Read Yamano Wɛ̀lɛ̀vèlésɔ̃̀ 12 Bible Online

Wɛ̀lɛ̀vèlésɔ̃̀ 12 - Yamano bible

Wɛ̀lɛ̀vèlésɔ̃̀ 12

¹Lé-pa-wɔ̃̀ kpàlézɛ̀ dò e kɛ lɛ̀í kii yí. E kɛ lee doó ká. À mɔ̀-sɔ̀ e kɛ nyɛ́nɛ́ ká. Mɛnɛ e kɛ à gã̀ wì. Zòlò lɛ́ sĩ̀ã́ã̀ŋèlè vũ̀ doó wɛ́lɛ́ pèèlɛ kɛɛ̀ e kɛá à mɔ̀ɔ, e kɛ à wĩĩ́.

²À gí e kɛ à mɔ̀. À wɛlɛ e kɛ nyɔ́ɔ̀ɔ. À gé e kɛ kpɛ́nɛ́pìà, áà gbóó ɓò lɛ̀ lɛ́ e dɔ é nu nɛ́ ká pɛlɛía ká.

³Lé-pa-wɔ̃̀ e bɛ̀i e kɛ zeĩ́ lɛ̀í. Wìì zóló gbùò dò lɛ́ ò si dálágɔ̃̀ɔ e ɓɔ. À wũ-kèlè e kɛ sálápèèlɛ. À ɓé e kɛ vũ̀ doó. Zòlò e kɛ à wũ-kèlèa mɔ̀ doó doó.

⁴Sĩ̀ã́ã̀ŋèlè vɔ̀ o kɛ lɛ̀ía o yí gìniì e kɛá kpolà yààka zɛ̀. Dálágɔ̃̀ɔ e à kpolà doó-mì gã́ã́ e woũ ká a káá tã́ã̀. E die e dɔ lee lɛ́ à wɛlɛ e kɛ nyɔ́ɔ̀ɔ wɛlɛ mɔ̀ kɛ é lééa là nɛ́ɛ ɓèlè, yé aà ye nɔ́ kéa ká.

⁵Lɛ̀ e kɛ kília, lééa e la gbaa nɛ́ gɔ̃ zɛ̀ lɛ́ è lo sɛ́lɛ́ gbɛɛ̀ gbɛɛ séĩ́ líé síì kpó-kpó ɓo, lɛ̀ mi lɛ́ pɛ-kúlú kpuú lɛ à kɛ̀lɛ̀ɛ lɛ́ ɓea ká. Kɛɛ o nɛ́fúa sɔ̀nɔ́ tíè-tíèe o ló à ká Wálà wà là dɔ-táŋánáa píé.

⁶Lééa e wàà gbaa e ló yɛ̀í là. E ló gbaa lɛ̀ lɛ́ Wálà aà pɛ̀ kɛ à lɛ̀ɛ mɔ̀. À lɛ̀ mɔ̀ lɛ́ ò lo o yɛ́lɛ́ kɛɛ̀ à mɔ̀ yi lúó wáá doó là wũ pèèlɛ là vũ̀ sáláádo píéa.

⁷Yé e kɛ kília, gèlè e kã́ gbaa lɛ̀í-sɛ̀lɛ̀ yí. Máíkɔ̀ wà là vɔ-mìà o gèlè gɔ̃ dálágɔ̃̀ɔ ká. Dálágɔ̃̀ɔ wà là vɔ-mìà o gèlè gɔ̃ o bɛ̃̀ɛ̃ o ká nɔ́ kíli.

⁸Kɛɛ o kɔ̀ e die dálágɔ̃̀ɔ là. Ɛ́ɛ̃́ lɛ̀ gbɛɛ lɛ̀ɛ́ gbaa kɛ ɓe dálágɔ̃̀ɔ nì lɛ̀ɛ lɛ̀í.

⁹O dálágɔ̃̀ gbùò e kília yí lúó gbaa. À ye lɛ́ e mɛ̀nɛ zii lɛ́ ò si Dɛ́ɓò ɛ̃́ɛ̃́ Sétɔ̃̀ lɛ́ e kpóṹ là zèe mìà séĩ́ bèkɛ̀-ɓo-mì káa káa. O wà là vɔ-mìà séĩ́ kpɔ́ à mɔ̀ o o dùò tã́ã̀ zèe.

