Read Yamano Zĩ́ĩ̀ 2 Bible Online

Zĩ́ĩ̀ 2 - Yamano bible

Zĩ́ĩ̀ 2

¹M lèe-gé vɔ̀, ka zò dɔɔ̀ lɛ ko Dàa-mì Zízɛ̀ Kɛ́lɛ̀ì, lɛ́ e mia Dàa-mì ká lɛ́ e lɛ̀ fɔ̀nɔɔ̀ɔ bàa mɔ̀. Yé lɛ kília, yékɛ̀ ká mia bà ɓo zi lɛ́ o kɛ-kɔ̀ lɛ à káa mɔ́ɔ̀ wɔ̃̀ mɔ̀.

²Lúó dò káa, gɔ̃ lɛ́ góò ɓɔ́ɔ́ lɛ à kɔ̀ mɔ̀, tó à mɛ́ síì lɛ sɔ yiè yiè káa, lɛ́ɛ̀ lo nuù kà pà-kíe-mɔ̀ yí, tó gɔ̃ lɛ́ pɛ wá à kɛ̀lɛ̀, lɛ́ sɔ zɛ́kɛ́lɛ́ ɓoòo zɛ̀ lɛ à mɔ̀ɔ, à nuù lɛ́ɛ̀ lo kɛɛ̀á yi nɔ́ kíli.

³Yé kaà mi yé sɔ yiè lɛ à mɔ̀ɔ ɓɛ̀lɛ kpɔ́, tó káà gèè à lɛ̀ɛ, “Yàlà-pìà yiè gɛ̃̀ e ké,” tó ka gèe zeĩ́ gɔ̃ fĩ́ĩ́-nyɛ zɛ̀ɛ lɛ̀ɛ, “Dɔ lɛ̀ e yía mɔ̀,” ɛ̃́ɛ̃́ káà gèè, “Yà tã́ã̀ sɛ́lɛ́ bà m gã̀ dṹɔ̃̀ lɛ̀ɛ mɔ̀,”

⁴yé kaà kɛ kília, kɛɛ ka nupìà mia bà-ɓo-wɔ̃̀ ká tã́ã̀, ɛ̃́ɛ̃́ káà kɛ̀ tó ka yɛ́lɛ́-tàà-yí-wɔ̃̀ lɛ yɔɔ, tó káà mɛ̀ĩ́-sà ɓò à ká.

⁵M lèe-gé vɔ̀ lɛ́ ka lɔ̀ kpɔ́ɔ̀ lɛ m mɔ̀ ɓɛ, kà ka tóó dɔ. Ḿ gɔ̃̀, Wálà aà mia lɛ́ pɛ wá o kɛ̀lɛ̀ kpóṹ e kéa làa sí, kɛ ó kɛ kpànazɛ̀ zò-dɔ̀à-mɔ̀ yí, ɛ̃́ɛ̃́ kɛ lɛ̀ lɛ́ e e wè dɔ à ká mia lɛ́ à lɔ̀ kpɔ́ɔ̀ lɛ o mɔ̀, lɛ́ à tóò lɛ mia là yia, kɛ é kɛ wà pɛ ká?

⁶Kɛɛ ka yee, ka nyìɛ fɔ̃́ɔ̃̀ lɛ mia lɛ́ pɛ wá o kɛ̀lɛ̀ɛ yí. Dé è wàa kpɔ ka mɔ̀, tó áà ka gã̀ã̀ tã́ã̀ dɔ-mìà wɛlɛ mɔ̀ ɓɛ? Ḿ gɔ̃̀, mia kpànazɛ̀ɛ lɛ?

⁷O lɛ́ ò mɛ́ĩ́ yɔɔ ɓo tɔ́ yiè lɛ́ à nɔɔ̀ lɛ ka lɛ̀ɛ gbĩ mɔ̀ɔ. Ye wá kíli?

⁸Wálà kiia láà gèe kélɛ̀, “I yà-sɔ́nɔ́-mìà zì lɔ̀-kpɔ̀ i mɔ̀ɔ, lɛ à mɔ̀ é kɛ lɛ̀ zí i dìè lɔ̀ kpɔ́ɔ̀ lɛ à ká i mɔ̀ɔ lɛ́ ɓe.” Yé kaà ka Líé-sí-mì là lɔ́ɔ̀ e kéa kṹ tã́ã̀a, kɛ káà kɛ̀ sɛ̀.

