Read Yamano 2 Témɔ́tè 3 Bible Online

2 Témɔ́tè 3 - Yamano bible

2 Témɔ́tè 3

¹Wɔ̃́ e kéa kpɔ́ i gé. Ye lɛ́ e kélɛ̀, wɔ̃́ nyɔ́ɔ̀ɔ gɛ̃̀ɛ̃ɛ̃̀ lɛ́ɛ̀ lo kɛɛ̀ ɓe lúó léĩ́-tó-lùò ká.

²Mia óò lo à naà o dìè ká. Pɛlèe mɔ́ɔ̀ wɔ̃̀ lɛ́ɛ̀ lo diè o zò ká. Óò lo lé-gbùò-là kɛɛ̀, tó wáà o dìè sì gbùò. Óò lo kɛɛ̀ lé-kã́ zɛ̀. Òó wɔ̃́ ma o ye-mìà wè là. Òó mia zúo ɓo. Òó ló gbiniì Wálà lɛ̀ɛ.

³Òó ló o nyìɛ dɔɔ̀ mia mɔ̀. Mia yéĩ́ lɛ̀ɛ́ ló kɛɛ̀ o mɔ̀. Óò lo mia tɔ́ yɔɔ gèeè. E bɛ̀i, óò lo kɛɛ̀ mia gana zɛ̀ ká. Óò lo kɛɛ̀ mia nyaàa zɛ̀ ká. Òó ló à naà wɔ̃́ yiè ká.

⁴Ɛ́ɛ̃́ zéniía, óò lo kɛɛ̀ mia lɔ̀ɔ̀-dɔ-mìà ɛ̃́ɛ̃́ mia yé òó o kpóló kpɔ́ o mɔ̀ wɔ̃́ kɛɛ̀ káa ká. O fɔ̀ɔɔ̀ lɛ́ɛ̀ lo kɛɛ̀ à ká dìè-sì-gbùò ká. O dìè-tĩ́ zì zò-kṹ-wɔ̃̀ kɛ-lɔ̀ lɛ́ɛ̀ lo kpɔ́ɔ̀ o mɔ̀, wáà kã̀ Wálà zì lɔ̀ lɛ́ áá kpɔ́ɔ̀ o mɔ̀ɔ yee lɛ̀ɛ.

⁵Íì o gɛ̃̀áa, íì lo o gɛ̃̀ɛ̃̀ ɓɔ̀ɔ kélɛ̀ o kùnù ko zì gbìnì Wálà lɛ̀ɛ kɔ̀ɔ mɔ̀ mìà ká. Kɛɛ óò lo o wũ ɓoò gbìnì Wálà lɛ̀ɛ kɔ̀ɔ zì yíkɛ̀ gáàa kpó-kpóa wì. Ì i yí ɓo mia nì sùua mɔ̀.

⁶O dò óò lo kɛ́ì píé tó wáà kɛ̀ loà lɛ́ o yí è gaa là. Loà o kília o loà lɛ́ o kɛ-wɔ̃̀ yɔɔ lɛ o wĩĩ́ vũ gbííni ká, lɛ́ wɔ̃́ yɔɔ̀ yɔɔ̀ kɛ-lɔ̀ è o kɛ̀ɛ káa.

⁷O loà lɛ́ ò nàà ó pɛ dã́ teelea ká, lɛ́ bɛ̀i wá o mɔ̀ kɛ ó kɛ wánà-wɔ̃̀ dɔ-mìà káa káa.

⁸Zi lɛ́ Zánì wà Zã́ɓèlè o gèlè gbiniá Móózè mɔ̀ɔ, zi nɔ́ doóa lɛ́ gɔ̃à o kéa waà gèlè gbiniá wɔ̃́ wánà zɛ̀ɛ mɔ̀ɔ. Gɔ̃à o kília, o wũ-kèlè yí wá kpeĩ. O kɔ̃́ɔ̃̀ lɛ gbaa zò-dɔ̀à-mɔ̀ wɔ̃̀ mɔ̀.

⁹Kɛɛ òó ló lóò gbèĩ nyɔ́ɔ̀ɔ, ɓii mia séĩ́ óò lo o kɛ̀ bè zɛ̀ míní síì lɛ̀ zí nɔ́ e kɛá Zánì wà Zã́ɓèlè o káa lɛ́ ɓe.

