Read Yamano Hííbúlù 11 Bible Online

Hííbúlù 11 - Yamano bible

Hííbúlù 11

¹Zò-dɔ̀à-mɔ̀ kɛ̀ mi yí lɛ́ e kélɛ̀, kóò à yí dɔ kélɛ̀ pɛ lɛ́ ko zò lɛ à mɔ̀ɔ lɛ ɓe, ɛ̃́ɛ̃́ ko zò lɛ pɛ lɛ́ kòó gɛ̃̀ɛ̃ mɔ̀ kpó-kpó ɓo.

²Ƃii o zì zò-dɔ̀à-mɔ̀ kolo là zàáa, mia lɛ́ o kɛ mɔ́ ɓea, Wálà zò dàaà e kɛá o píé.

³Lɛ zò-dɔ̀à-mɔ̀ kolo là ká lɛ́ kò yí ma kélɛ̀ Wálà e kpóṹ là kɛ e lé-wè ɓɔ̀ɔ káa. E pɔɔ̀ lɛ́ òó gɛ̃̀ɛ sí, e pɔɔ̀ lɛ́ ò gɛ̃̀ɛ̃ kɛ à ká.

⁴Zò-dɔ̀à-mɔ̀ lɛ́ a kɛ lɛ́ Ébɛ̀ e sálà ɓo Wálà lɛ̀ɛ sálà-ɓo-pɛ̀ lɛ́ e kɛ kpeĩ é diá Kéĩ̀ zìa làa káa. À zì zò-dɔ̀à-mɔ̀ kolo là zàáa, Wálà a zɔ̃̀ɔ̃̀ kélɛ̀ e kɛ kpeĩ, ɓii Wálà dìè e e kɔ̀ yà là nɔ̀-lɛ̀ɛ-pɛ̀ɛ wì. Ébɛ̀ lɛ tĩã́ wéépìà à zì zò-dɔ̀à-mɔ̀ kolo là, yé bɛ̃̀ɛ̃ à gaà lɛɛ ká.

⁵Zò-dɔ̀à-mɔ̀ lɛ́ a kɛ lɛ́ Íínɔ̀ lɛ̀ɛ́ gbaa gaa. À síì e kɛá wáà lòá Wálà píé lɛ̀í. Bɛ̀i lɛ̀ɛ́ gbaa kɛ mi gbɛɛ mɔ̀ kɛ á gɛ̃̀, ɓii Wálà aà à sí, aà lóá lɛ̀ía mɔ́ɔ̀ wɔ̃̀ mɔ̀. Wálà là kíía láà gèe kélɛ̀, kɛɛ Íínɔ̀ síì é tĩã́ kɛɛ̀ à káa, e Wálà zò-dà-wɔ̃̀ kɛ.

⁶Mi gbɛɛ lɛ̀ɛ́ bɛ̀i Wálà zò-dà-wɔ̃̀ kɛɛ̀ yé zò-dɔ̀à-mɔ̀ wá à yía ká. Ƃii lɛ à mɔ̀ zò-dɔ̀à-mɔ̀ é kɛ mi nɔ́ɔ fé lɛ́ è nu Wálà píéa yí kélɛ̀ Wálà lɛ ɓe, ɛ̃́ɛ̃́ lɛ́ɛ̀ mia lɛ́ ò à nààa fɔ́nɔ́ nɔ.

⁷Zò-dɔ̀à-mɔ̀ lɛ́ a kɛ lɛ́ Nóà e Wálà zì lìè-wè lɛ́ à gbɛ̃̀ɛ̃̀ lɛ wɔ̃́ lɛ́ lɛ líé zàá, lɛ́ lɛ̀ɛ́ gbaa kɛ à gɛ̃̀pìàa mɔ̀ɔ maa. E Wálà wéè kɛ. E gɔɔ lɛ́ wà e píé-kɛ́ì-mìà o kɛ à yí lɛ́ o laa dɔ. Zí e kéa káa, e mɛ̀ĩ́-sà káá à ká kpóṹ là mìà wĩĩ́, ɛ̃́ɛ̃́ e kɛ̀-kpeĩ-kɔ̀ lɛ́ è nu zò-dɔ̀à-mɔ̀ kolo làa sɔ̀lɔ̀ ɓo.