⁹Kɛɛ yé kaà mia bà ɓo o zì kɛ-kɔ̀ mɔ̀ɔ, kɛɛ kaà wɔ̃́ yɔɔ kɛ. Ɛ́ɛ̃́ Lɔ́ɔ̀ɔ lɛ́ɛ̀ lo ka kṹũ̀ lɛ̀ zí è e sìè-mìà kũáa lɛ́ ɓe.

¹⁰Ƃii mi lɛ́ è Lɔ́ɔ̀ɔ séĩ́ kɛ̀, tó áà kɔ̃̀ à lɛ̀ dò kɛɛ̀ mɔ̀ɔ, kɛɛ mɛ̀ĩ́-sà aà káá à wĩĩ́ Lɔ́ɔ̀ɔ séĩ́ sìeè mɔ́ɔ̀ wɔ̃̀ mɔ̀.

¹¹Ƃii mi yé a gèe, “Yékɛ̀ í wàà i ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ìa,” lɛ́ zeĩ́ a gèe kélɛ̀, “Yékɛ̀ í mi zɛɛ.” Í gɔ̃́ bɛ̃̀ɛ̃ wàà i ɓɛ́ĩ̀ gbɛɛ na píé kɛ́ìa, lɔ́ɔ̀ sìè-mì lɛ́ e i ká, yé ɓaà mi zɛɛ káa.

¹²Kà wɔ̃́ gèe, ɛ̃́ɛ̃́ káà wɔ̃́ kɛ̀ lɛ̀ mia lɛ́ lɔ́ɔ̀ lɛ́ è mia ɓo wɔ̃́ yía, è lo mɛ̀ĩ́-sà dɔɔ̀ o mɔ̀ɔ lɛ́ ɓe.

¹³Ƃii yé Wálà aà mɛ̀ĩ́-sà dɔ mi lɛ́ lɛ̀ɛ́ mi yéĩ̀ kṹ doa mɔ̀ɔ, Wálà lɛ̀ɛ́ ló à bɛ̃̀ɛ̃ yéĩ̀ kṹũ̀ nɔ́ kíli. Kɛɛ mia yéĩ́ kṹ-kɔ̀ diè lɛ mɛ̀ĩ́-sà kàà mia wĩĩ́ là.

¹⁴M lèe-gé vɔ̀, yé mi dò aà gèe kélɛ̀ zò-dɔ̀à-mɔ̀ lɛ à yí, lɛ́ à zì kɛ-wɔ̃̀ làá zɔ̃̀ɔ̃̀ɔ, mɛ́ mɔṹ è lo à gɛ̃̀ɛ̃̀ à kolo là? Zò-dɔ̀à-mɔ̀ e kília lɛ́ɛ̀ bɛ̀i à laà?

¹⁵Lúó dò káa, ko lèe-gé gɔ̃à zɛ̀ ɛ̃́ɛ̃́ loà zɛ̀ óò lo kɛɛ̀ ɓe, tó sɔ wá o kɛ̀lɛ̀, ɛ̃́ɛ̃́ tó lúó doó léɓèlè wá bɛ̃̀ɛ̃ o kɛ̀lɛ̀.

¹⁶Yé ka dò aà gèe o lɛ̀ɛ, “Wálà é lúà kpɔ́ ka mɔ̀, nɛ́nɛ́ è kã́ ka yí, ká ka lé yiè ɓèlè,” tó kàá pɛ lɛ́ lɛ o mɔ̀ ó sɔ̀lɔ̀ ɓo kɛ ó kɛ ɓe à làa nɔ o lɛ̀ɛ, mɛ́ ò lo à gɛ̃̀ɛ̃̀ mɔṹ ka wéè e kília kolo là?

¹⁷Zía lɛ́ lɛ à ká zò-dɔ̀à-mɔ̀ yía. Yé zò-dɔ̀à-mɔ̀ lɛ nɔ́ ɓɔ̀ɔ ɓe, tó kɛ-wɔ̃̀ gbɛɛ wá ɓe à mɛ̀ĩ́a, kɛɛ lɛ zò-dɔ̀à-mɔ̀ gaàa ká.

