Read Yamano 1 Zɔ̃̀ɔ̃́ 2 Bible Online

1 Zɔ̃̀ɔ̃́ 2 - Yamano bible

1 Zɔ̃̀ɔ̃́ 2

¹M̀ nɔ́ɔ̀ɓé, ḿm̀ wɔ̃́ e kéa bɛ̃̀ɛ̃ ka píé, kɛɛ yékɛ̀ ká kɛ-wɔ̃̀ yɔɔ kɛ. Kɛɛ yé mi dò aà kɛ-wɔ̃̀ yɔɔ kɛɛ, Zízɛ̀ Kɛ́lɛ̀ì lɛ́ lɛ kpeĩa lɛ ɓe ko lɛ̀ɛ. Lɛ́ɛ̀ mɛ́ĩ́ ɓo mia Dàa lɛ̀ɛ ko wɛ̃́ĩ̀.

²Ɛ́ɛ̃́ Kɛ́lɛ̀ì dìè kolo là lɛ́ ko zì kɛ-wɔ̃̀ yɔɔ è ɓo ko wũ mɔ̀ɔ. Ye wá kò kɛ-wɔ̃̀ yɔɔ doó ká, kɛɛ kpóṹ-là-mìà séĩ́ zì kɛ-wɔ̃̀ yɔɔ lɛ nɔ́ kíli.

³Yé kɔaà wɔ̃́ lɛ́ Wálà à gèe ko lɛ̀ɛ kɛɛ, kóò à yí kpó-kpó dɔ kélɛ̀ kóò à dɔ.

⁴Yé mi dò aà gèe kélɛ̀ láà dɔ, tó lɛ̀ɛ́ wɔ̃́ lɛ́ à gèea kɛɛ, mi sùua lɛ nɛ̀-kɛ-mì ká. Wánà-wɔ̃̀ gbɛɛ wá à yí.

⁵Kɛɛ mi lɛ́ è lo à wéè kɛɛ̀ɛ, lɛ́ e mi lɛ́ Wálà zì lɔ̀ kpɔ́ɔ̀ lɛ́ lɛ à mɔ̀ɔ kɛɛ̀ lɛ dóo kpeĩa káa. Pɛ́ à kɛ̀ kɔ́áà yí kpó-kpó dɔ̀ kélɛ̀ ko ɓe Wálà yía, ye lɛ́ e kélɛ̀,

⁶mi lɛ́ à gèe kélɛ̀ lɛ ɓe Wálà yía, lɛ à mɔ̀ é kɛ ɓe lɛ̀ zí Zízɛ̀ Kɛ́lɛ̀ì e kɛá ɓea lɛ́ ɓe.

⁷M̀ lɔ̀-kɛ̀á-mìà, lɔ́ɔ̀ lɛ́ m̀ bɛ̃̀ɛ̃ ka píé e kéa, ye wá wɔ̃́ dɛɛ ká. Lɛ lɔ́ɔ̀ zii lɛ́ aà kɛ mɔ́ ka kɛ̀lɛ̀ bèĩzɛ̀ɛ ká. Lɔ́ɔ̀ zii e kília lɛ́ e wéé lɛ́ kaà à maa káa.

⁸É kɛ bɛ̃̀ɛ̃ kília, lɔ́ɔ̀ lɛ́ m̀ bɛ̃̀ɛ̃ ka píéa lɛ dɛɛ. À zì kɛ̀ wánà zɛ̀ zɔ̃̀ɔ̃ɔ̃̀ lɛ Kɛ́lɛ̀ì yí, ɛ̃́ɛ̃́ ka bɛ̃̀ɛ̃ ka yí nɔ́ kíli. Ƃii bĩ́ tii lɛ kã́pìà gbaa tã́ã̀. Ɛ́ɛ̃́ lɛ̀ fɔ̀nɔɔ̀ɔ wánà zɛ̀ ɓɛ lɛ lɛ̀ fɔ̀nɔpìà.

⁹Mi lɛ́ à gèe lɛ lɛ̀ fɔ̀nɔɔ̀ɔ bà, tó à lèe-gé lɔ̀ nyɛɛ̀ lɛ à mɔ̀ɔ, lɛ tĩã́ bĩ́ tii bà.

¹⁰Mi lɛ́ à lèe-gé lɔ̀ kpɔ́ɔ̀ lɛ à mɔ̀ɔ à yàlà kṹũ̀ lɛ lɛ̀ fɔ̀nɔɔ̀ɔ yí. À mɔ́ɔ̀ wɔ̃̀ mɔ̀ɔ, wɔ̃́ gbɛɛ wá à mɔ̀ kɛ á kɛ mi dò é pèlè.

¹¹Kɛɛ mi lɛ́ à lèe-gé lɔ̀ nyɛɛ̀ lɛ à mɔ̀ɔ lɛ bĩ́ tii bà. Lɛ́ɛ̀ tàà à bà, tó lɛ̀ɛ́ lɛ̀ è lo yía dɔ, ɓii bĩ́ tiia aà à nyìɛ kááa mɔ́ɔ̀ wɔ̃̀ mɔ̀.

