Read Yamano Hííbúlù 1 Bible Online

Hííbúlù 1 - Yamano bible

Hííbúlù 1

¹Wálà e mɛ́ĩ́ ɓo mɔ́ ko dàa ye dàà nì lɛ̀ɛ lúó búnùzɛ̀ ɛ̃́ɛ̃́ zi sùu gbɛɛ̀ gbɛɛ zɛ̀ ká. E kɛ à káápìà dɔ̀à-lé-là-mìà lé wáà gèè.

²Kɛɛ lúó lɛ́ ko à yí e ké, lɛ́ e lúó léĩ́-tó-lùò káa, aà mɛ́ĩ́ ɓo ko lɛ̀ɛ e Gbe yí zàá. À ye lɛ́ Wálà e kpóṹ là kɛ à kolo làa. À ye lɛ́ Wálà aà sí kɛɛ pɛ séĩ́ é kɛ là pɛ ká líé zàáa.

³Wálà là lɛ̀-fɔ̀nɔ-kɔ̀ láà kɛ̀ tó à mɛ́ áà ɓɔ̀. Zi nɔ́ Wálà lɛ à ká kpó-kpó ɓoa, lɛ́ à Gbe bɛ̃̀ɛ̃ lɛ à káa. À Gbe e kília zì wéè lɛ́ yíkɛ̀ gáàa lɛ à yí ɓɛ, lɛ́ à kɛ̀ tó pɛ áà kɛ̀ ɓe teelea. Lɛ̀ e nyɛ mia ɓéèe ɓò o kɛ-wɔ̃̀ yɔɔ yí mɔ̀ɔ, e yà gbaa tã́ã̀ Wálà lɛ́ yíkɛ̀ gáàa séĩ́ lɛ à kɛ̀lɛ̀ɛ kɔ̀ yiè yí Wálà-pà.

⁴Wálà a kɛ à Gbe e kɛ kpànazɛ̀ é diá là vɔ-mìà là, lɛ̀ zí nɔ́ tɔ́ lɛ́ a kpɔ́ e Gbéa mɔ̀ɔ lɛ à ká kpànazɛ̀, é diá là vɔ-mìàa zì làa lɛ́ ɓɛ.

⁵Ƃii Wálà làá gèe do là vɔ-mìàa dò nɔ́ɔ fé lɛ̀ɛ kélɛ̀, “I m Gbe ká. Maà kɛ gbaa i Dàa ká pɛ́nɛɛ.” Ɛ́ɛ̃́ kɛ bɛ̃̀ɛ̃ Wálà á gèe o dò lɛ̀ɛ kélɛ̀, “Ḿm̀ lo kɛɛ̀ à Dàa ká, Ɛ́ɛ̃́ à bɛ̃̀ɛ̃ lɛ́ɛ̀ lo kɛɛ̀ m Gbe ká.”

⁶Ɛ́ɛ̃́ zéniía, lɛ̀ lɛ́ Wálà e kɛ à kɛpìà é e dìè là Nɛ́ líé vɔ tã́ã̀ zèea, a gèe kélɛ̀, “Lɛ Wálà là vɔ-mìàa séĩ́-séĩ́ mɔ̀ ó gbini à lɛ̀ɛ.”

⁷Wɔ̃́ lɛ́ Wálà a gèe é gbɛ̃̀á là vɔ-mìà mɔ̀ɔ lɛ́ e kélɛ̀, “Wálà lɛ́ɛ̀ là vɔ-mìà kɛ̀ fã̀ã̀ ká. Ɛ́ɛ̃́ lɛ́ɛ̀ là yɛɓo-kɛ-mìà kɛ̀ tíé nanà ká.”

⁸Kɛɛ wɔ̃́ lɛ́ Wálà a gèe é gbɛ̃̀á e Gbe mɔ̀ɔ lɛ́ e kélɛ̀, “Wálà i ké ɓɛ. I zì dɔ-táŋáná lɛ́ɛ̀ lo kɛɛ̀ ɓe wɔ́lɔ́-wɔ́lɔ́ ká. I zì mia líé-sí-kɔ̀ɔ lɛ kpeĩ kpó-kpó ɓo.

⁹Wɔ̃́ kpeĩ lɛ́ à lɔ̀ kpɔ́ɔ̀ lɛ i mɔ̀ɔ. Kɛɛ wɔ̃́ yɔɔ lɔ̀ nyɛɛ̀ lɛ i mɔ̀. Pɛ́ a kɛ lɛ́ Wálà lɛ́ e ɓà Wálà káa, a mɔ́ɔ̀ i sí ɓo lɛ́ e géli nyɔ́nɔ́ɔ káá i wĩĩ́ gbùò é diá i ɓɛ́ĩ̀ nì làa lɛ́ ɓɛ.”

¹⁰A gèe zeĩ́ kélɛ̀, “Ƃí i mia Dàa-mì ká e ké ɓɛ, wɔ̃́ séĩ́ gã̀-gbɛ̃̀ lùò káa, i kpóṹ là kɛ. I lɛ̀í kɛ i dìè kɔ̀ ká.

¹¹O séĩ́-séĩ́ óò lo diè, kɛɛ ɓi yee íì lo tóò ɓe. O séĩ́ óò lo kòlò kɛɛ̀ lɛ̀ zí sɔ è kòlò kɛ̀áa lɛ́ ɓe.

¹²Íì lo o yɛ́ɛ̀ lɛ̀ zí mia ò sɔ yɛáa lɛ́ ɓe. Ɛ́ɛ̃́ óò lo o mɛ́ vɔ̀ɔɔ̀ lɛ̀ zí ò sɔ mɛ́ vɔ̀ɔáa lɛ́ ɓe. Kɛɛ ɓi yee, zí i à ká dɛɛ káa, íì lo tóò à ká kíli. Ɛ́ɛ̃́ i yìì-là lɛ̀ɛ́ ló kã́ã̀.”

¹³Wálà lɛ̀ɛ́ gbaa à gèe là vɔ-mìàa dò nɔ́ɔ fé lɛ̀ɛ kélɛ̀, “Ì yà m kɔ̀ yiè yí, é tóá kíli ḿ mia lɛ́ ò gèlè gɔ̃ i káa, kɛ i gã̀-gbɛ̃̀à-là pɛ̀ ká.”

¹⁴Mɛ́ mɔṹ e Wálà là vɔ-mìàa ká? O séĩ́ o gɛ̀ɛ̀ sùu dò ká, o yí wáà yɛɓo kɛ̀ Wálà lɛ̀ɛ, tó Wálà áà o vɔ̀, tó wáà gbũ̀ mia lɛ́ lɛ o mɔ̀ ó la-ɓo sɔ̀lɔ̀ ɓoa mɔ̀.