Read Yamano 1 Tɛsàlónìà 4 Bible Online

1 Tɛsàlónìà 4 - Yamano bible

1 Tɛsàlónìà 4

¹Ko lèe-gé vɔ̀, m tèáà-là lɛ́ e kélɛ̀, ka zi lɛ́ lɛ ka mɔ̀ ká yìì à ká kɛ é Wálà zò dàa, dã́ ko kɛ̀lɛ̀. Zi lɛ́ ka à kɛpìà káa, ye lɛ́ ɓɛ. Ɛ́ɛ̃́ dɛɛ ká bɛ̃̀ɛ̃, kóò kpé kã ka lɛ̀ɛ, kɔ́áà lìè-wè dɔ̀ ka lɛ̀ɛ ko Dàa-mì Zízɛ̀ tɔ́ yí, kɛɛ ká à kɛ bɛ̃̀ɛ̃ gbùò é diá yi.

²Ƃii káà wɔ̃́ lɛ́ kɔa gèe ka lɛ̀ɛ ká kɛ ko Dàa-mì Zízɛ̀ yía, káà dɔ.

³Wɔ̃́ lɛ́ Wálà à nàà ka kɛ̀lɛ̀ɛ, gɛ̃̀ e ké. Lɛ́ɛ̀ à nàà ká kɛ púlú lé paàa zɛ̀, ɛ̃́ɛ̃́ ká ka dìè ɓo sɔ̃̀ɔ̃ yɔɔ kɛɛ̀ yí.

⁴Lɛ ka doó doó ka mɔ̀ ká zi lɛ́ káá lee síì à káa dɔ. Lɛ ka mɔ̀ ká kɛ zi lɛ́ lɛ à kɛ-zì kpeĩ káa ká, ɛ̃́ɛ̃́ zi lɛ́ mia ò bɛ̀i à mɔ̀ ó à ɓɛ̀lɛ yà à káa ká.

⁵Yékɛ̀ ká kɛ wɔ̃́ yɔɔ kɛ-lɔ̀ à ka kɛɛ̀ mɔ́ɔ̀ wɔ̃̀ mɔ̀, lɛ̀ zí mia lɛ́ òó Wálà dɔɔ ò kɛ̀áa lɛ́ ɓe.

⁶Wɔ̃́ e kéa kɛɛ̀ yía, yékɛ̀ mi gbɛɛ é wɔ̃́ yɔɔ kɛ e lèe-gé ká, ɛ̃́ɛ̃́ kɛ bɛ̃̀ɛ̃ à nyìɛ é fɔ̃́ à yí. Kɔaà wɔ̃́ e kéa gèe ka lɛ̀ɛ do, ɛ̃́ɛ̃́ kɔaà lìè-wè dɔ ka lɛ̀ɛ mɛ́ gágà zɛ̀ kélɛ̀ ko Dàa-mì lɛ́ɛ̀ lo wɔ̃́ sùua kɛ-mìà kṹũ̀ gágà.

⁷Wálà lɛ̀ɛ́ gbaa ko súo kɛ wɔ̃́ lilì kṹã̀a zɛ̀ kɛɛ̀ wɛ̃́ĩ̀. Kɛɛ e ko súo kɛ wɔ̃́ púlú kɛɛ̀ mɔ́ɔ̀ wɔ̃̀ mɔ̀.

⁸À mɔ́ɔ̀ wɔ̃̀ mɔ̀ɔ, mi lɛ́ è pɛ́ e kéa wɔ̃̀ si péĩ́a, ye wá mia ká kɛ é o sí péĩ́. Kɛɛ Wálà lɛ́ è là Gɛ̀ɛ̀ Púlú nɔ ka lɛ̀ɛ, lɛ́ è à si péĩ́a.

⁹Ye wá bɛ̃̀ɛ̃ à mɔ̀ kɛɛ ḿ ka ɓɛ́ĩ̀-ye-mìà lɔ̀-kpɔ̀-ka-mɔ̀ wɔ̃̀ gèe bɛ̃̀ɛ̃ kii bɛ̃̀ɛ̃̀ ka píé ká. Ƃii Wálà aà zi lɛ́ ka kíe nì lɔ̀ áá kpɔ́ɔ̀á ka mɔ̀ɔ zɔ̃̀ɔ̃̀ ka dìè ka lɛ̀ɛ.