⁸Zò-dɔ̀à-mɔ̀ lɛ́ a kɛ lɛ́ Éɓɔ́lɔ́hã́ã̀ e Wálà wéè kɛ lɛ̀ lɛ́ Wálà a súo kɛɛ káa. E ló sɛ́lɛ́ lɛ́ Wálà e e wè dɔ à ká kɛ á nɔ à lɛ̀ɛ yí. E gó e dìè pà, ɛ̃́ɛ̃́ lɛ̀ɛ́ gbaa lɛ̀ lɛ́ e kɛ à mɔ̀ é ló yia dɔ.

⁹E e yàlà kṹ sɛ́lɛ́ lɛ́ Wálà aà e wè dɔ à ká à lɛ̀ɛ yí lɛ̀ lɔ̀ɔ̀-mi lɛ́ ɓe zò-dɔ̀à-mɔ̀ kolo là zàá. Wà Áázè ɛ̃́ɛ̃́ Zékɔ̀ lɛ́ o wè-dɔ-wè nɔ́ doóa sɔ̀lɔ̀ ɓoa, o kɛ yììpìà sɔ-ká wì.

¹⁰Ƃii Éɓɔ́lɔ́hã́ã̀ e kɛ yàá pɛ́lɛ lɛ́ Wálà aà à gɔ̃́, ɛ̃́ɛ̃́ lɛ́ aà à dɔ, lɛ́ à gã̀-gbɛ̃̀à-là gɛ̀lɛ̀ lɛ ɓe tòá kíli káa gɛ̀nɛ̀.

¹¹Zò-dɔ̀à-mɔ̀ lɛ́ a kɛ lɛ́ bɛ̀i e kɛ Sɛ́wàlà mɔ̀ é e gí sí, yé bɛ̃̀ɛ̃ e kɛ kòlòa káa. Ƃii a gɛ̃̀ wánà ká kélɛ̀ Wálà lɛ́ɛ̀ lo wɔ̃́ lɛ́ e e wè dɔ à káa kɛɛ̀.

¹²Yé bɛ̃̀ɛ̃ Éɓɔ́lɔ́hã́ã̀ e kɛ ga gùlù làa, gɔ̃ doó e kília kolo là zàáa, à sùu-là-mìà o kɛ kù gbùò zɛ̀ lɛ̀ sĩ̀ã́ã̀ŋèlè lɛ́ ɓe lɛ̀í. Ɛ́ɛ̃́ o kù e kɛ gbùò lɛ̀ nyìɛ́-sɛ́lɛ́ lɛ́ e mɛ̀ĩ́ kpóṹ là, lɛ́ mia òó bɛ̀i à lóníìa lɛ́ ɓe.

¹³Zò-dɔ̀à-mɔ̀ yí lɛ́ míá o kéa séĩ́ o gaa. Òó gbaa pɛ lɛ́ Wálà e e wè dɔ à káa sɔ̀lɔ̀ ɓo. Kɛɛ o tó líé gbèĩ, o o gɛ̃̀, tó wáà o kɔ̀ yà o wì. Ɛ́ɛ̃́ o wéé o kɛ̀ lɔ̀ɔ̀-mìà ɛ̃́ɛ̃́ sɛ́lɛ́ gbɛɛ yí-mìà lɛ́ o kpóṹ là zèea ká wɔ̃̀ mɔ̀.

¹⁴Míá ò wɔ̃́ nì e kéa gèea, óò à kɛ̀ mia wáà yí dɔ̀ kélɛ̀ o sɛ́lɛ́ lɛ́ e o dìè o pà káa naapìà.

¹⁵Kɛɛ òó gbaa o yɛ́lɛ́ táá sɛ́lɛ́ lɛ́ waà gó à yí gbaa mɔ́ɔ̀ wɔ̃̀ ká. È kɛ̀á wa kɛ kília, lúó áá kɛɛ̀ o kɛ̀lɛ̀ kɛ ó yɛ́ o zí.

