Read Yamano Hííbúlù 12 Bible Online

Hííbúlù 12 - Yamano bible

Hííbúlù 12

¹Kɛɛ ko yee, kélá-wè ɓo-mìà kù gbùò zɛ̀ e kéa o nìɛɛ̀ lɛ ko mɔ̀. Yé lɛ kília, kɔ̀à gó pɛ séĩ́ lɛ́ è kɔa kɛ̀ gbííni, ɛ̃́ɛ̃́ kɛ-wɔ̃̀ yɔɔ lɛ́ à kùnuù lɛ ko mɔ̀ bĩĩ lea lɛ̀ɛ, kɔ́á kɔa zò dɔ gágà, kɔ́á bàlà lɛ́ e kɔa líéa sí.

²Kɔ̀à kɔa nyìɛ sí, kɔ́á dɔ Zízɛ̀ lɛ́ ko zì zò-dɔ̀à-mɔ̀ zi è gbɛ̃̀ à là, tó à líé áà nyɛ̀ à làa mɔ̀. Lɛ̀ɛ́ gbaa kɔ̃́ wɔ̃́ mɔ̀ kɔ́lɔ́sìa mɔ́ɔ̀ wɔ̃̀ mɔ̀. Kɛɛ géli lɛ́ e kɛ yàá à gɛ̀nɛ̀ɛ mɔ́ɔ̀ wɔ̃̀ mɔ̀ɔ, à nyìɛ a mɔ́ɔ̀ fɔ̃́ ɓo yɛ́lɛ̀ lɛ́ e kɛ ga lɛ́ e kɛ à mɔ̀ á ɓo kɔ́lɔ́sì mɔ̀ɔ káa yí. Ɛ́ɛ̃́ à yàà lɛ gbaa Wálà kɔ̀ yiè yí là dɔ-táŋáná sɔ́nɔ́.

³Kà ka yɛ́lɛ́ táá Zízɛ̀ mɔ́ɔ̀ wɔ̃̀ ká. Kà ka yɛ́lɛ́ táá zi lɛ́ e kɛ-wɔ̃̀ yɔɔ kɛ-mìà zì lɔ̀-nyɛ̀à-mɔ̀ kṹ e zò káa mɔ́ɔ̀ wɔ̃̀ yí, yékɛ̀ ka fĩ́ĩ́ é nyɛ, ɛ̃́ɛ̃́ yékɛ̀ ká kɛ kɔ̃̀-wɔ̃̀-mɔ̀ mìà ká.

⁴Ka zì gèlè gɔ̃̀ kɛ-wɔ̃̀ yɔɔ káa, kàá gèlè lɛ́ léà è kàà à yía gɔ̃ nɛ́.

⁵Ka zò aà ni fã̀ã́-wàà wè lɛ́ Wálà à gèe ka lɛ̀ɛ, áà ka sì e gbe nìa mɔ́ɔ̀ wɔ̃̀ ká? O lɛ́ o kélɛ̀, “M gbe, yé mia Dàa-mì aà i kṹ gágà wɔ̃́ dò wɛ̃́ĩ̀a, yékɛ̀ i nyìɛ é fɔ̃́ wɔ̃́ a kɛ i káa yí. Yékɛ̀ i zò é dà zízàá yé aà wéé gágà i lɛ̀ɛ ká.

⁶Ƃii mia Dàa-mì lɛ́ɛ̀ mi nɔ́ɔ fé lɛ́ à lɔ̀ kpɔ́ɔ̀ lɛ à mɔ̀ɔ kũ gágà. Lɛ́ɛ̀ mi nɔ́ɔ fé lɛ́ è à si e gbea mɛ̀.”

⁷Kà ka zò kṹ ka gé yé kaà kɛ wɔ̃́ nyɔ́ɔ̀ɔ gɛ̃̀pìàa ká. Ka Dàa lɛ́ è ka kũ gágàa. Ka kɛ̀ à gbe nì káa mɔ́ɔ̀ ka kpɔ́ lɛ́ Wálà à ɓo ɓɛ. Nɛ́ sùu kpɛɛ̀ lɛ́ à dàa lɛ̀ɛ́ à kṹ gágà ɓɛ?

⁸Yé lɛ̀ɛ́ ka kṹ gágà lɛ̀ zí è e gbe nì séĩ́ kũáa káa, à yí lɛ́ e kélɛ̀, ka wá à gbe nì kpó-kpó ká. Kɛɛ ka sɔ̀-nɛ̀ ká.

⁹É kɛ bɛ̃̀ɛ̃ ko dàa nì lɛ́ o kpóṹ là zèea káa, o ko kṹ gágà, ɛ̃́ɛ̃́ ko bɛ̃̀ɛ̃ ko ɓɛ̀lɛyà nɔ o lɛ̀ɛ. Zi sùu kpɛɛ̀ lɛ́ mɔṹ kò bɛ̀i à mɔ̀ kó ko dìè nɔá mi lɛ́ e ko gɛ̀ɛ̀ Dàa káa lɛ̀ɛ, tó kɔ́áà kɛ̀ ɓea ká ké?