¹⁸Kɛɛ mi dò lɛ́ɛ̀ lo à gèeè kélɛ̀, “Zò-dɔ̀à-mɔ̀ lɛ i yí, kɛɛ ma bɛ̃̀ɛ̃, m kɛ-wɔ̃̀ lɛ m mɔ̀.” É kɛ̀á kília, kɛɛ ḿm̀ lo à gèeè kélɛ̀, “Zi lɛ́ zò-dɔ̀à-mɔ̀ è bɛ̀i kɛɛ̀á mi yí, tó i kɛ-wɔ̃̀ wá i mɔ̀ɔ, ì à zɔ̃̀ɔ̃̀ m lɛ̀ɛ. Ma yee, ḿm̀ lo m̀ zò-dɔ̀à-mɔ̀ zɔ̃̀ɔ̃̀ i lɛ̀ɛ m zì kɛ-wɔ̃̀ kolo là.”

¹⁹Íì à gɛ̃̀ wánà ká kélɛ̀ Wálà lɛ nɔ́ ɓe doó kàáà? Ƃáà kɛ̀ sɛ̀. É kɛ bɛ̃̀ɛ̃ pɛ yɔɔ vɔ̀ káa, óò à gɛ̃̀ wánà ká nɔ́ kíli, tó o mɛ́ áà tàlè túó ká.

²⁰Gɔ̃, i bè zɛ̀. Ƃáà nàà ó à zɔ̃̀ɔ̃̀ i lɛ̀ɛ kélɛ̀ zò-dɔ̀à-mɔ̀ lɛ́ kɛ-wɔ̃̀ wá à mɛ̀ĩ́a, lɛ wɔ̃́ dà tã́ã̀a zɛ̀ ká?

²¹Zi sùu kpɛɛ̀ lɛ́ ko dàa ye dàà Éɓɔ́lɔ́hã́ã̀ à kɛɛ̀ e kɛá kpeĩ Wálà lɛ̀ɛ? Ḿ gɔ̃̀, e kɛ wɔ̃́ lɛ́ a kɛ, lɛ́ e e gbe Áázè nɔ Wálà lɛ̀ɛ sálà-ɓòà-là-pɛ̀ɛ làa kolo là zàá?

²²Zi lɛ́ à zì zò-dɔ̀à-mɔ̀ wà à zì kɛ-wɔ̃̀ e yɛɓo kɛá e kíe làa, ɓàá gɛ̃̀? À zì zò-dɔ̀à-mɔ̀ kɛɛ̀ e kɛá kpeĩ fɛ́fɛ́ le à zì kɛ-wɔ̃̀ kolo là zàá.

²³Wɔ̃́ lɛ́ Wálà là kíía à gèea, à kɛɛ̀ e kɛá wánà zɛ̀. Ye lɛ́ e kélɛ̀, “Éɓɔ́lɔ́hã́ã̀ e e zò dɔ Wálà mɔ̀. À zì zò-dɔ̀à-mɔ̀ kolo là zàáa, Wálà a sí gbaa é kɛ mi kpeĩ ká.” Ɛ́ɛ̃́ wa mɔ́ɔ̀ Éɓɔ́lɔ́hã́ã̀ sí ɓo Wálà ɓɛ́ɛ.

²⁴À mɔ́ɔ̀ wɔ̃̀ mɔ̀ɔ, káà zi lɛ́ mi dò kɛɛ̀ lɛ à ká kpeĩ Wálà lɛ̀ɛ e zì kɛ-wɔ̃̀ kolo làa gɛ̃̀. Ye wá nɔ́ ɓɔ̀ɔ à zì zò-dɔ̀à-mɔ̀ doó ká.

²⁵Zi nɔ́ doóa e kɛá Wéléháà lɛ́ e kɛ e dìè lɔ̀ɔ̀ dɔpìàa ká. Ḿ gɔ̃̀, à kɛɛ̀ e kɛá kpeĩ Wálà lɛ̀ɛ à zì kɛ-wɔ̃̀ kolo là zàá? E e kɔ̀ yà vɔ-mìàa wì, ɛ̃́ɛ̃́ a kɛ o wàà o kpɔ́ o kpáá gbɛɛ ká.

²⁶À mɔ́ɔ̀ wɔ̃̀ mɔ̀ɔ, zi lɛ́ gbĩ-kpàla lɛ́ gɛ̀ɛ̀ wá à yía, gaà lɛ à káa, zi nɔ́ doóa lɛ́ zò-dɔ̀à-mɔ̀ lɛ́ kɛ-wɔ̃̀ wá à píéa, gaà lɛ à káa.