Read Yamano 1 Tɛsàlónìà 5 Bible Online

1 Tɛsàlónìà 5 - Yamano bible

1 Tɛsàlónìà 5

¹M lèe-gé vɔ̀, ye wá bɛ̃̀ɛ̃ à mɔ̀ kɛ ḿ lúó wà wɔ̃́-kɛ-lùò e kília mɔ́ɔ̀ kii bɛ̃̀ɛ̃ ɓo ka píé.

²Ƃii ka dìè káà à yí dɔ sɛ̀ kélɛ̀ ko Dàa-mì zì Lúóa lɛ́ɛ̀ lo ɓɔɔ̀ mia là lɛ̀ zí kã̀ã-mì è ɓɔá mia là bĩ́ã́a lɛ́ ɓe.

³Yé mia waà kɛ à gèepìà kélɛ̀ pɛ séĩ́ zò yàà lɛ à gé, ɛ̃́ɛ̃́ wɔ̃́ gbɛɛ wá o mɔ̀ɔ, o yí lɛ́ɛ̀ lo sìè nɔ́ zá le. Òó ló wàà à mɔ̀. Lɛ́ɛ̀ lo kɛɛ̀ kélɛ̀ gé-kɛ lɛ́ è lee kũ nɔ́ zá lea lɛ́ ɓe.

⁴Kɛɛ m lèe-gé vɔ̀, ka yee ka wá bĩ́ tii bà. Ye wá à mɔ̀ kɛɛ Lúó e kília é à kɛ ka lé é pa, lɛ̀ zí kã̀ã-mì à kɛ̀á tó ka lé áà pàa lɛ́ ɓe.

⁵Ka séĩ́-séĩ́ ka lɛ̀-púlú là mia nì ká. Ɛ́ɛ̃́ zeĩ́, ka lɛ̀-kpɛ̀iì là mia ká. Ko wá bĩ́míà, ɛ̃́ɛ̃́ zeĩ́ bĩ́ tii là mia ká.

⁶À mɔ́ɔ̀ wɔ̃̀ mɔ̀ɔ, yékɛ̀ kó kɛ yi bà, lɛ̀ mia yé o tóa lɛ́ ɓe. Lɛ à mɔ̀ kó kɛ ko nyìɛ́, ɛ̃́ɛ̃́ kó kɛ dìè-kũ̀-tã́ã̀ zɛ̀.

⁷Bĩmíà lɛ́ mia ò yi zɛáa. Ɛ́ɛ̃́ bĩ́míà doóa lɛ́ mia ò yɔ miá, tó à kɔ̀ áà dìè o làa.

⁸Kɛɛ ko yee ko lɛ̀-kpɛ̀iì là mia ká, ɛ̃́ɛ̃́ lɛ ko mɔ̀ kó kɛ dìè-kũ̀-tã́ã̀ zɛ̀. Lɛ à mɔ̀ ko zò-là bĩ̀ĩ̀-pɛ̀ lɛ́ kò dà ko mɔ̀ɔ, é kɛ zò-dɔ̀à-mɔ̀ wà mi lɔ̀-kpɔ̀ mi mɔ̀ ká. Ɛ́ɛ̃́ lɛ à mɔ̀ kɔ́á kɔa zì zò-kɛ̀-la-ɓoa mɔ̀ɔ sí, kɔ́á yà kɔa wĩĩ́ kɔa zì gèlè-gɔ̃ gbàlá ká.

⁹Wálà lɛ̀ɛ́ gbaa ko sí kɛ à zì wɔ̃́à-wàa-kɔ̀ é nu ko là. Kɛɛ a kɛ kíli kɛɛ kó la-ɓo sɔ̀lɔ̀ ɓo ko Dàa-mì Zízɛ̀ Kɛ́lɛ̀ì kolo là.

¹⁰E ga ko mɔ́ɔ̀ wɔ̃̀ mɔ̀, kɛɛ zi é kɛ ɓe kɛ kò ye nì kó kɛ ko kíe là, yé bɛ̃̀ɛ̃ ko gaà é kɛá, ɛ̃́ɛ̃́ kó kɛ bɛ̃̀ɛ̃ ɓéèea ká.

¹¹Wɔ̃́ e kéa mɔ́ɔ̀ wɔ̃̀ mɔ̀ɔ, kà ka kíe nì fã̀ã́-wàà wè gèe, ɛ̃́ɛ̃́ kà gbũ ka kíe nì mɔ̀, lɛ̀ zí kà à kɛ̀á dɛɛ káa lɛ́ ɓe.

