Read Yamano Hííbúlù 10 Bible Online

Hííbúlù 10 - Yamano bible

Hííbúlù 10

¹Lɔ́ɔ̀ɔ wá pɛ wánà zɛ̀ɛ gɔ̃̀á zò-dɔ̀à-mɔ̀ zɛ̀ kpó-kpó ká. Lɛ nɔ́ pɛ yiè lɛ́ lɛ nupìàa bĩ́ ká ɓɔ̀ɔ. Óò sálà doóa ɓo kɛ̀ɛ̀ séĩ́ ká teele. Yé lɛ kília, zi sùu kpɛɛ̀ lɛ́ Lɔ́ɔ̀ɔ è bɛ̀i à mɔ̀ é mia lɛ́ ò nu Wálà píéa, kɛá kpeĩ fɛ́fɛ́ le sálà ɓoò nì o kéa kolo là?

²È kɛ̀á mia lɛ́ ò gbìnì Wálà lɛ̀ɛ o kɛ-wɔ̃̀ yɔɔ ɓoò lɛ o mɔ̀ fɛ́fɛ́ lea, o zò lɛ̀ɛ́ gɔ̃̀ mɛ̀ɛ̀ o mɔ̀ o kɛ-wɔ̃̀ yɔɔ wɛ̃́ĩ̀. Ɛ́ɛ̃́ sálà ɓoò nì séĩ́ wɔ̃̀ áá tèáà gbaa.

³Kɛɛ lɛ̀ zí lɛ à káa, sálà ɓoò nìa lɛ́ɛ̀ mia zò vùò o kɛ-wɔ̃̀ yɔɔ wɛ̃́ĩ̀ kɛ̀ɛ̀ séĩ́-séĩ́ ká.

⁴Ƃii dìì gɔ̃ wà ɓò léà lɛ̀ɛ́ bɛ̀i mi kɛ-wɔ̃̀ yɔɔ ɓoò mi mɔ̀.

⁵Wɔ̃́ e kéa mɔ́ɔ̀ wɔ̃̀ mɔ̀ɔ, lɛ̀ Kɛ́lɛ̀ì e kɛ à kɛpìà é nu kpóṹ làa, a gèe Wálà lɛ̀ɛ kélɛ̀, “Bàá naa sálà ɓoò ɛ̃́ɛ̃́ nɔ̀-lɛ̀ɛ-pɛ̀ nì ká. Kɛɛ ɓaà gbĩ-kpàla dò pɛ̀ kɛ m lɛ̀ɛ.

⁶I zò lɛ̀ɛ́ dà sálà-ɓo-pɛ̀ yé ò gèlè, ɛ̃́ɛ̃́ à yé ò nɔ kɛ-wɔ̃̀ yɔɔ wɛ̃́ĩ̀a píé.

⁷Ɛ́ɛ̃́ ḿm̀ gèe, ‘Wálà, ma gɛ̃̀ m ké, kɛ ḿ wɔ̃́ lɛ́ ɓà nàà ḿ kɛɛ kɛ, lɛ̀ zí nɔ́ wɔ̃́ bɛ̃̀ɛ̃ɛ̃̀ lɛ à ká Lɔ́ɔ̀ kiia yí m gbĩ mɔ̀ɔ lɛ́ ɓe.’ ”

⁸Bèĩzɛ̀ɛ, a gèe kélɛ̀, “Ƃàá naa, ɛ̃́ɛ̃́ i zò lɛ̀ɛ́ dà sálà ɓoò wà pɛ́ ò nɔ i lɛ̀ɛ, ɛ̃́ɛ̃́ sálà-ɓo-pɛ̀ yé ò gèlè, ɛ̃́ɛ̃́ à yé ò nɔ kɛ-wɔ̃̀ yɔɔ wɛ̃́ĩ̀a píé.” E wɔ̃́ e kéa gèe, yé bɛ̃̀ɛ̃ ò sálà e kília séĩ́ kóná ɓo lɛ̀ zí Lɔ́ɔ̀ɔ a gèe ó kɛáa ká.

⁹Lɛ̀ e kɛ kília, a gèe kélɛ̀, “Ma gɛ̃̀ m ké, kɛ ḿ wɔ̃́ lɛ́ ɓà nàà ḿ kɛɛ kɛ.” Zí e kéa káa, Wálà e e kɔ̀ ɓo sálà ɓoò ziia wì, e Kɛ́lɛ̀ì zì sálà a ɓo e dìè káa sí gbaa, e à gbɛ̃̀ o dɔ̀lɔ̀ yí.

