Read Yamano Hííbúlù 2 Bible Online

Hííbúlù 2 - Yamano bible

Hííbúlù 2

¹Wɔ̃́ e kéa mɔ́ɔ̀ wɔ̃̀ mɔ̀ɔ, lɛ à mɔ̀ kó ko kɔ̀ kùnù wɔ̃́ lɛ́ kɔaà maa mɔ̀ kpɛ̃ĩ le, yékɛ̀ pɛ nɔ́ɔ fé é ko ɓo zi mɔ̀.

²Wɔ̃́ lɛ́ Wálà là vɔ-mìàa wa gèea, mia wa kɛ̀ wánà zɛ̀ wɔ̃̀ yí dɔ gbaa. Mi nɔ́ɔ fé lɛ́ lɛ̀ɛ́ gbaa wéé à kɛ-wɔ̃̀ mɔ̀, kɛɛ é à kṹ tã́ã̀a, e wɔ̃́ nyɔ́ɔ̀ɔ lɛ́ laa mɔ̀ á sɔ̀lɔ̀ ɓo à wɛ̃́ĩ̀a gɛ̃̀.

³Yé lɛ kília, yé kòó ko tóó dɔ la-ɓo kpànazɛ̀ e kéa mɔ̀ɔ, zi sùu kpɛɛ̀ lɛ́ kò bɛ̀i zi gɛ̃̀á kó wàà mɔṹ? Ko Dàa-mì dìè-tĩ́ lɛ́ e la-ɓo e kéa wɔ̃̀ gèe mɔ́ bèĩzɛ̀ɛ. Mia lɛ́ wa wéè maa, wa zɔ̃̀ɔ̃̀ ko lɛ̀ɛ kélɛ̀ lɛ wánà zɛ̀.

⁴Ɛ́ɛ̃́ Wálà e e dìè zì kélá dà gbaa à bà wɔ̃́ gɔ̃̀á wà wɔ̃́ lé-pa zɛ̀, e bɛ̀i wɔ̃́ kpàlézɛ̀ gbɛɛ̀ gbɛɛ kɛɛ̀ kolo là zàá. E bɛ̀i, e Gɛ̀ɛ̀ Púlú zì nɔ̀-lɛ̀ɛ-pɛ̀ yí gìnì mia mɔ̀ lɛ̀ zí a naa à káa lɛ́ ɓe.

⁵Wálà lɛ̀ɛ́ gbaa là vɔ-mìàa kɛ ó kɛ kpóṹ là lɛ́ kò wèè à káa ké, lɛ́ lɛ nupìàa là.

⁶Kɛɛ o pɛ bɛ̃̀ɛ̃ Wálà kiia lɛ̀ dò mɔ̀ weeá kélɛ̀, “Mɛ́ e mi ká, lɛ́ ì bɛ̀i à mɔ̀ í i yɛ́lɛ́ táá à mɔ́ɔ̀ wɔ̃̀ yí? Ɛ́ɛ̃́ mɛ́ e mia gbe nì o kéa o ká, lɛ́ ì bɛ̀i à mɔ̀ í kpàa o mɔ́ɔ̀ wɔ̃̀ ká?

⁷I à kɛ ɓà vɔ-mìà o kɛ à mɔ̀ kpànazɛ̀ lúó zààle píé. I tɔ́-ɓɔ wà ɓɛ̀lɛyà lɛ́ ò nɔ sɛ́lɛ́ líé-sí-mì lɛ̀ɛ nɔ à lɛ̀ɛ.

⁸I à kɛ e kɛ pɛ séĩ́ là.” Wɔ̃́ yé e kéa, a gèe kélɛ̀ Wálà e mi kɛ pɛ séĩ́ là. À yí lɛ́ e kélɛ̀, pɛ gbɛɛ wá ɓe kɛ é gɔ̃́ kɛɛ̀ à wì. Kɛɛ kòó mi gɛ̃̀ kɛ é kɛ pɛ séĩ́ là dɛɛ ká.

⁹Kɛɛ kóò Zízɛ̀ yee gɛ̃̀. O Wálà là vɔ-mìà kɛ à mɔ̀ kpànazɛ̀ lúó zààle píé, kɛɛ Wálà zì zò-kɛ̀-sɛ̀ kolo là zàáa, é à kɛ é ga mia séĩ́ wɛ̃́ĩ̀. Kóò à gɛ̃̀, tó tɔ́-ɓɔ wà ɓɛ̀lɛyà lɛ́ ò nɔ sɛ́lɛ́ líé-sí-mì lɛ̀ɛ, tó à nɔɔ̀ lɛ à lɛ̀ɛ sã̀-dɔ gà lɛ́ a ɓoa mɔ́ɔ̀ wɔ̃̀ mɔ̀.

