Read Yamano 1 Pílɛ̀ 2 Bible Online

1 Pílɛ̀ 2 - Yamano bible

1 Pílɛ̀ 2

¹À mɔ́ɔ̀ wɔ̃̀ mɔ̀ɔ, kà ka yí ɓo pɛ séĩ́ lɛ́ lɛ yɔɔ mɔ̀. Yékɛ̀ ká nɛ̀ kɛ. Yékɛ̀ ká ka dìè wɛlɛ li. Yékɛ̀ ká dàa-gbe-là kɛ. Ɛ́ɛ̃́ yékɛ̀ ká wɔ̃́ yɔɔ̀ yɔɔ̀ gèe.

²Kà kɛ lɛ̀ nɛ́fú dɛɛ lɛ́ ɓe. Nyɔ́-yíí kpeĩ lɛ́ lɛ ɓe ka gɛ̀ɛ̀ wɛ̃́ĩ̀a, à mi-lɔ̀ è ka kɛ, kɛɛ ká kɛ̀á mipìàa, ká fàa, ɛ̃́ɛ̃́ kɛ ká la-ɓo sɔ̀lɔ̀ ɓo.

³Ƃii kaà ko Dàa-mì zì sɔ̃̀ɔ̃-kɛ̀-sɛ̀ mia káa dã́.

⁴Kà nu ko Dàa-mì lɛ́ e gɛ̀lɛ̀ lɛ́ lɛ ɓéèea káa píé. Mia o gɛ̀lɛ̀ e kília wɔ̃̀ dà o kɔ̀ mɛ̀ĩ́. Kɛɛ Wálà e à sí, e kɛ gbaa kpànazɛ̀ e dìè lɛ̀ɛ.

⁵Ka kélɛ̀ gɛ̀lɛ̀ lɛ́ lɛ ɓéèea lɛ́ ɓe. Kà à tó Wálà é ka sí é ka gɛ̀ɛ̀ kɛ Wálà-kà ká. Káà lo sálà-ɓò-Wálà-mɔ̀-mìà púlú kɛ-yɛ̀ɓo kɛɛ̀ yi. Káà lo sálà ɓoò pɛ lɛ́ ka gɛ̀ɛ̀ à nɔ, lɛ́ è Wálà zò dàa ká Zízɛ̀ Kɛ́lɛ̀ì kolo là.

⁶Ƃii Wálà là kiia láà gèe kélɛ̀, “Lɛ̀ gɛ̃̀, m gɛ̀lɛ̀ kpànazɛ̀ sí, ɛ̃́ɛ̃́ m à kpɔ́pìà Záyɔ̃̀ pɛlɛí, lɛ̀ lɛ́ lɛ à mɔ̀ gɛ̀lɛ̀ kpànazɛ̀ é kɛ yía mɔ̀. Ɛ́ɛ̃́ mi lɛ́ è lo e zò dɔɔ̀ à mɔ̀ɔ, à zò lɛ̀ɛ́ ló tóò lɛ̀í.”

⁷Gɛ̀lɛ̀ e kéa lɛ dóo kpànazɛ̀ mia lɛ́ zò-dɔ̀à-mɔ̀ lɛ ka yía lɛ̀ɛ. Kɛɛ mia lɛ́ zò-dɔ̀à-mɔ̀ wá o yía, zí e kéa lɛ́ wɔ̃́ lɛ à ká o lɛ̀ɛ. Ye lɛ́ e kélɛ̀, “Gɛ̀lɛ̀ lɛ́ ká dɔ-mìà wa dà o kɔ̀ mɛ̀ĩ́a, aà kɛ gbaa gɛ̀lɛ̀ kpànazɛ̀ ká, é diá gɛ̀lɛ̀ séĩ́ là.”

⁸Ɛ́ɛ̃́ Wálà là kiia láà gèe zeĩ́ kélɛ̀, “Lɛ gɛ̀lɛ̀ lɛ́ è lo à kɛɛ̀ mia wáà sã̀ à káa ká. Lɛ gɛ̀lɛ̀-kpùlù lɛ́ è lo à kɛɛ̀ ó pèlèa ká.” O sã́, ɓii òó gbaa wééa kɛɛ mɔ́ɔ̀ wɔ̃̀ mɔ̀. Wɔ̃́ Wálà aà pɛ̀ kɛ o lɛ̀ɛ lɛ́ ɓɛ.

