Read Yamano 1 Témɔ́tè 1 Bible Online

1 Témɔ́tè 1 - Yamano bible

1 Témɔ́tè 1

¹Óò m si Pɔ́ɔ̀. M Kɛ́lɛ̀ì Zízɛ̀ là àpɔ́sɔ̀lɔ̀ ká, ɓii ko La-mì Wálà, e bɛ̀i Kɛ́lɛ̀ì Zízɛ̀ lɛ́ ko zò lɛ à mɔ̀ɔ, waà gèe ḿ kɛáa mɔ́ɔ̀ wɔ̃̀ mɔ̀.

²Témɔ́tè lɛ́ i m̀ nɛ́ wánà zɛ̀ ká zò-dɔ̀à-mɔ̀ wɔ̃̀ kolo là zàáa, ḿm̀ wèè i bà. Wálà lɛ́ e mia Dàa káa, wà kɔa Dàa-mì Kɛ́lɛ̀ì Zízɛ̀, o zì zò-kɛ̀-sɛ̀, ɛ̃́ɛ̃́ zeĩ́, o zì mia yéĩ̀ kṹũ̀a é kɛ i píé, wáà zò-yà-gé nɔ̀ i lɛ̀ɛ.

³Ḿm̀ nàà í tó Ɛ́fɔ́sɔ̀, lɛ̀ zí nɔ́ maà gèeá i lɛ̀ɛ lɛ̀ lɛ́ m kɛ lópìà Masèdónàa káa lɛ́ ɓe. Mia dò o yía o pɛ gbɛɛ zɔ̃̀ɔ̃̀pìà mia lɛ̀ɛ à lɛ̀ mɔ̀. Ì à gèe o lɛ̀ɛ ó tèá à zɔ̃̀ɔ̃ɔ̃̀ ká.

⁴À gèe o lɛ̀ɛ ó kã́ pĩ̀ã̀ nì, ɛ̃́ɛ̃́ mia ye-gã̀ gbèkèni lɛ́ ò pɛ̀ɛ̀ yia lɛ̀ɛ. Ƃii wɔ̃́ nì e kéa kɛɛ̀ lɛ́ɛ̀ nu tèé dàaà ká. Wɔ̃́ nì e kéa ye wá sɛ̀ Wálà là wɔ̃́ lɛ́ aà yà e géa mɔ́ɔ̀ wɔ̃̀ mɔ̀. Ƃii Wálà zì wɔ̃́ e kília, mia óò à dɔ zò-dɔ̀à-mɔ̀ kolo là zàá.

⁵Pɛ́ è kɛ̀ lɛ́ m̀ mɔ́ɔ̀ wɔ̃̀ nì e kéa gèe ɓo ɓá kɛɛ, gɛ̃̀ e ké. Ye lɛ́ e kélɛ̀, lɔ̀-kɛ̀à-mɔ̀ lɛ́ è go mi zò píé púlú zɛ̀ lɛ́ à zò lɛ̀ɛ́ mɛ̀ à mɔ̀ɔ gé, lɛ́ zò-dɔ̀à-mɔ̀ wánà zɛ̀ lɛ à yía, é kɛ ɓe.

⁶Gɔ̃ã̀ dò waà o ko gbɛ̃̀ wɔ̃́ nì sùua mɔ̀, ɛ̃́ɛ̃́ waà gó zi lèe mɔ̀ o zì wɔ̃́ yí gíniìa zɛ̀ gèeè o kíe nì lɛ̀ɛ kolo là zàá.

⁷Óò nàà ó kɛ Wálà là lɔ́ɔ̀ɔ zɔ̃̀ɔ̃̀-mìà ká. Kɛɛ òó o dìè-tĩ́ lé-wè yí ma. Ɛ́ɛ̃́ òó wɔ̃́ lɛ́ ò à gèe e mɛ́ gágà zɛ̀ káa yí ma.

⁸Kóò à yí dɔ kélɛ̀ Lɔ́ɔ̀ɔ lɛ sɛ̀ yé waà wɔ̃́ kɛá e kɛ-zì káa ká.

