Read Yamano Hííbúlù 7 Bible Online

Hííbúlù 7 - Yamano bible

Hííbúlù 7

¹Mɛ̀késédɛ̀ e kília, e kɛ Sélɔ̀ũ̀-pɛ̀lɛ̀ líé-sí-mì ká. Ɛ́ɛ̃́ e kɛ Wálà lɛ́ e pɛ séĩ́ làa là sálà-ɓo-mì ká. Lɛ̀ Éɓɔ́lɔ́hã́ã̀ e kɛ gópìà gèlè lɛ́ e sɛ́lɛ́ líé-sí-mìà zɛ à yía mɔ̀ɔ, Mɛ̀késédɛ̀ e à gɛ̃̀ áà lúà kpɔ̀ à mɔ̀.

²Éɓɔ́lɔ́hã́ã̀ e pɔɔ̀ séĩ́ lɛ́ e kɛ à kɛ̀lɛ̀ɛ vũ̀-lé-ɓɔ nɔ à lɛ̀ɛ. Mɛ̀késédɛ̀ tɔ́ɔ yí-ɓopìà bèĩzɛ̀ lɛ́ e kélɛ̀, wɔ̃́ kpeĩ líé-sí-mì. Ɛ́ɛ̃́ zeĩ́ lɛ̀ lɛ́ e kɛ Sélɔ̀ũ̀-pɛ̀lɛ̀ líé-sí-mì káa, à mɔ́ɔ̀ à tɔ́ yí doó-mì lɛ́ zò-yà-gé líé-sí-mì.

³À dàa wà à lèe wá ɓe. Ɛ́ɛ̃́ zeĩ́, à dàa ye dàà nì nɔ́ɔ fé wɔ̃̀ bɛ̃̀ɛ̃ɛ̃̀ wá tã́ã̀. À yeè, ɛ̃́ɛ̃́ ga lɛ́ a ɓoa mɔ́ɔ̀ kii wá ɓe. Lɛ kélɛ̀ Wálà Gbe lɛ́ ɓe. Lɛ sálà-ɓò-Wálà-mɔ̀-mì ká tòá kíli ká.

⁴Zi lɛ́ e kɛá e kpànazɛ̀ káa, káà à gɛ̃̀. Éɓɔ́lɔ́hã́ã̀ lɛ́ e kɛ kɔa gòà-yí-tɔ̃̀ũ̀ káa, e pɔɔ̀ séĩ́ lɛ́ e gó à ká gèlè mɔ̀ɔ vũ̀-lé-ɓɔ nɔ à lɛ̀ɛ.

⁵Lɔ́ɔ̀ɔ láà gèe Lííváì sùu-là-mìà yé o sálà-ɓò-Wálà-mɔ̀-mìà káa lɛ̀ɛ, ó vũ̀-lé-ɓɔ kṹ Éézɛ̀lɛ̀-mìà kɛ̀lɛ̀. À yí lɛ́ e tɔ́, ó à kṹ o dìè o pà-mìà kɛ̀lɛ̀, yé bɛ̃̀ɛ̃ o bɛ̃̀ɛ̃ o Éɓɔ́lɔ́hã́ã̀ sùu-là-mìà káa ká.

⁶Mɛ̀késédɛ̀ lɛ̀ɛ́ gbaa kɛ Lííváì sùu-là-mìà dò ká. Kɛɛ e vũ̀-lé-ɓɔ kṹ Éɓɔ́lɔ́hã́ã̀ kɛ̀lɛ̀, ɛ̃́ɛ̃́ e lúà kpɔ́ Éɓɔ́lɔ́hã́ã̀ lɛ́ e Wálà là wè-dɔ-wèa sɔ̀lɔ̀ ɓoa mɔ̀.

⁷Òó bɛ̀i à mɔ̀ ó mi lɛ́ è lúà kpɔ mi mɔ̀ɔ kɛ̀ kpànazɛ̀ é diá mi ké yee è lúà kpɔ à mɔ̀ɔ là wɔ̃̀ tèé ɓoò.

⁸Mia ké ò vũ̀-lé-ɓɔɔ kũa, o mia lɛ́ ò gaa ká. Kɛɛ Mɛ̀késédɛ̀ ké è vũ̀-lé-ɓɔɔ kũa yee, lɛ mí lɛ ɓea ká, lɛ̀ zí Wálà kiia à gèe à káa lɛ́ ɓe.

