yí, kɛɛ Wálà tɔ́ é kɛ gbùò, ɛ̃́ɛ̃́ kɛ mia ó à tɔ́ ɓɔ.

¹²M lèe-gé vɔ̀, ḿm̀ nàà ká wɔ̃́ e kéa yí dɔ. Ye lɛ́ e kélɛ̀, wɔ̃́ lɛ́ aà kɛ m káa, lɛ́ɛ̀ gbũ dìè ɓo wɔ̃́ làṹ yièa lò líé mɔ̀.

¹³Wɔ̃́ e kéa mɔ́ɔ̀ wɔ̃̀ mɔ̀ɔ, sóyà vɔ̀ séĩ́ lɛ́ ò o nyìɛ kɛ̀ sɛ́lɛ́ líé-sí-mì yà-pìà e zèea mɔ̀, é dàá mia séĩ́ yé o tó lɛ́ o zèea bàa, óò à yí dɔ kélɛ̀ m bĩ́-kɛ̀ì kɛ̀ Kɛ́lɛ̀ì là yɛɓo-kɛ-mì ká mɔ́ɔ̀ wɔ̃̀ mɔ̀.

¹⁴Ɛ́ɛ̃́ m zì kɛ̀ bĩ́-kɛ̀ìa aà kɛ m lèe-gé vɔ̀ búnùzɛ̀ lɛ́ o zèea, waà o zò dɔ ko Dàa-mì mɔ̀ yí gágà zɛ̀, ɛ̃́ɛ̃́ aà kɛ gbaa o nyìɛ là aà kɛ gágà Wálà lé-wèa gèeè yí, tó áà kɛ̀ òó túó à mɔ́ɔ̀ wɔ̃̀ yí.

¹⁵O dò óò Kɛ́lɛ̀ì-wɔ̃̀ gèe ɓii óò dàa-gbe là kɛ̀, ɛ̃́ɛ̃́ o wéé zɛ̀ɛ mɔ́ɔ̀ wɔ̃̀ mɔ̀. Kɛɛ mia dò bɛ̃̀ɛ̃ óò à wɔ̃̀ gèe zò púlú ká.

¹⁶Míá o kília, óò kɛ̀ lɔ̀-kɛ̀à-mɔ̀ kolo là zàá. Ƃii óò à yí dɔ kélɛ̀ Wálà aà m sí kɛɛ ḿ dɔ wɔ̃́ làṹ yièa là.

¹⁷Mia yé o tóa, Kɛ́lɛ̀ì-wɔ̃̀ lɛ́ ò gèe lòũ̀ káa, lɛ̀ɛ́ gó o zò píé. Óò à kɛ̀ à naa ò ɓo o dìè káa mɔ́ɔ̀ wɔ̃̀ mɔ̀. Óò à gɛ̃̀ ɓɔ̀ɔ kélɛ̀ óò lo wɔ̃́ yɔɔ kɛɛ̀ m ká zeĩ́ lɛ̀ lɛ́ m tĩã́ bĩ́-kɛ̀ìa ká.

¹⁸À kɛ̀ kíli wá wɔ̃́ dò ká. M gé lɛ́ɛ̀ li à kɛ̀ kíli mɔ́ɔ̀ wɔ̃̀ mɔ̀, yé nɔ́ yo ò Kɛ́lɛ̀ì wɔ̃̀ gèe zi séĩ́ ká, yé bɛ̃̀ɛ̃ à gèe ò ɓoa óò yà o gé yɔɔ, ɛ̃́ɛ̃́ óò yà o gé sɛ̀ɛ, lɛ sɛ̀. Ɛ́ɛ̃́ m gé lɛ́ɛ̀ lo lóò líé liì ká,

¹⁹ɓii ka zì sɛ̀nɛ kà ɓoa kolo là, e bɛ̀i, gbũ̀-mɔ̀ lɛ́ è go Zízɛ̀ Kɛ́lɛ̀ì zì Gɛ̀ɛ̀ Púlúa kɛ̀lɛ̀ɛ, m ɓoò lɛ́ɛ̀ lo kɛɛ̀á wɔ̃́ yí.

²⁰Wɔ̃́ lɛ́ à wɔ̃̀ diè lɛ m zò ká, ɛ̃́ɛ̃́ lɛ́ maà yà m zò mɔ̀ kɛ-wɔ̃̀ káa, lɛ́ e kélɛ̀, yékɛ̀ ḿ kɔ̃́ wɔ̃́ lɛ́ lɛ m mɔ̀ ḿ kɛɛ mɔ̀, kɛɛ lúó séĩ́ káa, ɛ̃́ɛ̃́ kpó-kpó ɓo pɛ́nɛɛ̀ɛ, m paà lɛ́ɛ̀ lo kɛɛ̀ à ká zò kɛ̀-gágà-lɛ̀ ká, kɛɛ Kɛ́lɛ̀ì tɔ́ é kɛ gbùò m dìè mɔ́ɔ̀ wɔ̃̀ mɔ̀, yé bɛ̃̀ɛ̃ ḿ ga, ɛ̃́ɛ̃́ ḿ tó ɓéèea ká.

