Read Yamano 1 Témɔ́tè 4 Bible Online

1 Témɔ́tè 4 - Yamano bible

1 Témɔ́tè 4

¹Gɛ̀ɛ̀ Púlú láà gèe e yí púlú zɛ̀ ká kélɛ̀ yé lúó aà die ɓɛ̀lɛ̀ píé gbèĩ zɛ̀ɛ, mia dò óò lo góò zò-dɔ̀à-mɔ̀ wɔ̃̀ɔ lɛ̀ɛ. Óò lo pɛ vɔ̀ lɛ́ ò nɛ̀ kɛ̀ɛ wéè kɛɛ̀. Óò lo tóò pɛ yɔɔ vɔ̀ wà pɛ-zɔ̃̀ɔ̃̀-kɔ̀ píé.

²Pɛ-zɔ̃̀ɔ̃̀-kɔ̀ e kília, lɛ́ɛ̀ go mia lɛ́ ò nɛ̀ kɛ̀ɛ o zì mia bèkɛ̀-ɓo-kɔ̀ yí zàá. O zì zò gíkã́ lɛ dífá-dìfà, lɛ̀ pɛ lɛ́ pɛ kúlú tíèe vɔ̀ɔ a gélé.

³Míá o kéa óò pɛ zɔ̃̀ɔ̃̀ wáà gèè kélɛ̀ mia wà o kíe nì síì lɛ wɔ̃́ yɔɔ ká. Ɛ́ɛ̃́ zeĩ́, lɛ yɔɔ kɛ ó léɓèlè sùu dò ɓèlè. Kɛɛ Wálà aà léɓèlè nì o kéa kɛ kɛɛ mia yé waà o zò dɔ à mɔ̀, ɛ̃́ɛ̃́ lɛ́ waà kɛ wánà-wɔ̃̀ɔ yí-dɔ-mìà káa, kɛ ó Wálà zúo gèe wáà ɓèlè.

⁴Ƃii pɛ séĩ́ lɛ́ Wálà aà kɛɛ lɛ sɛ̀. Pɛ gbɛɛ wá ɓe kɛ mi í i wũ ɓo à wì. Kɛɛ lɛ i mɔ̀ í o séĩ́ o sɔ̀lɔ̀ ɓo Wálà zúo ɓoò ká.

⁵Ƃii Wálà là wééa, e bɛ̀i sɛ̀nɛ ɓoò aà o kɛ kpeĩ.

⁶Yé ɓaà wɔ̃́ kɛ-zì lɛ́ m̀ gèe i lɛ̀ɛ e kéa nɔ lèe-gé vɔ̀ yé o tóa lɛ̀ɛ, íì lo kɛɛ̀ yɛɓo-kɛ-mì kpeĩ ká Kɛ́lɛ̀ì Zízɛ̀ lɛ̀ɛ. Íì lo léɓèlè lɛ́ i gɛ̀ɛ̀ è lo à naà káa sɔ̀lɔ̀ ɓoò. Léɓèlè e kília lɛ́ e kélɛ̀, wéé lɛ́ à gbɛ̃̀ɛ̃̀ lɛ zò-dɔ̀à-mɔ̀ wɔ̃̀ mɔ̀, ɛ̃́ɛ̃́ wéé lɛ́ zeĩ́ à gbɛ̃̀ɛ̃̀ lɛ pɛ-zɔ̃̀ɔ̃̀-kɔ̀ wánà zɛ̀ lɛ́ ɓaà tó à píéa mɔ̀ɔ káa.

⁷Kɛɛ ì i kɔ̀ ɓo pĩ̀ã̀ lɛ́ Wálà tɔ́ lɛ̀ɛ́ ɓɔ à ɓoò yí, ɛ̃́ɛ̃́ lɛ́ à yí wáá mɔ̀ɔ bà. Ì i dìè mɛ́ dã́ kɛ í kɛ ɓe lɛ̀ zí Wálà à nàà à káa lɛ́ ɓe.

