Read Yamano Zĩ́ĩ̀ 1 Bible Online

Zĩ́ĩ̀ 1 - Yamano bible

Zĩ́ĩ̀ 1

¹Óò m si Zĩ́ĩ̀. M yɛɓo-kɛ-mì ká Wálà ɛ̃́ɛ̃́ ko Dàa-mì Zízɛ̀ Kɛ́lɛ̀ì lɛ̀ɛ. Ḿm̀ wèè mia lɛ́ ka Éézɛ̀lɛ̀-mìà sùu kpolà vũ̀ doó wɛ́lɛ́ pèèlɛ, lɛ́ ka wɛ̃̀ĩĩ̀ lɛ sɛ́lɛ́ séĩ́ làa bà.

²M lèe-gé vɔ̀, yé yí-dã́-wɔ̃̀ doò do aà kɛ ɓɔpìà ka mɔ̀ɔ, è kɛ ka lɛ̀ɛ géli-wɔ̃̀ kpó-kpó ká,

³ɓii káà à yí dɔ kélɛ̀ yé ka zì zò-dɔ̀à-mɔ̀ kɔ̀ aà die yí-dã́-wɔ̃̀ sùu e kília làa, ka zò lɛ́ɛ̀ lo kɛɛ̀ gágà káà lòá líé.

⁴Ɛ́ɛ̃́ kà tó ka zì zò-gágà-lɛ̀ɛ é ka bìnì líé, yékɛ̀ ká kɔ̃́ wɔ̃́ mɔ̀. Kà kɛ kíli kɛɛ ka mɛ́ é kpálà, ɛ̃́ɛ̃́ kɛ ká kɛ kpeĩ fɛ́fɛ́ le, yékɛ̀ pɛ gbɛɛ sã̀ã̀ é kɛ ka mɔ̀.

⁵Yé gíkã́ sã̀ã̀ dàaà aà kɛá ka dò mɔ̀ɔ, laa mɔ̀ é à pɛ̃́ Wálà mɔ̀. Á kɛá kília, Wálà lɛ́ɛ̀ lo à nɔɔ̀ à lɛ̀ɛ. Ƃii Wálà lɛ́ɛ̀ pɛ nɔ mia séĩ́ lɛ̀ɛ zò wɛ́lɛ́-wɛ̀lɛ̀-là ká, tó lɛ̀ɛ́ e wéè tó à píé.

⁶Kɛɛ lɛ ka mɔ̀ ká à pɛ̃́ à mɔ̀ zò-dɔ̀à-mɔ̀ ká, ɛ̃́ɛ̃́ yékɛ̀ zò pèèlɛ é kɛ ka gé. Mi lɛ́ zò pèèlɛ lɛ à géa, lɛ kélɛ̀ mɛ̀ĩ́ gɔ̃ lɛ́ è dɔ, lɛ́ fã̀ã̀ è yà à mɔ̀, tó à súlúú áà dɔ̀ lɛ̀ía lɛ́ ɓe.

⁷Mi sùua zì yɛ́lɛ́-táá kpolà lɛ pèèlɛ, ɛ̃́ɛ̃́ à dɔ̀lɔ̀ kṹũ̀ wá lɛ̀ doó mɔ̀ kpɛ̃ĩ lɛ à zì kɛ-wɔ̃̀ séĩ́ yí. Yékɛ̀ á yà e gé kélɛ̀ lɛ́ɛ̀ lo pɛ lɛ́ è go ko Dàa-mì kɛ̀lɛ̀ɛ sɔ̀lɔ̀ ɓoò.

⁹Ko lèe-gé yé lɛ fɛ́í-fɛ̀ì mia nyìɛ làa, lɛ à mɔ̀ à gé é li yé Wálà aà à sí lɛ̀ía ká.

¹⁰Ɛ́ɛ̃́ ko lèe-gé yé à bɛ̃̀ɛ̃ lɛ kpànazɛ̀ɛ, lɛ à mɔ̀ à gé é li yé Wálà aà nu à ká tã́ã̀a ká. Ƃii óò lo kɔ̃́ɔ̃̀ mia kpànazɛ̀ ká lɛ̀ zí ò kɔ̃̀á sùu bĩ́ káa lɛ́ ɓe.