²¹Ƃii mɛ́ mɔṹ ò si kɛ̀ɓe? Ma yee maà gɛ̃̀ɛ, ye lɛ́ nɔ́ e Kɛ́lɛ̀ì káa. Ɛ́ɛ̃́ ga lɛ́ɛ̀ lo à kɛɛ̀ tó m pɛ sɔ̀lɔ̀ ɓo.

²²É kɛ̀á m zì kɛ́ m̀ lo à ɓoò ɓéèea, ḿm̀ lo yɛɓo ɓò yí zɛ̀ kɛɛ̀ɛ, kɛɛ m̀ḿ pɛ yé m̀ lo à síìa dɔ.

²³M kṹũ̀ lɛ kɔ̀ɔ pèèlɛ là. Ḿm̀ nàà kpó-kpó ɓo à ká kɛ ḿ gó kɛ̀ɓe yé e kéa yí, ḿ ló kɛɛ̀ Kɛ́lɛ̀ì píé. Lɛ dóo wɔ̃́ yiè kpó-kpó ká.

²⁴Kɛɛ lɛ dóo kpeĩ kpó-kpó ɓo ka lɛ̀ɛ kɛ ḿ tó zèe m gbĩ-kpàla e kéa yí.

²⁵Ḿm̀ gɛ̃̀ wánà kpó-kpó ká kíli. À mɔ́ɔ̀ wɔ̃̀ mɔ̀ɔ, ḿm̀ yí dɔ kélɛ̀ ḿm̀ lo tóò ka píé zèe. Ḿm̀ lo tóò ka séĩ́ ka fĩ̀ã̀ zèe, kɛɛ ḿ m kɔ̀ dà ka píé, káà lò líé zò-dɔ̀à-mɔ̀ yí géli ká.

²⁶À mɔ́ɔ̀ wɔ̃̀ mɔ̀ɔ, yé maà kɛ zeĩ́ ka píéa, wɔ̃́ lɛ́ kà lo à mɔ́ɔ̀ lé-gbùò-là kɛɛ̀ m mɔ́ɔ̀ wɔ̃̀ mɔ̀ɔ, lɛ́ɛ̀ lo kɛɛ̀ gbùò Kɛ́lɛ̀ì Zízɛ̀ yí zàá.

²⁷Ɛ̀ɛ̀, wɔ̃́ nɔ́ lɛ à mɔ̀ ká kɛɛ lɛ́ e kélɛ̀, lɛ sɛ̀ ka yìì-kɔ̀ é kɛ kpeĩ, lɛ̀ zí Kɛ́lɛ̀ì wɔ̃̀ làṹ yièa à nàà é kɛáa lɛ́ ɓe, kɛɛ yé bɛ̀i lɛ m mɔ̀, ɛ̃́ɛ̃́ yé bɛ̀i wá bɛ̃̀ɛ̃ m mɔ̀ kɛ ḿ nu ɓɔ ka píéa, kɛɛ ḿ à ma yee ɓo kélɛ̀ ka dɔ̀á ka dɔ̀lɔ̀ mɔ̀ zò doó ká, tó ka yɛ́lɛ́-tàà-yí-wɔ̃̀ lɛ doó, kɛɛ ká gèlè gɔ̃ pɛ doó ká e kíe là. Pɛ doó e kília lɛ́ e zò-dɔ̀à-mɔ̀ wɔ̃̀ lɛ́ wɔ̃́ làṹ yièa è à wɔ̃̀ gèea káa.

²⁸Yékɛ̀ ká túó mia lɛ́ ò gèlè gɔ̃ ka káa lɛ̀ɛ zi nɔ́ɔ fé dò ká. Wɔ̃́ e kéa lɛ́ɛ̀ lo à zɔ̃̀ɔ̃̀ o lɛ̀ɛ kélɛ̀ o yí lɛ́ɛ̀ lo sìè, tó ka yee ka la. Wálà lɛ́ è lo à kɛɛ̀ kília.

²⁹Ƃii Wálà aà wɔ̃́ yiè nɔ ka lɛ̀ɛ Kɛ́lɛ̀ì kòlɛ̀ mɔ̀ zàá. Wɔ̃́ yiè e kília, ye wá zò-dɔ̀ Kɛ́lɛ̀ì mɔ̀ doó ká. Kɛɛ lɛ zeĩ́ wɔ̃́ nyɔ́ɔ̀ɔ gɛ̃̀ɛ̃̀ Kɛ́lɛ̀ì mɔ́ɔ̀ wɔ̃̀ mɔ̀ ká nɔ́ kíli.

³⁰Dɛɛ ká gbaa, kɔ̀à ɓi nì kɔa gèlè doó gɔ̃-mìà ká. Gèlè nɔ́ ka m gɛ̃̀ máà à gɔ̃̀ mɔ́ɔ, lɛ́ nɔ́ m tĩã́ à gɔ̃pìà lɛ́ kà wɔ̃̀ ma ɓɛ.