¹²Ko lèe-gé vɔ̀, kóò kpé kã ka lɛ̀ɛ ɓɛ̀lɛyà nɔ̀ mia lɛ́ ò yɛɓo kɛ̀ ka bà yia lɛ̀ɛ mɔ́ɔ̀ wɔ̃̀ mɔ̀. O lɛ́ o mia lɛ́ ò ka líé si ko Dàa-mì yí, ɛ̃́ɛ̃́ lɛ́ ò wɔ̃́ kɛ-zì zɔ̃̀ɔ̃̀ ka lɛ̀ɛ káa.

¹³Kà ɓɛ̀lɛyà kpànazɛ̀ nɔ o lɛ̀ɛ o lɔ̀-kpɔ̀-ka-mɔ̀ ká yɛɓo lɛ́ ò à kɛ̀ɛ mɔ́ɔ̀ wɔ̃̀ mɔ̀. Zò-yà-gé è kɛ ka fĩ̀ã̀.

¹⁴Ko lèe-gé vɔ̀, wɔ̃́ lɛ́ kò nàà ká kɛɛ, gɛ̃̀ e ké. Kà lìè-wè dɔ mia fíàa zɛ̀ lɛ̀ɛ. Kà mia lɛ́ yɛ́lɛ̀ è o kɛ̀ wɔ̃́ kɛɛ̀ yía, o kɛ o fã̀ã́ é wàà. Kà gbũ mia lɛ́ o mɛ́ wá gágàa mɔ̀. Kà ka zò kṹ ka gé mia séĩ́ kɛ-wɔ̃̀ ká.

¹⁵Yékɛ̀ ká tó kɛɛ mi nɔ́ɔ fé é wɔ̃́ yɔɔ dɛ̀í dà wɔ̃́ yɔɔ ká. Kɛɛ kà wɔ̃́ yiè kɛ̀ ka kíe nì ká, ɛ̃́ɛ̃́ mia séĩ́ ká zì naa teele.

¹⁶Kà géli kɛ teele.

¹⁷Kà sɛ̀nɛ ɓo teele.

¹⁸Mɛɛ wɔ̃̀ é kɛ bɛ̃̀ɛ̃ ka káa, kà Wálà zúo ɓo. Ƃii ka zì kɛ̀ Kɛ́lɛ̀ì Zízɛ̀ yía, wɔ̃́ Wálà à nàà ká kɛɛ, lɛ́ ɓɛ.

¹⁹Yékɛ̀ ká Gɛ̀ɛ̀ Púlú tèá wɔ̃́ lɛ́ à nàà á kɛɛ kɛɛ̀ mɔ̀.

²⁰Yékɛ̀ ka nyìɛ é fɔ̃́ wɔ̃́ lɛ́ Wálà à kàà mia lé ó gèea yí.

²¹Kà pɛ séĩ́ yí dã́. Kà kùnù pɛ lɛ́ lɛ sɛ̀ɛ mɔ̀.

²²Kà ka yí ɓo wɔ̃́ yɔɔ doò do kɛɛ̀ mɔ̀.

²³Wálà lɛ́ è zò-yà-gé nɔ kɔa lɛ̀ɛ, è ka kɛ púlú fɛ́fɛ́ le, ɛ̃́ɛ̃́ è e nyìɛ kɛ ka lɛ̀ séĩ́ lɛ́ e ka gɛ̀ɛ̀, wà ka zò, e bɛ̀i ka gbĩ-kpàla káa mɔ̀, kɛ o laà é kɛá kɛɛ séĩ́ kɛ̀lɛ̀ yé ko Dàa-mì Zízɛ̀ Kɛ́lɛ̀ì aà nua ká.

²⁴Mi lɛ́ è ka súo kɛ̀ɛ, lɛ́ è lo à kɛɛ̀ɛ. Ƃii lɛ zò-dɔ̀à-mɔ̀ zɛ̀ɛ mɔ́ɔ̀ wɔ̃̀ mɔ̀.

²⁵Ko lèe-gé vɔ̀, kà sɛ̀nɛ ɓo ko mɔ́ɔ̀ wɔ̃̀ mɔ̀ nɔ́ kíli.

²⁶Kà wéé ka lèe-gé vɔ̀ séĩ́ píé ka bè gbɛ̃̀ o kpéĩ́ mɔ̀ ká lɛ̀ zí wáá kɛɛ̀áa ká.

²⁷Ḿm̀ gèe ka lɛ̀ɛ ko Dàa-mì tɔ́ yí kélɛ̀ kà kíí e kéa gèe ko lèe-gé vɔ̀ séĩ́ lɛ́ o yía lɛ̀ɛ.

²⁸Ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ é kɛ ka píé.