Read Yamano Zĩ́ĩ̀ 3 Bible Online

Zĩ́ĩ̀ 3 - Yamano bible

Zĩ́ĩ̀ 3

¹M lèe-gé vɔ̀, yékɛ̀ ka búnùzɛ̀ ká kɛ pɛ-zɔ̃̀ɔ̃̀-mìà ká. Ƃii yé waà kɛ mɛ̀ĩ́-sà dɔpìà mia lɛ́ ko pɛ-zɔ̃̀ɔ̃̀-mìà káa mɔ̀ɔ, óò lo ko kṹũ̀ gágà, é diá mia yé o tóa là.

²Ko séĩ́-séĩ́ kóò wɔ̃́ ni teele. Mi lɛ́ lɛ̀ɛ́ ni do wɔ̃́ à gèea mɔ̀ɔ, kɛɛ lɛ dóo mi kpeĩ kpó-kpó ká. Bɛ̀i lɛ à mɔ́ɔ̀ mì mɔ̀ kɛ é e gbĩ-kpàla lɛ̀ séĩ́ kṹ tã́ã̀.

³Kóò kálá dà sòo lé kɛɛ é wɔ̃́ ma ko wè là. Bɛ̀i lɛ ko mɔ̀ kó kɛ é ló lɛ̀ lɛ́ kò nàà é ló yia mɔ̀.

⁴Ɛ́ɛ̃́ zeĩ́, kà ka yɛ́lɛ́ táá gɔɔ bɛ̃̀ɛ̃ mɔ́ɔ̀ wɔ̃̀ yí. Yé bɛ̃̀ɛ̃ lɛ pɛ gbùò ká, tó fã̀ã̀ mɛ́ gágà zɛ̀ áà nyɔ̀ɔ̀ɔ, à pɛ lɛ́ ò à wũ vɔ à ká zi gbɛɛ káa, lɛ nyɔ̀nɔ́ kpó-kpó ɓo. Ɛ́ɛ̃́ lɛ́ɛ̀ lo lɛ̀ lɛ́ gɔ́ɔ́ɔ táá-mì è à nàà é ló yia mɔ̀.

⁵Zía lɛ́ mia nanà mɔ́ɔ̀ wɔ̃̀ lɛ à káa. Yé bɛ̃̀ɛ̃ lɛ pɛ nyɔ̀nɔ́ káa, lɛ́ɛ̀ lé-gbùò-là kɛ̀ pɛ gbùò wɛ̃́ĩ̀. Zi lɛ́ tíé kpã́né ɓɔ̀ɔ è bɛ̀i à mɔ̀ é bíní-kù gbùò gélé à káa, kà gɛ̃̀.

⁶Mia nanà lɛ kélɛ̀ tíé lɛ́ ɓe. Lɛ kélɛ̀ kpóṹ là lɛ́ à paà lɛ wɔ̃́ yɔɔ káa, lɛ́ ɓe. À yàlà kṹũ̀ lɛ ko gbĩ-kpàla yí, tó áà wɔ̃́ yɔɔ wɛ̃̀ĩ̀ ko gbĩ-kpàla lɛ̀ séĩ́ mɔ̀. Lɛ́ɛ̀ tíé dà kɛ̀ɓe lɛ́ ko à ká lúó doó doó píéa yí. Ɛ́ɛ̃́ tíé lɛ́ e nanà yía, lɛ́ɛ̀ go tíé-pà.

⁷Mia kɔ̀ bɛ̀iì lɛ gbaa wìì nyaàa, ɛ̃́ɛ̃́ mɔ̀ɔ̀, e bɛ̀i wìì lɛ́ è tàà e gí làa, ɛ̃́ɛ̃́ pɛ séĩ́ lɛ́ e mɛ̀ĩ́ bàa mɔ̀, wáà o tòlò. Ɛ́ɛ̃́ waà o séĩ́ o tòlò do.

⁸Kɛɛ mi dò nɔ́ɔ fé kɔ̀ lɛ̀ɛ́ bɛ̀i do nanà mɔ̀ kɛ á tòlò. Lɛ yɔɔ, ɛ̃́ɛ̃́ à wũ kũ̀-tã́ã̀-zì wá ɓe. À paà lɛ mia zɛ-pɛ̀ ká.