⁹Kɛɛ ka yee, ka mia-kù lɛ́ Wálà aà o sía ká. Ɛ́ɛ̃́ ka mia Líé-sí-mì là sálà-ɓo-mìà ká. Ka Wálà là sɛ́lɛ́ɛ yí-mìà púlú ká. Ka Wálà dìè là mia nì ká. E ka sí, kɛɛ ká à zì wɔ̃́ kɛ-zì kpàlézɛ̀ ɓɛ wɔ̃̀ gèe. À ye lɛ́ e ka súo kɛ kɛ ká gó bĩ́ tii bà, kɛ ká nu à dìè-tĩ́ là lɛ̀ fɔ̀nɔɔ̀ɔ kpàlézɛ̀ ɓɛ bàa.

¹⁰Lúó lɛ́ aà diea píéa, kàá gbaa kɛ Wálà là mia nì ká. Kɛɛ ka là mia nì ká gbaa. Lúó e kília káa, kàá gbaa Wálà là mia yéĩ̀ kṹũ̀ sɔ̀lɔ̀ ɓo. Kɛɛ kaà là mia yéĩ̀ kṹũ̀ sɔ̀lɔ̀ ɓo gbaa.

¹¹M̀ lɔ̀-kɛ̀á-mìà lɛ́ ka lɔ̀ɔ̀-mìà ká, lɛ́ ka pà gbɛɛ wá ɓe kpóṹ e kéa làa, ḿm̀ kpé kã ka lɛ̀ɛ, kɛɛ ká ka yí ɓo pɛ lɛ́ à kɛ-lɔ̀ è ka gbĩ-kpàlaa kɛ̀ɛ mɔ̀. Wɔ̃́ kɛ-lɔ̀ e kília óò gèlè gɔ̃ mia gɛ̀ɛ̀ lɛ́ e mia yía ká.

¹²Ka zì wɔ̃́ kɛ-kɔ̀ lɛ́ kà wɔ̃́ kɛ̀á mia lɛ́ òó Wálà dɔɔ bàa, lɛ à mɔ̀ é kɛ kpeĩ. Yé aà kɛ kíli lɛ́ waà à gèe ka wɔ̃́ yɔɔ kɛ-mìà káa, lɛ́ɛ̀ lo kɛɛ̀ o mɔ̀ kɛɛ ó ka kɛ-wɔ̃̀ yièa míní sí, ɛ̃́ɛ̃́ óò lo Wálà tɔ́ ɓɔɔ̀ à zì nu-lùò ká nɔ́ kíli.

¹³Kà ka dìè kɛ yíkɛ̀ gáàa nɔ́ɔ fé lɛ́ lɛ mi kɛ̀lɛ̀ɛ wì ko Dàa-mì mɔ́ɔ̀ wɔ̃̀ mɔ̀. Kà kɛ sɛ́lɛ́ séĩ́ Líé-sí-mì lɛ́ lɛ pɛ séĩ́ làa wì.

¹⁴Ɛ́ɛ̃́ kà kɛ zeĩ́ mia wũ-là-mìàa wì. Sɛ́lɛ́ séĩ́ Líé-sí-mì aà o vɔ kɛ ó wɔ̃́ yɔɔ kɛ-mìà kṹ gágà, ɛ̃́ɛ̃́ kɛ ó wɔ̃́ yiè kɛ-mìà tɔ́ li.

¹⁵Ƃii wɔ̃́ lɛ́ Wálà à nàà à káa, gɛ̃̀ e ké. Láà nàà kɛ ká kɛ mia yí gíniìa zɛ̀, lɛ́ òó wɔ̃́ gbɛɛ yí dɔ, lɛ́ ò wéé yee ɓoa, ó o lɛ̀à ga wɔ̃́ yiè lɛ́ kà kɛ̀ɛ kolo là zàá.

¹⁶Kà kɛ ɓe lɛ̀ mia lɛ́ o wá lùò káa lɛ́ ɓe. Kɛɛ yékɛ̀ ká kɛ ka zì kɛ́ kàá ɓo lùò káa é sɔ̃̀ɔ̃ yɔɔ là bĩ̀ĩ̀. Kɛɛ kà kɛ ɓe Wálà là lùò ká.

¹⁷Kà ɓɛ̀lɛyà nɔ mia séĩ́ lɛ̀ɛ. Ka lèe-gé vɔ̀ lɔ̀ è kpɔ́ ka mɔ̀. Kà túó Wálà lɛ̀ɛ. Kà ɓɛ̀lɛyà nɔ sɛ́lɛ́ séĩ́ Líé-sí-mì lɛ̀ɛ.

