Read Yamano 1 Pílɛ̀ 4 Bible Online

1 Pílɛ̀ 4 - Yamano bible

1 Pílɛ̀ 4

¹Lɛ̀ lɛ́ Kɛ́lɛ̀ì e wàa ɓèlè mɔṹ e gbĩ-kpàla yía, lɛ ka bɛ̃̀ɛ̃ ka mɔ̀ ká ka dìè mɛ́ kɛ gágà yɛ́lɛ́-táá-kɔ̀ doóa kolo là. Ƃii mi lɛ́ è wàa ɓèlè e gbĩ-kpàla yía, yé aà kɛ kília, kɛɛ à lé wá gbaa kɛ-wɔ̃̀ yɔɔ kɛ-wɔ̃̀ yí.

²Yé lɛ kília, é kã́ pɛ́nɛɛ mɔ̀ é ló líéa, lɛ à mɔ̀ wɔ̃́ lɛ́ Wálà à nàà à káa é líé sí ka zì kɛ̀ɓe lɛ́ ka à ká tã́ã̀ zèea ká. Kɛɛ yékɛ̀ wɔ̃́ kɛ-lɔ̀ lɛ́ è mia ɓéèe kɛ̀ɛ é líé sí à ká.

³Kaà lúó káá tã́ã̀ gbùò lúó lɛ́ aà diea píé wɔ̃́ lɛ́ míá òó Wálà dɔɔ, ò nàà ó kɛɛ kɛɛ̀ ká. Ka kɛ ɓe nɛ́ĩ̀ wà mànaà zɛɛ̀ yí. Ka wɔ̃́ lɛ́ à kɛ-lɔ̀ e kɛ ka kɛpìàa kɛ. Ka kɛ yɔ mi-mìà ká, tó káà kpílì kɛ̀, tó káà yɔ-mi-gbũ̀ã̀ kɛ̀. Ka kɛ wɔ̃́ yɔɔ yé lɛ́ e kélɛ̀ gbìnì-kɛ̀ɛ̀-wɛ́lɛ́ lɛ̀ɛ kɛ-mìà ká.

⁴Dɛɛ káa, mia lɛ́ òó Wálà dɔɔ, o lé paà lɛ yé waà ka gɛ̃̀ tó kàá dà gbaa o bà yé waà kɛ wɔ̃́ yɛ́lɛ̀ yɛ́lɛ̀ zɛ̀ e kéa kɛpìàa ká. Yé aà kɛ kília, tó wáà wɔ̃́ yɔɔ gèè ka gbĩ mɔ̀ gbaa.

⁵Kɛɛ óò lo mɛ́ĩ́ ɓoò o dìè wũ mɔ̀ wɔ̃̀ gèeè o dìè lɛ̀ɛ Wálà lɛ́ à pɛ̀ kɛɛ̀ lɛ kɛ é mɛ̀ĩ́-sà dɔ mia lɛ́ o ɓéèea, wà o yé o gaà lɛɛ mɔ̀ɔ wɛlɛ mɔ̀.

⁶Pɛ́ à kɛ̀ lɛ́ wɔ̃́ làṹ yièa gèeè e kɛá mia yé waà gaa o bɛ̃̀ɛ̃ o lɛ̀ɛ lɛ́ ɓɛ. O lɛ́ o mia lɛ́ mɛ̀ĩ́-sà dɔɔ̀ e kɛá o mɔ̀ o gbĩ-kpàla yí, lɛ̀ zí à kɛɛ̀ lɛ à ká mia séĩ́ káa lɛ́ ɓea. À gèeè e kɛá ko lɛ̀ɛ kɛɛ o zì kɛ̀ɓe gɛ̀ɛ̀ yí zàáa, ó kɛ ɓe lɛ̀ Wálà lɛ́ ɓe.

⁷Pɛ séĩ́ líé-nyɛ-lùò aà tó kɔ̀ɛ́. Laa mɔ̀ ká kɛ dìè-kũ̀-tã́ã̀ zɛ̀, ɛ̃́ɛ̃́ ká yà ka nyìɛ́, kɛ bɛ̀i é kɛ ka mɔ̀ káà sɛ̀nɛ ɓò.

⁸Wɔ̃́ kpànazɛ̀ kpó-kpó e ɓea lɛ́ e kélɛ̀, ka kíe nì lɔ̀ è kpɔ́ ka mɔ̀ kpó-kpó ɓo, ɓii lɔ̀-kɛ̀à-mɔ̀ lɛ́ɛ̀ kɛ-wɔ̃̀ yɔɔ búnùzɛ̀ kɔ̀ là yɛ.

⁹Kà wɔ̀lɔ̀ nɔ̀ ka kíe nì lɛ̀ɛ mɛ́ dã́. Yékɛ̀ ká ka wè kpɔ́ à kɛɛ̀ yí.

¹⁰Kà kɛ yɛɓo-kɛ̀-pɛ-ká-mìà yiè ká, kɛɛ ká yɛɓo kɛ nɔ̀-lɛ̀ɛ-pɛ̀ doò do lɛ́ Wálà aà nɔ ka lɛ̀ɛ ka tɔ̀ là doó doóa ká. Lɛ à mɔ̀ ká yɛɓo kɛ o ká, kɛ é gbũ mia gbɛɛ mɔ̀.

