Read Yamano 1 Pílɛ̀ 1 Bible Online

1 Pílɛ̀ 1 - Yamano bible

1 Pílɛ̀ 1

¹Óò m si Pílɛ̀. M Zízɛ̀ Kɛ́lɛ̀ì là àpɔ́sɔ̀lɔ̀ ká. Ḿm̀ wèè mia lɛ́ Wálà aà ka sí lɛ́ ka wɛ̃̀ĩĩ̀ lɛ, lɛ́ ka lɔ̀ɔ̀-mìà vɔ̀ ká Pɔ̃́tɔ̀, ɛ̃́ɛ̃́ Gɛ̀lésìà, e bɛ̀i Kapɛ̀dósìà, ɛ̃́ɛ̃́ zeĩ́ Ésìà, ɛ̃́ɛ̃́ Bàtínìàa ka bà.

²Wálà lɛ́ e mia Dàa káa, e ka sí lɛ̀ zí a yàá e gé mɔ́ɔ lɛ́ ɓe. Gɛ̀ɛ̀ Púlú aà ka kɛ là mia nì lɛ́ o púlúa ká, kɛ ká Zízɛ̀ Kɛ́lɛ̀ì wéè kɛ, ɛ̃́ɛ̃́ kɛ à léà é ka mɛ́ pɛ́lɛ́. Zò-kɛ̀-sɛ̀ wà zò-yà-gé là è kpɔ́ ka lɛ̀ɛ.

³Wálà lɛ́ e kɔa Dàa-mì Zízɛ̀ Kɛ́lɛ̀ì Dàa káa, kɔ̀à à tɔ́ ɓɔ. À zì mia yéĩ̀ kṹũ̀ kpànazɛ̀ɛ mɔ́ɔ̀ wɔ̃̀ mɔ̀ɔ, e kɛ̀ɓe dɛɛ nɔ kɔa lɛ̀ɛ Zízɛ̀ Kɛ́lɛ̀ì wɛ̀lɛ̀ a ɓo ga kɛ̀lɛ̀ɛ kolo là zàá. Wɔ̃́ e kéa láà kɛ̀, tó zò-kɛ̀-pɛ-mɔ̀ ɓéèe áà kɛ̀ ko yí.

⁴Pɛ́ ko zò lɛ à mɔ̀ kília, lɛ́ e pɛ lɛ́ è lo kɛɛ̀ kò pɛ káa káa. Pɔɔ̀ e kília vúú là wɔ̃́ wá à mɔ̀. Pɛ gbɛɛ lɛ̀ɛ́ bɛ̀i à sìè, ɛ̃́ɛ̃́ kɛ bɛ̃̀ɛ̃ à wɔ̃̀ é kɛ fúɛ́-fùɛ̀. Wálà lɛ́ɛ̀ à yàlà bɛ̀i ka lɛ̀ɛ e pà.

⁵O mia lɛ́ Wálà là yíkɛ̀ gáàa è e yɛ́lɛ́ yiè kɛ̀ ka píé zò-dɔ̀à-mɔ̀ kolo làa, kà pɛ ká. Wálà lɛ́ɛ̀ e yɛ́lɛ́ e kéa kɛ̀ ka mɔ̀ la-ɓo lɛ́ à pɛ̀ kɛɛ̀ lɛ, kɛɛ lɛ́ɛ́ é ɓo à là lúó léĩ́-tó-lùò káa mɔ́ɔ̀ wɔ̃̀ mɔ̀.

⁶Ka gé è li wɔ̃́ nì e kília mɔ́ɔ̀ wɔ̃̀ mɔ̀, yé bɛ̃̀ɛ̃ ka lèĩ yàá yéĩ̀zɛ̀ lúó zààle píé yí-dã́-wɔ̃̀ gbɛɛ̀ gbɛɛ lɛ́ lɛ ɓɔpìà ka làa yía ká.

⁷Lɛ́ɛ̀ kɛ̀ ka ká kíli, kɛɛ á zɔ̃̀ɔ̃̀ kélɛ̀ ka zì zò-dɔ̀à-mɔ̀ lɛ wánà zɛ̀ kpó-kpó ɓo. É kɛ bɛ̃̀ɛ̃ góò lɛ́ à yí è bɛ̀i sìèa káa, óò à yí dã tíé ká. À mɔ́ɔ̀ wɔ̃̀ mɔ̀ɔ, laa mɔ̀ ka zì zò-dɔ̀à-mɔ̀, lɛ́ lɛ bɛ̃̀ɛ̃ kpànazɛ̀ kpó-kpó ɓo é diá góò làa, à dã́ã̀ é kɛá nɔ́ kíli, kɛɛ é kɛ ɓe teele. Yé aà kɛ kília, káà lo kɛɛ̀ lɛ̀-fɔ̀nɔ-kɔ̀ yí, tó káà tɔ́-ɓɔ ɛ̃́ɛ̃́ ɓɛ̀lɛyà sɔ̀lɔ̀ ɓò Lúó lɛ́ Zízɛ̀ Kɛ́lɛ̀ì zɔ̃̀ɔ̃ɔ̃̀ è lo kɛɛ̀á mia lɛ̀ɛ ká.

