Read Yamano 2 Pílɛ̀ 3 Bible Online

2 Pílɛ̀ 3 - Yamano bible

2 Pílɛ̀ 3

¹M̀ lɔ̀-kɛ̀á-mìà, kíí maà bɛ̃̀ɛ̃ ka píéa, pèèlɛ-mì lɛ́ e kéa. Kii pèèlɛ lɛ́ maà bɛ̃̀ɛ̃ yía, maà à kɛ-zì naa kɛ ḿ tíé kpaa ka là, kɛɛ yɛ́lɛ́-táá yiè é kɛ ka mɔ̀ ka zò lɛ́ m̀ vùò kília kolo là.

²Ḿm̀ nàà ka zò é vùò wéé lɛ́ dɔ̀-Wálà-lé-là-mìà púlúa waà gèe mɔ́ e pɛ́lɛ̀ ká, ɛ̃́ɛ̃́ wɔ̃́ lɛ́ ko Dàa-mì lɛ́ e mia La-mì káa, a gèe ka lɛ̀ɛ àpɔ́sɔ̀lɔ̀ vɔ̀ lɛ́ o kɛ ka bàa yía ká.

³Bèĩzɛ̀ɛ, kà à yí dɔ kélɛ̀ lúó léĩ́-tó-lùò káa, mia dò lɛ́ o zì wɔ̃́ kɛ-lɔ̀ è líé si o zì kɛ̀ɓe káa, óò lo kɛɛ̀ ɓe. Óò lo yéí síì ka mɔ̀,

⁴wáà gèè kélɛ̀, “Ḿ gɔ̃̀, e e wè dɔ kélɛ̀ lɛ́ɛ̀ lo nuù? Lɛ mɔṹ mɛ́? Ko dàa nì waà ga. Kɛɛ pɛ séĩ́ kɛɛ̀ lɛ nɔ́ e kɛ-zì ká, é kã́ lúó lɛ́ o kpóṹ là zèe kɛáa mɔ̀, é ɓɔá pɛ́nɛɛ mɔ̀ɔ ká.”

⁵Óò à yà o gé o nyìɛ é fɔ̃́ wɔ̃́ e kéa yí. Ye lɛ́ e kélɛ̀, Wálà e mɛ́ĩ́ ɓo mɔ́, tó lɛ̀í wà tã́ã̀ o kɛ ɓe. Kpóṹ là zèe kɛɛ̀ e kɛá yíí ká, ɛ̃́ɛ̃́ yíí kolo là zàá.

⁶Ɛ́ɛ̃́ yíí lɛ́ e kpóṹ là lɛ́ e kɛ mɔ́ zèea yí sìèa. Yíí e kília lɛ́ e kélɛ̀, yíí lɛ́ e pa mɔ́ɔ.

⁷Kɛɛ lɛ̀í wà tã́ã̀ lɛ́ o ɓe dɛɛ káa, o yàlà ɓoò lɛ Wálà lé-wè nɔ́ doóa kolo là zàá, kɛ o yí é sìè tíé ká. O yàlà ɓoò lɛ lúó lɛ́ míá òó Wálà sɔ̃̀ɔ̃ kɛɛ, ò lo mɛ̀ĩ́-sà dɔɔ̀á o mɔ̀, tó wáà o yí sìèa gɛ̀nɛ̀.

⁸Kɛɛ m̀ lɔ̀-kɛ̀á-mìà, yékɛ̀ ka zò é ni wɔ̃́ doó e kéa mɔ̀. Ye lɛ́ e kélɛ̀, lúó doó lɛ ko Dàa-mì lɛ̀ɛ kɛ̀ɛ̀ wáá doó ká. Ɛ́ɛ̃́ kɛ̀ɛ̀ wáá doó bɛ̃̀ɛ̃ lɛ nɔ́ ɓɔ̀ɔ lúó doó ká à lɛ̀ɛ.

⁹Ko Dàa-mì yí wá dɔ́lɔ́-dɔ́lɔ́ wɔ̃́ lɛ́ aà e wè dɔ à káa kɛpìà, lɛ̀ zí mia dò ò o yɛ́lɛ́ tàáa lɛ́ ɓe. Kɛɛ lɛ́ɛ̀ e zò kũ tã́ã̀ ka mɔ́ɔ̀ wɔ̃̀ mɔ̀, ɓii làá naa kɛ mi nɔ́ɔ fé yí é sìè. Láà nàà mia séĩ́ ó o sɔ̃̀ɔ̃ yɔɔ mɛ́ vɔ̀ɔ.

¹⁰Kɛɛ ko Dàa-mì zì Lúóa lɛ́ɛ̀ lo ɓɔɔ̀ lɛ̀ kã̀ã-mì lɛ́ ɓe. Lúó e kília káa, lɛ̀í lɛ́ɛ̀ lo diè e zɔ̀ɔ̀ vĩ̀ ká. Pɛ séĩ́ lɛ́ e lɛ̀ía, óò lo gélè, ɛ̃́ɛ̃́ o yí lɛ́ɛ̀ lo sìè. Ɛ́ɛ̃́ óò lo kɔ̃́ɔ̃̀ kpóṹ là zèe wà pɔɔ̀ séĩ́ lɛ́ o à yía ká.

