Read Yamano Hííbúlù 8 Bible Online

Hííbúlù 8 - Yamano bible

Hííbúlù 8

¹Wɔ̃́ lɛ́ kò gèea wũ gɛ̃̀ e ké. Sálà-ɓò-Wálà-mɔ̀-mìà wũ-là-mì sùua dò lɛ ko kɛ̀lɛ̀. Lɛ yàá Wálà lɛ́ yíkɛ̀ gáàa séĩ́ lɛ à kɛ̀lɛ̀ɛ zì dɔ-táŋáná là à kɔ̀ yiè yí Wálà-pà.

²Lɛ́ɛ̀ e zì sálà-ɓo-yɛ̀ɓoa kɛ̀ Wálà là Lɛ̀ Púlúa Lɛ̀ Kpànazɛ̀-pìà. Lɛ̀ e kília, lɛ́ e kélɛ̀, sɔ-ká kpó-kpó lɛ́ ko Dàa-mì e à dɔ, lɛ́ mia ɓéèe òó gbaa dɔɔ káa.

³Óò sálà-ɓò-Wálà-mɔ̀-mìà wũ-là-mìà séĩ́ si kɛ ó nɔ̀-lɛ̀ɛ-pɛ̀ nɔ, ɛ̃́ɛ̃́ kɛ ó sálà ɓo Wálà lɛ̀ɛ. À mɔ́ɔ̀ wɔ̃̀ mɔ̀ɔ, lɛ ko zì sálà-ɓò-Wálà-mɔ̀-mìà wũ-là-mìa mɔ̀ kɛ pɛ é kɛ à kɛ̀lɛ̀ kɛ á nɔ Wálà lɛ̀ɛ.

⁴È kɛ̀á lɛ tã́ã̀ zèea, lɛ̀ɛ́ gɔ̃̀ kɛɛ̀ sálà-ɓo-mì ká gbɛɛ ɓo, ɓii sálà-ɓo-mìà lɛ́ ò nɔ̀-lɛ̀ɛ-pɛ̀ nɔ lɛ̀ zí lɔ́ɔ̀ɔ a gèe à káa lɛ́ ɓea, o ɓe.

⁵O zì sálà-ɓo-yɛ̀ɓoa lɛ pɛ lɛ́ e lɛ̀ía bĩ́ wà à gɔ̃̀á ɓɔ̀ɔ ká. E kɛ nɔ́ kíli Móózè vɔ̀ɔ ká. Lɛ̀ e kɛ à kɛpìà kɛ é sɔ-káa dɔɔ, Wálà a gèe à lɛ̀ɛ kélɛ̀, “Ì i yɛ́lɛ́ kɛ yí, í wɔ̃́ séĩ́ kɛ e kpáá yí, lɛ̀ zí wa zɔ̃̀ɔ̃̀ à ká i lɛ̀ɛ tɔ̃̀ũ̀a wĩĩ́a lɛ́ ɓe.”

⁶Kɛɛ lɛ̀ zí lɛ à káa, waà sálà-ɓo-yɛ̀ɓo lɛ́ lɛ kpànazɛ̀ é diá mia yé o tóa zì làa nɔ Zízɛ̀ lɛ̀ɛ, lɛ̀ zí nɔ́ wè-dɔ-wè lɛ́ aà pɛ̀ kɛ Wálà wà mia nì o fĩ̀ã̀a lɛ à ká fìaa lɛ́ ɓɛ. Lɛ fìa ɓii à gã̀-gbɛ̃̀ɛ̃̀ lɛ wè-dɔ-wè lɛ́ lɛ fìaa là.

⁷Kɛɛ è gɔ̃̀á kɛɛ̀ wè-dɔ-wè bèĩzɛ̀ɛ mɔ̀ɔ, à dɛɛ kɛɛ̀ lɛ̀ɛ́ gɔ̃̀ à mɛ́ kṹũ̀.

⁸Kɛɛ Wálà e kɛɛ gɛ̃̀ là mia nì mɔ̀ lɛ̀ lɛ́ a gèe kélɛ̀, “Mia Dàa-mì láà gèe kélɛ̀, lúó lɛ́ m̀ lo m wè dɛɛ dɔɔ̀ à ká Éézɛ̀lɛ̀-mìà ɛ̃́ɛ̃́ Zúdà sùu-là-mìà lɛ̀ɛ lɛ nupìà.

⁹Lɛ̀ɛ́ ló kɛɛ̀ lɛ̀ m wè lɛ́ ma dɔ mɔ́ o dàa ye dàà nì lɛ̀ɛ lúó lɛ́ m o kɔ̀ kpɛí kṹ à ká, máà o líé sì máà gò o ká Ízèa lɛ́ ɓe. Òó gbaa ɓɔ o wè lɛ́ wa dɔ m lɛ̀ɛ mɔ̀. À mɔ́ɔ̀ wɔ̃̀ mɔ̀ɔ, m̀ḿ m tóó gbɛɛ dɔ o mɔ̀. Zí mia Dàa-mì à gèe à káa lɛ́ ɓɛ.

¹⁰Mia Dàa-mì láà gèe kélɛ̀, m wè lɛ́ m̀ lo à dɔɔ̀ Éézɛ̀lɛ̀-mìà lɛ̀ɛ lúó lɛ́ è lo nuùa káa, gɛ̃̀ e ké. Ḿm̀ lo m̀ lɔ́ɔ̀ nìa wàà o wũ-kèlè yí. Ḿm̀ lo o bɛ̃̀ɛ̃ɛ̃̀ o zò mɔ̀. Ḿm̀ lo kɛɛ̀ wà Wálà ká. Ɛ́ɛ̃́ o bɛ̃̀ɛ̃ óò lo kɛɛ̀ m̀ mia nì ká.

¹¹O dò nɔ́ɔ fé lɛ̀ɛ́ ló pɛ zɔ̃̀ɔ̃̀ e pà-mìà lɛ̀ɛ, ɛ̃́ɛ̃́ kɛ bɛ̃̀ɛ̃ á gèe e ɓɛ́ĩ̀ ye-mìà lɛ̀ɛ kélɛ̀, ‘Ì ko Dàa-mì dɔ.’ Ƃii o yé o kpànazɛ̀, ɛ̃́ɛ̃́ o yé o fĩ́ĩ́-nyɛ zɛ̀ɛ, o séĩ́ óò lo m dɔɔ̀.

¹²Ó wɔ̃́ lɛ́ ye wá kpeĩa kɛ̀áa, ḿm̀ lo o yéĩ̀ kṹũ̀, ɛ̃́ɛ̃́ m zò lɛ̀ɛ́ ló vùò gbɛɛ ɓoò gbaa o zì kɛ-wɔ̃̀ yɔɔ ká.”

¹³Wè-dɔ-wè dɛɛ mìa wɔ̃̀ gèe lɛ́ Wálà a ɓoa, aà kɛ à bèĩzɛ̀ɛ aà kɛ gbaa pɛ zii ká. Ɛ́ɛ̃́ pɛ nɔ́ɔ fé lɛ́ lɛ kòlò kɛpìà, ɛ̃́ɛ̃́ lɛ́ lɛ zɛ́kɛ́lɛ́ kɛpìàa, kɛɛ waà dɔ ó kɔ̃́ à ká.