¹⁶Kɛɛ sɛ́lɛ́ lɛ́ ò à píé bàlà sia, lɛ́ e kɛ sɛ́lɛ́ kpeĩ ká, é diá à yé ò go à yía làa. Sɛ́lɛ́ kpeĩ e kília lɛ́ e à yé e lɛ̀ía káa. À mɔ́ɔ̀ wɔ̃̀ mɔ̀ɔ, yé míáa waà Wálà sí wà Wálàa, yɛ́lɛ̀ lɛ̀ɛ́ Wálà kɛ à mɔ́ɔ̀ wɔ̃̀ mɔ̀, ɓii aà pɛ́lɛ dò pɛ̀ kɛ o lɛ̀ɛ mɔ́ɔ̀ wɔ̃̀ mɔ̀.

¹⁷Zò-dɔ̀à-mɔ̀ lɛ́ a kɛ lɛ́ Éɓɔ́lɔ́hã́ã̀ e e gbe Áázè nɔ sálà-ɓo-pɛ̀ ká Wálà lɛ̀ɛ, lɛ̀ lɛ́ Wálà e Éɓɔ́lɔ́hã́ã̀ yí dã́a káa. Éɓɔ́lɔ́hã́ã̀ lɛ́ Wálà e e wè dɔ à lɛ̀ɛ. É kɛ bɛ̃̀ɛ̃ kília, à pɛ̀ kɛɛ̀ e kɛá kɛ é e gbe doó lɛ́ e kɛ à kɛ̀lɛ̀ɛ nɔ sálà-ɓo-pɛ̀ ká.

¹⁸Wálà aà gèe à lɛ̀ɛ kélɛ̀, “I sùu-là-mìà óò lo góò Áázè yí.”

¹⁹Éɓɔ́lɔ́hã́ã̀ e à gɛ̃̀ wánà ká e gé zàá kélɛ̀ bɛ̀i lɛ Wálà mɔ̀ kɛ é Áázè wɛ̀lɛ̀ ga kɛ̀lɛ̀, kɛ é kɛ zeĩ́ ɓéèe. Ɛ́ɛ̃́ lɛ̀ zí wa gèe à káa lɛ́ ɓea, Áázè e wɛ̀lɛ̀á ga kɛ̀lɛ̀, à dàa e à sɔ̀lɔ̀ ɓo zeĩ́.

²⁰Zò-dɔ̀à-mɔ̀ lɛ́ a kɛ lɛ́ Áázè e lúà lɛ́ e kɛ nupìàa kpɔ́ Zékɔ̀ wà Íísɔ̀ o mɔ̀ɔ.

²¹Zò-dɔ̀à-mɔ̀ lɛ́ a kɛ lɛ́ Zékɔ̀ e lúà kpɔ́ Zósɛ̀ gbe nì mɔ̀ doó doó kɛ é tĩã́ gaàa. À kɔ̃̀nɔɔ̀ e kɛá là kpeĩ̀ là áà gbìnì Wálà lɛ̀ɛ.

²²Lɛ̀ Zósɛ̀ e kɛ nupìà gaàa, zò-dɔ̀à-mɔ̀ lɛ́ a kɛ lɛ́ e Éézɛ̀lɛ̀-mìà gò Ízè wɔ̃̀ gèea. Ɛ́ɛ̃́ e e wè tó yi wɔ̃́ lɛ́ e kɛ o mɔ̀ ó kɛ é gbɛ̃̀á à bílí mɔ̀ɔ wɛ̃́ĩ̀.

²³Zò-dɔ̀à-mɔ̀ lɛ́ a kɛ lɛ́ Móózè mìà nì wa bĩ̀ĩ̀ mɛnɛ yààka píé lɛ̀ lɛ́ wa yea káa. Wa li mìnì sí, ɛ̃́ɛ̃́ òó gbaa túó sɛ́lɛ́ líé-sí-mì wéè tóò mɔ́ɔ̀ wɔ̃̀ mɔ̀.