¹⁰Ko dàa lɛ́ e tã́ã̀ zèea, o ko kṹ gágà lúó kpuú ɓɔ̀ɔ píé, lɛ̀ zí e liá o lɛ̀ɛ ká. Kɛɛ Wálà láà kɛ̀ kíli kɛɛ é gbũ ko mɔ̀, kɛɛ kò ye nì kó dɔ à zì kɛ̀-púlú-kɔ̀ bà.

¹¹Yé waà ko kṹ gágàa, lɛ ko lɛ̀ɛ wɔ̃́ zò-dà-zízàá zɛ̀ ká. Kɛɛ ye wá ko géli wɔ̃̀ ká. Kɛɛ lɛ̀ à lɛ̀ e ɓo pèèlɛɛ, mia lɛ́ waà o kpɔ́ zi sùua káa, óò pɛ ɓɛɛ zò-yà-gé zɛ̀ lɛ́ e yìì-kɔ̀ kpeĩ káa ɓo.

¹²À mɔ́ɔ̀ wɔ̃̀ mɔ̀ɔ, kà ka kɔ̀ tɛ́ɛ́-tɛ̀ɛ̀ ɓɛ sí lɛ̀í, ká ka kpuò lɛ́ à mɛ́ wá gágàa wɛ́lɛ́ dà à yí.

¹³Kà táá zi kpeĩ píé teele, yékɛ̀ gã̀ lɛ́ à kpɔ́lɔ̀ lɛɛ é ɓo e wéĩ́, kɛ é kɛ yee ɓo kéléŋ-kèlèŋ.

¹⁴Kà kɛ-zì naa zò-yà-gé é kɛ kà mia nì séĩ́ ka fĩ̀ã̀. Kà à kɛ-zì naa kɛ kɛɛ é nyɛ ka mɔ̀, ɓii mi nɔ́ɔ fé lɛ́ kɛɛ lɛ à mɔ̀ɔ, lɛ̀ɛ́ ló ko Dàa-mì gɛ̃̀ɛ̃̀.

¹⁵Kà ka yɛ́lɛ́ kɛ ka dìè píé, yékɛ̀ mi nɔ́ɔ fé é e ko gbɛ̃̀ Wálà zì zò-kɛ̀-sɛ̀ɛ mɔ̀. Kà ka yɛ́lɛ́ kɛ ka dìè píé yékɛ̀ mi nɔ́ɔ fé é kɛ ka bà, é kɛ lɛ̀ pɛ píní nyɔ́ɔ̀ɔ lɛ́ è ɓɔ tó áà e zì kɛ̀-nyɔ́ɔ̀ɔ-làa wɛ̃̀ĩ̀ e ɓɛ́ĩ̀ yí, tó áà wéé kã̀a lɛ́ ɓe.

¹⁶Kà ka yɛ́lɛ́ kɛ ka dìè píé yékɛ̀ ka dò é kɛ sɔ̃̀ɔ̃ yɔɔ kɛ-mì, ɛ̃́ɛ̃́ yékɛ̀ é kɛ mi lɛ́ lɛ̀ɛ́ gbini Wálà lɛ̀ɛ lɛ̀ zí Íísɔ̀ e kɛáa lɛ́ ɓe. Íísɔ̀ e kília, e là dìè-là lɔ̀ɔ̀ dɔ léɓèlè kɔ̀ɛ̀ doó mɔ̀.

¹⁷Káà à yí dɔ lɛ̀ a kɛ kília, a naa é lúà lɛ́ e kɛ à dàa kɛ̀lɛ̀ɛ sɔ̀lɔ̀ ɓo. Kɛɛ òó gbaa wéé à mɔ̀ kɛ á kɛ kíli. Ƃii lɛ̀ɛ́ gbaa zi gbɛɛ gɛ̃̀ kɛ é wɔ̃́ lɛ́ a kɛɛ mɛ́ vɔ̀ɔ, yé bɛ̃̀ɛ̃ a naa e nyìɛ-yíí káa ká.

¹⁸Ka nuù wá pɛ́ kà bɛ̀i à mɔ̀ ká pá à káa ká kɔ̀ɛ́, lɛ̀ zí Éézɛ̀lɛ̀-mìà o nu à káa lɛ́ ɓe. Ye lɛ́ e tɔ̃̀ũ̀ lɛ́ tíé è kũ à wĩĩ́ zùlù zùlù lea káa. Bĩ́ tii, e bɛ̀i, fã̀ã̀ mɛ́ gágà zɛ̀,

¹⁹ɛ̃́ɛ̃́ túlú wéè, e bɛ̀i mi wéè e kɛ à lɛ̀ mɔ̀. Lɛ̀ míáa o mi wéè e kília maa, o kpé kã́ wáà gèè, yékɛ̀ ó wéé sùua gbɛɛ ma gbaa.