⁹Kóò à yí dɔ kélɛ̀ òó gbaa lɔ́ɔ̀ɔ kɛ wɔ̃́ kpeĩ kɛ-mìà lɛ̀ɛ. Kɛɛ à kɛɛ̀ lɛ míá o kéa o lɛ̀ɛ. O lɛ́ o kélɛ̀, lɔ́ɔ̀-sìè-mìà, e bɛ̀i mia lɛ́ òó mia wéè kɛɛ, ɛ̃́ɛ̃́ zeĩ́ mia lɛ́ ò wɔ̃́ yɔɔ kɛ̀ Wálà gbĩ mɔ̀ɔ, e bɛ̀i kɛ-wɔ̃̀ yɔɔ kɛ-mìà, ɛ̃́ɛ̃́ mia lɛ́ o wá Wálà là mia nì ká, lɛ́ òó gbini à lɛ̀ɛ káa. O dò lɛ́ zeĩ́ e mia lɛ́ ò o dàa nì, ɛ̃́ɛ̃́ lèe nì zɛɛò, ɛ̃́ɛ̃́ mia zɛ-mìà,

¹⁰ɛ̃́ɛ̃́ zeĩ́ sɔ̃̀ɔ̃ yɔɔ kɛ-mìàò, e bɛ̀i, mia lɛ́ ò o ɓɛ́ĩ̀ nì kɛ̀ o na káaò, ɛ̃́ɛ̃́ mia lɛ́ ò mia kã̀ã ɓoaò, e bɛ̀i, nɛ̀-kɛ-mìà, ɛ̃́ɛ̃́ zeĩ́ fùlu kélá-wè ɓo-mìà, ɛ̃́ɛ̃́ é dàá mia lɛ́ ò wɔ̃́ nɔ́ɔ fé kɛ̀ lɛ́ wà pɛ-zɔ̃̀ɔ̃̀-kɔ̀ wánà zɛ̀ɛ òó wéé o kíe nì wéè mɔ̀ɔ káa.

¹¹Pɛ-zɔ̃̀ɔ̃̀-kɔ̀ wánà zɛ̀ e kília, lɛ wɔ̃́ làṹ yiè lɛ́ Wálà aà dɔ̀ kɛ m kɛ̀lɛ̀ɛ yí. Wɔ̃́ làṹ yiè e kília, lɛ́ɛ̀ go Wálà kpànazɛ̀ lɛ́ kò tɔ́ ɓɔɔ píé.

¹²Ḿm̀ ko Dàa-mì Kɛ́lɛ̀ì Zízɛ̀ lɛ́ aà yíkɛ̀ gáàa nɔ m lɛ̀ɛ m̀ yɛɓoa kɛɛ̀ mɔ́ɔ̀ wɔ̃̀ mɔ̀ɔ zúo ɓo. Ḿm̀ à zúo ɓo m gɛ̃̀ a ɓo mi zò-dɔ̀à-mɔ̀ zɛ̀ ká, lɛ́ e m sí kɛ ḿ là yɛɓo kɛɛ mɔ́ɔ̀ wɔ̃̀ mɔ̀.

¹³A kɛ kíli, yé bɛ̃̀ɛ̃ m kɛ wɔ̃́ yɔɔ gèepìà à gbĩ mɔ̀ bèĩzɛ̀, ɛ̃́ɛ̃́ lɛ́ m à sã̀ dɔ máà lé-kã́ kɛ̀ à mɔ̀ɔ káa ká. Kɛɛ Wálà e m yéĩ̀ kṹ, ɓii zò-dɔ̀à-mɔ̀ lɛ̀ɛ́ gbaa kɛ m yí, ɛ̃́ɛ̃́ wɔ̃́ m kɛ à kɛpìàa, m̀ḿ gbaa kɛ à yí dɔpìàa ká.