⁹Ɛ́ɛ̃́ kóò bɛ̀i à mɔ̀ kó gèe kélɛ̀ lɛ̀ Éɓɔ́lɔ́hã́ã̀ e vũ̀-lé-ɓɔɔ nɔɔ, Lííváì lɛ́ è vũ̀-lé-ɓɔɔ kũa, à bɛ̃̀ɛ̃ a nɔ nɔ́ kíli.

¹⁰Ƃii e kɛ tĩã́ e dàa ye dàà Éɓɔ́lɔ́hã́ã̀ gé lɛ̀ lɛ́ Ébɔ́lɔ́hã́ã̀ wà Mɛ̀késédɛ̀ o o kíe gɛ̃̀ɛ ká.

¹¹Lɔ́ɔ̀ɔ gã̀-gbɛ̃̀ɛ̃̀ e kɛá Lííváì-mìà kɛ̀ sálà-ɓò-Wálà-mɔ̀-mìà ká là, ɛ̃́ɛ̃́ à nɔɔ̀ e kɛá gbaa Éézɛ̀lɛ̀-mìà lɛ̀ɛ. È kɛ̀á Lííváì-mìà o kília o kɛ-yɛ̀ɓo líé nyɛɛ̀ e kɛáa, sálà-ɓò-Wálà-mɔ̀-mì gbɛɛ lɛ̀ɛ́ gɔ̃̀ kɛɛ̀ ɓe é kã́ o mɔ̀ɔ ká. À dò lɛ̀ɛ́ gɔ̃̀ góò sálà-ɓo-mìà lɛ́ ò o si Mɛ̀késédɛ̀ lɛ́ ye wá Ɛ́ɛ́lɔ̀ũ̀ sùu-là-mìà káa bà.

¹²Kɛɛ yé waà sálà-ɓo-mìàa kɛ-yɛ̀ɓo mɛ́ vɔ̀ɔ, lɛ à mɔ̀ ó lɔ́ɔ̀ɔ bɛ̃̀ɛ̃ mɛ́ vɔ̀ɔ nɔ́ kíli.

¹³Ɛ́ɛ̃́ ko Dàa-mì lɛ́ wɔ̃́ nì ò gèe e kéa gbɛ̃̀ɛ̃̀ lɛ à mɔ̀ɔ, e kɛ mi gbɛɛ sùu-là-mì ká. Ɛ́ɛ̃́ mi gbɛɛ lɛ̀ɛ́ gó mia sùu e kília bà kɛ é kɛ sálà-ɓo-mì ká sálà-ɓòà-là-pɛ̀ɛ là.

¹⁴Mia óò yí dɔ e yí púlú zɛ̀ ká kélɛ̀ o à ye Zúdà sùu là. Ɛ́ɛ̃́ Móózè lɛ̀ɛ́ gbaa mia sùu o kéa wɔ̃̀ gèe gbɛɛ ɓo lɛ̀ lɛ́ e kɛ sálà-ɓò-Wálà-mɔ̀-mìà wɔ̃̀ gèepìàa ká.

¹⁵Wɔ̃́ɔ lɛ kɛpìà gbaa kpó-kpó ɓo e yí púlú zɛ̀ ká. Sálà-ɓò-Wálà-mɔ̀-mì gbɛɛ aà kɛ zeĩ́ ɓe. Lɛ kélɛ̀ Mɛ̀késédɛ̀ lɛ́ ɓe.

¹⁶Mia ɓéèe zì wɔ̃́ kɛ-zì ɛ̃́ɛ̃́ o zì lɔ́ɔ̀ kpɔ́ɔ̀ lɛ̀ɛ́ gbaa à kɛ sálà-ɓò-Wálà-mɔ̀-mì ká. E kɛ sálà-ɓo-mì ká kɛ̀ɓe lɛ́ à líé nyɛpìà wá ɓea zì yíkɛ̀ gáàa kolo là.

¹⁷Ƃii Wálà kiia láà gèe kélɛ̀, “I sálà-ɓo-mìà yé ò o si Mɛ̀késédɛ̀ɛ doó-mì ká.”

¹⁸Lɔ́ɔ̀ ziia wa dà gbaa o kɔ̀ mɛ̀ĩ́, ɓii lɛ̀ɛ́ gbaa kɛ gágà ɛ̃́ɛ̃́ pɛ-kɛ̀á-pɛ̀ ká gbaa mɔ́ɔ̀ wɔ̃̀ mɔ̀.

¹⁹Ƃii Móózè là Lɔ́ɔ̀ɔ lɛ̀ɛ́ bɛ̀i pɛ nɔ́ɔ fé dò kɛɛ̀ kpeĩ fɛ́fɛ́ le. Ɛ́ɛ̃́ pɛ lɛ́ lɛ fìa kɛ kó ko zò kɛ à mɔ̀ kɛ kó kpɔ́ à là kó nu Wálà ká kɔ̀ɛ́ɛ, waà nu à ká gbaa.

