Read Yamano Fèlépĩ̀ã̀ 4 Bible Online

Fèlépĩ̀ã̀ 4 - Yamano bible

Fèlépĩ̀ã̀ 4

¹M lèe-gé vɔ̀, zi lɛ́ wɔ̃́ lɛ à káa lɛ́ ɓɛ. Zi sùu kpɛɛ̀ lɛ́ ka lɔ̀ è m kɛ̀á ké. Ka gɛ̃̀-lɔ̀ lɛ́ɛ̀ m kɛ̀. Ka lɛ́ ka tɔ́ m̀ géli. Ka pɛ lɛ́ maà mɔ́ɔ̀ gèlè gɔ̃ɔ ká. M̀ lɔ̀-kɛ̀á-mìà, zi lɛ́ káá dɔɔ̀á ka dɔ̀lɔ̀ mɔ̀ ko Dàa-mì yía, gɛ̃̀ e ké.

²Yuòdáyà kà Sɛ̃̀tíkè, ḿm̀ kpé kã ka lɛ̀ɛ, kà kpé lɛ sɛ̀, lɛ̀ lɛ́ ka doó ko Dàa-mì yía, kà wéé ka kíe nì wéè mɔ̀.

³Ɛ́ɛ̃́ zeĩ́, mi lɛ́ i m ɓɛ́ɛ zò-dɔ̀à-mɔ̀ zɛ̀ káa, ḿm̀ nàà kɛɛ í gbũ loà o kéa mɔ̀. Kò ye nì kɔaà yɛɓo kɛ gágà wɔ̃́ làṹ yièa wɛ̃́ĩ̀, é dàá Kɛ́lɛ́mɛ̀, e bɛ̀i, m ɓɛ́ĩ̀ yɛɓo-kɛ-mìà séĩ́ yé o tó, lɛ́ o tɔ́ lɛ kɛ̀ɓe-kii yía nì bà.

⁴Kà géli kɛ kɔa Dàa-mì tɔ́ yí zàá teele. Ḿm̀ gèe zeĩ́ kélɛ̀, kà géli kɛ.

⁵Mia séĩ́ ò ka zì zò-kɛ̀-sɛ̀ mia ká míní sí. Ko Dàa-mì nu-lùò aà ɓɔ kɔ̀ɛ́.

⁶Yékɛ̀ wɔ̃́ nɔ́ɔ fé wɔ̃̀ é ka lè dũ. Kɛɛ ka zì sɛ̀nɛ séĩ́ ɓoò yía, kà pɛ lɛ́ lɛ ka mɔ̀ ká sɔ̀lɔ̀ ɓoa, pɛ̃́ à mɔ̀. Ká pɛ pɛ̃̀á à mɔ̀ɔ, à zúo ɓo kpàà è kɛ ka mɔ̀ teele.

⁷Ɛ́ɛ̃́ Wálà zì zò-yà-gé lɛ́ lɛ mia zì yɛ́lɛ́-táá ká gbèĩ kpó-kpó ɓoa, lɛ́ɛ̀ lo e yɛ́lɛ́ kɛɛ̀ ka zò wà ka zì wũ-kèlè yí píé Kɛ́lɛ̀ì Zízɛ̀ yí zàá.

⁸M lèe-gé vɔ̀, m tèáà-là lɛ́ e kélɛ̀, kà ka zì yɛ́lɛ́-táá kɛ à lé é pa wɔ̃́ nì lɛ́ lɛ sɛ̀, ɛ̃́ɛ̃́ lɛ́ lɛ pɛ lɛ́ à tɛ̀nɛɛ̀ à mɛ́ kũa ká. O lɛ́ o pɛ wánà zɛ̀, ɛ̃́ɛ̃́ pɛ́ ò bɛ̀i à mɔ̀ ó ɓɛ̀lɛyà nɔ à lɛ̀ɛ, e bɛ̀i, wɔ̃́ kpeĩ, ɛ̃́ɛ̃́ pɛ lɛ́ kɛɛ nyɛɛ̀ lɛ à mɔ̀ɔ, e bɛ̀i zeĩ́, pɛ lɛ́ à liì lɛɛò, ɛ̃́ɛ̃́ pɛ lɛ́ lɛ ɓɛ̀lɛ-ɓɛ̀lɛ zɛ̀ɛ káa.

⁹Pɛ lɛ́ ka dã́, ɛ̃́ɛ̃́ lɛ́ ka sɔ̀lɔ̀ ɓo, lɛ́ kaà ma m lé, tó káà m gɛ̃̀ máà kɛ̀ɛ, kà yɛɓo kɛ o ká. Ɛ́ɛ̃́ Wálà lɛ́ è zò-yà-gé nɔ ko lɛ̀ɛ, lɛ́ɛ̀ lo kɛɛ̀ ka píé.

¹⁰Géli lɛ́ e m yí m zì kɛ̀ɓe lɛ́ m à ká ko Dàa-mì yía káa, lɛ kpànazɛ̀. Yé bɛ̃̀ɛ̃ lúó gbɔ̃́ aà diea, m kpàà lɛ́ e kɛ ka mɔ̀ɔ, ka zò aà vùò à mɔ́ɔ̀ wɔ̃̀ ká. M̀ḿ à gèe kélɛ̀ m kpàà aà tèá kɛ̀ ka mɔ̀ káò. Lúó lɛ̀ɛ́ gbaa kɛ ka kɛ̀lɛ̀ kɛ ká zɔ̃̀ɔ̃̀ɔ lɛ.

