Read Yamano 1 Témɔ́tè 3 Bible Online

1 Témɔ́tè 3 - Yamano bible

1 Témɔ́tè 3

¹Wɔ̃́ mia ò gèe e kéa lɛ wánà zɛ̀. Óò gèe kélɛ̀, é kɛ̀á mi dò láà nàà é Wálà-mìà líé-sí-yɛ̀ɓo kɛɛ, yɛɓo lɛ́ à nàà kília lɛ dóo yɛɓo yiè kpó-kpó ká.

²Zi lɛ́ Wálà-mìà líé-sí-mì áá kɛɛ̀áa, gɛ̃̀ e ké. Yékɛ̀ kɛɛ é kɛ à mɔ̀. Laa mɔ̀ à na é kɛ nɔ́ doó. Laa mɔ̀ é e dìè kṹ tã́ã̀. Lɛ sɛ̀ é e líé dɔ wɔ̃́ kɛɛ̀ yí, ɛ̃́ɛ̃́ zeĩ́ é wɔ̃́ kɛ e kpáá yí. Laa mɔ̀ é kɛ mí è lɔ̀ɔ̀-mìà wɔ̀lɔ̀ kpɔɔ ká. Laa mɔ̀ bɛ̀i é kɛ à mɔ̀ é pɛ zɔ̃̀ɔ̃̀.

³Yékɛ̀ é kɛ mi lɛ́ yɔ-yíí-mi wɔ̃̀ diè lɛ à zò káa ká. Yékɛ̀ é kɛ mi gana zɛ̀ ká. Kɛɛ è kɛ mi kpóló kpɔ̀ mɔ̀ zɛ̀, ɛ̃́ɛ̃́ zò-kũ̀-gé mì ká. Yékɛ̀ é kɛ mi lɛ́ pɛlèe wɔ̃̀ diè lɛ à zò káa ká.

⁴Lɛ à mɔ̀ bɛ̀i é kɛ à mɔ̀ é líé sí e píé-kɛ́ì-mìà ká e yiè ká, ɛ̃́ɛ̃́ é à kɛ là nɔ́ɔ̀ ó à wéè kɛ, wáà kpàà-ká nɔ̀ à lɛ̀ɛ zi nɔ́ɔ fé ká.

⁵Ƃii yé mi lɛ̀ɛ́ bɛ̀i líé síì e píé-kɛ́ì-mìà káa, zi sùu kpɛɛ̀ lɛ́ è lo e yɛ́lɛ́ kɛɛ̀á Wálà-mìà yee mɔ̀?

⁶Yékɛ̀ é kɛ mi lɛ́ e e zò nìɛ̀ dɛɛ ká. Ƃii mí e kília fɔ̀ɔɔ̀ lɛ́ɛ̀ lo lèĩ kɛɛ̀á dìè-sì-gbùò ká, ɛ̃́ɛ̃́ mɛ̀ĩ́-sà lɛ́ɛ̀ lo káà à wĩĩ́, lɛ̀ zí e káá à ká Dɛ́ɓò wĩĩ́a lɛ́ ɓe.

⁷Ɛ́ɛ̃́ zeĩ́, è kɛ mi lɛ́ mia lɛ́ o wá Wálà-mìà káa ò à ɓɛ̀lɛ yàa ká, yékɛ̀ wɔ̃́ yɔɔ lɛ́ mia ò bɛ̀i à mɔ̀ ó gèe à gbĩ mɔ̀ɔ é kɛ ɓe, ɛ̃́ɛ̃́ yékɛ̀ Dɛ́ɓò zì pɛ́lɛ́ é à kṹ.

⁸Zi nɔ́ doóa káa, lɛ à mɔ̀ gbũ̀-Wálà-mìà-mɔ̀ mìà bɛ̃̀ɛ̃ o sɔ̃̀ɔ̃ é kɛá sɛ̀. Yékɛ̀ o nanà é kɛ o lé pèèlɛ. Yékɛ̀ ó kɛ wã́ã́ĩ̀ là lùò ká. Yékɛ̀ pɛlèe sɔ̀lɔ̀ ɓò yɛ̀ì-yɛ́í ká mɔ́ɔ̀ fã̀ã́-wàà é kɛ o yí.

