Read Yamano 1 Témɔ́tè 5 Bible Online

1 Témɔ́tè 5 - Yamano bible

1 Témɔ́tè 5

¹Yé ɓaà naa í i dàa-lɛ̀-mì gbɛ̃̀ zuúa, yékɛ̀ ɓá gèe wɛlɛ káá ká. Kɛɛ ì wɔ̃́ gèe à lɛ̀ɛ lɛ̀ zí ì wɔ̃́ gèeá i dàa lɛ̀ɛ lɛ́ ɓe. Gɔ̃ã̀ nɛ̀ĩ́ bɛ̃̀ɛ̃ ì wɔ̃́ kɛ o ká lɛ̀ zí ì wɔ̃́ kɛ̀á i lèe-gé gɔ̃ã̀ zɛ̀ nì káa lɛ́ ɓe.

²Loà dìè-dìè vɔ̀ bɛ̃̀ɛ̃, ì wɔ̃́ kɛ o ká lɛ̀ zí ì wɔ̃́ kɛ̀á i lèe káa lɛ́ ɓe. Ɛ́ɛ̃́ zeĩ́, loà nɛ̀ĩ́ bɛ̃̀ɛ̃, ì wɔ̃́ kɛ o ká lɛ̀ zí ì wɔ̃́ kɛ̀á i lèe-gé lee zɛ̀ nì káa lɛ́ ɓe wɔ̃́ kpeĩ kɛ-zì séĩ́ ká.

³Ì ɓɛ̀lɛyà nɔ gã̀ã loà lɛ́ o gã̀ã vɔ̀ kpó-kpó káa o lɛ̀ɛ.

⁴Kɛɛ yé gã̀ã-lè dò aà kɛ yí lɛ́ nɛ́ laa kɛ̀lɛ̀, ɛ̃́ɛ̃́ lɛ́ là nɛ́ à nɛ́ lɛ ɓea, lɛ nɔ́ɔ̀ɓé o kília mɔ̀ ó pɛ lɛ́ lɛ mia lɛ́ ò gbìnì Wálà lɛ̀ɛ mɔ̀ ó kɛ o mìà nì lɛ̀ɛ, ó à kɛɛ̀ mɛ́ dã́ bèĩzɛ̀. Zí e kéa káa, óò lo wɔ̃́ lɛ́ o ye-mìà ɛ̃́ɛ̃́ o ye-mìà bɛ̃̀ɛ̃ zì mìà nì waà kɛɛ dɛ̀í dàà ká. Ƃii wɔ̃́ e kéa kɛɛ̀ lɛ́ è Wálà zò dàa.

⁵Lee lɛ́ lɛ gã̀ã kpó-kpó ká, lɛ́ mi gbɛɛ wá ɓe kɛ é dɔ à làa, aà e zò dɔ Wálà mɔ̀, ɛ̃́ɛ̃́ lɛ́ɛ̀ lo e líé sɛ̀nɛ ɓoò ká bĩ́ã́ ɛ̃́ɛ̃́ nyɛ́nɛ́ĩ́ kɛɛ Wálà é gbũ à mɔ̀.

⁶Kɛɛ gã̀ã lee yé è e dìè nɔ e dìè zò-kṹ-wɔ̃̀ kɛɛ̀ lɛ̀ɛ, à gaà lɛ, yé bɛ̃̀ɛ̃ lɛ tĩã́ kpóṹ làa ká.

⁷Ì wɔ̃́ nì e kéa kpɔ́ o kɔ̀ là, yékɛ̀ mia ó o kɛ̀ɛ naa o mɔ̀.

⁸Kɛɛ yé mi lɛ̀ɛ́ e yɛ́lɛ́ kɛ e kɔ̀-píé-mìà píé, kɛɛ kpó-kpó ɓoa e mìà nì píéa, á kɛ̀á kília, kɛɛ aà zò-dɔ̀à-mɔ̀ wɔ̃̀ɔ tèé ɓo. Ɛ́ɛ̃́ kɛɛ à diè lɛ vɔ̀ mí lɛ̀ɛ́ Wálà dɔɔ là.