²⁰Ɛ́ɛ̃́ zeĩ́a, Wálà zì náá a kpɔ́ɔ lɛ ɓe. Náá-kpɔ́ sùua lɛ̀ɛ́ gbaa kɛ ɓe lɛ̀ lɛ́ mia yé o tóa o kɛɛ̀ e kɛá sálà-ɓò-Wálà-mɔ̀-mìà káa ká.

²¹Kɛɛ Zízɛ̀ kɛɛ̀ e kɛá sálà-ɓò-Wálà-mɔ̀-mì ká náá-kpɔ́ kolo là, lɛ̀ lɛ́ Wálà a gèe à lɛ̀ɛ kélɛ̀, “Mia Dàa-mì aà e náá kpɔ́. Ɛ́ɛ̃́ lɛ̀ɛ́ ló e wúú mɛ́ vɔ̀ɔɔ̀. ‘Íì lo kɛɛ̀ sálà-ɓo-mì ká tòá kíli ká.’ ”

²²Wɔ̃́ e kéa lɛ́ɛ̀ Zízɛ̀ kɛ̀ wè-dɔ-wè lɛ́ lɛ fìa à yé lɛ́ e kɛ bèĩzɛ̀ɛ mɔ̀ɔ wɛ́lɛ́ ká.

²³Ɛ́ɛ̃́ zeĩ́, sálà-ɓo-mìà lɛ́ o kɛ ɓe bèĩzɛ̀ɛ, o kù e kɛ gbùò, ɓii ga e à kɛ, ɛ̃́ɛ̃́ bɛ̀i lɛ̀ɛ́ gbaa kɛ o mɔ̀ kɛ ó ló líé wà yɛɓoa kɛɛ̀ ká.

²⁴Kɛɛ Zízɛ̀ lɛ ɓe tòá kíli ká. À zì sálà-ɓo-yɛ̀ɓoa ɓò à kɛ̀lɛ̀ wɔ̃̀ wá ɓe.

²⁵À mɔ́ɔ̀ wɔ̃̀ mɔ̀ɔ, bɛ̀i lɛ à mɔ̀ gbaa, ɛ̃́ɛ̃́ lɛ́ɛ̀ lo kɛɛ̀ à mɔ̀ teele, tó áà mia lɛ́ ò nu Wálà píé à kolo làa là, ɓii lɛ ɓe tòá kíli ká, tó áà mɛ́ĩ́ ɓò Wálà lɛ̀ɛ o mɔ́ɔ̀ wɔ̃̀ mɔ̀.

²⁶Zízɛ̀ lɛ́ e sálà-ɓò-Wálà-mɔ̀-mìà wũ-là-mì lɛ́ à bɛ̀iì lɛ ko mɔ̀ɔ káa. Lɛ púlú. Kɛ-wɔ̃̀ yɔɔ wà kɛɛ gbɛɛ wá à mɔ̀. À ɓoò lɛ kɛ-wɔ̃̀ yɔɔ kɛ-mìà bà. Ɛ́ɛ̃́ à síì lɛ kɛ é kɛ lɛ̀í là lɛ̀í.

²⁷Ye wá kélɛ̀ sálà-ɓò-Wálà-mɔ̀-mìà wũ-là-mìà yé o tóa lɛ́ ɓe. Ye wá à mɔ̀ kɛ é sálà ɓo e dìè-tĩ́ kɛ-wɔ̃̀ yɔɔ, ɛ̃́ɛ̃́ mia gbɛɛ zì kɛ-wɔ̃̀ yɔɔ wɛ̃́ĩ̀ lúó séĩ́ ká. E sálà doó ɓo nɔ́ doó lɛ̀ lɛ́ e sálà ɓo e dìè káa ká.

²⁸Móózè là Lɔ́ɔ̀ɔ lɛ́ɛ̀ mia lɛ́ kɛɛ lɛ o mɔ̀ɔ si, wáà kɛ̀ sálà-ɓò-Wálà-mɔ̀-mìà wũ-là-mìà ká. Kɛɛ Wálà là wè-dɔ-wè lɛ́ náá lɛ à mɔ̀, lɛ́ e tó Móózè là Lɔ́ɔ̀ɔ ko mɔ̀ɔ, lɛ́ɛ̀ Wálà Gbe lɛ́ à mɛ́ kpálà e kɛá tòá kíli káa si.