¹⁰Lɛ̀ lɛ́ Zízɛ̀ Kɛ́lɛ̀ì e wɔ̃́ lɛ́ Wálà a naa á kɛɛ kɛɛ, ko kɛɛ̀ lɛ gbaa púlú kɛ-wɔ̃̀ yɔɔ wá ko mɔ̀ gbaa, sálà lɛ́ a ɓo e dìè gbĩ-kpàla ká nɔ́ doóa kolo là zàá.

¹¹Sálà-ɓò-Wálà-mɔ̀-mìà séĩ́ óò dɔ wáà o kɛ-yɛ̀ɓo kɛ̀ lúó séĩ́ ká. Óò sálà doóa ɓo nɔ́ teele. Kɛɛ sálà ɓoò nì o kéa, òó bɛ̀i mi kɛ-wɔ̃̀ yɔɔ ɓoò mi mɔ̀.

¹²Kɛɛ Kɛ́lɛ̀ì e sálà lɛ́ lɛ ɓe tòá kíli káa ɓo nɔ́ doó kɛ-wɔ̃̀ yɔɔ wɛ̃́ĩ̀. Lɛ̀ a kɛ kília, e yà gbaa Wálà kɔ̀ yiè yí.

¹³À lɛ̀ mɔ̀ lɛ́ lɛ yàá yi é tóá kíli Wálà é mia lɛ́ ò gèlè gɔ̃ à káa, kɛ à gã̀-gbɛ̃̀à-là pɛ̀ káa.

¹⁴Sálà doó ɓoò kolo làa, aà mɔ́ɔ̀ à kɛ ɓo mia lɛ́ o kɛɛ̀ lɛ púlú, lɛ́ kɛ-wɔ̃̀ yɔɔ wá o mɔ̀ gbaa, waà kɛ kpeĩ fɛ́fɛ́ le tòá kíli ká.

¹⁵Gɛ̀ɛ̀ Púlú lɛ́ɛ̀ à zì kélá-wè ɓo ko lɛ̀ɛ nɔ́ kíli. Láà gèe bèĩzɛ̀ kélɛ̀,

¹⁶“Mia Dàa-mì láà gèe kélɛ̀, m wè lɛ́ m̀ lo à dɔɔ̀ o lɛ̀ɛ lúó lɛ́ è lo nuùa káa, gɛ̃̀ e ké. Ḿm̀ lo m̀ lɔ́ɔ̀ nìa wàà o zò píé. Ḿm̀ lo o bɛ̃̀ɛ̃ɛ̃̀ o wũ-kèlè mɔ̀.”

¹⁷Ɛ́ɛ̃́ a gèe zeĩ́ kélɛ̀, “M zò lɛ̀ɛ́ ló vùò gbɛɛ ɓoò gbaa o zì kɛ-wɔ̃̀ yɔɔ ɛ̃́ɛ̃́ o kɛ-wɔ̃̀ yɔ̀lɔ zɛ̀ ká.”

¹⁸À mɔ́ɔ̀ wɔ̃̀ mɔ̀ɔ, yé mɔṹ wɔ̃́ nì e kéa ɓoò lɛ mi mɔ̀ɔ, ye wá mɔṹ à mɔ̀ kɛ ó sálà-ɓo-pɛ̀ nɔ kɛɛ é mi kɛ-wɔ̃̀ yɔɔ ɓo mi mɔ̀.

¹⁹M lèe-gé vɔ̀, yé aà kɛ kília, aà kɛ bɛ̀i aà kɛ ko mɔ̀ kɛ kó wàà Wálà là Lɛ̀ Púlúa Lɛ̀ Kpànazɛ̀-pìàa wì Zízɛ̀ léà kolo là zàá.

²⁰E zi dɛɛ lé ɓo ko lɛ̀ɛ. Lɛ zi kɛ̀ɓe zɛ̀ ká. Zía diè lɛ sɔ lɛ́ à dũũ̀ lɛ káa wìa yí. Ye lɛ́ e kélɛ̀, à diè lɛ e dìè-tĩ́ gbĩ-kpàla yí.

²¹Sálà-ɓo-mì kpànazɛ̀ lɛ ko kɛ̀lɛ̀, ɛ̃́ɛ̃́ à ye lɛ́ lɛ Wálà là káa wũ làa.

