Read Yamano Hííbúlù 13 Bible Online

Hííbúlù 13 - Yamano bible

Hííbúlù 13

¹Ka kíe nì lɔ̀ è kpɔ́ ka mɔ̀ teele lɛ̀ zí ye-mìà lɔ̀ è kpɔá o kíe nì mɔ̀ɔ lɛ́ ɓe.

²Ka zò è vùò ka kɔ̀ yà lɔ̀ɔ̀-mìà wì wɔ̃̀ ká ka píé kɛ́ì. Mia dò wa kɛ kíli. O tóá kɛpìà, o o kɔ̀ yà Wálà là vɔ-mìà wì, kɛɛ òó gbaa à yí dɔ.

³Ka zò è vùò mia lɛ́ o bĩ́-kɛ̀ìa mɔ́ɔ̀ wɔ̃̀ ká, lɛ̀ pɛ lɛ́ kà ye nì ka bĩ́-kà e kília wì. Ka zò è vùò mia lɛ́ o wàa ɓèlèpìàa ká, lɛ̀ pɛ lɛ́ kà ye nì lɛ́ kà wàa e kília ɓèlè.

⁴Lɛ mia séĩ́ mɔ̀ ó ɓɛ̀lɛyà nɔ lee wà gɔ̃ o kíe sí wɔ̃̀ yí. Yékɛ̀ lee wà e dɛ̃ ó sɔ̃̀ɔ̃ yɔɔ kɛ o kíe nì ká. Wálà lɛ́ɛ̀ lo mɛ̀ĩ́-sà dɔɔ̀ míá ò sɔ̃̀ɔ̃ yɔɔ kɛ̀ɛ, wà míá ò wàà o ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ìa mɔ̀.

⁵Yékɛ̀ pɛlèe zì lɔ̀-kɛ̀à-mɔ̀ é die ka zò ká. Ka zò è dà pɛ́ e ka kɛ̀lɛ̀ɛ píé. Ƃii Wálà aà gèe kélɛ̀, “M̀ḿ ló kã́ã̀ ka mɔ̀, ɛ̃́ɛ̃́ m̀ḿ ló góò ka zí gbɛɛ ɓo.”

⁶Yé lɛ kília, kɔ̀à túó ɓo kɔa là, kɔ́á gèe kélɛ̀, “Mia Dàa-mì lɛ́ e gbũ̀-m-mɔ̀ mì káa. M̀ḿ ló túò. Mɛ́ mi è bɛ̀i à mɔ̀ á kɛ m ká?”

⁷Ka zò è vùò ka líé-sí-mìà bèĩzɛ̀ lɛ́ o Wálà là wééa gèe ka lɛ̀ɛ ká. Kà ka yɛ́lɛ́ táá zi lɛ́ o kɛ à ká, lɛ́ o gaa ká. Ɛ́ɛ̃́ zi lɛ́ zò-dɔ̀à-mɔ̀ e kɛá o yía, è kɛá ka bɛ̃̀ɛ̃ ka yí.

⁸Zi lɛ́ Zízɛ̀ Kɛ́lɛ̀ì e kɛá yaláa, lɛ à ká pɛ́nɛɛ, ɛ̃́ɛ̃́ lɛ́ɛ̀ lo tóò kíli tòá kíli ká.

⁹Yékɛ̀ ká tó pɛ-zɔ̃̀ɔ̃̀-kɔ̀ dɛɛ dɛɛ é ka ɓo zi yiè ɓɛ píé. Lɛ sɛ̀ Wálà zì zò-kɛ̀-sɛ̀ é ko zò mɛ́ kɛ gágà, kɛɛ ye wá mi tɔ̃́ɛ̃́ tóò ká. Míá ò o tɔ̃́ɛ̃́ toa, òó pɛ gbɛɛ gɛ̃̀ à tóò kolo là.

¹⁰Mia lɛ́ ò yɛɓo kɛ̀ Zúù-mìà zì sɔ-káa wìa, bɛ̀i wá o mɔ̀ kɛ ó sálà-ɓo-pɛ̀ lɛ́ e kò sálà-ɓòà-là-pɛ̀ɛ làa ɓèlè.

¹¹Sálà-ɓò-Wálà-mɔ̀-mìà wũ-là-mìa lɛ́ɛ̀ lo wìì léà ká Wálà là Lɛ̀ Púlúa Lɛ̀ Kpànazɛ̀-pìà, kɛɛ é à kóná ɓo Wálà mɔ̀ sálà-ɓo-pɛ̀ ká kɛ-wɔ̃̀ yɔɔ wɛ̃́ĩ̀. Kɛɛ óò wììa bílí si, o gó à ká lɛ̀ lɛ́ o yàlà kṹũ̀ lɛ yía mɔ̀, tó wáà gèlè.

¹²Wɔ̃́ e kéa mɔ́ɔ̀ wɔ̃̀ mɔ̀ɔ, Zízɛ̀ e kpɔ́ gàlà lɛ́ e kɛ pɛ́lɛɛ mɔ̀ɔ lé ká kɛɛ ó tĩã́ zɛɛ̀. E ga kɛɛ é mia kɛ púlú e léà ká.