¹⁰E kɛ nɔ́ wánà zɛ̀ lɛ́ Wálà lɛ́ e pɛ séĩ́ kɛ, ɛ̃́ɛ̃́ lɛ́ è e nyìɛ kɛ̀ pɛ séĩ́ mɔ̀ɔ, lɛ́ e Zízɛ̀ kɛ mɛ́ kpálàa zɛ̀ wɔ̃́ nyɔ́ɔ̀ɔ lɛ́ a gɛ̃̀ɛ kolo là, kɛ é à kɛ mia búnùzɛ̀ ó kɛ à gbe nì ká, kɛ é nu o ká kɛɛ wà ye nì ó dɔ à zì lɛ̀-fɔ̀nɔ-kɔ̀ɔ yía. Ƃii Zízɛ̀ lɛ́ è líé si o ká la-ɓo sɔ̀lɔ̀-ɓo-zì píéa.

¹¹Lɛ́ɛ̀ mia kɛ̀ tó kɛɛ áà nyɛ̀ o mɔ̀. À yeo, ɛ̃́ɛ̃́ mia lɛ́ e o kɛ lɛ́ kɛɛ nyɛɛ̀ lɛ o mɔ̀ɔ, wà ye nì o Dàa lɛ nɔ́ doó. Pɛ́ à mɔ́ɔ̀ yɛ́lɛ̀ lɛ̀ɛ́ Zízɛ̀ kɛ kɛ é o sí e lèe-gé vɔ̀ɔ lɛ́ ɓɛ.

¹²Láà gèe kélɛ̀, “Ḿm̀ lo i wɔ̃̀ gèeè m lèe-gé vɔ̀ lɛ̀ɛ. Ḿm̀ lo i tɔ́ ɓɔɔ̀ mia gbũ fĩ̀ã̀.”

¹³Láà gèe zeĩ́ kélɛ̀, “Ḿm̀ lo m zò dɔɔ̀ Wálà mɔ̀.” Ɛ́ɛ̃́ láà gèe zeĩ́ kélɛ̀, “Nɔ́ɔ̀ɓé lɛ́ Wálà aà o nɔ m lɛ̀ɛ, kò ye nì gɛ̃̀ ko ké.”

¹⁴Lɛ̀ lɛ́ nɔ́ɔ̀ɓéa o mia lɛ́ o léà wà o nɔ̀ɛ lɛ o mɔ̀ɔ káa, Zízɛ̀ dìè a mɔ́ɔ̀ kɛ ɓo lɛ̀ o lɛ́ ɓe, tó wà ye nì o kɛ-kɔ̀ áà kɛ̀ à yí doó. A kɛ kíli kɛɛ à zì gá a ɓoa, kɛ á kɛ Dɛ́ɓò lɛ́ yíkɛ̀ gáàa lɛ à kɛ̀lɛ̀ ga làa, kɛɛ à yí é sìè,

¹⁵kɛ bɛ̀i é kɛ à mɔ̀ kɛ é mia lɛ́ o zì tùò-ga-lɛ̀ɛ aà o kɛ wáà kɛ̀ lùò ká o zì kɛ̀ɓe yía, kɛ é o la.

¹⁶Lɛ wánà ká kélɛ̀ mia lɛ́ è gbũ o mɔ̀ɔ, o wá Wálà là vɔ-mìàa ká. Kɛɛ o lɛ́ o tɔ́ Éɓɔ́lɔ́hã́ã̀ sùu-là-mìàa.

¹⁷À mɔ́ɔ̀ wɔ̃̀ mɔ̀ɔ, e kɛ à mɔ̀ é kɛ lɛ̀ e lèe-gé vɔ̀ lɛ́ ɓe zi séĩ́ ká, kɛɛ é kɛ wà sálà-ɓò-Wálà-mɔ̀-mìà wũ-là-mì zò-dɔ̀à-mɔ̀ zɛ̀ lɛ́ è mia yéĩ̀ kũa ká, à zì kɛ-yɛ̀ɓo lɛ́ à kɛ̀ Wálà lɛ̀ɛ kolo là zàá, kɛɛ mia ɓéèe zì kɛ-wɔ̃̀ yɔɔ é ɓo o wũ mɔ̀.

¹⁸Ɛ́ɛ̃́ lɛ́ɛ̀ bɛ̀i gbaa à mɔ̀ é gbũ mia lɛ́ yí-dã́-wɔ̃̀ aà ɓɔ o làa mɔ̀, ɓii yí-dã́-wɔ̃̀ aà ɓɔ à bɛ̃̀ɛ̃ là, ɛ̃́ɛ̃́ à sã̀ aà dɔ doa mɔ́ɔ̀ wɔ̃̀ mɔ̀.