⁹Yékɛ̀ í gã̀ã lee nɔ́ɔ fé tɔ́ bɛ̃̀ɛ̃ gã̀ã loà tɔ́ bà, yé à kɛ̀ɛ̀ wá vũ̀ sáláádoa ká. Ɛ́ɛ̃́ è kɛ lee lɛ́ à gɔ̃ síì kpolà aà kɛ doóa ká.

¹⁰Ɛ́ɛ̃́ zeĩ́, lɛ à mɔ̀ é kɛ mi lɛ́ mia ò à tɔ́ yiè gèe à zì yɛɓo yiè kɛɛ̀ wɛ̃́ĩ̀a ká. È kɛ lee lɛ́ aà là nɔ́ɔ̀ tòlò o tòlò-zì káa ká, lɛ́ aà lɔ̀ɔ̀-mi wɔ̀lɔ̀ kpɔ́ do, ɛ̃́ɛ̃́ lɛ́ aà Wálà-mìà gã̀ mɛ́ pɛ́lɛ́, e bɛ̀i, aà gbũ mia lɛ́ o kɛ wɔ̃́ nyɔ́ɔ̀ɔ yía mɔ̀, ɛ̃́ɛ̃́ lɛ́ aà e dìè nɔ yɛɓo yiè séĩ́ kɛɛ̀ lɛ̀ɛ ká.

¹¹Kɛɛ yékɛ̀ í loà dɛɛ dɛɛ lɛ́ o gã̀ã káa tɔ́ dà o bà. Ƃii yé o zì nàà-ká-wɔ̃̀ aà naa ó gɔ̃ sía, óò o ko gbɛ̃̀ Kɛ́lɛ̀ì mɔ̀.

¹²Zí e kília káa, mɛ̀ĩ́-sà káà lɛ o wĩĩ́, ɓii òó gbaa o wè bèĩzɛ̀ lɛ́ wa dɔ Kɛ́lɛ̀ì lɛ̀ɛ píé-wɔ̃̀ kɛ.

¹³Ɛ́ɛ̃́ zeĩ́, óò zi lɛ́ ò wà lúó kàà à ká tã́ã̀ wáà lò ká ɓɔá sí e kíe làa mɛ́ dã̀. Ye wá bɛ̃̀ɛ̃ à doó ká. Kɛɛ óò lùe ɓoò mɛ́ dã, tó wáà o lé dà o ɓɛ́ĩ̀ gbɛɛ wà wɔ̃́ yí, wáà wɔ̃́ lɛ́ ye wá o mɔ̀ kɛ ó gèea, wáà gèè.

¹⁴À mɔ́ɔ̀ wɔ̃̀ mɔ̀ɔ, ḿm̀ lo à naà kɛɛ gã̀ã loà dɛɛ dɛɛ ó gɔ̃ sí ó nɛ́ ye, e bɛ̀i, ó o yɛ́lɛ́ kɛ o píé kɛ́ì mɔ̀, yékɛ̀ ó lúó nɔ ko dàa-gbe lɛ̀ɛ kɛ ó mɛ́ĩ́ yɔɔ ɓo ko gbĩ mɔ̀.

¹⁵Ƃii gã̀ã loà dò góà lɛ gbaa zi lèe mɔ̀, kɛ ó tó Sétɔ̃̀ píé.

¹⁶Kɛɛ yé lee lɛ́ aà e zò dɔ Wálà mɔ̀ɔ, gã̀ã lee aà kɛ à kɔ̀-píé-mìà bàa, lɛ à mɔ̀ é e yɛ́lɛ́ yiè kɛ à mɔ̀, yékɛ̀ é vũ gbííni e kéa yà Wálà-mìà wĩĩ́. Yé aà kɛ kília, bɛ̀i lɛ Wálà-mìà mɔ̀ kɛ ó o yɛ́lɛ́ kɛ loà lɛ́ o gã̀ã loà kpó-kpó káa mɔ̀.