²²À mɔ́ɔ̀ wɔ̃̀ mɔ̀ɔ, kɔ̀à nu Wálà ká kɔ̀ɛ́ zò yiè wà zò-dɔ̀à-mɔ̀ wánà zɛ̀ ká. Kɔ̀à nu à ká kɔ̀ɛ́ zò lɛ́ waà léà wɛ̃̀ĩ à là, lɛ́ lɛ̀ɛ́ mɛ̀ mi mɔ̀ gbaa, ɛ̃́ɛ̃́ gbĩ-kpàla lɛ́ à mɛ́ pɛ́lɛ̀ lɛ yíí zéŋé-zèŋè káa ká.

²³Kɔ̀à kùnù pɛ lɛ́ kɔa zò lɛ à mɔ̀, lɛ́ kɔaà wéé à mɔ́ɔ̀ wɔ̃̀ mɔ̀ɔ mɔ̀ kpɛ̃ĩ le, ɓii Wálà lɛ́ e e wè dɔ ko lɛ̀ɛ lɛ zò-dɔ̀à-mɔ̀ zɛ̀.

²⁴Kɔ̀à kpàa kɔa kíe nì mɔ́ɔ̀ wɔ̃̀ yí, kɛɛ kɔ́á gbũ kɔa kíe nì mɔ̀ kɛ mia lɔ̀ é kpɔ́ ko mɔ̀, ɛ̃́ɛ̃́ kɛ kó wɔ̃́ yiè kɛ.

²⁵Yékɛ̀ kɔa fĩ́ĩ́ é nyɛ lò pà-kíe-mɔ̀ mɔ̀ pìà, lɛ̀ zí mia dò ò kɛ̀áa lɛ́ ɓe. Kɛɛ kɔ̀à kɔa kíe nì fã̀ã́-wàà wè gèe. Kɔ̀à à kɛ kíli yí gbùò zɛ̀ lɛ̀ lɛ́ kaà kɔa Dàa-mì zì Lúóa gɛ̃̀ nupìàa ká.

²⁶Yé kɔaà kɛ-wɔ̃̀ yɔɔ kɛɛ̀ yà ko gé kɔ́áà kɛ̀ɛ, yé mɔṹ waà wɔ̃́ wánà zɛ̀ɛ zɔ̃̀ɔ̃̀ ko lɛ̀ɛ, lɛ́ kɔaà à dɔɔ, sálà nɔ́ɔ fé lɛ́ è lo kɛ-wɔ̃̀ yɔɔ ɓoò mi mɔ̀ɔ, ye wá ɓe gbaa.

²⁷Kɛɛ wɔ̃́ nɔ́ aà tó ɓá kɛɛ, lɛ́ e kélɛ̀, í túó wɔ̃́ lɛ́ è lo kɛɛ̀ɛ mɔ́ɔ̀ wɔ̃̀ yí. Ye lɛ́ e kélɛ̀, Wálà là mɛ́ĩ́-dɔ̀-mia-mɔ̀, e bɛ̀i, tíé nyásã́-nyàsã̀ lɛ́ è lo mia lɛ́ ò gèlè gɔ̃ Wálà káa gélèa káa.

²⁸Mi nɔ́ɔ fé lɛ́ è Móózè là Lɔ́ɔ̀ɔ sìèa, óò lo à zɛɛ̀, yé kélá vɔ̀ pèèlɛ ɛ̃́ɛ̃́ yààka aà wéé à làa ká. Òó ló à yéĩ̀ kṹũ̀.

²⁹Kó ma mɔṹ mí ké à nyìɛ fɔ̃́ɔ̃̀ lɛ Wálà Gbe yía píé? Ye lɛ́ e kélɛ̀, mi lɛ́ lɛ̀ɛ́ ɓɛ̀lɛyà nɔ léà lɛ́ e Wálà là wè-dɔ-wèa wɛ́lɛ́ ká, lɛ́ e à kɛ púlú, lɛ́ kɛ-wɔ̃̀ yɔɔ gbɛɛ wá à mɔ̀ɔ káa ká, ɛ̃́ɛ̃́ ye lɛ́ e mi lɛ́ è lé-kã́ kɛ̀ Gɛ̀ɛ̀ Púlú lɛ́ è zò-kɛ̀-sɛ̀ nɔ mia lɛ̀ɛ mɔ̀ɔ káa. Zi sùu kpɛɛ̀ lɛ́ wɔ̃́ nyɔ́ɔ̀ɔ lɛ́ lɛ à mɔ̀ á gɛ̃̀ɛ, lɛ à ká yɔɔ ké.

