Read Yamano 2 Tɛsàlónìà 1 Bible Online

2 Tɛsàlónìà 1 - Yamano bible

2 Tɛsàlónìà 1

¹Ma Pɔ́ɔ̀, kò Sálɛ̀ wà Témɔ́tè, kóò wèè Wálà-mìà lɛ́ ka Tɛsàlònákà, lɛ́ ka kɔ̀à Wálà wà kɔa Dàa-mì Zízɛ̀ Kɛ́lɛ̀ì là mia nì káa bà.

²Wálà lɛ́ e mia Dàa káa, wà kɔa Dàa-mì Zízɛ̀ Kɛ́lɛ̀ì o zì zò-kɛ̀-sɛ̀ɛ é kɛ ka píé, wáà zò-yà-gé nɔ̀ ka lɛ̀ɛ.

³Ko lèe-gé vɔ̀, lɛ à mɔ̀ kɔ́á Wálà zúo ɓo lúó séĩ́ ká ka mɔ́ɔ̀ wɔ̃̀ mɔ̀. Lɛ kpeĩ kɛ kɔ́á kɛ kíli, ɓii ka zì zò-dɔ̀à-mɔ̀ yí lɛ kɛpìà gbùò, ɛ̃́ɛ̃́ lɔ̀-kɛ̀à-mɔ̀ lɛ́ e ka yí doó doó ka kíe nì mɔ́ɔ̀ wɔ̃̀ mɔ̀ɔ, à là lɛ kpɔ́pìà.

⁴Ye lɛ́ ko dìè kò mɔ́ɔ̀ lé-gbùò-là kɛ ɓo ka mɔ́ɔ̀ wɔ̃̀ mɔ̀ lɛ̀ doò do lɛ́ Wálà-mìà o yía mɔ̀ɔ mɔ̀ɔ. Kóò lé-gbùò-là kɛ̀ zi lɛ́ kà ka zò kũ à ká tã́ã̀, tó káà lò ka líé zò-dɔ̀à-mɔ̀ yí zàá, sã̀-dɔ wà wɔ̃́ nyɔ́ɔ̀ɔ séĩ́ ɓɔ̀ ka là yía mɔ́ɔ̀ wɔ̃̀ mɔ̀.

⁵Wɔ̃́ e kéa lɛ́ɛ̀ à zɔ̃̀ɔ̃̀ kélɛ̀ zi lɛ́ Wálà è mɛ̀ĩ́-sà ɓo à káa lɛ kpeĩ. Ƃii wɔ̃́ nì e kéa lɛ́ɛ̀ lo ka kɛɛ̀, tó bɛ̀i e kɛ ka mɔ̀ kɛ ká kɛ Wálà zì tò-mia-là lɛ́ kà mɔ́ɔ̀ wàa ɓèlèa wì.

⁶Wálà lɛ́ɛ̀ lo wɔ̃́ lɛ́ lɛ kpeĩa kɛɛ̀. Lɛ́ɛ̀ lo à kɛɛ̀ tó mia lɛ́ ò ka kɛ̀ káà wàa ɓèlèa, o kɛɛ̀ wáà wàa ɓèlè nɔ́ kíli.

⁷Ɛ́ɛ̃́ lɛ́ɛ̀ lo mia lɛ́ kà wàa ɓèlè, é dàá ko bàa, ko ɓoò ɓɛ̀lɛ̀ yí. Lɛ́ɛ̀ lo wɔ̃́ e kéa kɛɛ̀ yé ko Dàa-mì Zízɛ̀ aà ɓíé lɛ̀í-kii yí wà là vɔ-mìà mɛ́ gágà zɛ̀ɛ wáà nùa ká.

⁸Óò lo nuù tíé kṹã̀a gbùò yí kɛ ó wɔ̃́ nyɔ́ɔ̀ɔ kɛ mia lɛ́ òó Wálà dɔ, wà o yé lɛ́ òó wɔ̃́ lɛ́ wɔ̃́ làṹ yiè lɛ́ à gbɛ̃̀ɛ̃̀ lɛ ko Dàa-mì Zízɛ̀ mɔ̀ɔ, è à gèea, òó kɛɛ ká.

⁹Wɔ̃́ nyɔ́ɔ̀ɔ lɛ́ ò lo à gɛ̃̀ɛ̃̀ɛ, lɛ́ e kélɛ̀, kɛ́ ò lo à ɓoò mia yí-sìè-pìà tòá kíli káa káa. O ɓoò lɛ́ɛ̀ lo kɛɛ̀á ko Dàa-mì wà e zì yíkɛ̀ gáàa kpànazɛ̀ɛ wɛlɛ mɔ̀ bá le.

¹⁰Lɛ́ɛ̀ lo kɛɛ̀ kíli yé ko Dàa-mì aà nu Lúó e kília ká, kɛ é tɔ́-ɓɔ sɔ̀lɔ̀ ɓo áà gò là mia nì séĩ́ kɛ̀lɛ̀, ɛ̃́ɛ̃́ kɛ zeĩ́ é ɓɛ̀lɛyà lɛ́ è go mia séĩ́ lɛ́ waà o zò dɔ à mɔ̀ɔ kɛ̀lɛ̀ɛ sɔ̀lɔ̀ ɓoa ká. Ka bɛ̃̀ɛ̃ káà lo kɛɛ̀ o dò ká, ɓii kaà wɔ̃́ lɛ́ kɔaà à gèe ka lɛ̀ɛ gɛ̃̀ wánà káa mɔ́ɔ̀ wɔ̃̀ mɔ̀.

¹¹Wɔ̃́ e kéa mɔ́ɔ̀ wɔ̃̀ lɛ́ kò mɔ́ɔ̀ sɛ̀nɛ ɓo ka wɛ̃́ĩ̀ teelea. Kóò sɛ̀nɛ ɓo kò Wálà lɛ̀ɛ kɛ é ka kɛ kpeĩ wɔ̃́ lɛ́ aà mɔ́ɔ̀ ka súo kɛ ɓoa mɔ́ɔ̀ wɔ̃̀ mɔ̀. À zì yíkɛ̀ gáàa è à kɛ kɛɛ wɔ̃́ yiè séĩ́ lɛ́ à kɛ-lɔ̀ è ka kɛ̀ɛ, kɛ à kɛ-kɔ̀ é kɛ ka là, ɛ̃́ɛ̃́ á kɛ ká yɛɓo lɛ́ ka zì zò-dɔ̀à-mɔ̀ à kɛ̀ɛ líé nyɛ.

¹²Zí e kéa káa, ko Dàa-mì Zízɛ̀ tɔ́ lɛ́ɛ̀ lo tɔ́-ɓɔ lɛ́ è go ka kɛ̀lɛ̀ɛ sɔ̀lɔ̀ ɓoò. Ɛ́ɛ̃́ ka bɛ̃̀ɛ̃ káà lo tɔ́-ɓɔ lɛ́ è go à kɛ̀lɛ̀ɛ sɔ̀lɔ̀ ɓoò kò Wálà wà ko Dàa-mì Zízɛ̀ Kɛ́lɛ̀ì zì zò-kɛ̀-sɛ̀ɛ kolo là.