¹¹Ɛ́ɛ̃́ ma wá wɔ̃́ e kéa gèepìà ɓii ḿm̀ nàà pɛ káa mɔ́ɔ̀ wɔ̃̀ mɔ̀. Ƃii maà zi lɛ́ lɛ mi mɔ̀ i zò é dàá pɛ lɛ́ lɛ i kɛ̀lɛ̀ɛ wɛ̃́ĩ̀a dã́.

¹²Ḿm̀ zi lɛ́ yé pɛ aà kɛ mi kɛ̀lɛ̀ nyɔ̀nɔ́ɔ i à káa dɔ, tó máà zi lɛ́ pɛ aà kɛá mi kɛ̀lɛ̀ gbùòa i à káa dɔ̀. M à kɔ̀ɛ̀à ká gbaa. À mɔ́ɔ̀ wɔ̃̀ mɔ̀ɔ, ḿ kɛ bɛ̃̀ɛ̃ lɛ̀ nɔ́ɔ fé mɔ̀, ɛ̃́ɛ̃́ lúó nɔ́ɔ fé káa, m zò yàà lɛ m gé, yé bɛ̃̀ɛ̃ m gé lɛ kã́pìà lɔ̀ɔ ká, ɛ̃́ɛ̃́ yé bɛ̃̀ɛ̃ m gí dɔɔ̀ lɛ, e bɛ̀i, yé bɛ̃̀ɛ̃ pɛ lɛ m kɛ̀lɛ̀ gbùòa, ɛ̃́ɛ̃́ é kɛ bɛ̃̀ɛ̃ m kɛ̀lɛ̀ nyɔ̀nɔ́ɔ ká.

¹³Bɛ̀i lɛ m mɔ̀ ḿ wɔ̃́ séĩ́ kɛ Kɛ́lɛ̀ì lɛ́ è m mɛ́ kɛ̀ gágàa yí zàá.

¹⁴Kɛɛ ka kɛ dóo sɛ̀ lɛ́ ka gbũ m mɔ̀ lɛ̀ lɛ́ m kɛ wɔ̃́ nyɔ́ɔ̀ɔ yía káa.

¹⁵Fèlépĩ̀ã̀-mìà ka ké ɓɛ, káà à yí dɔ kélɛ̀ lɛ̀ lɛ́ m gó Masèdónà kɛɛ maà gbɛ̃̀ wɔ̃́ làṹ yièa gèeè ká dɛɛ, ka lɛ́ nɔ́ ka kɛ Wálà-mìà kù lɛ́ o gbũ m mɔ̀ɔ káa. Ka lɛ́ nɔ́ kɔ̀à ɓi nì kɔa dɔ m zì pɛ sɔ̀lɔ̀ ɓoò wà m zì pɛ ɓò m kɔ̀ là yía.

¹⁶Lɛ̀ lɛ́ m kɛ Tɛsàlònákà, lɛ́ e kɛ m mɔ̀ ó gbũ m mɔ̀ɔ, ka gbũ̀-m-mɔ̀ pɛ̀ vɔ m píé. Ɛ́ɛ̃́ kàá gbaa kɛ nɔ́ ɓɔ̀ɔ lúó doó píé.

¹⁷Ye wá kélɛ̀ ḿm̀ nàà kɛ mia ó nɔ̀-lɛ̀ɛ-pɛ̀ nɔ m lɛ̀ɛ. Kɛɛ ḿm̀ nàà kɛɛ pɛ lɛ́ kaà à yàlà bɛ̀ia kpɔ̀à-mɔ̀ é kɛ ɓe ka lɛ̀ɛ.

¹⁸Maà pɛ séĩ́ lɛ́ lɛ m mɔ̀ ḿ sɔ̀lɔ̀ ɓoa sɔ̀lɔ̀ ɓo, ɛ̃́ɛ̃́ à lé-gbú lɛ vɔ̀ à mɔ̀. Maà pɛ lɛ́ ka nɔ Ìpafòlòdátà lɛ̀ɛ é nuá m píéa maà à sɔ̀lɔ̀ ɓo. M lé aà pa gbaa. Nɔ̀-lɛ̀ɛ-pɛ̀ nì o kília, o kélɛ̀ nɔ̀-lɛ̀ɛ-pɛ̀ gĩĩ yiè zɛ̀ lɛ́ ò nɔ Wálà lɛ̀ɛ lɛ́ ɓe. Ɛ́ɛ̃́ o sálà-ɓo-pɛ̀ lɛ́ Wálà è à nàà ká, ɛ̃́ɛ̃́ lɛ́ è à zò dàa ká.

¹⁹Ɛ́ɛ̃́ m̀ Wálà lɛ́ɛ̀ lo pɛ séĩ́ lɛ́ lɛ ka mɔ̀ ká sɔ̀lɔ̀ ɓo, lɛ́ lɛ là dɔ-pɔ̀ɔ̀ yí gbùò zɛ̀ kpànazɛ̀, lɛ́ lɛ ɓe Kɛ́lɛ̀ì Zízɛ̀ yí zàáa bàa, lɛ́ɛ̀ lo à síì, áà nɔ̀ ka lɛ̀ɛ.

²⁰Kò Wálà lɛ́ e ko Dàa káa, à tɔ́ è ɓɔ tòá kíli wɔ́lɔ́-wɔ́lɔ́ ká. É kɛ kíli.

²¹Kóò wèè Wálà là mia nì séĩ́ lɛ́ o Kɛ́lɛ̀ì Zízɛ̀ là mia nì káa bà. Kɔa lèe-gé vɔ̀ yé o m píé zèea, óò wèè ka bà.

²²Wálà-mìà séĩ́ lɛ́ o zèea, o wéé ka bà. Kɛɛ kpó-kpó ɓoa, mia yé o Sízà píé-kɛ́ì-mìà káa, óò wèè ka bà.

²³Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ é kɛ ka gɛ̀ɛ̀ píé.