¹³À mɔ́ɔ̀ wɔ̃̀ mɔ̀ɔ, kɔ̀à gó lɛ̀ lɛ́ mia yàlà kṹũ̀ lɛ yía mɔ̀, kɔ́á ló à píé, kɛɛ kɔ̀à ye nì kɔ́á dɔ yɛ́lɛ̀ lɛ́ e kpɔ́ à làa yí.

¹⁴Ƃii ko pà lɛ́ è bɛ̀i kɛɛ̀ ɓe tòá kíli káa wá ɓe kpóṹ là zèe. Ko yɛ́lɛ́ lɛ ko pà lɛ́ lɛ ɓe é nua gɛ̀nɛ̀.

¹⁵Yé lɛ kília, kɔ̀à tɔ́-ɓɔ nɔ kɔa zì sálà-ɓo-pɛ̀ ká Wálà lɛ̀ɛ Zízɛ̀ tɔ́ yí zàá teele. Tɔ́-ɓɔ e kília, lɛ́ e nɔ̀-lɛ̀ɛ-pɛ̀ lɛ́ bè lɛ́ è à tɔ́ gèea à nɔ à lɛ̀ɛ káa.

¹⁶Yékɛ̀ ka zò é ni wɔ̃́ yiè kɛɛ̀ mɔ̀, ɛ̃́ɛ̃́ gbũ̀ ka kíe nì mɔ̀ wɔ̃̀ ká. Ƃii sálà ɓoò lɛ́ è Wálà zò dàa lɛ́ e kília.

¹⁷Kà ka líé-sí-mìà wè kɛ, káà kɛ̀ o wì. O nyìɛ lɛ ka gɛ̀ɛ̀ mɔ̀. Ƃii lɛ o mɔ̀ ó o dìè wɔ̃̀ gèe yɛɓo lɛ́ ò kɛ̀ɛ mɔ́ɔ̀ wɔ̃̀ mɔ̀. Yé kaà o wéè kɛɛ, óò lo o kɛ-yɛ̀ɓo kɛɛ̀ géli ká. Yé kàá kɛ kília, óò lo à kɛɛ̀ zò yéĩ̀zɛ̀ ká, ɛ̃́ɛ̃́ lɛ̀ɛ́ ló gbũũ̀ ka mɔ̀ gbɛɛ ɓo.

¹⁸Kà sɛ̀nɛ ɓo ko lɛ̀ɛ. Kóò à yí dɔ kélɛ̀ ko zò píé lɛ púlú, ɓii kóò nàà kó wɔ̃́ lɛ́ lɛ kpeĩa kɛ teele.

¹⁹Ḿm̀ kpé kpó-kpó kã ka lɛ̀ɛ kɛɛ ká sɛ̀nɛ ɓo Wálà lɛ̀ɛ é m vɔ ka píé pɛ́lɛ̀.

²⁰Wálà aà ko Dàa-mì Zízɛ̀ wɛ̀lɛ̀ ga kɛ̀lɛ̀. À ye lɛ́ e Nyìɛ-kɛ̀ ɓáá vɔ̀ lɛ́ o ko káa, mɔ̀ mì Kpànazɛ̀ ká à zì léà lɛ́ e wè-dɔ-wè tòá kíli zɛ̀ ɓɛ wɛ́lɛ́ káa mɔ́ɔ̀ wɔ̃̀ mɔ̀ɔ.

²¹Wálà lɛ́ è zò-yà-gé nɔɔ, è pɛ yiè séĩ́ lɛ́ lɛ ka mɔ̀ ká sɔ̀lɔ̀ ɓo kɛɛ ká wɔ̃́ lɛ́ à nàà à káa kɛɛ nɔ ka lɛ̀ɛ. È wɔ̃́ lɛ́ è à zò dàa kɛ ko yí Zízɛ̀ Kɛ́lɛ̀ì kolo là zàá. Ò Kɛ́lɛ̀ì tɔ́ ɓɔ tòá kíli wɔ́lɔ́-wɔ́lɔ́ ká. É kɛ kíli.

²²M lèe-gé vɔ̀, ka kpé lɛ sɛ̀, kà ka tóó dɔ m mɔ̀ zò-kũ̀-tã́ã̀ ká fã̀ã́-wàà wè nì e kéa mɔ̀. Ƃii kii lɛ́ ma bɛ̃̀ɛ̃ ka píé e kéa, ye wá bɛ̃̀ɛ̃ gbèĩ.

²³Ḿm̀ nàà ká yí dɔ kélɛ̀ waà ko lèe-gé Témɔ́tè ɓo bĩ́-kɛ̀ì. É nùá pɛ́lɛ̀ɛ, lɛ́ɛ̀ lo kɛɛ̀ m píé yé maà ka gɛ̃̀ɛ ká.

²⁴Kóò wèè ka líé-sí-mìà séĩ́, ɛ̃́ɛ̃́ Wálà là mia nì séĩ́ bà. Kɔa lèe-gé vɔ̀ lɛ́ ò go Ítálèa, óò wèè ka bà.

²⁵Zò-kɛ̀-sɛ̀ é kɛ ka séĩ́ ka píé. É kɛ kíli.