⁹Lɛ o mɔ̀ ó kùnù zò-dɔ̀à-mɔ̀ wɔ̃̀ lɛ́ lɛ́ɛ́ aà ɓo à là ko lɛ̀ɛ mɔ̀ zò yiè là ká.

¹⁰Lɛ mia mɔ̀ ó míá o kília bɛ̃̀ɛ̃ yí dã́ nɔ́ kíli. Yé waà die yí-dã́ e kília yía kɛ ó tĩã́ yɛɓo e kília kɛɛ̀.

¹¹Laa mɔ̀ o na nì bɛ̃̀ɛ̃ sɔ̃̀ɔ̃ é kɛ sɛ̀. Yékɛ̀ ó lùe ɓo. Lɛ à mɔ̀ ó o dìè kṹ tã́ã̀, ɛ̃́ɛ̃́ ó kɛ zò-dɔ̀à-mɔ̀ zɛ̀ wɔ̃́ séĩ́ kɛɛ̀ yí.

¹²Lɛ à mɔ̀ gbũ̀-Wálà-mìà-mɔ̀ mì na é kɛ nɔ́ doó. Lɛ à mɔ̀ é là nɔ́ɔ̀ ɛ̃́ɛ̃́ e píé-kɛ́ì-mìà séĩ́ líé sí e yiè ká.

¹³Mia lɛ́ ò yɛɓo yiè kɛ̀ɛ, óò o dɔ̀lɔ̀ yiè gɛ̃̀ à kɛɛ̀ yí. Ɛ́ɛ̃́ bɛ̀i lɛ o mɔ̀ ó o zì zò-dɔ̀-Kɛ́lɛ̀ì-Zízɛ̀-mɔ̀ wɔ̃̀ gèe nyìɛ gágà là ká.

¹⁴Yé bɛ̃̀ɛ̃ m kii e kéa bɛ̃̀ɛ̃ i píéa, m zò lɛ yí kɛ ḿ nu ɓɔ i píé dɛɛ ká.

¹⁵Kɛɛ yé maà tó zízàá gbèĩ nuù mɔ̀ɔ, kíí e kéa lɛ́ɛ̀ lo zi lɛ́ kɔ́áá wɔ̃́ kɛɛ̀ à ká Wálà là mia nì bàa zɔ̃̀ɔ̃̀ i lɛ̀ɛ. Wálà là mia nì o kília, lɛ́ o Wálà ɓéèe ɓɛ là ká lɛ́ e wɔ̃́ wánà zɛ̀ɛ gɛ̀nɛ̀-yìlì wà à kũ̀-lɛ̀í-pɛ̀ káa.

¹⁶Wɔ̃́ lɛ́ à gbɛ̃̀ɛ̃̀ lɛ ko zì gbìnì Wálà lɛ̀ɛ mɔ̀, lɛ́ à bĩ̀ĩĩ̀ e kɛáa, lɛ dóo wɔ̃́ kpànazɛ̀ ká. Ɛ́ɛ̃́ mi gbɛɛ lɛ̀ɛ́ bɛ̀i à tèé ɓoò. Wɔ̃́ e kília gɛ̃̀ e ké. E kɛ mi ká lɛ̀ lɛ́ e ɓɔ mia làa ká. Gɛ̀ɛ̀ Púlú a zɔ̃̀ɔ̃̀ mia lɛ̀ɛ kélɛ̀ lɛ wánà zɛ̀. Wálà là vɔ-mìà wa gɛ̃̀. O à wɔ̃̀ gèe sɛ́lɛ́ gbɛɛ̀ gbɛɛ yí píé. O à wɔ̃̀ gɛ̃̀ wánà ká kpóṹ là zèe. Ɛ́ɛ̃́ o ló à ká lɛ̀ fɔ̀nɔ-pìà lɛ́ e lɛ̀ía mɔ̀.