Read Yamano Hííbúlù 6 Bible Online

Hííbúlù 6 - Yamano bible

Hííbúlù 6

¹À mɔ́ɔ̀ wɔ̃̀ mɔ̀ɔ, kɔ̀à lo kɔa líé, kɛ kɔ́á pɛ lɛ́ ò zɔ̃̀ɔ̃̀ mia dìè lɛ̀ɛ dã́. Wɔ̃́ lɛ́ wa zɔ̃̀ɔ̃̀ mɔ́ ko lɛ̀ɛ, lɛ́ à gbɛ̃̀ɛ̃̀ lɛ Kɛ́lɛ̀ì mɔ̀ɔ, kɔ̀à die à là. Ye wá ko mɔ̀ kɛ kó ká gã̀-gbɛ̃̀à-là gɛ̀lɛ̀ɛ dɔ zeĩ́. Ká gã̀-gbɛ̃̀à-là gɛ̀lɛ̀ e kília lɛ́ e kélɛ̀, ko ko gbɛ̃̀ yɛɓo fèle kɛɛ̀ mɔ̀ ká, tó kɔ́áà ko zò dɔ̀ Wálà mɔ̀ɔ,

²ɛ̃́ɛ̃́ zeĩ́, pɛ-zɔ̃̀ɔ̃̀-kɔ̀ lɛ́ à gbɛ̃̀ɛ̃̀ lɛ bàtáì kɛɛ̀ séĩ́, ɛ̃́ɛ̃́ kɔ̀ kpɔ̀ mia là, e bɛ̀i, mia lɛ́ waà gaa, o wɛ̀lɛ̀-ga-kɛ̀lɛ̀, ɛ̃́ɛ̃́ tòá kíli mɛ̀ĩ́-sà lɛ́ ò lo à káà mia wĩĩ́a káa.

³Ɛ́ɛ̃́ yé Wálà aà wéé à mɔ̀ɔ, kóò lo lóò ko líé.

⁴Zi sùu kpɛɛ̀ lɛ́ mia yé o góò lɛ Wálà mɔ̀ɔ, ò bɛ̀i à mɔ̀ ó nu o ká o mɛ̀ĩ́, kɛ ó o sɔ̃̀ɔ̃ yɔɔ mɛ́ vɔ̀ɔ zeĩ́? O kɛ bèĩzɛ̀ Wálà là lɛ̀-fɔ̀nɔ-kɔ̀ bà. O nɔ̀-lɛ̀ɛ-pɛ̀ lɛ́ è go lɛ̀ía dã́. Wà Gɛ̀ɛ̀ Púlú nì o kɛ doó.

⁵Lɛ kélɛ̀ pɛ lɛ́ o Wálà lé-wèa dã́, ɛ̃́ɛ̃́ wa míní sí gbaa kélɛ̀ lɛ sɛ̀. O lúó lɛ́ lɛ nupìàa zì yíkɛ̀ gáàa nì dò dã́.

⁶Lɛ̀ e kɛ kília, o gó Wálà mɔ̀. Òó bɛ̀i gbaa à mɔ̀ kɛ ó nu o ká e mɛ̀ĩ́, kɛ ó o sɔ̃̀ɔ̃ yɔɔ mɛ́ vɔ̀ɔ zeĩ́, ɓii o Wálà Gbe pápìà nélè ká kɔ́lɔ́sì mɔ̀ zeĩ́, ɛ̃́ɛ̃́ o à dàpìà wáà-là, kɛɛ mia ó o lé sí à yí.

⁷Wálà lɛ́ɛ̀ lúà kpɔ tã́ã̀a dò mɔ̀. À lɛ̀ yé e kília, lɛ́ è yíí lɛ́ è bã à mɔ̀ teelea mi, tó áà kɛ̀ taa-pɔ̀ɔ̀ lɛ́ lɛ sɛ̀ mi lɛ́ o là nyɛ́nɛ̀ĩ̀ kpɔ́ɔ lɛ̀ɛ áà ɓɔ̀.

⁸Kɛɛ yé aà kɛ lɛ́ gɛ́nɛ́ wà sùu waà ɓɔ yía, lɛ pɛ yí sìeèe zɛ̀ ká. Ɛ́ɛ̃́ kɛɛ Wálà zì náá aà ɓɔ à mɔ̀ kɔ̀ɛ́. Óò lo à yí sìè tíé ká.

⁹Kɛɛ m̀ mia nì lɛ́ ka lɔ̀ kpɔ́ɔ̀ lɛ m mɔ̀ ɓɛ, yé bɛ̃̀ɛ̃ kò wɔ̃́ sùu e kéa gèea, ko zò dàà lɛ ka píé. Kóò à yí dɔ kélɛ̀ lúà kpànazɛ̀ lɛ́ lɛ ɓe la-ɓo lɛ́ ka sɔ̀lɔ̀ ɓoa wɛ̃́ĩ̀a, à kpɔ́ɔ̀ lɛ ka mɔ̀.

