Read Yamano Zĩ́ĩ̀ 5 Bible Online

Zĩ́ĩ̀ 5 - Yamano bible

Zĩ́ĩ̀ 5

¹Ɛ̀ɛ̀, mia kpànazɛ̀ ka ké ɓɛ, kà ka tóó dɔ m mɔ̀. Kà gbóó ɓo, ka wúú áà kàà pɛlɛí wɔ̃́ zò-dà-zízàá zɛ̀ lɛ́ lɛ nupìà ka mɔ̀ɔ mɔ́ɔ̀ wɔ̃̀ mɔ̀.

²Kà dɔ-pɔ̀ɔ̀ aà vúú gbaa. Ɛ́ɛ̃́ pɛ aà ka mɔ̀-sɔ̀ ɓèlè.

³Kàkpa aà bɔ́nɔ́ kà góò wà sévà o mɔ̀. Ɛ́ɛ̃́ kàkpa e kília lɛ́ɛ̀ lo kélá-wè ɓoò ka là. Lɛ́ɛ̀ lo ka nɔ̀ɛ ɓèlè ka mɔ̀ lɛ̀ tíé lɛ́ ɓe. Lúó léĩ́-tó-lùò e kéa, kaà kà dɔ-pɔ̀ɔ̀ gbũ dɔá e kíe là.

⁴Kàá mia lɛ́ ò yɛɓo kɛ̀ ka píé nyɛ́nɛ̀ĩ̀a fɔ́nɔ́ nɔ nɛ́. O fɔ́nɔ́ e kília lɛ gbóó ɓoò mɔ̀. Mia lɛ́ o ɓà ɓu kã́-mìà káa, o gbóó-wè aà dà ko Dàa-mì lɛ́ là yíkɛ̀ gáàa lɛ pɛ séĩ́ làa tóó kɛ̀lɛ̀.

⁵Ka zì kɛ̀ kpóṹ e kéa làa, ka yàà lɛ kà dɔ-pɔ̀ɔ̀ là, ɛ̃́ɛ̃́ kaà ka dìè nàà-ká-wɔ̃̀ kɛ. Kaà ka dìè kɛ, kaà ɓómá lúó lɛ́ ò lo mia zɛɛ̀ à káa mɔ́ɔ̀ wɔ̃̀ mɔ̀.

⁶Kaà mɛ̀ĩ́-sà káá mi lɛ́ lɛ̀ɛ́ gbaa wɔ̃́ gbɛɛ kɛɛ wĩĩ́, ɛ̃́ɛ̃́ kaà à zɛ. Lɛ̀ɛ́ gbaa wéé nɔ́ɔ fé dò kṹ ka lé.

⁷À mɔ́ɔ̀ wɔ̃̀ mɔ̀ɔ m lèe-gé vɔ̀, kà kɛ zò-kũ̀-tã́ã̀ zɛ̀ é tóá kíli ko Dàa-mì é nu. Zi lɛ́ nyɛ́nɛ̀ĩ̀ dàa-mì zò kṹũ̀ lɛ à ká tã́ã̀ é tóá kíli pɔɔ̀ lɛ́ a taa là nyɛ́nɛ̀ĩ̀a mɔ̀ɔ, é ɓa e ɓɛɛ yiè káa, kà gɛ̃̀. À zò kṹũ̀ lɛ tã́ã̀, ɛ̃́ɛ̃́ lɛ yàá lɛ̀ɛ-yíí-pɛ̃́ bèĩzɛ̀ wà à tò-ko-mɔ̀ zɛ̀ɛ gɛ̀nɛ̀.

⁸Lɛ ka bɛ̃̀ɛ̃ ka mɔ̀ ká kɛ zò-kũ̀-tã́ã̀ zɛ̀. Kà ka zò kɛ yí, ɓii lúó lɛ́ ko Dàa-mì è lo nuù à káa, aà ɓɔ kɔ̀ɛ́.

⁹M lèe-gé vɔ̀, yékɛ̀ ká ka wè kpɔ́ ka kíe nì kɛ̀lɛ̀. Kà kɛ kíli yékɛ̀ Wálà é mɛ̀ĩ́-sà dɔ ka mɔ̀. Kà lɛ̀ gɛ̃̀, Mɛ̀ĩ́-sà Ƃo-mìa lɛ dɔ̀á gbaa ká lé mɔ̀.

¹⁰M lèe-gé vɔ̀, ka zò è vùò dɔ̀-Wálà-lé-là-mìà lɛ́ o mɛ́ĩ́ ɓo ko Dàa-mì tɔ́ yía mɔ́ɔ̀ wɔ̃̀ ká. Zi lɛ́ o o zò kṹá tã́ã̀ lɛ̀ lɛ́ o kɛ wàa ɓèlèpìàa káa, è kɛ wɔ̃́ gɔ̃̀á ká ka lɛ̀ɛ.

