Read Yamano 1 Pílɛ̀ 3 Bible Online

1 Pílɛ̀ 3 - Yamano bible

1 Pílɛ̀ 3

¹Zi nɔ́ doóa káa, loà lɛ́ ka mia na nì ká ɓɛ, lɛ ka mɔ̀ ká kɛ ka dɛ̃ nì wì. Kà à kɛ kíli, kɛɛ é kɛ̀á o dò òó Wálà lé-wè gɛ̃̀ wánà káa, kɛɛ ka zì wɔ̃́ kɛ-kɔ̀ á kɛ kɛɛ ó à mɔ́ɔ̀ wɔ̃̀ gɛ̃̀ wánà ká. Ye wá bɛ̃̀ɛ̃ ka mɔ̀ kɛɛ ká wɔ̃́ nɔ́ɔ fé dò gèe,

²ɓii óò lo zi lɛ́ ka zì kɛ-kɔ̀ lɛ à ká kpeĩ, ɛ̃́ɛ̃́ zi lɛ́ kà tùòá Wálà lɛ̀ɛ gɛ̃̀ɛ̃̀.

³Yékɛ̀ ka zì li-kɔ̀ é kɛ pɔɔ̀ lɛ́ lɛ mia gbĩ mɔ̀ɔ ká. Ye lɛ́ e kélɛ̀, zí kà kà wũ bɛ̀i à ká, e bɛ̀i, ka mɛ́-sí-pɔ̀ɔ̀ lɛ́ e góò káa, wà ka dĩ́-sɔ̀ káa.

⁴Kɛɛ ka zì li-kɔ̀ è kɛ zi lɛ́ kaa ká ka zò píéa ká. È kɛ mɛ́-sí-pɔ̀ɔ̀ lɛ́ lɛ̀ɛ́ sìèa ká. Ye lɛ́ e kélɛ̀, zò-dɔ́ɔ́lɔ́-là wà kpóló-kpɔ̀-mɔ̀ɔ. Wɔ̃́ nì e kéa lɛ dóo kpànazɛ̀ Wálà wɛlɛ mɔ̀.

⁵Ƃii loà lɛ́ o kɛ mɔ́ ɓe, lɛ́ o o dìè nɔ Wálà lɛ̀ɛ, ɛ̃́ɛ̃́ lɛ́ o zò kɛɛ̀ e kɛá Wálà mɔ̀ɔ, o kɛ o mɛ́ sípìà, o dìè kɛ́ o kɛ à ɓopìà o dɛ̃ nì wìa kolo là.

⁶Sɛ́wàlà e wɔ̃́ nɔ́ doóa kɛ. E wɔ̃́ ma Éɓɔ́lɔ́hã́ã̀ wè là, áà sì e dàa-mì. Ka gbaa à lú nì ká, yé kaà wɔ̃́ yiè kɛ, lɛ́ kàá túó pɛ nɔ́ɔ fé lɛ̀ɛ ká.

⁷Lee-sí-gɔ̃̀à ka bɛ̃̀ɛ̃, lɛ̀ kà ka na nì ka tĩã́ ka kíe píéa, lɛ ka mɔ̀ ká à yí dɔ kélɛ̀ ka mɛ́ lɛ gágà é diá o là. À mɔ́ɔ̀ wɔ̃̀ mɔ̀ɔ, kà ɓɛ̀lɛyà nɔ o lɛ̀ɛ, ɓii kà ye nì káà lo Wálà zì nɔ̀-lɛ̀ɛ-pɛ̀ lɛ́ e kɛ̀ɓe káa, sɔ̀lɔ̀ ɓoò e kíe ká. Kà wɔ̃́ e kéa kɛ, yékɛ̀ wɔ̃́ nɔ́ɔ fé é kà sɛ̀nɛ kà ɓoa tèá.

⁸M̀ wéé líé-nyɛ-mɔ̀ lɛ́ e kélɛ̀, ka séĩ́ ka zì yɛ́lɛ́-táá è kɛ doó. Ka kíe nì yéĩ́ è ka kɛ. Ka kíe nì lɔ̀ è kpɔ́ ka mɔ̀, lɛ̀ zí lèe-gé vɔ̀ lɔ̀ è kpɔá o kíe nì mɔ̀ɔ lɛ́ ɓe. Ka sɔ̃̀ɔ̃ è kɛ sɛ̀, káà ka dìè sì péĩ́.

⁹Yékɛ̀ ká wɔ̃́ yɔɔ dɛ̀í dà wɔ̃́ yɔɔ ká. Yékɛ̀ ká lé-kã́ dɛ̀í dà lé-kã́ ká. Kɛɛ yé mi dò aà lé-kã́ kɛ ka mɔ̀ɔ, kà à dɛ̀í dà lúà kpɔ̀ à mɔ̀ ká. Ƃii pɛ lɛ́ Wálà a mɔ́ɔ̀ ka súo kɛ kɛ ká sɔ̀lɔ̀ ɓoa, lɛ́ e lúà káa.

¹⁰Ƃii, “Mi lɛ́ à nàà à zò é dà e zì kɛ̀ɓe là, ɛ̃́ɛ̃́ lɛ́ à nàà é lúó yiè sɔ̀lɔ̀ ɓoa, laa mɔ̀ é e yí ɓo wɔ̃́ yɔɔ gèeè mɔ̀, ɛ̃́ɛ̃́ yékɛ̀ é nɛ̀ kɛ.

