Read Yamano 1 Tɛsàlónìà 1 Bible Online

1 Tɛsàlónìà 1 - Yamano bible

1 Tɛsàlónìà 1

¹Ma Pɔ́ɔ̀, kò Sálɛ̀ wà Témɔ́tè, kóò wèè Wálà-mìà lɛ́ ka Tɛsàlònákà, lɛ́ ka Wálà lɛ́ e mia Dàa káa, wà ko Dàa-mì Zízɛ̀ Kɛ́lɛ̀ì là mia nì káa bà. Zò-kɛ̀-sɛ̀ wà zò-yà-gé é kɛ ka yí-pɛ̀ ká.

²Kóò Wálà zúo ɓo teele ka séĩ́ ka mɔ́ɔ̀ wɔ̃̀ mɔ̀, tó kɔ́áà ka tɔ́ dà teele kò sɛ̀nɛ ɓoò bà.

³Ƃii ko zò lɛ́ɛ̀ vùò kò Wálà lɛ́ e ko Dàa káa wɛlɛ mɔ̀ zi lɛ́ ka yɛɓo kɛá ka zì zò-dɔ̀à-mɔ̀ kolo là, ɛ̃́ɛ̃́ zi lɛ́ mia lɔ̀-kpɔ̀ ka mɔ̀ a kɛá, lɛ́ ka yɛɓo kɛ gáàa, e bɛ̀i, zi lɛ́ ka zò kɛɛ̀ lɛ à ká ko Dàa-mì Zízɛ̀ Kɛ́lɛ̀ì mɔ̀ kpɛ̃ĩ lea mɔ́ɔ̀ wɔ̃̀ mɔ̀.

⁴Ko lèe-gé vɔ̀, kóò à yí dɔ kélɛ̀ ka lɔ̀ kpɔ́ɔ̀ lɛ Wálà mɔ̀, ɛ̃́ɛ̃́ aà ka sí kɛ ká kɛ là mia nì ká.

⁵Ƃii ko nu wɔ̃́ làṹ yièa ká ka píé. Kòó gbaa nu nɔ́ ɓɔ̀ɔ à ká ko lé wɛ́lɛ́ ká. Kɛɛ ko nu à ká yíkɛ̀ gáàa, ɛ̃́ɛ̃́ Gɛ̀ɛ̀ Púlú yí. Ɛ́ɛ̃́ ko à wɔ̃̀ kɛ̀ wánà ká gɛ̃̀ wánà ká fɛ́fɛ́ le. Zi lɛ́ ko kɛ yììpìà à ká lɛ̀ lɛ́ ko kɛ ka píéa káa, káà dɔ. Ko kɛ yìì e kília ɓopìà ka mɔ́ɔ̀ wɔ̃̀ mɔ̀.

⁶Ka ko píé gɔ̃́, tó káà ko Dàa-mì bɛ̃̀ɛ̃ píé gɔ̃̀ nɔ́ kíli. Yé bɛ̃̀ɛ̃ ka wàa ɓèlè nyɔ́ɔ̀ɔ, ka wéé lɛ́ ko kɛ à gèepìàa kṹ ka zɔ̃̀ɔ̃̀ ká géli lɛ́ è go Gɛ̀ɛ̀ Púlú kɛ̀lɛ̀ɛ ká.

⁷À mɔ́ɔ̀ wɔ̃̀ mɔ̀ɔ, ka kɛ gbaa wɔ̃́ gɔ̃̀á ká Wálà-mìà séĩ́ lɛ́ ò go Masèdónà wà Àkéyàa o lɛ̀ɛ.

⁸Ƃii ko Dàa-mì là wééa e gó ka kɛ̀lɛ̀ áà wɛ̃̀ĩ̀. Lɛ̀ɛ́ gbaa wɛ̃̀ĩ nɔ́ ɓɔ̀ɔ Masèdónà wà Àkéyà doó mɔ̀, kɛɛ ka zì zò-dɔ̀ Wálà mɔ̀ mɛ̃̀ĩ̀ aà wɛ̃̀ĩ sɛ́lɛ́ séĩ́ yí nɔ́ kíli. Yé lɛ kília, wɔ̃́ gbɛɛ wá ɓe kɛ kó gèe gbaa.

⁹Mia séĩ́ lɛ́ o yía, óò zi lɛ́ ka ko kpɛ̀ɛ̀ kɛá lɛ̀ lɛ́ ko nu ɓɔɔ̀ ka píéa káa, óò à wɔ̃̀ gèe. Ɛ́ɛ̃́ zeĩ́, óò zi lɛ́ ka ka ko gbɛ̃̀á gbìnì kɛ̀ɛ̀-wɛ́lɛ́ lɛ̀ɛ mɔ̀ lɛ́ ka nìɛ̀ à ká Wálà píéa, óò à wɔ̃̀ gèe. Ka kɛ kíli kɛɛ ká yɛɓo kɛ Wálà wánà zɛ̀ ɛ̃́ɛ̃́ ɓéèea lɛ̀ɛ,

¹⁰ɛ̃́ɛ̃́ kɛ ká yà lúó lɛ́ à Gbe è lo góòá lɛ̀í áà nùáa gɛ̀nɛ̀. À Gbe Zízɛ̀ e kília lɛ́ e à wɛ̀lɛ̀ ga kɛ̀lɛ̀, lɛ́ e ko la Wálà là wɔ̃́à-wàa-kɔ̀ lɛ́ lɛ nupìàa kɛ̀lɛ̀ɛ.