³⁰Ƃii mi lɛ́ e wɔ̃́ e kéa gèea, kóò à dɔ. Wɔ̃́ɔ lɛ́ e kélɛ̀, “Ḿm̀ lo wɔ̃́ dɛ̀í dàà. Ḿm̀ lo wɔ̃́ kèlè ɓoò.” Ɛ́ɛ̃́ a gèe zeĩ́, “Mia Dàa-mì lɛ́ɛ̀ lo mɛ̀ĩ́-sà dɔɔ̀ là mia nì mɔ̀.”

³¹Dà Wálà ɓéèe ɓɛ kɛ̀lɛ̀ lɛ dóo wɔ̃́ mìni zɛ̀ kpó-kpó ká.

³²Zi lɛ́ ka wɔ̃̀ e kɛá lúó lɛ́ aà diea píéa, ka zò è vùòá. Lúó e kília ká kɛɛ Wálà là lɛ̀-fɔ̀nɔ-kɔ̀ aà lɛ̀ fɔ̀nɔ ka bàa, ka wàa búnùzɛ̀ ɓèlè. Kɛɛ é kɛ bɛ̃̀ɛ̃ kília, kàá gbaa tó à gbɛ̀ɛ́ɛ̀ wì.

³³Lúó dò káa, o kɛ lé-kã́ kɛpìà ka mɔ̀, tó wáà wɔ̃́ yɔɔ kɛ̀ ka ká mia nyìɛ mɔ̀. Lúó dò bɛ̃̀ɛ̃ káa, ka zò yɛɛ̀ e kɛá kɛɛ ká dà mia lɛ́ o kɛ wɔ̃́ sùu e kéa sɔ̀lɔ̀ ɓopìàa bà.

³⁴Kà bĩ́-kɛ̀ì mìà nì ka kɛ dɔpìà o zì wɔ̃́ nyɔ́ɔ̀ɔ lɛ́ o kɛ à gɛ̃̀pìàa yí. Ɛ́ɛ̃́ lɛ̀ lɛ́ o kà pɔɔ̀ séĩ́ kṹ ka kɛ̀lɛ̀ɛ, ka ka zò kṹ tã́ã̀ géli ká, ɓii ka à yí dɔ kélɛ̀ pɛ lɛ́ e kpànazɛ̀, é diá pɛ lɛ́ wa kṹ ka kɛ̀lɛ̀ɛ là, lɛ́ e tòá kíli pɛ̀ káa, lɛ tĩã́ ka kɛ̀lɛ̀.

³⁵À mɔ́ɔ̀ wɔ̃̀ mɔ̀ɔ, yékɛ̀ ká ka zò ɓo pɛ lɛ́ ka zò lɛ à mɔ̀ɔ píé, ɓii fɔ́nɔ́ kpànazɛ̀ lɛ ɓe à kolo làa mɔ́ɔ̀ wɔ̃̀ mɔ̀.

³⁶Lɛ ka mɔ̀ ká kɛ zò-kũ̀-tã́ã̀ zɛ̀, kɛɛ ká wɔ̃́ lɛ́ Wálà à nàà ká kɛɛ kɛ, ɛ̃́ɛ̃́ kɛ ká pɛ lɛ́ aà e wè dɔ à káa sɔ̀lɔ̀ ɓo.

³⁷Ƃii, “À lɛ̀ lɛ̀ɛ́ ló túò tó mi lɛ́ lɛ nupìàa áà nù. Lɛ̀ɛ́ ló túò nupìà.

³⁸Kɛɛ m̀ mia kpeĩ nìa, zò-dɔ̀à-mɔ̀ lɛ́ɛ̀ lo kɛɛ̀ o yí, ɛ̃́ɛ̃́ óò lo kɛɛ̀ ɓe. Kɛɛ yé o dò nɔ́ɔ fé aà e ko gbɛ̃̀ m mɔ̀ɔ, m zò lɛ̀ɛ́ ló dàà à píé.”

³⁹Ko wá mia lɛ́ ò o ko gbɛ̃̀ Wálà mɔ̀, tó o gínià lɛɛ dò ká. Kɛɛ zò-dɔ̀à-mɔ̀ lɛ ko yí, ɛ̃́ɛ̃́ ko laà lɛ.