⁸À lɔ̀ kpɔ́ɔ̀ lɛ ka mɔ̀ yé bɛ̃̀ɛ̃ kàá à gɛ̃̀ nɛ́ɛ ká. Káà à mɔ́ɔ̀ wɔ̃̀ gɛ̃̀ wánà ká, yé bɛ̃̀ɛ̃ kàá à dìè gɛ̃̀ dɛɛ káa ká. À mɔ́ɔ̀ wɔ̃̀ mɔ̀ɔ, ka gé lɛ́ɛ̀ li géli tɔ́ ɓɔɔ̀ɔ zɛ̀ lɛ́ mi lɛ̀ɛ́ bɛ̀i à mɔ́ɔ̀ wɔ̃̀ gèeèa ká,

⁹ɓii ka wɔ̃́ lɛ́ à mɔ́ɔ̀ zò-dɔ̀à-mɔ̀ lɛ ka yía sɔ̀lɔ̀ ɓopìà. Ye lɛ́ e kélɛ̀, la-ɓo lɛ́ lɛ ɓe ka gɛ̀ɛ̀ wɛ̃́ĩ̀a.

¹⁰La-ɓo e kília dɔ̀-Wálà-lé-là-mìà wa mɔ́ɔ̀ wɔ̃̀ yí naa ɓo mɔ́ e yiè ká, tó wáà wɛ̃́ĩ́-lɔ̀ɔ kɛ̀ píé à mɔ́ɔ̀ wɔ̃̀ mɔ̀. O wɔ̃́ lɛ́ Wálà a káá o lé, lɛ́ à gbɛ̃̀ɛ̃̀ e kɛá zò-kɛ̀-sɛ̀ lɛ́ è lo kɛɛ̀ à kɛ̀lɛ̀ ka wɛ̃́ĩ̀a wɔ̃̀ gèe.

¹¹O à kɛ-zì naa kɛ ó lúó lɛ́ e lúóa ká, ɛ̃́ɛ̃́ zí è lo nuù à káa dɔ. Kɛ́lɛ̀ì zì Gɛ̀ɛ̀ lɛ́ e kɛ o yía, e lúó lɛ́ e kéa wɔ̃̀ gèe o lɛ̀ɛ, lɛ̀ lɛ́ e wɔ̃́ nyɔ́ɔ̀ɔ lɛ́ e kɛ lópìà kɛɛ̀ Kɛ́lɛ̀ì ká, ɛ̃́ɛ̃́ lɛ̀ fɔ̀nɔɔ̀ɔ lɛ́ e kɛ à mɔ̀ é tó à píéa wɔ̃̀ gèe líéa ká.

¹²Wálà e à zɔ̃̀ɔ̃̀ dɔ̀à-lé-là-mìà o kília lɛ̀ɛ kélɛ̀ yɛɓo lɛ́ o kɛ à kɛpìàa, lɛ̀ɛ́ gbaa kɛ o dìè mɔ́ɔ̀ wɔ̃̀ mɔ̀, kɛɛ ka mɔ́ɔ̀ wɔ̃̀ lɛ́ o kɛ à mɔ́ɔ̀ à kɛ ɓopìàa. O wɔ̃́ lɛ́ kaà wɔ̃̀ ma gbaa wɔ̃́ làṹ yièa gèe-mìà léa wɔ̃̀ gèe. Míá o kília o wɔ̃́ nì e kília gèe yíkɛ̀ gáàa lɛ́ è go Gɛ̀ɛ̀ Púlú lɛ́ è go lɛ̀ía kɛ̀lɛ̀ɛ kolo là. Wɔ̃́ nì e kéa Wálà là vɔ-mìà nì óò nàà kɛ ó à yí naa.

¹³À mɔ́ɔ̀ wɔ̃̀ mɔ̀ɔ, ka zì yɛ́lɛ́-táá pɛ̀ kɛɛ̀ è kɛá wɔ̃́ kɛɛ̀ wɛ̃́ĩ̀. Kà yà ka nyìɛ́, ɛ̃́ɛ̃́ ka zò kɛɛ̀ è kɛá kpó-kpó ɓo lúà lɛ́ à nɔɔ̀ è lo kɛɛ̀á ka lɛ̀ɛ yé Zízɛ̀ Kɛ́lɛ̀ì zɔ̃̀ɔ̃ɔ̃̀ aà kɛá mia lɛ̀ɛ káa mɔ̀.

¹⁴Kà kɛ Wálà wéè kɛ-mìà ká. Yékɛ̀ ká tó wɔ̃́ kɛ-lɔ̀ lɛ́ e kɛ ka yí lɛ̀ lɛ́ kàá gbaa kɛ wɔ̃́ gbɛɛ yí dɔpìàa káa, é wɔ̃́ kɛ-zì zɔ̃̀ɔ̃̀ ka lɛ̀ɛ.