¹¹Mi nɔ́ɔ fé lɛ́ è wɔ̃́ gèea, wɔ̃́ à gèea lɛ à mɔ̀ é kɛ Wálà lé-wè ká. Mi nɔ́ɔ fé lɛ́ è yɛɓo kɛ̀ mia lɛ̀ɛ, lɛ à mɔ̀ á kɛ yíkɛ̀ gáàa lɛ́ Wálà a nɔ à lɛ̀ɛ ká, kɛɛ wɔ̃́ séĩ́ kɛɛ̀ yía, tɔ́-ɓɔ nɔɔ̀ é kɛá Wálà lɛ̀ɛ Zízɛ̀ Kɛ́lɛ̀ì lɛ́ lɛ̀-fɔ̀nɔɔ̀ɔ wà yíkɛ̀ gáàa lɛ là pɛ ká tòá kíli wɔ́lɔ́-wɔ́lɔ́ káa, kolo là zàá. É kɛ kíli.

¹²M̀ lɔ̀-kɛ̀á-mìà, yékɛ̀ ka lé é pa yí-dã́-wɔ̃̀ tíé zɛ̀ lɛ́ lɛ ɓɔpìà ka mɔ̀ɔ mɔ́ɔ̀ wɔ̃̀ mɔ̀, lɛ̀ pɛ lɛ́ lɛ wɔ̃́ dɛɛ lɛ́ lɛ kɛpìà ka káa ká.

¹³Kɛɛ ka gé è li kélɛ̀ kà Kɛ́lɛ̀ì nì ka dɔpìà à zì wɔ̃́ nyɔ́ɔ̀ɔ yí, kɛɛ ka gé é li kpó-kpó ɓo yé lɛ́ɛ́ aà ɓo à zì lɛ̀-fɔ̀nɔ-kɔ̀ làa ká.

¹⁴Yé mia waà mɛ́ĩ́ yɔɔ ɓo ka gbĩ mɔ̀ ka kɛ̀ Kɛ́lɛ̀ì là mia nì káa mɔ́ɔ̀ wɔ̃̀ mɔ̀ɔ, zò géli lɛ ka kɛ̀lɛ̀. Ƃii láà zɔ̃̀ɔ̃̀ kélɛ̀ Wálà zì Gɛ̀ɛ̀ lɛ́ e lɛ̀ fɔ̀nɔɔ̀ɔ bàa, à yàà lɛ ka là.

¹⁵Kɛɛ yékɛ̀ ka dò nɔ́ɔ fé é kɛ wàa lɛ́ mi zɛ-mì, ɛ̃́ɛ̃́ kã̀ã-mì, e bɛ̀i wɔ̃́ yɔɔ kɛ-mì, ɛ̃́ɛ̃́ mí à lé lɛ̀ɛ́ yà tã́ã̀a, ò à ɓèlèa ɓèlè-mì ká.

¹⁶Kɛɛ ká wàa ɓèlèá ka kɛ̀ Kɛ́lɛ̀ì là mia nì káa wɛ̃́ĩ̀a, yékɛ̀ yɛ́lɛ̀ é ka kɛ. Kɛɛ kà Wálà zúo ɓo Kɛ́lɛ̀ì tɔ́ kɛ̀ ka mɔ̀ wɛ̃́ĩ̀.

¹⁷Lúó lɛ́ mɛ̀ĩ́-sà ɓoò zi è lo gbɛ̃̀áa aà ɓɔ. Wálà dìè là mia nì lɛ́ è lo mɛ̀ĩ́-sà dɔɔ̀ o mɔ̀ bèĩzɛ̀ɛ. Yé aà gbɛ̃̀ ko làa, zi kpɛɛ̀ lɛ́ à líé è lo nyɛɛ̀ à ká mia lɛ́ òó wɔ̃́ làṹ yiè lɛ́ è go Wálà kɛ̀lɛ̀ɛ gɛ̃̀ wánà káa là?

¹⁸Ɛ́ɛ̃́, “Lɛ gágà kɛɛ mia kpeĩ ó la-ɓo sɔ̀lɔ̀ ɓo. Yé lɛ kília, zi sùu kpɛɛ̀ lɛ́ mia ké yee òó gbini Wálà lɛ̀ɛ, ɛ̃́ɛ̃́ o yé o kɛ-wɔ̃̀ yɔɔ kɛ-mìà káa, o zì è lo kɛɛ̀á?”

¹⁹À mɔ́ɔ̀ wɔ̃̀ mɔ̀ɔ, mia lɛ́ ò wàa ɓèlè ɓii wɔ̃́ lɛ́ Wálà à nàà é kɛ o káa lɛɛ, lɛ à mɔ̀ ó o dìè nɔ féfé le o zì Kɛ-mì lɛ́ lɛ zò-dɔ̀à-mɔ̀ zɛ̀ɛ lɛ̀ɛ, wáà wɔ̃́ kpeĩ kɛ̀.