Read Yamano Hííbúlù 3 Bible Online

Hííbúlù 3 - Yamano bible

Hííbúlù 3

¹M lèe-gé vɔ̀ lɛ́ ka ké Kɛ́lɛ̀ì tɔ́ yí zàáa, Wálà aà ka vɔ̀ɔ ka súo kɛ nɔ́ kíli. Kà ka yɛ́lɛ́ táá Zízɛ̀ mɔ́ɔ̀ wɔ̃̀ yí. Wálà e à vɔ kɛ é kɛ sálà-ɓò-Wálà-mɔ̀-mìà wũ-là-mì ká zò-dɔ̀à-mɔ̀ wɔ̃̀ lɛ́ kò wèè à mɔ̀ɔ wɛ̃́ĩ̀.

²E kɛ zò-dɔ̀à-mɔ̀ zɛ̀ Wálà lɛ́ e à sí kɛ é yɛɓo e kéa kɛɛ lɛ̀ɛ, lɛ̀ zí nɔ́ Móózè e kɛá zò-dɔ̀à-mɔ̀ zɛ̀ yɛɓo lɛ́ e kɛ à kɛpìà Wálà píé-kɛ́ì-mìà séĩ́ fĩ̀ã̀a lɛ́ ɓe.

³Mi lɛ́ è ká dɔɔ, óò à ɓɛ̀lɛ yà, é diá ká ké a dɔɔ là. Zi nɔ́ doóa káa, lɛ́ɛ̀ Zízɛ̀ mɛ́ kũ kpó-kpó ɓo kɛ é tɔ́-ɓɔ sɔ̀lɔ̀ ɓo, é diá Móózè là.

⁴Ká nɔ́ɔ fé dɔ-mì lɛ ɓe. Ɛ́ɛ̃́ Wálà lɛ́ aà pɛ séĩ́ dɔɔ.

⁵Móózè e kɛ zò-dɔ̀à-mɔ̀ zɛ̀ Wálà píé-kɛ́ì-mìà séĩ́ fĩ̀ã̀. E kɛ Wálà là yɛɓo-kɛ-mì ká, ɛ̃́ɛ̃́ e kɛ wɔ̃́ lɛ́ Wálà e kɛ lópìà à gèeè líéa gèepìà.

⁶Kɛɛ Kɛ́lɛ̀ì lɛ zò-dɔ̀à-mɔ̀ zɛ̀, ɛ̃́ɛ̃́ à ye lɛ́ e Wálà Gbe lɛ́ e Wálà là káa wũ làa káa. Ko lɛ́ ko là ká ká, yé ko fã̀ã́ aà wàà, ɛ̃́ɛ̃́ lɛ́ kɔaà ko zò dɔ pɛ lɛ́ ko zò lɛ à mɔ̀ɔ mɔ̀ teelea káa.

⁷Lɛ̀ wɔ̃́ nì e kéa lɛ kília, Gɛ̀ɛ̀ Púlú a mɔ́ɔ̀ à gèe ɓo kélɛ̀, “Yé kaà Wálà wéè ma pɛ́nɛɛ,

⁸yékɛ̀ ká wũ-yí-gágà-là kɛ, lɛ̀ zí ka kɛá lúó lɛ́ ka gèlè gɔ̃á Wálà káa káa lɛ́ ɓe. Lúó e kília lɛ́ ka Wálà yí dã́ à ká yɛ̀í làa.

⁹Ka dàa ye dàà nì o ma Wálà m yí kpó-kpó dã́ à lɛ̀ mɔ̀, yé bɛ̃̀ɛ̃ o wɔ̃́ lɛ́ ma kɛ kɛ̀ɛ̀ vũ̀ yììsɛ píéa gɛ̃̀ɛ ká.

¹⁰Wɔ̃́ e kília mɔ́ɔ̀ wɔ̃̀ mɔ̀ɔ, wɔ̃́ e m wàa míá o kília o píé, máà gèè kélɛ̀, ‘O zò láà kɛ̀ tó wáà wɔ̃́ nì nɔ́ teele. Òó m zì wɔ̃́ kɛ-kɔ̀ dɔ nɛ́.’

¹¹Wɔ̃́ e m wàa, a kɛ máà m náá kpɔ̀ weeá kélɛ̀, ‘Òó ló ɓɔ gbɛɛ ɓoò m zì fĩ́ĩ́-dɔpìà.’ ”

¹²M lèe-gé vɔ̀, kà ka yɛ́lɛ́ kɛ ka dìè píé yékɛ̀ mi nɔ́ɔ fé lɛ́ e ka bàa à zò píé é kɛ yɔɔ, tó wɔ̃́ gɛ̃̀ wánà ká wá à yí, tó áà kɛ̀ kɛɛ é à ɓo Wálà ɓéèe ɓɛ zì zía píé.

¹³Kɛɛ lɛ ka mɔ̀ ká lìè-wè dɔ ka kíe nì lɛ̀ɛ lúó séĩ́ ká, yé kɔa tĩã́ ɓe pɛ́nɛɛ lɛ́ kɔ̀à wɔ̃̀ gèea ká, yékɛ̀ kɛ-wɔ̃̀ yɔɔ é ka dò nɔ́ɔ fé bèkɛ̀ ɓo, tó áà ka tùluù kɛ̀ gágà.

¹⁴Ƃii kò Kɛ́lɛ̀ì nì ko doó wɔ̃́ séĩ́ yí yé kɔaà kùnù zò-dɔ̀à-mɔ̀ lɛ́ e kɛ ko kɛ̀lɛ̀ bèĩzɛ̀ɛ mɔ̀ kpɛ̃ĩ le, é tóá kíli é ɓɔá wɔ̃́ líé-nyɛpìàa ká.

¹⁵Wɔ̃́ lɛ́ Wálà là kiia à gèea, gɛ̃̀ e ké. “Yé kaà Wálà wéè ma pɛ́nɛɛ, yékɛ̀ ká wũ-yí-gágà-là kɛ, lɛ̀ zí ka kɛá lúó lɛ́ ka gèlè gɔ̃á Wálà káa káa lɛ́ ɓe.”

¹⁶Dé e Wálà wéè ma, tó áà gèlè gɔ̃̀ à ká? Ḿ gɔ̃̀, mia séĩ́ lɛ́ Móózè e líé sí o ká, wà ye nì wáà gò Ízè-sɛ̀lɛ̀ yía lɛ?

¹⁷Kéa, dé wɔ̃́ e Wálà wàa o píé kɛ̀ɛ̀ vũ̀ yììsɛ píé? Ḿ gɔ̃̀, mia lɛ́ o kɛ-wɔ̃̀ yɔɔ kɛ, lɛ́ o dà o bílí ká tã́ã̀ yɛ̀í làa lɛ?

¹⁸Lɛ̀ Wálà e e náá kpɔ́ weeá kélɛ̀, “Òó ló ɓɔ gbɛɛ ɓoò m zì fĩ́ĩ́-dɔpìàa,” dé e kɛ là wéé ɓopìà ɓɛ? Ḿ gɔ̃̀, mia lɛ́ o à wéè tóa lɛ?

¹⁹À mɔ́ɔ̀ wɔ̃̀ mɔ̀ɔ, kóò à gɛ̃̀ kélɛ̀ bɛ̀i lɛ̀ɛ́ gbaa kɛ o mɔ̀ kɛ ó ɓɔ yí, ɓii òó gbaa wɔ̃́ gɛ̃̀ wánà káa mɔ́ɔ̀ wɔ̃̀ mɔ̀.