Read Yamano Hííbúlù 5 Bible Online

Hííbúlù 5 - Yamano bible

Hííbúlù 5

¹Óò sálà-ɓò-Wálà-mɔ̀-mìà wũ-là-mì nɔ́ɔ fé si e ɓɛ́ĩ̀ bà, ɛ̃́ɛ̃̀ óò yíkɛ̀ gáàa nɔ à lɛ̀ɛ kɛ é yɛɓo kɛ Wálà lɛ̀ɛ o mɔ́ɔ̀ wɔ̃̀ mɔ̀. Lɛ́ɛ̀ nɔ̀-lɛ̀ɛ-pɛ̀ nɔ Wálà lɛ̀ɛ, tó áà sálà ɓò mia zì kɛ-wɔ̃̀ yɔɔ mɔ́ɔ̀ wɔ̃̀ mɔ̀.

²Bɛ̀i lɛ à mɔ̀ kɛ é mia lɛ́ òó wɔ̃́ yí dɔ, lɛ́ ò wɔ̃́ nia, kɛ é o kṹ lɔ́ɔ́-lɔ̀ɔ̀, ɓii é kɛ bɛ̃̀ɛ̃ à dìè-tĩ́ káa, à mɛ́ lɛ yɔ̃́ṹ-yɔ̃̀ũ̀ zi búnùzɛ̀ ká.

³Wɔ̃́ e kéa mɔ́ɔ̀ wɔ̃̀ mɔ̀ɔ, lɛ à mɔ̀ é sálà ɓo e dìè-tĩ́ kɛ-wɔ̃̀ yɔɔ wɛ̃́ĩ̀, yékɛ̀ á ɓo mia gbɛɛ kɛ-wɔ̃̀ yɔɔ doó wɛ̃́ĩ̀.

⁴Mi gbɛɛ lɛ̀ɛ́ yɛɓo yiè lɛ́ e kɛ̀ sálà-ɓò-Wálà-mɔ̀-mìà wũ-là-mì káa, sí e dìè lɛ̀ɛ. Kɛɛ mí nɔ́ è kɛ̀áa lɛ́ e mí Wálà à súo kɛ̀, lɛ̀ zí e Ɛ́ɛ́lɔ̀ũ̀ súo kɛáa lɛ́ ɓea káa.

⁵Zi nɔ́ doóa káa, Kɛ́lɛ̀ì lɛ̀ɛ́ gbaa e dìè sí lɛ̀í kɛ é kɛ sálà-ɓò-Wálà-mɔ̀-mìà wũ-là-mì ká. Kɛɛ Wálà a gèe à lɛ̀ɛ kélɛ̀, “I m Gbe ká. Maà kɛ gbaa i Dàa ká pɛ́nɛɛ.”

⁶E bɛ̀i, a gèe zeĩ́ lɛ̀ gbɛɛ mɔ̀ kélɛ̀, “Íì lo kɛɛ̀ sálà-ɓò-Wálà-mɔ̀-mì ká tòá kíli ká. I sálà-ɓo-mìà yé ò o si Mɛ̀késédɛ̀ɛ doó-mì ká.”

⁷Zízɛ̀ zì kɛ̀ tĩã́ kpóṹ là zèea, e sɛ̀nɛ ɓo Wálà lɛ́ bɛ̀i e kɛ à mɔ̀ é à la ga kɛ̀lɛ̀ɛ lɛ̀ɛ, áà kpé kã̀ à lɛ̀ɛ gbóó ká, à nyìɛ-yíí áà dìè. E túó Wálà lɛ̀ɛ gbìnì-à-lɛ̀ɛ ká. À mɔ́ɔ̀ wɔ̃̀ mɔ̀ɔ, Wálà e à wéè ma.

⁸Kɛɛ yé bɛ̃̀ɛ̃ e kɛ Wálà Gbe káa, e Wálà-wè kɛɛ̀ mɛ́ dã́ e zì wɔ̃́ nyɔ́ɔ̀ɔ gɛ̃̀ɛ̃ɛ̃̀ kolo là zàá.

⁹Lɛ̀ lɛ́ à mɛ́ kpálà e kɛáa, e kɛ gbaa la-ɓo lɛ́ lɛ ɓe tòá kíli káa, gã̀-gbɛ̃̀pìà ká mia séĩ́ lɛ́ ò à wéè kɛ̀ɛ lɛ̀ɛ.

¹⁰Ɛ́ɛ̃́ Wálà e à kɛ̀ sálà-ɓò-Wálà-mɔ̀-mìà wũ-là-mì ká wɔ̃̀ gèe. Lɛ sálà-ɓo-mìà yé ò o si Mɛ̀késédɛ̀ɛ doó-mì ká.

¹¹Wɔ̃́ lɛ ko lé gbùò kɛ kó gèe é gbɛ̃̀á wɔ̃́ e kéa mɔ̀, kɛɛ lɛ gágà kó à yí pɛ́ɛ́ ka lɛ̀ɛ, ɓii ka tóó lɛ̀ɛ́ wɔ̃́ ma sɛ̀ɛ mɔ́ɔ̀ wɔ̃̀ mɔ̀.

¹²Káá kɛɛ̀ gbaa pɛ-zɔ̃̀ɔ̃̀-mìà ká dɛɛ káa mɔ̀. Kɛɛ ka tĩã́ mi dò naapìà kɛ é pɛ yé ka dã́ bèĩzɛ̀ Wálà lé-wè mɔ̀ɔ, kɛɛ á zɔ̃̀ɔ̃̀ ka lɛ̀ɛ. Ka tĩã́ nyɔ́-yíí mi-mìà ká. Bɛ̀i wá ka mɔ̀ nɛ́ kɛ ká ɓèlè-pɛ̀ gágà ɓèlè.

¹³Mi lɛ́ lɛ tĩã́ à mɔ̀ é nyɔ́-yíí mia, lɛ tĩã́ nɛ́fú ká. Lɛ̀ɛ́ wɔ̃́ kpeĩ dɔ nɛ́.

¹⁴Kɛɛ ɓèlè-pɛ̀ gágà lɛ mi dìè wɛ̃́ĩ̀. O zì wɔ̃́-yí-dɔ pɛ̀ lɛ́ e o yía, waà yɛɓo kɛ o ká, tó áà kɛ̀ wáà wɔ̃́ yɔɔ wà wɔ̃́ yiè dɔ̀.