Read Yamano 2 Témɔ́tè 1 Bible Online

2 Témɔ́tè 1 - Yamano bible

2 Témɔ́tè 1

¹Óò m si Pɔ́ɔ̀. M Kɛ́lɛ̀ì Zízɛ̀ là àpɔ́sɔ̀lɔ̀ ká, ɓii Wálà a naa ḿ kɛáa mɔ́ɔ̀ wɔ̃̀ mɔ̀. Lɛ kíli kɛ ḿ kɛ̀ɓe lɛ́ aà e wè dɔá mia lɛ́ wà Kɛ́lɛ̀ì Zízɛ̀ nì o doóa lɛ̀ɛ wɔ̃̀ gèe.

²Témɔ́tè, lɛ́ i m̀ nɛ́ ká, lɛ́ i lɔ̀ kpɔ́ɔ̀ lɛ m mɔ̀ɔ, ḿm̀ wèè i bà. Wálà lɛ́ e mia Dàa káa, wà kɔa Dàa-mì Kɛ́lɛ̀ì Zízɛ̀, o zì zò-kɛ̀-sɛ̀, ɛ̃́ɛ̃́ zeĩ́ o zì mia yéĩ̀ kṹũ̀a é kɛ i píé, wáà zò-yà-gé nɔ̀ i lɛ̀ɛ.

³Ḿm̀ Wálà lɛ́ m̀ yɛɓo kɛ̀ à lɛ̀ɛ zò yiè ká, lɛ̀ zí m dàa ye dàà nì wa kɛáa lɛ́ ɓea zúo ɓo. Yé maà kɛ sɛ̀nɛ ɓopìàa, m zò lɛ́ɛ̀ vùò i mɔ́ɔ̀ wɔ̃̀ ká teele bĩ́ã́ ɛ̃́ɛ̃́ nyɛ́nɛ́ĩ́. À mɔ́ɔ̀ wɔ̃̀ mɔ̀ɔ, ḿm̀ Wálà zúo ɓo.

⁴M zò lɛ́ɛ̀ vùò zi lɛ́ i nyìɛ-yíí e káá à ká i làa mɔ́ɔ̀ wɔ̃̀ ká. Ɛ́ɛ̃́ i gɛ̃̀-lɔ̀ lɛ́ɛ̀ m kɛ̀ kpó-kpó ɓo kɛ m paà é kɛá géli ká.

⁵M zò vùò lɛ i zì zò-dɔ̀à-mɔ̀ wánà zɛ̀ ɓɛ ká. Zò-dɔ̀à-mɔ̀ doó e kília lɛ́ e kɛ i lòóò lɛ́ ò si Yúnè, e bɛ̀i à zì lòóò lɛ́ ò si Lóɛ̀ɛ yía. Ḿm̀ à yí dɔ kélɛ̀ lɛ ɓi bɛ̃̀ɛ̃ i yí nɔ́ kíli.

⁶À mɔ́ɔ̀ wɔ̃̀ mɔ̀ɔ, ḿm̀ i zò vùò nɔ̀-lɛ̀ɛ-pɛ̀ lɛ́ Wálà a nɔ i lɛ̀ɛ, lɛ̀ lɛ́ m m kɔ̀ kpɔ́ i làa káa, yékɛ̀ ɓá tó à wũ é ga. Kɛɛ ì à kɛ áà lɛ̀ fɔ̀nɔ̀.

⁷Ƃii Gɛ̀ɛ̀ lɛ́ Wálà aà nɔ ko lɛ̀ɛ, lɛ̀ɛ́ à kɛ kɛɛ yɛ́lɛ̀ é ko kɛ wɔ̃́ kɛɛ̀ yí. Kɛɛ à zì Gɛ̀ɛ̀ lɛ́ɛ̀ yíkɛ̀ gáàa, lɔ̀-kpɔ̀à-mɔ̀, e bɛ̀i dìè-kũ̀-tã́ã̀ nɔ ko lɛ̀ɛ.

⁸À mɔ́ɔ̀ wɔ̃̀ mɔ̀ɔ, yékɛ̀ yɛ́lɛ̀ é i kɛ ko Dàa-mì là kélá-wè ɓoò mɔ́ɔ̀ wɔ̃̀ mɔ̀. Ɛ́ɛ̃́ yékɛ̀ yɛ́lɛ̀ é i kɛ má m là bĩ́-kɛ̀ì-mì káa lɛ̀ɛ. Kɛɛ ì wàa lɛ́ mia kò ɓèlè wɔ̃́ làṹ yièa mɔ́ɔ̀ wɔ̃̀ mɔ̀ɔ, ì i zì ɓèlè yíkɛ̀ gáàa lɛ́ Wálà à nɔ i lɛ̀ɛ ká.

