Read Yamano 1 Zɔ̃̀ɔ̃́ 1 Bible Online

1 Zɔ̃̀ɔ̃́ 1 - Yamano bible

1 Zɔ̃̀ɔ̃́ 1

¹Kóò Wéé lɛ́ à gbɛ̃̀ɛ̃̀ lɛ kɛ̀ɓe mɔ̀ɔ wɔ̃̀ bɛ̃̀ɛ̃ ka píé. Aà kɛ ɓe mɔ́ pɛ́lɛ̀ wɔ̃́ séĩ́ gã̀-gbɛ̃̀pìà. Kɔaà à ma, ɛ̃́ɛ̃́ kɔaà à gɛ̃̀ ko nyìɛ ká. Kɔaà ko nyìɛ dɔ à mɔ̀, ɛ̃́ɛ̃́ kɔaà ko kɔ̀ pá à mɔ̀.

²Lɛ̀ lɛ́ kɛ̀ɓe e kéa e kɛ pɛ́ ò gɛ̃̀ɛ káa, kɔa gɛ̃̀. À mɔ́ɔ̀ wɔ̃̀ mɔ̀ɔ, kóò là kélá-wè ɓo, ɛ̃́ɛ̃́ tó kɔ́áà wɔ̃́ gèè ka lɛ̀ɛ áà gbɛ̃̀á kɛ̀ɓe wɔ́lɔ́-wɔ́lɔ́ lɛ́ e kɛ lɛ̀ lɛ́ ko Dàa lɛ yía mɔ̀, ɛ̃́ɛ̃́ lɛ́ à wɔ̃̀ kɛɛ̀ e kɛá e yí púlú zɛ̀ ká ko lɛ̀ɛ mɔ̀.

³Wɔ̃́ lɛ́ kɔaà gɛ̃̀ ɛ̃́ɛ̃́ lɛ́ kɔaà maa, lɛ́ kò à gèe ka bɛ̃̀ɛ̃ ka lɛ̀ɛ, kɛɛ kɔ̀à ɓi nì kɔ́á dà kɔa kíe bà, kɔ́áà tàà-kíe-píé kɛ̀ɛ. Tàà-kíe-píé lɛ́ kò kɛ̀ɛ, ye lɛ́ e tàà-kíe-píé lɛ́ ko Dàa wà e Gbe Zízɛ̀ Kɛ́lɛ̀ì kò ye nì kò kɛ̀ɛ káa.

⁴Kóò wɔ̃́ e kéa bɛ̃̀ɛ̃ kɛɛ ko zì géli lé é pa.

⁵Kɛɛ wɔ̃́ làṹ lɛ́ kɔaà ma áà gò à píé, ɛ̃́ɛ̃́ tó kɔ́áà à gèè ka lɛ̀ɛ gɛ̃̀ e ké. Wálà lɛ lɛ̀ púlú ká. Ɛ́ɛ̃́ bĩ́ gbɛɛ míì wá à bà.

⁶Yé mɔṹ kò gèe kò ye nì kóò tàà-kíe-píé kɛ̀, tó ko nɔ́ tàà bĩ́ tii bà mɔ̀ɔ, kɛɛ wɔ̃́ kò gèea lɛ nɛ̀ ká, ɛ̃́ɛ̃́ wɔ̃́ lɛ́ kò kɛ̀ɛ, wánà gbɛɛ wá à yí.

⁷Kɛɛ yé kɔaà kɛ ɓe lɛ̀ púlú bà, lɛ̀ zí à dìè bɛ̃̀ɛ̃ lɛ à ká lɛ̀ púlú bàa lɛ́ ɓea, kɛɛ kɔ́áà tàà-kíe-píé kɛ̀, ɛ̃́ɛ̃́ à Gbe Zízɛ̀ léà lɛ́ɛ̀ ko mɛ́ pɛ̀lɛ̀, tó ko zì kɛ-wɔ̃̀ yɔɔ séĩ́ áà ɓò ko mɔ̀.

⁸Yé kɔaà gèe kɛ-wɔ̃̀ yɔɔ gbɛɛ wá ko mɔ̀ɔ, kɛɛ ko ko dìè bèkɛ̀ ɓopìà, ɛ̃́ɛ̃́ wánà-wɔ̃̀ gbɛɛ wá ko yí.

⁹Kɛɛ yé kɔaà wéé ko zì kɛ-wɔ̃̀ yɔɔ mɔ̀ Wálà wɛlɛ mɔ̀ɔ, kɛɛ lɛ mɔṹ zò-dɔ̀à-mɔ̀ zɛ̀ ɛ̃́ɛ̃́ kpeĩ. Lɛ́ɛ̀ lo ko zì kɛ-wɔ̃̀ yɔɔ ɓoò ko wũ mɔ̀, ɛ̃́ɛ̃́ tó e ko mɛ́ pɛ́lɛ́, tó pɛ yɔɔ séĩ́ lɛ́ e ko mɔ̀ɔ, e ɓo ko mɔ̀.

¹⁰Kó gèeá kélɛ̀, kòó kɛ-wɔ̃̀ yɔɔ kɛ doa, kɛɛ ko Wálà kɛpìà nɛ̀-mì ká, ɛ̃́ɛ̃́ à zì wéè wá ko yí.