¹⁰Ɛ́ɛ̃́ kaà wɔ̃́ e kília kɛ ka ɓɛ́ĩ̀ ye-mìà séĩ́ lɛ́ o Masèdónà lɛ̀ séĩ́ mɔ̀ɔ ká. À mɔ́ɔ̀ wɔ̃̀ mɔ̀ɔ, ko lèe-gé vɔ̀, kóò kpé kã ka lɛ̀ɛ, ká à kɛ bɛ̃̀ɛ̃ gbùò é diá yi.

¹¹Wɔ̃́ nɔ́ ka zò è bɛ̀i kɛɛ̀ à mɔ̀ɔ lɛ́ e kélɛ̀, kɛɛ ká kɛ ɓe zò-yà-gé yí, ɛ̃́ɛ̃́ yékɛ̀ ká ka lé dà mia gbɛɛ wà wɔ̃́ yí, tó káà dɔ̀ ka dìè là, lɛ̀ zí kɔaà à gèeá ka lɛ̀ɛ kpáa lɛ́ ɓe.

¹²Zí e kéa káa, káà lo à kɛɛ̀ tó mia lɛ́ o wá Wálà-mìà káa, wáà ɓɛ̀lɛyà nɔ̀ ka lɛ̀ɛ. Yé aà kɛ kília, kàá ló ka zò dɔɔ̀ mi nɔ́ɔ fé mɔ̀ pɛ lɛ́ lɛ ka mɔ̀ ká sɔ̀lɔ̀ ɓoa mɔ́ɔ̀ wɔ̃̀ ká.

¹³Ko lèe-gé vɔ̀, kóò nàà ká wɔ̃́ lɛ́ à gbɛ̃̀ɛ̃̀ lɛ mia lɛ́ waà gaa mɔ̀ɔ dɔ. Kóò kɛ̀ kíli yékɛ̀ ká kɛ yéĩ̀zɛ̀, lɛ̀ zí mia lɛ́ zò-kɛ̀-pɛ-mɔ̀ wá o yía, o à ká yéĩ̀zɛ̀ɛ lɛ́ ɓe.

¹⁴Kóò à gɛ̃̀ wánà ká kélɛ̀ Zízɛ̀ e ga, e bɛ̀i, e wɛ̀lɛ̀ ga kɛ̀lɛ̀. À mɔ́ɔ̀ wɔ̃̀ mɔ̀ɔ, kóò à gɛ̃̀ wánà ká kélɛ̀ mia lɛ́ waà ga, lɛ́ o zò dɔɔ̀ e kɛá Zízɛ̀ mɔ̀ɔ, Wálà lɛ́ɛ̀ lo nuù wà Zízɛ̀ nì o ká.

¹⁵Wɔ̃́ lɛ́ kò lo à gèeè ka lɛ̀ɛ e kéa, lɛ ko Dàa-mì wéè ká. Ye lɛ́ e kélɛ̀, mia lɛ́ kò lo kɛɛ̀ tĩã́ ɓe lúó lɛ́ ko Dàa-mì è lo nuù à káa káa, kòó ló dɔɔ̀ mia lɛ́ waà gaa mɔ̀ líé.

¹⁶Mia óò lo gbɛ́ɛ́ gágà ɓoò. Óò lo Wálà là vɔ-mì kpànazɛ̀ wéè maà. Wálà là túlú wéè lɛ́ɛ̀ lo dɔɔ̀. Ko Dàa-mì dìè lɛ́ɛ̀ lo góò lɛ̀í e nu tã́ã̀. Mia lɛ́ o zò dɔɔ̀ e kɛá Kɛ́lɛ̀ì mɔ̀ lɛ́ o gaa, óò lo wɛ̀lɛ̀ bèĩzɛ̀.

¹⁷Yé aà kɛ kília, mia lɛ́ kò lo kɛɛ̀ tĩã́ ɓéèe lúó e kília káa, kò ye nì ko síì lɛ́ɛ̀ lo kɛɛ̀á lɛ̀í lɛ̀í-kii yí, kɛɛ kò ko Dàa-mì nì kó ko kíe gɛ̃̀ lɛ̀í. Zí e kéa káa, kò ko Dàa-mì nì kóò lo kɛɛ̀á lɛ̀ doó mɔ̀ teele.

¹⁸À mɔ́ɔ̀ wɔ̃̀ mɔ̀ɔ, kà ka kíe nì fã̀ã́-wàà wɔ̃́ nì e kéa gèeè ká.