⁹E ko la, ɛ̃́ɛ̃́ e ko súo kɛ kɛ kó kɛ à dìè là mia nì ká. Wɔ̃́ e kília lɛ̀ɛ́ gbaa kɛ wɔ̃́ kɔaà kɛɛ mɔ́ɔ̀ wɔ̃̀ mɔ̀. Kɛɛ à kɛɛ̀ lɛ e dìè zì wɔ̃́ yà e gé, e bɛ̀i, à zì zò-kɛ̀-sɛ̀ mɔ́ɔ̀ wɔ̃̀ mɔ̀. E zò-kɛ̀-sɛ̀ e kéa nɔ ko lɛ̀ɛ Kɛ́lɛ̀ì Zízɛ̀ yí zàá kɛ bɛ̃̀ɛ̃ pɛ séĩ́ é tĩã́ kɛɛ̀ ɓe.

¹⁰Kɛɛ à zɔ̃̀ɔ̃ɔ̃̀ lɛ gbaa ko lɛ̀ɛ ko La-mì Kɛ́lɛ̀ì Zízɛ̀ nuù yí zàá. Aà à kɛ gbaa yíkɛ̀ gáàa wá gbaa ga kɛ̀lɛ̀. Ɛ́ɛ̃́ aà nu kɛ̀ɓe ɛ̃́ɛ̃́ kɛ̀ ɓéèe lɛ́ lɛ̀ɛ́ nyɛɛ ká gbaa lɛ̀ púlú mɔ̀ wɔ̃́ làṹ yièa kolo là zàá.

¹¹Wálà aà m sí àpɔ́sɔ̀lɔ̀ wà pɛ-zɔ̃̀ɔ̃̀-mì ká, kɛɛ ḿ wɔ̃́ làṹ yièa gèe lòũ̀ ká.

¹²Wɔ̃́ nì e kéa mɔ́ɔ̀ wɔ̃̀ lɛ́ m sã̀ è dɔ ɓɛ. Kɛɛ m zò mɛ́ lɛ tĩã́ gágà, ɓii mi lɛ́ m zò dɔɔ̀ lɛ à mɔ̀ɔ, ḿm̀ à dɔ. Ɛ́ɛ̃́ ḿm̀ à yí kpó-kpó dɔ kélɛ̀ pɛ lɛ́ aà kpɔ́ m kɔ̀ làa, bɛ̀i lɛ à mɔ̀ é e yɛ́lɛ́ kɛ à mɔ̀ é tóá kíli Lúó e kília é ɓɔ.

¹³Ì i kɔ̀ kùnù wéé wánà zɛ̀ lɛ́ ma zɔ̃̀ɔ̃̀ i lɛ̀ɛ kɛ é kɛ wɔ̃́ gɔ̃̀á lɛ́ ì lo tóò à píéa káa mɔ̀. Ì kɛ ɓe zò-dɔ̀à-mɔ̀ wà lɔ̀-kpɔ̀à-mɔ̀ lɛ́ lɛ mia lɛ́ kò Kɛ́lɛ̀ì Zízɛ̀ nì ko doóa ko kɛ̀lɛ̀ɛ yí.

¹⁴Wɔ̃́ yiè yiè lɛ́ à kpɔ́ɔ̀ lɛ i kɔ̀ làa, ì i yɛ́lɛ́ kɛ o mɔ̀ Gɛ̀ɛ̀ Púlú lɛ́ e ko yía, zì yíkɛ̀ gáàa kolo là zàá.

¹⁵Íì à yí dɔ kélɛ̀ mia séĩ́ lɛ́ o Ésìàa, o o ko gbɛ̃̀ m mɔ̀. Míá o kília, Fàzílà wà Hàmɔ́zénì o kɛ o bà.

¹⁶Ko Dàa-mì è Ònɛ́séfɔ̀lɔ̀ píé-kɛ́ì-mìà yéĩ̀ kṹ, ɓii e à kɛ m fã̀ã́ e wàà lúó búnùzɛ̀ píé. Yɛ́lɛ̀ lɛ̀ɛ́ gbaa à kɛ m kɛ̀ bĩ́-kɛ̀ì mɔ́ɔ̀ wɔ̃̀ mɔ̀.

¹⁷Kɛɛ lɛ̀ e ɓɔ Wólóũ̀a, e gbɛ̃̀ áà lò m nàá sí é tóá kíli é m gɛ̃̀.

¹⁸Ko Dàa-mì è à kɛ kɛ ko Dàa-mì é à yéĩ̀ kṹ Lúó e kília ká. Ɛ́ɛ̃́ zi lɛ́ e wɔ̃́ búnùzɛ̀ kɛá m lɛ̀ɛ Ɛ́fɔ́sɔ̀ɔ, íì à dɔ sɛ̀.