¹²M̀ nɔ́ɔ̀ɓé, ḿm̀ wɔ̃́ e kéa bɛ̃̀ɛ̃ ka píé, ɓii ka zì kɛ-wɔ̃̀ yɔɔ ɓoò lɛ ka wũ mɔ̀ Kɛ́lɛ̀ì tɔ́ mɔ́ɔ̀ wɔ̃̀ mɔ̀.

¹³M dàa nì, ḿm̀ wɔ̃́ e kéa bɛ̃̀ɛ̃ ka píé, ɓii káà mi lɛ́ aà kɛ ɓe pɛ séĩ́ gã̀-gbɛ̃̀pìàa dɔɔ mɔ́ɔ̀ wɔ̃̀ mɔ̀. Ḿm̀ wɔ̃́ e kéa bɛ̃̀ɛ̃ mia dɛɛ ka píé, ɓii ka kɔ̀ aà die Kɛ-pɛ̀ Yɔɔ Kɛ-mìa làa mɔ́ɔ̀ wɔ̃̀ mɔ̀.

¹⁴M̀ nɔ́ɔ̀ɓé, ḿm̀ wɔ̃́ e kéa bɛ̃̀ɛ̃ ka píé, ɓii káà mia Dàa dɔ. M dàa nì, ḿm̀ wɔ̃́ e kéa bɛ̃̀ɛ̃ ka píé, ɓii káà mi lɛ́ aà kɛ ɓe pɛ séĩ́ gã̀-gbɛ̃̀pìàa dɔɔ mɔ́ɔ̀ wɔ̃̀ mɔ̀. Ḿm̀ wɔ̃́ e kéa bɛ̃̀ɛ̃ mia dɛɛ ka píé, ɓii ka mɛ́ lɛ gágàa mɔ́ɔ̀ wɔ̃̀ mɔ̀. Wálà lé-wè yàlà kṹũ̀ lɛ ka yí, ɛ̃́ɛ̃́ ka kɔ̀ aà die Kɛ-pɛ̀ Yɔɔ Kɛ-mìa là.

¹⁵Yékɛ̀ kpóṹ là, ɛ̃́ɛ̃́ pɛ séĩ́ lɛ́ lɛ kpóṹ làà pɛ káa, lɔ̀ é kpɔ́ ka mɔ̀. Yé kpóṹ là zèe lɔ̀ aà kpɔ́ mi dò mɔ̀ɔ, kɛɛ mia Dàa zì lɔ̀-kpɔ̀à-mɔ̀ wá à yí.

¹⁶Pɛ séĩ́ lɛ́ lɛ kpóṹ làà pɛ ká, lɛ́ e kélɛ̀, wɔ̃́ yɔɔ lɛ́ à kɛ-lɔ̀ è mia kɛ̀ɛ, wà pɛ lɛ́ mia ò gɛ̃̀, tó à kɛ̀-o-kɛ̀lɛ̀ lɔ̀ áà o kɛ̀ɛ, ɛ̃́ɛ̃́ pɛ séĩ́ lɛ́ e kpóṹ là zèe lɛ́ mia ɓéèe ò lé-gbùò-là kɛ̀ à wɛ̃́ĩ̀a, à dò nɔ́ɔ fé lɛ̀ɛ́ gó mia Dàa píé. À séĩ́ lɛ kpóṹ là zèe là pɛ ká.

¹⁷Kpóṹ là, ɛ̃́ɛ̃́ pɛ séĩ́ lɛ́ e à yí lɛ́ à lɔ̀ è mia kɛ̀ɛ, à wɔ̃̀ lɛ nyɛpìà tã́ã̀. Kɛɛ mi lɛ́ è wɔ̃́ lɛ́ Wálà à nàà à káa kɛ̀ɛ, lɛ́ɛ̀ lo kɛɛ̀ ɓe tòá kíli ká.

¹⁸Nɔ́ɔ̀ɓé, lúó líé-nyɛ-lùò aà ɓɔ gbaa. O Kɛ́lɛ̀ì Dàa-gbe nu-wɔ̃̀ gèe ka lɛ̀ɛ. Ɛ́ɛ̃́ dɛɛ káa, Kɛ́lɛ̀ì dàa-gbe vɔ̀ kù aà kɛ gbùò. À mɔ́ɔ̀ wɔ̃̀ mɔ̀ɔ, kóò à yí dɔ kélɛ̀ lúó líé-nyɛ-lùò aà ɓɔ kɔ̀ɛ́.

¹⁹Míá o kéa òó gbaa kɛ ko dò ká. Ye lɛ́ a kɛ lɛ́ o gó ko bàa. È kɛ̀á o kɛ ko dò káa, wáá tóò ko bà. Kɛɛ o gó ko bà, kɛɛ á zɔ̃̀ɔ̃̀ kpó-kpó ɓo kélɛ̀ o dò nɔ́ɔ fé òó gbaa kɛ ko dò ká.