¹⁰Yé e kɛ kília, m wéé gágà dò ma lɛ̀í-sɛ̀lɛ̀ yí weeá kélɛ̀, “Wálà là mia la-lùò aà ɓɔ à mɔ̀. Kò Wálà là yíkɛ̀ gáàa wà à zì tò-mia-làa lúó aà ɓɔ. Ɛ́ɛ̃́ là Kɛ́lɛ̀ì zì yíkɛ̀ gáàa lùò aà ɓɔ. Ƃii mi lɛ́ e kɛ wɔ̃́ kpɔ̀ ko lèe-gé vɔ̀ mɔ̀-mì ká, lɛ́ e kɛ wɔ̃́ kpɔ́pìà o wĩĩ́ bĩ́á ɛ̃́ɛ̃́ nyɛ́nɛ́ĩ́ kò Wálà wɛlɛ mɔ̀ɔ, waà à dùò gbaa tã́ã̀.

¹¹Ko lèe-gé vɔ̀ kɔ̀ e die à là Ƃáá nyɔ̀nɔ́ɔ léà, ɛ̃́ɛ̃́ kélá-wè lɛ́ wa ɓoa kolo là zàá. Òó gbaa kpàa o dìè zì kɛ̀ɓe mɔ́ɔ̀ wɔ̃̀ yí, yé bɛ̃̀ɛ̃ e kɛ o mɔ̀ ó gaa ká.

¹²À mɔ́ɔ̀ wɔ̃̀ mɔ̀ɔ, lɛ̀í wà pɛ séĩ́ lɛ́ o pà kã́ã̀ lɛ yía, kà géli kɛ. Kɛɛ wɔ̃́ yéĩ̀zɛ̀ kɛɛ̀ lɛ kpóṹ là wà mɛ̀ĩ́ o ká. Ƃii Dɛ́ɓò aà nu tã́ã̀ yi ka píé. Wɔ̃́à wàaà lɛ kpó-kpó ɓo, ɓii láà yí dɔ là lúó aà tó nɔ́ e ɓúlu ká.”

¹³Yé dálágɔ̃̀ɔ a gɛ̃̀ kélɛ̀ waà dùò gbaa tã́ã̀ zèea, e gbɛ̃̀ gbaa áà tò lee lɛ́ e la gɔ̃-nɛ̀ káa píé.

¹⁴Kɛɛ o kɔ̀a gbùò gbã pèèlɛ dɔ lééa mɔ̀ kɛ é wɛ̀lɛ̀ à ká é ló e yàlà kṹũ̀ yɛ̀í là. À lɛ̀ mɔ̀ lɛ́ o yɛ́lɛ́ è lo kɛɛ̀ à mɔ̀ yi kɛ̀ɛ̀ yààka wà e lé-gbú píé, yékɛ̀ mɛ̀nɛ é à kṹa.

¹⁵Yíí gbùò dò e gó mɛ̀nɛɛ kpɛí áà lò lééa píé. Mɛ̀nɛɛ a kɛ kíli kɛɛ yíía é ló lééa ká bèí.

¹⁶Kɛɛ tã́ã̀ e gbũ lééa mɔ̀. Tã́ã̀ e e lé kã́ e kíe mɔ̀, e yíí lɛ́ e kɛ gópìà dálágɔ̃̀ɔ léa mání.

¹⁷Wɔ̃́ e dálágɔ̃̀ɔ wàa gbaa kpó-kpó ɓo lééa píé. E ló gbaa áà gèlè gbìnì lééa sùu-là-mìà yé o tóa mɔ̀. Lééa sùu-là-mìà o kília o lɛ́ o mia séĩ́ lɛ́ ò wɔ̃́ lɛ́ Wálà à gèe ó kɛɛ kɛ̀, ɛ̃́ɛ̃́ lɛ́ ò kélá-wè ɓo Zízɛ̀ lɛ̀ɛ káa.

¹⁸Dálágɔ̃̀ɔ e dɔ gbaa mɛ̀ĩ́ kpóṹ là.