¹¹Yé mɔṹ pɔɔ̀ e kéa séĩ́ yí è lo sìè zi sùua káa, ka kpàáà yí lɛ́ɛ̀ bɛ̀i à mɔ̀ é kɛ kpɛ? Lɛ à mɔ̀ ka zì kɛ̀ɓe é kɛ púlú, ɛ̃́ɛ̃́ à nɔɔ̀ é kɛá Wálà lɛ̀ɛ,

¹²lɛ̀ lɛ́ ka yàá Wálà zì Lúó gɛ̀nɛ̀, tó káà kɛ-zì nàà é nu pɛ́lɛ̀ɛ ká. Lúó e kília lɛ́ lɛ̀í è lo gélè, tó à yí áà sìèa. Ɛ́ɛ̃́ pɔɔ̀ séĩ́ lɛ́ e lɛ̀ía lɛ́ɛ̀ lo sèŋeè tíé lɛ́ è lo dɔɔ̀ lɛ̀ía ká.

¹³Kɛɛ ko bɛ̃̀ɛ̃, ko yàà lɛ pɛ lɛ́ Wálà aà e wè dɔ à káa gɛ̀nɛ̀. Ye lɛ́ e lɛ̀í dɛɛ wà tã́ã̀ zèe dɛɛ, lɛ́ kɛ̀-kpeĩ-kɔ̀ è lo e yàlà kṹũ̀ yia káa.

¹⁴À mɔ́ɔ̀ wɔ̃̀ mɔ̀ɔ, m̀ lɔ̀-kɛ̀á-mìà, lɛ̀ lɛ́ ka tĩã́ yàá Lúó e kília gɛ̀nɛ̀ɛ, kà à kɛ-zì kpó-kpó naa yékɛ̀ pɛ píé ɛ̃́ɛ̃́ kɛɛ nɔ́ɔ fé dò é kɛ ka mɔ̀ Wálà wɛlɛ mɔ̀, ɛ̃́ɛ̃́ kɛɛ zò-yà-gé é kɛ kà ye nì ka fĩ̀ã̀.

¹⁵Kà ko Dàa-mì zì zò-kũ̀-tã́ã̀a sí é kɛ lúó lɛ́ a nɔ ka lɛ̀ɛ kɛɛ ká la-ɓo sɔ̀lɔ̀ ɓo à káa ká, lɛ̀ zí ko lèe-gé Pɔ́ɔ̀ lɛ́ à lɔ̀ kpɔ́ɔ̀ lɛ ko mɔ̀ɔ, e à bɛ̃̀ɛ̃ à ká ka píé gíkã́ lɛ́ Wálà a nɔ à lɛ̀ɛ káa lɛ́ ɓe.

¹⁶Wɔ̃́ lɛ́ a gèe là kii lɛ́ a bɛ̃̀ɛ̃ séĩ́ yí lɛ̀ e kii bɛ̃̀ɛ̃ wɔ̃́ e kéa mɔ̀ɔ lɛ́ ɓɛ. Wɔ̃́ yí-maà-gágà zɛ̀ dò lɛ là kíía yí, ɛ̃́ɛ̃́ mia yé òó wɔ̃́ nɔ́ɔ fé yí dɔɔ, wà o yé o dɔɔ̀ wá o dɔ̀lɔ̀ doó mɔ̀ɔ, óò o yí ɓo nɛ̀ ká lɛ̀ zí ò kɛ̀á Wálà kiia yé e tóa káa lɛ́ ɓe. Zí e kéa káa, óò nu o dìè yí-sìè-wɔ̃̀ ká o dìè mɔ̀.

¹⁷Kɛɛ míá ka m̀ lɔ̀-kɛ̀á-mìà káa, káà wɔ̃́ e kéa yí dɔ gbaa. À mɔ́ɔ̀ wɔ̃̀ mɔ̀ɔ, kà ka yɛ́lɛ́ kɛ ka dìè píé, yékɛ̀ lɔ́ɔ̀ sìè-mìà zì wɔ̃́ niìa á kɛ ká gó zi lèe mɔ̀, áà kɛ̀ káà gò ka dɔ̀lɔ̀ yièa mɔ̀.

¹⁸Kɛɛ kà lo líé, káà fàà ko Dàa-mì lɛ́ e ko La-mì Zízɛ̀ Kɛ́lɛ̀ì káa, zì zò-kɛ̀-sɛ̀, ɛ̃́ɛ̃́ à zì dɔ́ kà ɓoa yí zàá. Tɔ́-ɓɔ è kɛ à kɛ̀lɛ̀ dɛɛ ká, ɛ̃́ɛ̃́ tòá kíli ká. É kɛ kíli.