⁹Kóò ko Dàa-mì lɛ́ e ko Dàa káa zúo ɓo à ká. Ɛ́ɛ̃́ kóò mia nì lɛ́ o kɛɛ̀ lɛ lɛ̀ zí Wálà lɛ à káa lɛ́ ɓea, náá kpɔ à ká.

¹⁰Lé nɔ́ doóa lɛ́ zúo-ɓo wà náá-kpɔ́ è go yía. M lèe-gé vɔ̀, ye wáá mɔ̀ kɛ é kɛ kíli.

¹¹Kéa, yíí nyɔ́ɔ̀ɔ wà yíí nɛ́ĩ́-nɛ̀ĩ̀ óò bɛ̀i à mɔ̀ ó gó yíí-to doó yí?

¹²M lèe-gé vɔ̀, kéa, féè-yìlì lɛ́ɛ̀ bɛ̀i à mɔ̀ é ɓa ɔ́lè ɓɛɛ ká? E bɛ̀i zeĩ́, ɓɛ̀lɛ̀-wɛ́lɛ́ lɛ́ ò ɓɛɛ yíí mia, lɛ́ɛ̀ bɛ̀i à mɔ̀ é ɓa féè ɓɛɛ ká? Ɛ́ɛ̃́ mi-yìì lɛ̀ɛ́ bɛ̀i góò wèĩ-yìì bà.

¹³Dé e ka bà lɛ́ à gí kã́ã̀ lɛ, ɛ̃́ɛ̃́ lɛ́ e wɔ̃́ yí-ma-mì ká? É kɛ̀á lɛ kília, è à zɔ̃̀ɔ̃̀ e zì yìì-mia-ká-kɔ̀ kpeĩ, ɛ̃́ɛ̃́ à zì wɔ̃́ yiè lɛ́ è à kɛ̀ e dìè-sì-péĩ́ wà gíkã́ káa kolo là zàá.

¹⁴Kɛɛ é kɛ̀á dàa-gbe là kɛɛ̀ nyɔ́ɔ̀ɔ, e bɛ̀i, nàà-dìè-ká lɛ ka zò píéa, yékɛ̀ ká lé-gbùò-là kɛ, tó káà nɛ̀ kpɔ̀ wɔ̃́ wánà zɛ̀ɛ mɔ̀.

¹⁵Gíkã́ sùua lɛ̀ɛ́ gó lɛ̀í. Lɛ kpóṹ là zèe là pɛ ká. Lɛ mia ɓéèe kɛ̀lɛ̀-pɛ̀ ká ɓɔ̀ɔ. Lɛ́ɛ̀ go pɛ yɔɔ vɔ̀ kɛ̀lɛ̀.

¹⁶Lɛ̀ lɛ́ dàa-gbe-là kɛɛ̀ wà nàà-dìè-ká wɔ̃̀ lɛ yía, mia kã̀-kíe-mɔ̀ wɔ̃̀ ɛ̃́ɛ̃́ wɔ̃́ yɔɔ séĩ́ lɛ à lɛ̀ mɔ̀ nɔ́ kíli.

¹⁷Kɛɛ gíkã́ lɛ́ è go lɛ̀ía, lɛ púlú kpá zii. Ɛ́ɛ̃́ lɛ zeĩ́ zò-yà-gé zɛ̀, ɛ̃́ɛ̃́ kpóló-kpɔ̀-mɔ̀ zɛ̀, e bɛ̀i, à yɛɛ̀ lɛ mia lɛ̀ɛ kɛ é e tóó dɔ mi mɔ̀. À paà lɛ mia yéĩ̀ kṹũ̀ ká, ɛ̃́ɛ̃́ lɛ́ɛ̀ ɓa e ɓɛɛ yiè ɓó máàa zɛ̀ ká. À zì yɛ́lɛ́-táá kpolà wá pèèlɛ. Ɛ́ɛ̃́ ye wá e dìè wɛlɛ-li-pɛ̀ ká.

¹⁸Pɛ wɛ́lɛ́ lɛ́ mia lɛ́ ò zò-yà-gé kɛ̀ áà kɛ̀ mia fĩ̀ã̀a, ò tàà zò-yà-gé káa, pɛ́ è ɓa à káa lɛ́ e kɛ̀-kpeĩ-kɔ̀ káa.