²⁰Ƃii wɔ̃́ lɛ́ Wálà a gèea, e kɛ o là gbííni. Ye lɛ́ e kélɛ̀, “É kɛ bɛ̃̀ɛ̃ wìì ká lɛ́ e pá tɔ̃̀ũ̀a mɔ̀ɔ, lɛ à mɔ̀ ó à pá gɛ̀lɛ̀ ká, é tóá kíli é ga.”

²¹Lɛ̀ o kɛ à gɛ̃̀pìàa, e kɛ gbíníí zɛ̀, a kɛ Móózè áà gèè, “M mɛ́ lɛ tàlepìà túó ká.”

²²Kɛɛ ka yee, ka nuù lɛ gbaa Záyɔ̃̀ tɔ̃̀ũ̀, wà Wálà ɓéèe ɓɛ pà, lɛ́ e Zùlúsàlɛ̀ yé lɛ lɛ̀ía káa mɔ̀. Wálà là vɔ-mìà lɛ́ òó bɛ̀i o lóníìa o lɛ̀ e kília mɔ̀.

²³Ka nuù lɛ gbaa lɛ̀ lɛ́ Wálà là nɛ́ líé vɔ̀ lɛ́ o tɔ́ bɛ̃̀ɛ̃ɛ̃̀ lɛ lɛ̀ía, lɛ́ o páà lɛ e kíe mɔ̀ géli yía lɛ̀ mɔ̀. Ka nuù lɛ Wálà lɛ́ e mɛ̀ĩ́-sà dɔ̀ mia séĩ́ mɔ̀ mì ká, ɛ̃́ɛ̃́ mia kpeĩ lɛ́ o kɛɛ̀ lɛ kpeĩ fɛ́fɛ́ lea, gɛ̀ɛ̀ wɛlɛ mɔ̀.

²⁴Ka nuù lɛ Zízɛ̀ lɛ́ e wè-dɔ-wè dɛɛ pɛ̀ kɛ, e bɛ̀i léà lɛ́ wa wɛ̃̀ĩ, lɛ́ è wɔ̃́ kpeĩ gèe é diá Ébɛ̀ zì làa wɛlɛ mɔ̀.

²⁵Kà ka yɛ́lɛ́ kɛ ka dìè píé yékɛ̀ ká mi lɛ́ è mɛ́ĩ́ ɓo ka lɛ̀ɛ wéè tó. Mia lɛ́ o lìè-wè lɛ́ a dɔ o lɛ̀ɛ kpóṹ làa wɔ̃̀ ɓo o tóó yía, òó gbaa zi gɛ̃̀ kɛ ó wàà. É kɛ̀á wɔ̃́ e kéa lɛ kíli, tó kɔ́áà kɔa ko gbɛ̃̀ mi lɛ́ lɛ yàá lɛ̀í, áà mɛ́ĩ́ ɓò ko lɛ̀ɛ mɔ̀ɔ, zi kpɛɛ̀ lɛ́ zi nyɛɛ̀ lɛ à ká ko kɛ̀lɛ̀ wàà wɛ̃́ĩ̀ ké.

²⁶À wéè a kɛ kpóṹ là áà tàlè à lúó ká. Kɛɛ dɛɛ káa, aà e wè dɔ kélɛ̀, “Ḿm̀ lo à kɛɛ̀ kpóṹ là é tàle doó ɓo zeĩ́. Ye wá bɛ̃̀ɛ̃ kpóṹ là doó ká. Lɛ̀í nì séĩ́ óò lo tàleè.”

²⁷Doó ɓo zeĩ́ lɛ́ a gèe e kéa, lɛ́ɛ̀ à zɔ̃̀ɔ̃̀ kélɛ̀ pɔɔ̀ lɛ́ o kɛɛ̀ lɛɛ, óò lo tàleè, tó wáà o ɓò o dɔ̀lɔ̀ mɔ̀. À kɛɛ̀ lɛ́ɛ̀ lo kɛɛ̀á kíli, kɛɛ pɔɔ̀ lɛ́ lɛ̀ɛ́ ló tàleèa, kɛɛ ó tó dɔ̀á o dɔ̀lɔ̀ mɔ̀.

²⁸À mɔ́ɔ̀ wɔ̃̀ mɔ̀ɔ, kɔ̀à kɛ zúo ɓo zɛ̀, ɓii sɛ́lɛ́ lɛ́ mi tóò lɛ ko là à yí, lɛ́ lɛ kɔ̀à pɛ káa, lɛ̀ɛ́ bɛ̀i tàleè. Kɔ̀à Wálà zúo ɓo, kɔ́á gbini à lɛ̀ɛ zi lɛ́ è à zò dàáa ká ɓɛ̀lɛyà ɛ̃́ɛ̃́ tùò-à-lɛ̀ɛ ká.

²⁹Ƃii kò Wálàa lɛ tíé lɛ́ è pɛ gèlèa ká.