¹⁵Kɛɛ kà kɛ púlú wɔ̃́ séĩ́ lɛ́ kà kɛ̀ɛ kɛɛ̀ yí, lɛ̀ zí Wálà lɛ́ e ka súo kɛɛ lɛ à ká púlúa lɛ́ ɓe.

¹⁶Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Lɛ à mɔ̀ ká kɛ púlú, ɓii ma Wálà m púlúa mɔ́ɔ̀ wɔ̃̀ mɔ̀.”

¹⁷Yé Wálà aà mɛ̀ĩ́-sà dɔ mia mɔ̀ɔ, lɛ̀ɛ́ dɔ mi nɔ́ɔ fé dò píé. Lɛ́ɛ̀ mɛ̀ĩ́-sà dɔ̀-mia-mɔ̀ si wɔ̃́ lɛ́ mia kaà kɛ ka tɔ̀ là doó doóa mɔ̀. Yé kaà sɛ̀nɛ ɓo à lɛ̀ɛ, káà à si ka Dàa. Lɛ̀ mɔṹ lɛ kília, lɛ̀ lɛ́ ka tĩã́ tã́ã̀ zèea, kà túó à lɛ̀ɛ teele.

¹⁸Ƃii káà pɛ lɛ́ à nɔɔ̀ e kɛá kɛ é ka la ka dàa ye dàà nì zì wɔ̃́ kɛ-zì lɛ́ à yí wá à mɔ̀, lɛ́ wa tó ka kɛ̀lɛ̀ɛ dɔ. Lɛ̀ɛ́ gbaa kɛ pɛ lɛ́ à wɔ̃̀ lɛ fĩ́ĩ́-nyɛ zɛ̀, lɛ̀ sévà wà góò lɛ́ ɓea ká.

¹⁹Kɛɛ pɛ́ e ka laa, lɛ́ e kɛ Kɛ́lɛ̀ì léà kpànazɛ̀ɛ káa. E kɛ kélɛ̀ ɓáá nyɔ̀nɔ́ lɛ́ pɛ píé ɛ̃́ɛ̃́ kɛɛ gbɛɛ wá à mɔ̀ɔ léàa lɛ́ ɓe.

²⁰Wálà e à sí mɔ́ kɛɛ é tĩã́ kpóṹ là zèe kɛɛ̀. Ɛ́ɛ̃́ lɛ́ɛ́ ɓoò e kɛá à wɔ̃̀ là lúó léĩ́-tó-lùò lɛ́ ko à yía ká ka mɔ́ɔ̀ wɔ̃̀ mɔ̀.

²¹Ka zò dɔɔ̀ lɛ Wálà lɛ́ e à wɛ̀lɛ̀ ga kɛ̀lɛ̀, ɛ̃́ɛ̃́ lɛ́ e lɛ̀-fɔ̀nɔ-kɔ̀ nɔ à lɛ̀ɛ mɔ̀ à kolo là zàá. À mɔ́ɔ̀ wɔ̃̀ mɔ̀ɔ, ka zì zò-dɔ̀à-mɔ̀ wà ka zì zò-kɛ̀-pɛ-mɔ̀ lɛ Wálà yí.

²²Kaà wɔ̃́ wánà zɛ̀ɛ wéè kɛ. Wɔ̃́ e kéa kɛɛ̀ kolo làa, kaà ka dìè kɛ púlú, ɛ̃́ɛ̃́ ka lèe-gé vɔ̀ lɔ̀ kpó-kpó kpɔ́ɔ̀ lɛ ka mɔ̀. Lɛ̀ lɛ́ wɔ̃́ nì e kéa lɛ kília, ka kíe nì lɔ̀ è kpɔ́ ka mɔ̀ kpó-kpó ɓo, áà gò ka zò píé.

²³Ka ye dɛɛ ɓoò lɛ Wálà lé-wè ɓéèe, lɛ́ lɛ ɓe tòá kíli káa kolo là zàá. Ɛ́ɛ̃́ ka ye-gã̀ lɛ̀ɛ́ gó pɛ lɛ́ è sìèa kɛ̀lɛ̀. Kɛɛ lɛ́ɛ̀ go pɛ lɛ́ lɛ̀ɛ́ bɛ̀i sìèa kɛ̀lɛ̀.

²⁴Ƃii, “Mia séĩ́ o kélɛ̀ sùu lɛ́ ɓe. O zì kɛ̀-kpànazɛ̀-kɔ̀ lɛ kélɛ̀ sùu bĩ́ lɛ́ ɓe. Sùu lɛ́ɛ̀ kpáa kũ, tó à bĩ́ áà kàà.

²⁵Kɛɛ ko Dàa-mì là wééa lɛ ɓe tòá kíli ká.” Wéé lɛ́ wɔ̃́ làṹ yièa e nu à ká ka píéa, lɛ́ ɓɛ.