¹¹Nyɛ́nɛ́ lɛ́ɛ̀ wɛ̀lɛ̀, tó áà ɓɔ̀ gágà, tó áà sùu kpáa kũ̀. Yé aà kɛ kília, sùua bĩ́ lɛ́ɛ̀ kàà, ɛ̃́ɛ̃́ à zì li-kɔ̀ yí áà sìè zi sùua ká. Zi nɔ́ doóa káa, mi kpànazɛ̀ lɛ́ɛ̀ lo tóò e kɛ-wɔ̃̀ kɛpìà, tó à yí áà sìè.

¹²Mi lɛ́ è to dɔ̀á e dɔ̀lɔ̀ mɔ̀ yé yí-dã́-wɔ̃̀ aà ɓɔ à làa káa, zò géli lɛ à kɛ̀lɛ̀. Ƃii yé aà die yí-dã́-wɔ̃̀ e kília yía, lɛ́ɛ̀ lo e fɔ́nɔ́ lɛ́ e kɛ̀ɓe-zòlò ká, lɛ́ Wálà aà e wè dɔ à ká mia lɛ́ à lɔ̀ kpɔ́ɔ̀ lɛ o mɔ̀ɔ lɛ̀ɛ sɔ̀lɔ̀ ɓoò.

¹³Yé yí-dã́-wɔ̃̀ dò nɔ́ɔ fé aà ɓɔ mi dò mɔ̀ɔ, yékɛ̀ á gèe kélɛ̀, “Yí-dã́-wɔ̃̀ e kéa lɛ́ɛ̀ go Wálà kɛ̀lɛ̀.” Ƃii kɛ-wɔ̃̀ yɔɔ nɔ́ɔ fé lɛ̀ɛ́ bɛ̀i Wálà yí dã́ã̀, ɛ̃́ɛ̃́ Wálà dìè bɛ̃̀ɛ̃ lɛ̀ɛ́ mi nɔ́ɔ fé yí dã́.

¹⁴Kɛɛ kɛ-wɔ̃̀ yɔɔ kɛ-lɔ̀ lɛ́ è mia ɓéèe kɛ̀, tó yí-dã́-wɔ̃̀ áà nù o mɔ̀ɔ. Wɔ̃́ kɛ-lɔ̀ e kília lɛ́ɛ̀ à gã̀ã̀ e píé, tó áà kɔ̀ ɓò.

¹⁵Yé aà kɛ kília, kɛ-wɔ̃̀ yɔɔ kɛ-lɔ̀ e kília lɛ́ɛ̀ e gí si, tó e kɛ-wɔ̃̀ yɔɔ ye. Ɛ́ɛ̃́ yé kɛ-wɔ̃̀ yɔɔ bɛ̃̀ɛ̃ aà ɓo e yía, tó e ga bɛ̃̀ɛ̃ ye gbaa.

¹⁶M lèe-gé vɔ̀, lɛ́ ka lɔ̀ kpɔ́ɔ̀ lɛ m mɔ̀ ɓɛ, yékɛ̀ ká tó ó ka bèkɛ̀ ɓo.

¹⁷Gbàá-pɛ̀ yiè nɔ́ɔ fé, ɛ̃́ɛ̃́ nɔ̀-lɛ̀ɛ-pɛ̀ kpeĩ séĩ́ lɛ́ɛ̀ go lɛ̀í. Lɛ́ɛ̀ go Wálà lɛ́ e pɛ séĩ́ lɛ́ è lɛ̀ fɔ̀nɔɔ kɛɛ kɛ̀lɛ̀, áà nù tã́ã̀ zèe. À dìè-tĩ́ mɛ́ lɛ̀ɛ́ vɔ̀ɔ. Lɛ̀ɛ́ nìɛ̀, kɛ á kɛ à bĩ́ é kɛ ɓe.

¹⁸À zì nàà-ká-wɔ̃̀ kolo làa, e à kɛ ko kɛ ɓe wéé wánà zɛ̀ɛ kolo là. A kɛ kíli kɛɛ kó kɛ bèĩzɛ̀ pɛ séĩ́ lɛ́ a kɛɛ bà.