¹⁷Mia dìè-dìè vɔ̀ yé ò míáa líé si e yiè káa, lɛ mia mɔ̀ ó o gɛ̃̀ mia lɛ́ ò bɛ̀i à mɔ̀ ó ɓɛ̀lɛyà là kpɔ́ɔ̀ɔ zɛ̀ sɔ̀lɔ̀ ɓoa ká. Kpó-kpó ɓoa, mia yé ò yɛɓo kɛ̀ gágà Wálà-wɔ̃̀ gèeè wà pɛ zɔ̃̀ɔ̃ɔ̃̀ káa, kà o gɛ̃̀ ɓɛ̀lɛyà sùua sɔ̀lɔ̀-ɓo-mìà ká.

¹⁸Ƃii Wálà kiia láà gèe kélɛ̀, “Yé ɓaà dìì kɛ áà ɓà ɓu zììa, yékɛ̀ í kálá dà à lé.” Ɛ́ɛ̃́ zeĩ́, láà gèe, “Yɛɓo-kɛ-mì à e fɔ́nɔ́ gɛ̃̀ɛ̃ɛ̃̀ láà mɛ́ kũ.”

¹⁹Yé mia waà wɔ̃́ kpɔ́ mia dìè-dìè vɔ̀ɔ doó-mì wĩĩ́a, yékɛ̀ í i tóó dɔ à mɔ̀ yé kélá pèèlɛ wà à yààka o wá mɛ́ĩ́ e kília mɔ̀ɔ ká.

²⁰Kɛɛ o yé ò lo kɛ-wɔ̃̀ yɔɔ kɛɛ̀ɛ, ì i wɛlɛ káá o mɔ̀, ɓáà wɔ̃́ gèè o lɛ̀ɛ mia séĩ́ nyìɛ mɔ̀, kɛɛ mia yé o tóa ó túó.

²¹Wálà wà Kɛ́lɛ̀ì Zízɛ̀, e bɛ̀i, Wálà là vɔ-mìà lɛ́ aà o sía wɛlɛ mɔ̀ɔ, maà wɔ̃́ e kéa kpɔ́ i wĩĩ́ kɛ í o kɛ, yékɛ̀ í dɔ mi dò fé píé, ɛ̃́ɛ̃́ yékɛ̀ í mia bà ɓo wɔ̃́ nɔ́ɔ fé lɛ́ ì lo à kɛɛ̀ɛ kɛɛ̀ yí.

²²Yékɛ̀ i yí é kɛ tíè-tíèe i kɔ̀ kpɔ̀ mi là Wálà là yɛɓo kɛɛ̀ mɔ́ɔ̀ wɔ̃̀ mɔ̀. Yékɛ̀ i kɔ̀ é kɛ kɛ-wɔ̃̀ yɔɔ lɛ́ mia gbɛɛ ò kɛ̀ɛ bà. Ì i dìè kṹ sɛ̀, yékɛ̀ kɛɛ é kɛ i mɔ̀.

²³Yékɛ̀ í yíí doó mi gbaa. Kɛɛ ì wã́ã́ĩ̀ ɓéĩ́ mi kɛ é gbũ i gé mɔ̀, lɛ̀ i kɔ̃́ṹ-kɔ̃̀ũ̀ teelea ká.

²⁴Mia dò zì kɛ-wɔ̃̀ yɔɔ ò kɛ̀ɛ, mia òó túó à gɛ̃̀pìà. O zì kɛ-wɔ̃̀ yɔɔ e kília lɛ́ɛ̀ dɔ o líé, tó e ló mɛ̀ĩ́-sà ɓopìà. Kɛɛ mia dò bɛ̃̀ɛ̃, lúó lɛ́ɛ̀ dìè kɛ ó tĩã́ o zì kɛ-wɔ̃̀ yɔɔ gɛ̃̀ɛ̃̀.

²⁵Zi nɔ́ doóa káa, òó túó kɛ-wɔ̃̀ yiè kɛɛ̀ gɛ̃̀pìà. Ɛ́ɛ̃́ à lɛ̀ é tùòá bɛ̃̀ɛ̃ fɛ̃̀ɛ̃̀ kɛ ó tĩã́ gɛ̃̀ɛ, òó bɛ̀i tóò o bĩ̀ĩ̀pìà.