¹⁰Wálà lɛ kpeĩ. À zò lɛ̀ɛ́ ló niì yɛɓo lɛ́ ka kɛɛ mɔ́ɔ̀ wɔ̃̀ mɔ̀. Ɛ́ɛ̃́ kɛ bɛ̃̀ɛ̃ à zò é ni zi lɛ́ ka zɔ̃̀ɔ̃̀á kélɛ̀ à lɔ̀ kpɔ́ɔ̀ lɛ ka mɔ̀ gbũ̀-mɔ̀ lɛ́ ka nɔ, ɛ̃́ɛ̃́ lɛ́ ka tĩã́ nɔpìà ka ɓɛ́ĩ̀ Wálà-mìà lɛ̀ɛ mɔ́ɔ̀ wɔ̃̀ ká.

¹¹Pɛ́ à kɛ-lɔ̀ è ko kɛ̀ɛ lɛ́ e kélɛ̀, ká à kɛ ka fã̀ã́ é tó wààpìà, é tóá kíli é ɓɔá à líé nyɛpìà ka tɔ̀ là doó doó, kɛɛ pɛ lɛ́ ka zò lɛ à mɔ̀ɔ, à yí é kɛ à mɔ̀.

¹²Kòó naa kɛ ká fíá. Kɛɛ kóò nàà kɛ ká ɓɔ mia lɛ́ ò o zò dɔ Wálà mɔ̀, lɛ́ ò o zò kũ tã́ã̀a bà. O lɛ́ o pɛ lɛ́ Wálà aà e wè dɔ à káa sɔ̀lɔ̀ ɓoa.

¹³Lɛ̀ lɛ́ Wálà e e wè dɔ Éɓɔ́lɔ́hã́ã̀ lɛ̀ɛ, e e náá kpɔ́. Lɛ̀ lɛ́ mi gbɛɛ lɛ̀ɛ́ gbaa kɛ kpànazɛ̀ é diá à làa, a mɔ́ɔ̀ e náá kpɔ́ e dìè mɔ̀.

¹⁴A gèe à lɛ̀ɛ kélɛ̀, “Wánà kpó-kpó káa, ḿm̀ lo lúà kpɔ́ɔ̀ i mɔ̀, tó m à kɛ i sùu-là-mìà o kɛ gbùò.”

¹⁵Éɓɔ́lɔ́hã́ã̀ e kɛ zò-kũ̀-tã́ã̀ zɛ̀. Pɛ́ a kɛ lɛ́ e pɛ lɛ́ Wálà e e wè dɔ à káa sɔ̀lɔ̀ ɓoa, lɛ́ ɓɛ.

¹⁶Yé mi aà e náá kpɔ́ɔ, lɛ́ɛ̀ à kpɔ mi lɛ́ lɛ kpànazɛ̀ é diá à làa mɔ̀. Ɛ́ɛ̃́ náá-kpɔ́ e kília lɛ́ɛ̀ wéé nɔ́ɔ fé lɛ́ e kɛ mia fĩ̀ã̀a yí bɛ̀i.

¹⁷Wálà a naa á zɔ̃̀ɔ̃̀ mia lɛ́ e kɛ o mɔ̀ ó pɛ lɛ́ aà e wè dɔ à káa sɔ̀lɔ̀ ɓoa lɛ̀ɛ e yí púlú zɛ̀ ká kélɛ̀ lɛ̀ɛ́ ló wɔ̃́ lɛ́ aà yà e gé kɛ á kɛɛ mɛ́ vɔ̀ɔɔ̀. A mɔ́ɔ̀ e wè dɔ e náá kpɔ́ɔ̀ ká.

¹⁸À mɔ́ɔ̀ wɔ̃̀ mɔ̀ɔ, pɔɔ̀ pèèlɛ lɛ́ à mɛ́ lɛ̀ɛ́ vɔ̀ɔ, ɛ̃́ɛ̃́ lɛ́ Wálà lɛ̀ɛ́ bɛ̀i nɛ̀ kɛɛ̀ o mɔ́ɔ̀ wɔ̃̀ mɔ̀ɔ, o ɓe. À mɔ́ɔ̀ wɔ̃̀ mɔ̀ɔ, mia lɛ́ kɔaà kɔa bĩ̀ĩ̀pìà gɛ̃̀ gbaa à yía, ko fã̀ã́ kpó-kpó wàà lɛ, kɛɛ kó kùnù pɛ lɛ́ ko zò lɛ à mɔ̀, lɛ́ à kpɔ́ɔ̀ lɛ ko wɛlɛ mɔ̀ɔ mɔ̀ kpɛ̃ĩ le.

¹⁹Pɛ lɛ́ ko zò lɛ à mɔ̀ kília, lɛ kélɛ̀ ko zò kũ̀-tã́ã̀-ɓɛ̀lɛ̀ lɛ́ ɓe. Lɛ zò-dɔ̀à-mɔ̀ zɛ̀ ɛ̃́ɛ̃́ lɛ̀ɛ́ tàle gbɛɛ ɓo. À pɛ́lɛ̀ lɛ sɔ lɛ́ à dũũ̀ lɛ Wálà là káa wìa yí, ɛ̃́ɛ̃́ à lóò lɛ káa yí kà wì.

²⁰Zízɛ̀ aà dɔ líé ko mɔ̀, aà ló yi ko mɔ́ɔ̀ wɔ̃̀ mɔ̀. Aà kɛ gbaa sálà-ɓò-Wálà-mɔ̀-mìà wũ-là-mì ká tòá kíli ká. Lɛ sálà-ɓo-mìà yé ò o si Mɛ̀késédɛ̀ɛ doó-mì ká.