⁸Yé ɓaà i dìè mɛ́ kɛ gágà wɔ̃́ dò kɛɛ̀ mɔ́ɔ̀ wɔ̃̀ mɔ̀ɔ, lɛ́ɛ̀ gbũ i mɔ̀ e ɓéĩ́ ká. Kɛɛ yé ɓaà kɛ ɓe zi lɛ́ Wálà à nàà í kɛá ɓea káa, lɛ́ɛ̀ gbũ i mɔ̀ kɔ̀ nɔ́ɔ tɛ̃̀ɛ̃́ɛ là. Ƃii íì lo wè-dɔ-wè lɛ́ à gbɛ̃̀ɛ̃̀ lɛ kɛ̀ɓe lɛ́ e dɛɛ ká ɓe, ɛ̃́ɛ̃́ lɛ́ e ɓe líé zàáa mɔ̀ɔ gɛ̃̀ɛ̃̀ à kɛɛ̀ yí.

⁹Wɔ̃́ mia ò gèea lɛ wɔ̃́ wánà zɛ̀ lɛ́ mi ì bɛ̀i à mɔ̀ í i kɔ̀ yà à wì zi séĩ́ ká, ɛ̃́ɛ̃́ ɓá gɛ̃̀ wánà káa ká.

¹⁰Ye lɛ́ kò mɔ́ɔ̀ à kɛ-zì nàà yɛɓo kɛ̀ gágà ká, ɓii ko zò lɛ Wálà ɓéèea mɔ̀. Wálà ɓéèe e kília lɛ́ e mia séĩ́ La-mì káa. Kɛɛ mia yé e o La-mì kpó-kpó káa, lɛ́ o mia lɛ́ o zò dɔɔ̀ lɛ à mɔ̀ɔ káa.

¹¹Ì pɛ́ e kéa zɔ̃̀ɔ̃̀ ɓáà gèè mia lɛ̀ɛ ó kɛ.

¹²Yékɛ̀ ɓá tó mi nɔ́ɔ fé nyìɛ é fɔ̃́ i yí ɓii i nɛ́fú káa mɔ́ɔ̀ wɔ̃̀ mɔ̀. Kɛɛ ì à tó i zì wɔ̃́ lɛ́ ɓà gèe, e bɛ̀i, i zì wɔ̃́ kɛ-kɔ̀, ɛ̃́ɛ̃́ zeĩ́, i zì lɔ̀-kɛ̀ mia ká, ɛ̃́ɛ̃́ i zì zò-dɔ̀à-mɔ̀, e bɛ̀i i zì kɛ̀ pulú é kɛ wɔ̃́ gɔ̃̀á ká mia lɛ́ waà o zò dɔ Wálà mɔ̀ɔ lɛ̀ɛ.

¹³Ì i yɛ́lɛ́ kɛ Wálà là kíía gèeè mia nyìɛ mɔ̀, e bɛ̀i, wɔ̃́ gèè ɛ̃́ɛ̃́ pɛ zɔ̃̀ɔ̃ɔ̃̀ ká é tóá kíli ḿ nu.

¹⁴Yékɛ̀ í nɔ̀-lɛ̀ɛ-pɛ̀ lɛ́ e i kɛ̀lɛ̀, lɛ́ à nɔɔ̀ e kɛá i lɛ̀ɛ lɛ̀ lɛ́ mia o wɔ̃́ lɛ́ Wálà a káá o lé o gèea wa gèea ká, ɛ̃́ɛ̃́ mia dìè-dìè vɔ̀ɔ o o kɔ̀ kpɔ́ i làa káa, yékɛ̀ ɓá wɔ̃̀ dà i kɔ̀ mɛ̀ĩ́.

¹⁵Ì wɔ̃́ nì e kéa mɛ́ dã́ i dìè nɔ̀ o lɛ̀ɛ ká, kɛɛ mia séĩ́ ó i zì yɛɓo-kɛ-kɔ̀ lɛ́ i lópìà à ká líéa gɛ̃̀.

¹⁶Ì i yɛ́lɛ́ kɛ i dìè wà i zì pɛ-zɔ̃̀ɔ̃̀-kɔ̀ píé. Ì lo i líé wɔ̃́ nì o kéa kɛɛ̀ ká. Ƃii yé ɓaà kɛ kília, íì lo i dìè wà mia lɛ́ ò o tóó dɔ i mɔ̀ɔ laà.