¹⁸Míá ka yɛɓo-kɛ̀-mi-mɔ̀ mìà káa, kà ka dìè kɛ ka dàa-mìà wì. Kà ɓɛ̀lɛyà kpó-kpó nɔ o lɛ̀ɛ. Yékɛ̀ ká ɓɛ̀lɛyà nɔ mia lɛ́ o sɔ̃̀ɔ̃ lɛ sɛ̀, ɛ̃́ɛ̃́ lɛ́ o kpóló-kpɔ̀-mɔ̀ zɛ̀ɛ doó lɛ̀ɛ. Kɛɛ kà nɔ mia yé lɛ́ o gana zɛ̀ɛ lɛ̀ɛ nɔ́ kíli.

¹⁹Ká wàa lɛ́ ye wá ka mɔ̀ ká ɓèlèa ɓèlèáa, yé kaà ka zò kṹ tã́ã̀ wàa e kília ɓèleè yí, ɓii Wálà wɔ̃̀ lɛ ka zò píéa mɔ́ɔ̀ wɔ̃̀ mɔ̀ɔ, Wálà lɛ́ɛ̀ lo lúà kpɔ́ɔ̀ ka mɔ̀ à mɔ́ɔ̀ wɔ̃̀ mɔ̀.

²⁰Yé kaà wɔ̃́ yɔɔ kɛ, lɛ́ waà ka mɛ̀ à wɛ̃́ĩ̀a, wɔ̃́ yiè kpɛɛ̀ lɛ́ e à yí yé kaà ka zò kṹ tã́ã̀ lɛ́ waà kɛ ka mɛ̀pìà à wɛ̃́ĩ̀a ká? Kɛɛ yé kaà wɔ̃́ yiè kɛ, lɛ́ kaà wàa ɓèlè à wɛ̃́ĩ̀a, yé kaà ka zò kṹ tã́ã̀ wàa e kília ɓèleè yía, Wálà lɛ́ɛ̀ lo lúà kpɔ́ɔ̀ ka mɔ̀ à mɔ́ɔ̀ wɔ̃̀ mɔ̀.

²¹Wálà e ka súo kɛ wɔ̃́ nì e kéa kɛɛ̀ wɛ̃́ĩ̀. Ƃii Kɛ́lɛ̀ì dìè e wàa ɓèlè ka mɔ́ɔ̀ wɔ̃̀ mɔ̀, lɛ́ e ka tó wɔ̃́ gɔ̃̀á ká, kɛɛ ká tó à kpáá yía.

²²Lɛ̀ɛ́ gbaa wɔ̃́ yɔɔ nɔ́ɔ fé dò kɛ. Mi gbɛɛ lɛ̀ɛ́ gbaa nɛ̀-wɔ̃̀ ma kɛ é gó à lé.

²³Lɛ̀ lɛ́ mia o o wè sí à mɔ̀ɔ, lɛ̀ɛ́ gbaa à dɛ̀í dà wè sì o mɔ̀ ká. Lɛ̀ e wàa ɓèlèa, lɛ̀ɛ́ gbaa mi gbɛɛ gã̀ naa à ɓèleè yí. Kɛɛ e e zò kɛ Wálà lɛ́ è mɛ̀ĩ́-sà ɓo kpeĩ lea mɔ̀.

²⁴Ko zì kɛ-wɔ̃̀ yɔɔ kpɔ́ɔ̀ e kɛá Kɛ́lɛ̀ì gbĩ-kpàla mɔ̀, ɛ̃́ɛ̃́ à dìè e ló à ká kɔ́lɔ́sì mɔ̀, kɛɛ kó ga kɛ-wɔ̃̀ yɔɔ mɔ̀, kɛ kó kɛ ɓe wɔ̃́ kpeĩ kɛɛ̀ yí. À zì gĩ̀ĩ a ɓoa kolo làa, ka laà lɛ.

²⁵Ka kɛ kélɛ̀ ɓáá vɔ̀ lɛ́ waà zi nia lɛ́ ɓe. Kɛɛ dɛɛ káa, ka nuù lɛ ka mɛ̀ĩ́ mi lɛ́ è e nyìɛ kɛ̀, ɛ̃́ɛ̃́ lɛ́ è e yɛ́lɛ́ yiè kɛ̀ ka gɛ̀ɛ̀ mɔ̀ɔ píé.