Read Yamano 1 Tɛsàlónìà 3 Bible Online

1 Tɛsàlónìà 3 - Yamano bible

1 Tɛsàlónìà 3

¹À mɔ́ɔ̀ wɔ̃̀ mɔ̀ɔ, kòó gbaa naa kó yà wɔ̃́ e kília yí zéĩ́ gbaa. Kɔa mɔ́ɔ̀ à yà ɓo ko gé kɛ kó tó ko doó ká Átɛ̃̀,

²kɛ kó Témɔ́tè lɛ́ e ko lèe-gé ká, lɛ́ kò ye nì kò yɛɓo kɛ̀ e kíe là Wálà lɛ̀ɛ wɔ̃́ làṹ yiè lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, gèeè káa vɔ ka píé. Ko à vɔ kɛɛ é ka mɛ́ kɛ gágà, ɛ̃́ɛ̃́ kɛ é ka zì zò-dɔ̀à-mɔ̀ wɛ́lɛ́ dà à yí,

³kɛɛ yékɛ̀ ka dò nɔ́ɔ fé é ɓo e dɔ̀lɔ̀ mɔ̀ sã̀-dɔ nì e kéa mɔ́ɔ̀ wɔ̃̀ mɔ̀. Ka dìè káà yí dɔ kélɛ̀ sã̀-dɔ sùua lɛ Wálà zò-kṹ-wɔ̃̀ ká lɛ́ è ɓɔ ko làa.

⁴Ƃii lɛ̀ ko kɛ tĩã́ ka píéa, kɔa gèe ka lɛ̀ɛ líé kélɛ̀ sã̀-dɔ nì lɛ́ɛ̀ lo ɓɔɔ̀ ko là. Ɛ́ɛ̃́ káà à yí dɔ kélɛ̀ wɔ̃́ kpó-kpó nɔ́ɔ lɛ́ è kɛ̀ɛ.

⁵Wɔ̃́ e kéa mɔ́ɔ̀ wɔ̃̀ lɛ́ m̀ mɔ́ɔ̀ Témɔ́tè vɔ ɓoa. M̀ḿ gbaa naa kɛ ḿ yà wɔ̃́ e kília ká dĩĩ le gbaa. À mɔ́ɔ̀ wɔ̃̀ mɔ̀ɔ, ma mɔ́ɔ̀ à vɔ ɓo kɛɛ é ka zì zò-dɔ̀à-mɔ̀ mɛ́ nyɛ. Ɛ́ɛ̃́ kɛ̀ mia Yí-dã́-mì aà ka yí dã́, áà kɛ̀ ko zì yɛɓo lɛ́ kɔa kɛɛ, áà kɛ̀ wɔ̃́ dà tã́ã̀ zɛ̀ ká?

⁶Dɛɛ ká gbaa, Témɔ́tè aà gó ka píé, aà nu e mɛ̀ĩ́ ko píé zèe. Ɛ́ɛ̃́ aà nu ka zì zò-dɔ̀à-mɔ̀, e bɛ̀i, ka zì mia lɔ̀-kpɔ̀-ka-mɔ̀ wɔ̃̀ làṹ yiè ká. Aà à gèe ko lɛ̀ɛ kélɛ̀ káà ka yɛ́lɛ́ yiè tàà ko mɔ́ɔ̀ wɔ̃̀ ká teele, ɛ̃́ɛ̃́ ko gɛ̃̀-lɔ̀ lɛ́ɛ̀ ka kɛ̀ nyɔ́ɔ̀ɔ lɛ̀ zí ka gɛ̃̀-lɔ̀ è ko bɛ̃̀ɛ̃ ko kɛ̀áa ká.

⁷À mɔ́ɔ̀ wɔ̃̀ mɔ̀ɔ, ko lèe-gé vɔ̀, ko zì wɔ̃́ nyɔ́ɔ̀ɔ gɛ̃̀ɛ̃ɛ̃̀ wà wàa ɓèleè yía, ka mɔ́ɔ̀ wɔ̃̀ aà fã̀ã́-wàà nɔ ko lɛ̀ɛ. Ka zì zò-dɔ̀à-mɔ̀ lɛ́ e ko fã̀ã́-wààa.

⁸Ƃii kóò lo kɛɛ̀ ɓe, yé kaà dɔ ka dɔ̀lɔ̀ mɔ̀ kpɛ̃ĩ le ko Dàa-mì yía ká.

⁹Yé lɛ kília, kóò bɛ̀i à mɔ̀ kó Wálà zúo ɓo ka mɔ́ɔ̀ wɔ̃̀ mɔ̀. Kóò à zúo ɓo géli lɛ́ e ko yí kò Wálà wɛlɛ mɔ̀ ka mɔ́ɔ̀ wɔ̃̀ mɔ̀ɔ wɛ̃́ĩ̀.

¹⁰Kóò sɛ̀nɛ ɓo à lɛ̀ɛ fã̀ã́-wàà ká bĩ́ã́ ɛ̃́ɛ̃́ nyɛ́nɛ́ĩ́, kɛɛ é zi kɛ ɓe kɛɛ kó ko nyìɛ yà ka gbĩ-kpàla mɔ̀, ɛ̃́ɛ̃́ kɛ kó pɛ lɛ́ lɛ ka zì zò-dɔ̀à-mɔ̀ mɔ̀ á sɔ̀lɔ̀ ɓoa nɔ ka lɛ̀ɛ.

¹¹Kò Wálà lɛ́ e ko Dàa káa dìè, e bɛ̀i, ko Dàa-mì Zízɛ̀ ò zi ɓo ko ká kɛ kó nu ka píé yi.

¹²Ko Dàa-mì è à kɛ ka zì kíe nì lɔ̀, ɛ̃́ɛ̃́ mia gbɛɛ lɔ̀ lɛ́ à kpɔ́ɔ̀ lɛ ka mɔ̀ɔ, è à kɛ à là é kpɔ́ yí gbùò zɛ̀, kɛ é kɛ gbùò lɛ̀ zí ka lɔ̀ lɛ́ à kpɔ́ɔ̀ lɛ ko mɔ̀ɔ, lɛ à káa lɛ́ ɓe.

¹³Zí e kéa káa, lɛ́ è lo ka zò kɛɛ̀á gágà, ɛ̃́ɛ̃́ lɛ́ɛ̀ lo ka kɛɛ̀ púlú, e bɛ̀i, kɛɛ nyɛɛ̀ lɛ́ɛ̀ lo kɛɛ̀á ka mɔ̀ kò Wálà lɛ́ e ko Dàa káa wɛlɛ mɔ̀, yé ko Dàa-mì Zízɛ̀ wà mia séĩ́ lɛ́ o là mia nì káa, waà nua ká.