¹⁹M lèe-gé vɔ̀, lɛ́ ka lɔ̀ kpɔ́ɔ̀ lɛ m mɔ̀ ɓɛ. Ka zò è vùò wɔ̃́ e kéa ká. Lɛ mia séĩ́ mɔ̀ ó wɔ̃́ ma tíè-tíèe, kɛɛ o yí è kɛ dɔ́lɔ́-dɔ́lɔ́ mɛ́ĩ́ ɓopìà, ɛ̃́ɛ̃́ o zò è kɛ dɔ́lɔ́, yékɛ̀ wɔ̃́ é o wàa tíè-tíèe.

²⁰Ƃii mia ɓéèe zì wɔ̃́à-wàa-kɔ̀ lɛ̀ɛ́ wɔ̃́ kpeĩ lɛ́ Wálà aà yà e géa kɛ.

²¹À mɔ́ɔ̀ wɔ̃̀ mɔ̀ɔ, kà wɔ̃́ lilì kṹã̀a zɛ̀, ɛ̃́ɛ̃́ ka zì wɔ̃́-kɛ-kɔ̀ yɔɔ séĩ́ ɓo ka zì kɛ̀ɓe là. Kà ka dìè sí péĩ́ Wálà wɛlɛ mɔ̀, ɛ̃́ɛ̃́ ká ka kɔ̀ yà wéé lɛ́ à tàà ka zò píé, lɛ́ è bɛ̀i ka laàa wì.

²²Yékɛ̀ ká ka dìè bèkɛ̀ ɓo ka tóó dɔ̀ à wéè mɔ̀ ɓɔ̀ɔ ká. Kɛɛ kà kɛ à wéè kɛ-mìà ká.

²³Mi lɛ́ è e tóó dɔ wééa mɔ̀, tó làá kɛɛ, lɛ kélɛ̀ gɔ̃ lɛ́ è lɛ̀ gɛ̃̀ sɛ́ɓɛ̀ yí, tó áà zi lɛ́ lɛ à káa gɛ̃̀ɛ lɛ́ ɓe.

²⁴Lɛ́ɛ̀ e dìè gɛ̃̀ e yiè ká, tó e là ló ɓo, ɛ̃́ɛ̃́ tó à zò e ni zi lɛ́ e kɛ à káa ká nɔ́ zá le.

²⁵Kɛɛ mi lɛ́ è lɔ́ɔ̀ púlú lɛ́ è mia ɓo wɔ̃́ yía, bà nàà e yiè ká, lɛ́ è e tóó dɔ à mɔ̀ teele, tó lɛ̀ɛ́ e tóó dɔ nɔ́ ɓɔ̀ɔ à mɔ̀, tó áà nì à ká, ɛ̃́ɛ̃́ lɛ́ lɛ ye ɓo à kɛ-mì káa, mí e kília, Wálà lɛ́ɛ̀ lo lúà kpɔ́ɔ̀ à mɔ̀ wɔ̃́ séĩ́ lɛ́ à kɛ̀ɛ kɛɛ̀ yí.

²⁶É kɛ̀á mi dò lɛ yí áà e dìè sì gbìnì-Wálà-lɛ̀ɛ mì, tó lɛ̀ɛ́ e nanà kũ̀-tã́ã̀-zì dɔɔ, kɛɛ lɛ e dìè bèkɛ̀ ɓopìà. À zì gbìnì-Wálà-lɛ̀ɛ lɛ wɔ̃́ dà tã́ã̀ zɛ̀ ká.

²⁷Pɛ lɛ́ Wálà lɛ́ e Dàa káa, à si gbìnì-à-lɛ̀ɛ kɔ̀ kpeĩ ɛ̃́ɛ̃́ púlúa, gɛ̃̀ e ké. Ye lɛ́ e kélɛ̀, ó gbũ tèè vɔ̀ ɛ̃́ɛ̃́ gã̀ã-loà vɔ̀ mɔ̀ o zì wɔ̃́ nyɔ́ɔ̀ɔ gɛ̃̀ɛ̃ɛ̃̀ yía. Ɛ́ɛ̃́ zeĩ́, í i dìè kɛ, yékɛ̀ kpóṹ là zèe pɛ píé é tó i mɔ̀.