¹⁰Kɛɛ ɓi yee, ɓaà tó m zì pɛ-zɔ̃̀ɔ̃̀-kɔ̀, ɛ̃́ɛ̃́ m zì kɛ-kɔ̀, e bɛ̀i wɔ̃́ lɛ́ m̀ nàà ḿ kɛ m zì kɛ̀ɓe làa píé. Ƃaà m zì zò-dɔ̀à-mɔ̀, e bɛ̀i m zì zò-kũ̀-tã́ã̀, ɛ̃́ɛ̃́ mia lɔ̀-kpɔ̀ m mɔ̀, e bɛ̀i, m zì lò m líé wɔ̃́ kɛɛ̀ ká,

¹¹ɛ̃́ɛ̃́ m zì sã̀-dɔ wà m zì wɔ̃́ nyɔ́ɔ̀ɔ gɛ̃̀ɛ̃ɛ̃̀ mɛ́ nyɛ. Íì wɔ̃́ séĩ́ lɛ́ e kɛ m ká Ã́téɔ̀, Àkónìà, e bɛ̀i Lísàa dɔ. Íì zi sùu lɛ́ m sã̀ e kɛ dɔpìà ká tó máà lò líé nɔ́ tĩã́ wɔ̃́ kɛɛ̀ káa dɔ. Kɛɛ ko Dàa-mì e m la o séĩ́ o kɛ̀lɛ̀.

¹²Mia séĩ́ lɛ́ wà Kɛ́lɛ̀ì Zízɛ̀ nì o doó, lɛ́ ò nàà ó kɛ ɓe Wálà lɛ̀ɛ, mia óò lo o sã̀ dɔɔ̀ nɔ́ téé-tèè.

¹³Kɛɛ mia kɛ-pɛ̀ yɔɔ zɛ̀, ɛ̃́ɛ̃́ mia lɛ́ ò mia bèkɛ̀ ɓoa, wɔ̃́ yɔɔ lɛ́ ò kɛ̀ɛ là lɛ́ɛ̀ lo kɛɛ̀ kpɔ́pìà teele. Óò lo lóò o líé mia bèkɛ̀ ɓoò ká, tó mia gbɛɛ bɛ̃̀ɛ̃ wáà o bèkɛ̀ ɓò.

¹⁴Kɛɛ ɓi yee, ì kùnù wánà-wɔ̃̀ lɛ́ wa zɔ̃̀ɔ̃̀ i lɛ̀ɛ, lɛ́ ɓa gɛ̃̀ wánà ká kpó-kpó ɓoa mɔ̀, ɓáà lòá i líé. Mia lɛ́ ɓa dã́ o wìa, íì o dɔ.

¹⁵Ɛ́ɛ̃́ é kã́ lúó lɛ́ i kɛá nɛ́fú káa mɔ̀, é ɓɔá pɛ́nɛɛ mɔ̀ɔ, íì à yí dɔ kélɛ̀ ɓaà Wálà là kiia dɔ. Ƃɛ̀i lɛ Wálà là kii e kília mɔ̀ kɛ é gíkã́ lɛ́ è lo i ká la-zì píéa nɔ i lɛ̀ɛ. La-ɓo e kília ɓáà sɔ̀lɔ̀ ɓo zò-dɔ̀ Kɛ́lɛ̀ì Zízɛ̀ mɔ̀ kolo là zàá.

¹⁶Pɛ séĩ́ lɛ́ à bɛ̃̀ɛ̃ɛ̃̀ lɛ Wálà kii yía, Wálà lɛ́ e à dà mia zò píé kɛ ó bɛ̃̀ɛ̃. Kíí e kília lɛ sɛ̀ wɔ̃́ nì e kéa wɛ̃́ĩ̀. Óò wánà-wɔ̃̀ zɔ̃̀ɔ̃̀ mia lɛ̀ɛ à ká, e bɛ̀i óò wɔ̃́ niàa lɛ́ mia waà kɛɛ, zɔ̃̀ɔ̃̀ o lɛ̀ɛ à ká. Ɛ́ɛ̃́ zeĩ́, óò mia gbɛ̃̀ zuú à ká, e bɛ̀i, zi lɛ́ mia wáá kɛɛ̀á ɓe kpeĩ lea, óò zɔ̃̀ɔ̃̀ à ká mia lɛ̀ɛ.

¹⁷Lɛ kíli kɛɛ mi lɛ́ è yɛɓo kɛ̀ Wálà lɛ̀ɛ, kɛɛ é e kɛ-yɛ̀ɓo dɔ kpó-kpó ɓo, ɛ̃́ɛ̃́ kɛ pɛ séĩ́ lɛ́ à nàà é yɛɓo yiè nɔ́ɔ fé kɛ à káa é kɛ à kɛ̀lɛ̀.