¹¹È e ko gbɛ̃̀ wɔ̃́ yɔɔ kɛɛ̀ mɔ̀, áà wɔ̃́ yiè kɛ̀. È zò-yà-gé naa, é à píé lúó.

¹²Ƃii ko Dàa-mì nyìɛ lɛ mia kpeĩ mɔ̀, ɛ̃́ɛ̃́ à tóó lé ɓoò lɛ sɛ̀nɛ lɛ́ ò ɓoa áà mà. Kɛɛ ko Dàa-mì lɛ́ɛ̀ e ko gbɛ̃̀ mia lɛ́ ò wɔ̃́ yɔɔ kɛ̀ɛ mɔ̀.”

¹³Dé è lo wàa kpɔ́ɔ̀ ka mɔ̀, yé ka fã̀ã́-wàà lɛ wɔ̃́ yiè kɛɛ̀ mɔ̀ɔ ká?

¹⁴Ɛ́ɛ̃́ ká wàa ɓèlèá bɛ̃̀ɛ̃ wɔ̃́ kpeĩ lɛ́ ka kɛɛ wɛ̃́ĩ̀a, zò géli lɛ ka kɛ̀lɛ̀. Yékɛ̀ ká túó mia lɛ̀ɛ, ɛ̃́ɛ̃́ yékɛ̀ ká ka zò gɔ̃́.

¹⁵Kɛɛ kà gbini Kɛ́lɛ̀ì lɛ̀ɛ ka zò píé, ká à kɛ ka Dàa-mì ká. Ka dìè pɛ̀ kɛɛ̀ è kɛ̀á lúó séĩ́ ká, kɛɛ ká mi nɔ́ɔ fé lɛ́ è lo ka wɛ̃́ĩ́-lɔ̀ɔ kɛɛ̀ zò-kɛ̀-pɛ-mɔ̀ lɛ́ e ka yía mɔ́ɔ̀ wɔ̃̀ káa, kɛ ká wéè yí zṹ.

¹⁶Kɛɛ kà kɛ kpóló-kpɔ̀-mɔ̀ wà ɓɛ̀lɛyà ká. Ka zò è kɛ sɛ̀ teele, kɛɛ yé mia waà lé-kã́ kɛ ka mɔ̀ɔ, kɛ yɛ́lɛ̀ é kpɔ́ mia lɛ́ ò wɔ̃́ yɔɔ gèe ka zì wɔ̃́ kɛ-kɔ̀ yiè lɛ́ kà kɛ̀ Kɛ́lɛ̀ì yía mɔ̀ɔ là.

¹⁷Ƃii lɛ sɛ̀ kɛ ká wàa ɓèlè wɔ̃́ yiè kɛɛ̀ wɛ̃́ĩ̀, é kɛ̀á Wálà wèèà-mɔ̀-wɔ̃̀ káa ká, é diá wàa ɓèlè wɔ̃́ yɔɔ kɛɛ̀ mɔ́ɔ̀ wɔ̃̀ mɔ̀ là.

¹⁸Ƃii Kɛ́lɛ̀ì dìè e ga ko mɔ́ɔ̀ wɔ̃̀ mɔ̀. E ga nɔ́ doó kɛ-wɔ̃̀ yɔɔ wɛ̃́ĩ̀. Gɔ̃ kpeĩ e kília, e ga mia lɛ́ o wá kpeĩa wɛ̃́ĩ̀, kɛɛ é nu ko ká Wálà píé. O à gbĩ-kpàla zɛ, kɛɛ à kɛɛ̀ e kɛá ɓe gɛ̀ɛ̀ yí zàá.

¹⁹Ɛ́ɛ̃́ à zì kɛ́ a ɓo ɓe gɛ̀ɛ̀ yí zàáa, e ló, áà Wálà lé-wè gèè gɛ̀ɛ̀ vɔ̀ lɛ́ o kɛ bĩ́-kɛ̀ìa lɛ̀ɛ.

²⁰Gɛ̀ɛ̀ vɔ̀ o kília, o lɛ́ o kɛ mia lɛ́ o Wálà wéè tó mɔ́ɔ gɛ̀ɛ̀ káa. O Wálà wéè tó lɛ̀ lɛ́ Wálà e kɛ yàá o gɛ̀nɛ̀ zò-kũ̀-tã́ã̀ ká lúó lɛ́ Nóà e kɛ gɔ́ɔ́ɔ kɛpìà káa ká. Mia wɛ́lɛ́ ɓéĩ́, lɛ́ o kɛ mia sálàka ká gɔ́ɔ́ɔ yía, o laà e kɛá yíía kolo là.

²¹Yíí e kília lɛ mia bàtáì kɛɛ̀ lɛ́ è ka la gbaa gɔ̃̀á ká. Ye wá mia lilì ɓò-mia-mɔ̀ pɛ̀ ká. Kɛɛ lɛ ka wè lɛ́ kà dɔ zò púlú ká Wálà lɛ̀ɛ ká. Lɛ́ɛ̀ ka la Zízɛ̀ Kɛ́lɛ̀ì zì wɛ̀lɛ̀-ga-kɛ̀lɛ̀ kolo là zàá.

²²À lóò lɛ lɛ̀í, ɛ̃́ɛ̃́ lɛ Wálà kɔ̀ yiè yí zàá. Lɛ yí Wálà là vɔ-mìà séĩ́, e bɛ̀i mia wũ-là-mìà ɛ̃́ɛ̃́ yíkɛ̀ gáàa nì séĩ́ là.