¹¹Kóò o si géli-mìà, ɓii o o zò kṹ tã́ã̀a mɔ́ɔ̀ wɔ̃̀ mɔ̀. Kaà zi lɛ́ Zóò e kɛá zò-kũ̀-tã́ã̀ zɛ̀ɛ wɔ̃̀ ma do. Ɛ́ɛ̃́ káà zi lɛ́ ko Dàa-mì e wɔ̃́ kɛá à lɛ̀ɛ, kɛɛ aà nyɛ wàa e kília ɓèlèpìàa dɔ. Ƃii ko Dàa-mì paà lɛ mia yéĩ̀ kṹũ̀ ká, ɛ̃́ɛ̃́ ko yéĩ́ láà kɛ̀.

¹²M lèe-gé vɔ̀, wɔ̃́ kpànazɛ̀ kpó-kpó e ɓea, gɛ̃̀ e ké. Yékɛ̀ ká ka náá kpɔ́. Yékɛ̀ ká ka náá kpɔ́ lɛ̀í, ɛ̃́ɛ̃́ kpóṹ là zèe, ɛ̃́ɛ̃́ pɛ nɔ́ɔ fé dò mɔ̀ tolo ɓèleè ká. Kà “M̀m̀” è kɛ m̀m̀ ká, ɛ̃́ɛ̃́ kà “Gbàaò” è kɛ gbàaò ká, yékɛ̀ Wálà là mɛ̀ĩ́-sà é káá ka wĩĩ́.

¹³Mi dò lɛ ka bà áà wàa ɓèlè? Mí e kília, è sɛ̀nɛ ɓo. Ɛ́ɛ̃́ mi dò lɛ géli zɛ̀? À bɛ̃̀ɛ̃ è Wálà tɔ́-ɓɔ tã̀ ɓo.

¹⁴Ɛ́ɛ̃́ mi dò lɛ kɔ̃́ṹ-kɔ̃̀ũ̀? Mí e kília è Wálà-mìà dìè-dìè vɔ̀ súo kɛ. Óò lo sɛ̀nɛ ɓoò à wɛ̃́ĩ̀, tó o nyɔ́nɔ́ táá à là ko Dàa-mì tɔ́ yí.

¹⁵Sɛ̀nɛ lɛ́ wa ɓo zò-dɔ̀à-mɔ̀ yí e kéa, lɛ́ɛ̀ lo mi kɔ̃́ṹ-kɔ̃̀ũ̀a laà. Ko Dàa-mì lɛ́ɛ̀ lo à wɛ̀lɛ̀ a dɔ e gã̀ mɔ̀. Ɛ́ɛ̃́ kɛ-wɔ̃̀ yɔɔ lɛ́ aà kɛɛ, à ɓoò lɛ́ɛ̀ lo kɛɛ̀á à wũ mɔ̀.

¹⁶À mɔ́ɔ̀ wɔ̃̀ mɔ̀ɔ, kà wéé ka kɛ-wɔ̃̀ yɔɔ mɔ̀ ka kíe nì lɛ̀ɛ, ɛ̃́ɛ̃́ káà sɛ̀nɛ ɓò ka kíe nì wɛ̃́ĩ̀, kɛɛ ka laà é kɛá. Sɛ̀nɛ lɛ́ mi kpeĩ à ɓoa, yíkɛ̀ gáàa kpànazɛ̀ lɛ à kɛ̀lɛ̀ kɛ é wɔ̃́ kɛ.

¹⁷Ìláyà e kɛ mi nɔ́ e ko káa dò ká. E sɛ̀nɛ lɛ́ è go à zò wìa ɓo mɔ́ yékɛ̀ lɛ̀ɛ é bã. Ɛ́ɛ̃́ lɛ̀ɛ nɔ́ɔ fé dò lɛ̀ɛ́ gbaa ɓálá tã́ã̀ kɛ̀ɛ̀ yààka wà e lé-gbú píé.

¹⁸E bɛ̀i, e sɛ̀nɛ ɓo zeĩ́. Lɛ̀ e kɛ kília, lɛ̀í e lɛ̀ɛ bã, tó tã́ã̀ zèe pɔ̀ɔ̀ áà ɓà e ɓɛɛ ká.

¹⁹M lèe-gé vɔ̀, yé ka dò aà gó wɔ̃́ wánà zɛ̀ɛ píé, lɛ́ à lé aà tó luú, lɛ́ mi gbɛɛ aà ló aà nu à ká e mɛ̀ĩ́a,

²⁰kɛɛ ka zò è vùò wɔ̃́ e kéa ká. Ye lɛ́ e kélɛ̀, mí è lo nuù kɛ-wɔ̃̀ yɔɔ kɛ-mì nɔ́ɔ fé lɛ́ aà zi nia ká e mɛ̀ĩ́a, lɛ́ɛ̀ lo kɛ-wɔ̃̀ yɔɔ kɛ-mì e kília gɛ̀ɛ̀ laà ga kɛ̀lɛ̀. Ɛ́ɛ̃́ lɛ́ɛ̀ lo à kɛɛ̀ tó kɛ-wɔ̃̀ yɔɔ búnùzɛ̀ áà ɓò mi wũ mɔ̀.