²⁴Zò-dɔ̀à-mɔ̀ lɛ́ a kɛ lɛ́ Móózè lɛ̀ɛ́ gbaa wéé à mɔ̀ kɛ ó sí Fɛ́ɛ́lò lú gbe lɛ̀ lɛ́ e fàaa káa.

²⁵A naa kɛ wà Wálà là mia nì ó wàa ɓèlè, é diá kɛ-wɔ̃̀ yɔɔ kɛ-wɔ̃̀ nyɔ́nɔ́ lò à zò ká lúó zààle píé là.

²⁶E à gɛ̃̀ wánà ká kélɛ̀ mi à lé-kã́ kɛ̀ à mɔ̀ Kɛ́lɛ̀ìa mɔ́ɔ̀ wɔ̃̀ mɔ̀ɔ, lɛ dóo kpànazɛ̀ é diá dɔ-pɔ̀ɔ̀ séĩ́ lɛ́ e Ízèa là. Móózè a kɛ kíli, ɓii à yɛ́lɛ́ e kɛ fɔ́nɔ́ lɛ́ e kɛ nupìàa mɔ̀.

²⁷Zò-dɔ̀à-mɔ̀ lɛ́ a kɛ lɛ́ Móózè e gó Ízè, ɛ̃́ɛ̃́ lɛ́ lɛ̀ɛ́ gbaa túó sɛ́lɛ́ líé-sí-mìa zì wɔ̃́à-wàa-kɔ̀ lɛ̀ɛ. E kɛ lópìà e líé kpeĩ le, lɛ̀ pɛ lɛ́ e Wálà lɛ́ mia òó gɛ̃̀ɛ gɛ̃̀.

²⁸Zò-dɔ̀à-mɔ̀ lɛ́ a kɛ lɛ́ e Dìè-mia-là Kpílìa gã̀ gbɛ̃̀ tã́ã̀, áà gèè mia lɛ̀ɛ ó léà wɛ̃̀ĩ kpóũ mɔ̀ píéa. A kɛ kíli, yékɛ̀ ga zì vɔ-mì é Éézɛ̀lɛ̀-mìà wà gɔ̃-nɛ̀ líé zɛ.

²⁹Zò-dɔ̀à-mɔ̀ lɛ́ a kɛ lɛ́ Éézɛ̀lɛ̀-mìà o Mɛ̀ĩ́ Zóló kã́ tã́ã̀, lɛ̀ pɛ lɛ́ yíí lɛ̀ɛ́ gbaa kɛ yía. Lɛ̀ lɛ́ Ízè-mìà o kɛ à kɛ-zì naapìà ó kɛɛ, yíí e o mání.

³⁰Zò-dɔ̀à-mɔ̀ lɛ́ a kɛ lɛ́ gàlà lɛ́ e kɛ Zɛ́lékò mɔ̀ɔ e wí tã́ã̀, lɛ̀ lɛ́ Éézɛ̀lɛ̀-mìà o nyɛ nìɛ̀ à ká mɔ̀ lúó sálápèèlɛ píéa káa.

³¹Zò-dɔ̀à-mɔ̀ lɛ́ a kɛ lɛ́ Wéléháà, lɛ́ e kɛ e dìè lɔ̀ɔ̀ dɔpìàa e la, lɛ̀ lɛ́ o mia lɛ́ o Wálà-wè tóa zɛɛ káa. À laà e kɛá ɓii e e kɔ̀ yà mia lɛ́ o nuù e kɛá kɛ ó sɛ́lɛ́ɛ mɛ́ nyɛɛ wì e yiè ká.

³²Ḿ ló tĩã́ m líé? Lúó gbɛɛ wá gbaa m kɛ̀lɛ̀ kɛɛ ḿ Gédĩ̀ã̀, e bɛ̀i Bálà ɛ̃́ɛ̃́ Sã́ṹsĩ̀, wà Zɛ́fà, ɛ̃́ɛ̃́ zeĩ́ Dèɓé ɛ̃́ɛ̃́ Sámìò, é dàá dɔ̀-Wálà-lé-là mìàa bàa, kɛɛ ḿ o wɔ̃̀ gèe.