¹⁴Ko Dàa-mì e e zì zò-kɛ̀-sɛ̀ káá m là yí gbùò zɛ̀, ɛ̃́ɛ̃́ e zò-dɔ̀à-mɔ̀ wà lɔ̀-kɛ̀à-mɔ̀ lɛ́ e kò pɛ ká kò Kɛ́lɛ̀ì Zízɛ̀ nì ko kɛ̀ doó yía kolo là zàáa, a nɔ m lɛ̀ɛ.

¹⁵Wɔ̃́ mia ò gèea lɛ wɔ̃́ wánà zɛ̀ lɛ́ mi ì bɛ̀i à mɔ̀ í i kɔ̀ yà à wì zi séĩ́ ká, ɛ̃́ɛ̃́ ɓá gɛ̃̀ wánà káa ká. Ye lɛ́ e kélɛ̀, Kɛ́lɛ̀ì Zízɛ̀ e nu tã́ã̀ zèe kɛ é kɛ-wɔ̃̀ yɔɔ kɛ-mìà la. M kɛ-wɔ̃̀ yɔɔ kɛ-mìà beĩ ká.

¹⁶E kɛ wɔ̃́ e kéa mɔ́ɔ̀ wɔ̃̀ ká lɛ́ Wálà e m yéĩ̀ kṹ, kɛɛ Zízɛ̀ Kɛ́lɛ̀ì é e zì zò-kũ̀-tã́ã̀ lɛ́ lɛ̀ɛ́ nyɛɛ, zɔ̃̀ɔ̃̀ mia lɛ̀ɛ. A zɔ̃̀ɔ̃̀ zi lɛ́ e wɔ̃́ kɛá kɛ-wɔ̃̀ yɔɔ kɛ-mì beĩ lɛ́ e m káa lɛ̀ɛ kolo là zàá. A kɛ kíli kɛ é kɛ wɔ̃́ gɔ̃̀á ká mia séĩ́ lɛ́ ò lo o zò dɔɔ̀ à mɔ̀, ɛ̃́ɛ̃́ lɛ́ ò lo kɛ̀ɓe wɔ́lɔ́-wɔ́lɔ́ sɔ̀lɔ̀ ɓoòa lɛ̀ɛ.

¹⁷Mia Líé-sí-mì lɛ́ lɛ ɓe tòá kíli ká, lɛ́ ga là wɔ̃́ wá à mɔ̀, ɛ̃́ɛ̃́ lɛ́ òó gɛ̃̀, lɛ́ à ye lɛ́ nɔ́ lɛ Wálà káa, ò à ɓɛ̀lɛ yà, wáà à tɔ́ ɓɔ̀ tòá kíli wɔ́lɔ́-wɔ́lɔ́ ká. É kɛ kíli.

¹⁸M̀ nɛ́ Témɔ́tè, wɔ̃́ kɛ-wɔ̃̀ e kéa, maà à kpɔ́ gbaa i kɔ̀ là. Wɔ̃́ lɛ́ Wálà aà káá mɔ́ mia lé é gbɛ̃̀á i mɔ̀, lɛ́ waà à gèea, wà wɔ̃́ e kéa o doó. Wɔ̃́ lɛ́ wa gèe kília, è kɛ ɓà gèlè-gɔ̃-pɔ̀ɔ̀ ká lɛ̀ lɛ́ i gèlè yiè gɔ̃pìàa ká.

¹⁹I zò dɔɔ̀ è kɛá Wálà mɔ̀ teele. Ɛ́ɛ̃́ yékɛ̀ í i zò-mɛ̀-i-mɔ̀ wɔ̃̀ kɛ. Mia dò waà o wũ ɓo wɔ̃́ lɛ́ o zò gíkã́ à gèe ó kɛɛ wì, ɛ̃́ɛ̃́ o zì zò-dɔ̀à-mɔ̀ aà kã́ gbaa e kíe lé.

²⁰Hàmìníà wà Ɛ́lèzánà o míá o kília o dò ká. Maà o nɔ gbaa Sétɔ̃̀ lɛ̀ɛ, kɛ ó wɔ̃́ dã́ à mɔ̀ kélɛ̀ ye wá kpeĩ kɛ ó wɔ̃́ yɔɔ gèe Wálà gbĩ mɔ̀.