Read Yamano Wɛ̀lɛ̀vèlésɔ̃̀ 10 Bible Online

Wɛ̀lɛ̀vèlésɔ̃̀ 10 - Yamano bible

Wɛ̀lɛ̀vèlésɔ̃̀ 10

¹M bɛ̀i m Wálà là vɔ-mì mɛ́ gágà zɛ̀ dò gɛ̃̀ zeĩ́ áà gò lɛ̀í. À mɔ̀-sɔ̀ e kɛ lúé-lúé ká. Gbèĩ́-ɓɛ̀lɛ̀ nìɛɛ̀ e kɛá à wũ-kèlè mɔ̀. À wɛlɛ e kɛ lɛ̀ nyɛ́nɛ́ lɛ́ ɓe. Ɛ́ɛ̃́ à gã̀ e kɛ lɛ̀ tíé kṹã̀a zɛ̀ kpo lɛ́ ɓe.

²Kii lɛ́ɛ́ kpíní kṹã̀a zɛ̀ ɓéĩ́ dò e kɛ à kɛ̀lɛ̀. À lé fólò e kɛá. E e gã̀ yiè gbɛ̃̀ mɛ̀ĩ́ là, e bɛ̀i, e e gã̀ gbiè gbɛ̃̀ kpóṹ bíní.

³E gbɛ́ɛ́ gágà lɛ̀ wɔ̀ɔ́ù lɛ́ è gbɛ̀ɛ̀. Lɛ̀ lɛ́ e gbɛ́ɛ́ɛ, gbánà sálápèèlɛɛ e wéé nɔ́ gɛ́lɛ̀ le.

⁴Yé o wéé nɔ́ɔ, m pɛ̀ kɛɛ̀ e kɛá kɛ ḿ pɛ bɛ̃̀ɛ̃. Kɛɛ m wéé dò ma áà gò lɛ̀í weeá kélɛ̀, “Wɔ̃́ lɛ́ gbánà sálápèèlɛɛ a gèea, à kpɔ́ i gé. Yékɛ̀ ɓá bɛ̃̀ɛ̃.”

⁵Ɛ́ɛ̃́ Wálà là vɔ-mì yé ma gɛ̃̀ dɔ̀á mɛ̀ĩ́ wà kpóṹ bínía, e e kɔ̀ yiè sí a zɔ̃̀ɔ̃̀ lɛ̀í,

⁶áà e wè dɔ̀ Wálà lɛ́ lɛ ɓe tòá kíli wɔ́lɔ́-wɔ́lɔ́ ká, lɛ́ e lɛ̀í wà pɔɔ̀ séĩ́ lɛ́ e yía kɛ, lɛ́ e tã́ã̀ zèe wà pɔɔ̀ séĩ́ lɛ́ a lɛ̀ mɔ̀ɔ kɛ, ɛ̃́ɛ̃́ lɛ́ e mɛ̀ĩ́ wà pɔɔ̀ séĩ́ lɛ́ a bàa kɛɛ tɔ́ ká. A gèe kélɛ̀, “Lúó-ɓò-mɛ̀ĩ́ gbɛɛ lɛ̀ɛ́ ló kɛɛ̀ ɓe.

⁷Kɛɛ yé Wálà là vɔ-mì sálápèèlɛ mìa aà là túlúa pìèa, Wálà zì wɔ̃́ lɛ́ lɛ à gé lɛ́ à bĩ̀ĩĩ̀ e kɛáa, lɛ́ɛ̀ lo kɛɛ̀ zí a gèeá là yɛɓo-kɛ-mìà lɛ́ o kɛ dɔ̀à-lé-là-mìà káa lɛ̀ɛ lɛ́ ɓe.”

⁸Wè lɛ́ ma ma lɛ́ e gó lɛ̀ía, e bɛ̀i e wɔ̃́ gèe m lɛ̀ɛ zeĩ́ weeá kélɛ̀, “Lo í kii lɛ́ɛ́ fólòa zɛ̀ lɛ́ e Wálà là vɔ-mì lɛ́ e dɔ̀á mɛ̀ĩ́ wà kpóṹ làa kɛ̀lɛ̀ɛ kṹ.”

⁹M ló Wálà là vɔ-mìa píé, ma gèe à lɛ̀ɛ é m gba kii lɛ́ɛ́ kpíní kṹã̀a zɛ̀ ɓéĩ́a ká. A gèe m lɛ̀ɛ, “À kṹ ɓá ɓèlè. Lɛ́ɛ̀ lo kɛɛ̀ nyɔ́ɔ̀ɔ i gé zàá. Kɛɛ lɛ́ɛ̀ lo kɛɛ̀ nɛ́ĩ́-nɛ̀ĩ̀ i lé zàá, lɛ̀ zɔ́ɔ́ nyɔ́nɔ́ lɛ́ ɓe.”

¹⁰M kii lɛ́ɛ́ ɓéĩ́a kṹ à kɛ̀lɛ̀ ma ɓèlè. E kɛ nɛ́ĩ́-nɛ̀ĩ̀ m lé nɔ́ lɛ̀ zɔ́ɔ́ nyɔ́nɔ́ lɛ́ ɓe. Kɛɛ lɛ̀ ma mánía, e kɛ gbaa nyɔ́ɔ̀ɔ m gé.

¹¹Wɔ̃́ gèeè e kɛá m lɛ̀ɛ zeĩ́ kélɛ̀, “Wɔ̃́ lɛ́ Wálà è à kàà i lé lɛ́ à gbɛ̃̀ɛ̃̀ lɛ sɛ́lɛ́ gbɛɛ̀ gbɛɛ yí-mìà búnùzɛ̀, e bɛ̀i mia kpóló kɛ-kɔ̀ gbɛɛ̀ gbɛɛ zɛ̀, ɛ̃́ɛ̃́ wè gbɛɛ̀ gbɛɛ gèe-mìà, e bɛ̀i sɛ́lɛ́ líé-sí-mìà mɔ̀ɔ lɛ i mɔ̀ ɓá gèe zeĩ́.”