³³Zò-dɔ̀à-mɔ̀ kolo làa, o gèlè gbini sɛ́lɛ́ lé paàa zɛ̀ mɔ̀, tó o kɔ̀ áà dìè à là. O wɔ̃́ lɛ́ e kɛ kpeĩa kɛ, ɛ̃́ɛ̃́ o pɛ lɛ́ Wálà e e wè dɔ à káa sɔ̀lɔ̀ ɓo. O wɔ̀ɔ́ù kɛ à lé áà gbɛ̃̀,

³⁴ɛ̃́ɛ̃́ o kɛ tíé gbùò gbùò númípìà. O la gèlè-gɔ̃-làa kɛ̀lɛ̀. O mɛ́ e kɛ yɔ̃́ṹ-yɔ̃̀ũ̀, kɛɛ o mɛ́ e gbɛ̃̀ áà kɛ̀ gágà. O mɛ́ e kɛ gágà gèlè gɔ̃pìà. O kɔ̀ e die sɛ́lɛ́ gbɛɛ yì-mìà zì gèlè gɔ̃-mìà là.

³⁵Zò-dɔ̀à-mɔ̀ kolo là zàáa, loà lɛ́ o mìà nì waà gaa, o o mìà nì o kília wɛ̀lɛ̀-ga-kɛ̀lɛ̀ zɛ̀ gɛ̃̀. Mia dò bɛ̃̀ɛ̃ o o wũ ɓo kɛ̀ɓe wì, ɛ̃́ɛ̃́ o ga wɔ̃́ nyɔ́ɔ̀ɔ lɛ́ o kɛ à gɛ̃̀pìàa kolo là zàá. Wa kɛ kíli kɛɛ o wɛ̀lɛɛ̀ é kɛá lɛ̀í kɛ̀ɓe lɛ́ lɛ kpeĩ é diá à yé e zèea làa yí.

³⁶O kɛ yéí sípìà o dò mɔ̀, wáà o mɛ̀ gbàtò ká. O o dò bɛ̃̀ɛ̃ yèlè wáà o dùò bĩ́-kɛ̀ì.

³⁷O o pá gɛ̀lɛ̀ ká. O o kpú kã́. O o zɛ gèlè-gɔ̃-làà ká. O mɔ̀-sɔ̀ e kɛ ɓáá ɛ̃́ɛ̃́ ɓò kii ká, wáà dìá píé. Pɛ nyɛɛ̀ e kɛá o kɛ̀lɛ̀. O o sã̀ dɔ wáà wɔ̃̀ yɔɔ̀ yɔɔ̀ kɛ̀ o ká.

³⁸O kɛ̀ kpóṹ là lɛ̀ɛ́ gbaa à mɛ́ kṹ. O kɛ lópìà píé yɛ̀í là, ɛ̃́ɛ̃́ tɔ̃̀ũ̀ mɔ̀ píé, tó wáà yìì gɛ̀lɛ̀ gbàa wì ɛ̃́ɛ̃́ bũ yí píé.

³⁹Tɔ́ li kpɛɛ̀ lɛ́ míá o kéa séĩ́ waà à sɔ̀lɔ̀ ɓo o zì zò-dɔ̀à-mɔ̀ kolo là ké. Kɛɛ é kɛ bɛ̃̀ɛ̃ kília, òó gbaa pɛ lɛ́ Wálà aà e wè dɔ à káa sɔ̀lɔ̀ ɓo.

⁴⁰Ƃii Wálà aà pɛ yiè kpó-kpó lɛ́ è lo à nɔɔ̀ ko lɛ̀ɛ wɔ̃̀ yà e gé. Wɔ̃́ a yà e géa lɛ́ e kélɛ̀, o kɛ yàá ko gɛ̀nɛ̀, kɛɛ kò ye nì ko kɛɛ̀ é kɛá kpeĩ fɛ́fɛ́ le e kíe ká.