²⁰Kɛɛ Gɛ̀ɛ̀ Púlú lɛ́ è go Mi Púlúa píéa, aà káá ka là. À mɔ́ɔ̀ wɔ̃̀ mɔ̀ɔ, ka séĩ́ káà wɔ̃́ yí dɔ.

²¹Yé lɛ kília, kii m̀ bɛ̃̀ɛ̃ ka píéa, ye wá kélɛ̀ kàá wánà-wɔ̃̀ dɔ. Kɛɛ ḿm̀ bɛ̃̀ɛ̃ ka píé ɓii káà wánà-wɔ̃̀ dɔɔ mɔ́ɔ̀ wɔ̃̀ mɔ̀. Ɛ́ɛ̃́ káà à yí dɔ zeĩ́ kélɛ̀ nɛ̀-wɔ̃̀ nɔ́ɔ fé lɛ̀ɛ́ gó wánà-wɔ̃̀ɔ kɛ̀lɛ̀.

²²Dé mɔṹ e nɛ̀ kɛ-mìa ká? Mi lɛ́ à gèe kélɛ̀ Zízɛ̀ wá Kɛ́lɛ̀ì káa lɛ́ e nɛ̀ kɛ-mìa káa. Mí e kília lɛ́ e Kɛ́lɛ̀ì Dàa-gbe káa. Lɛ́ɛ̀ e wũ ɓo mia Dàa wà e Gbe o mɔ́ɔ̀ wɔ̃̀ wì.

²³Ƃii mi lɛ́ è e wũ ɓo Mi Gbe wìa, kɛɛ mia Dàa wá là pɛ ká. Mi lɛ́ è e kɔ̀ yà Mi Gbe wìa, kɛɛ mia Dàa lɛ là pɛ ká.

²⁴Wɔ̃́ lɛ́ kaà gbɛ̃̀ mɔ́ à maà ká wɔ̃́ gã̀-gbɛ̃̀pìàa, kà à tó é e yàlà kṹ ka yí. É kɛ̀á kaà kɛ wɔ̃́ lɛ́ kaà gbɛ̃̀ mɔ́ à maà ká wɔ̃́ gã̀-gbɛ̃̀pìàa aà e yàlà kṹ ka yía, ka yàlà kṹũ̀ lɛ́ɛ̀ lo kɛɛ̀á Mi Gbe wà mia Dàa o yí.

²⁵Wɔ̃́ lɛ́ Kɛ́lɛ̀ì dìè e e wè dɔá kɛ á nɔ ko lɛ̀ɛ, lɛ́ e kɛ̀ɓe wɔ́lɔ́-wɔ́lɔ́ káa.

²⁶Ḿm̀ kíí e kéa bɛ̃̀ɛ̃ ka píé mia lɛ́ ò à kɛ-zì nàà ó ka bèkɛ̀ ɓo yía mɔ́ɔ̀ wɔ̃̀ mɔ̀.

²⁷Kɛɛ ka yee, Kɛ́lɛ̀ì aà e zì Gɛ̀ɛ̀ káá ka là, ɛ̃́ɛ̃́ à Gɛ̀ɛ̀ e kília yàlà kṹũ̀ lɛ ka yí. Yé lɛ kília, ye wá ka mɔ̀ kɛ ká mi naa kɛ é pɛ zɔ̃̀ɔ̃̀ ka lɛ̀ɛ. Ƃii à zì Gɛ̀ɛ̀ lɛ́ɛ̀ pɛ séĩ́ zɔ̃̀ɔ̃̀ ka lɛ̀ɛ mɔ́ɔ̀ wɔ̃̀ mɔ̀. Ɛ́ɛ̃́ pɛ́ à zɔ̃̀ɔ̃̀ ka lɛ̀ɛ lɛ wánà zɛ̀. Ye wá nɛ̀ zɛ̀. À mɔ́ɔ̀ wɔ̃̀ mɔ̀ɔ, kà wɔ̃́ lɛ́ Gɛ̀ɛ̀ à zɔ̃̀ɔ̃̀ ka lɛ̀ɛ kɛ káà ka yàlà kũ̀ Kɛ́lɛ̀ì yí.

²⁸Kɛɛ m̀ nɔ́ɔ̀ɓé, kà ka yàlà kṹ à yí kɛɛ kɔa gé é kɛ geleĩ yé aà ɓíé mia làa ká, yékɛ̀ yɛ́lɛ̀ é ko kɛ kɔ́áà ko bĩ̀ĩ̀ à mɔ̀ Lúó è lo nuù à káa ká.

²⁹Káà yí dɔ kélɛ̀ Kɛ́lɛ̀ì lɛ kpeĩ. Lɛ̀ mɔṹ kà yí dɔ kília, káá mí è wɔ̃́ kpeĩ kɛ̀ɛ yí dɔɔ̀ Wálà dìè ye-nɛ̀ ká.