Read Yamano Wɛ̀lɛ̀vèlésɔ̃̀ 13 Bible Online

Wɛ̀lɛ̀vèlésɔ̃̀ 13 - Yamano bible

Wɛ̀lɛ̀vèlésɔ̃̀ 13

¹M luú-wìì dò gɛ̃̀ áà gò mɛ̀ĩ́ bà. À ɓé e kɛ à wĩĩ́ vũ̀ doó. À wũ-kèlè e kɛ sálápèèlɛ. Zòlò e kɛ à ɓé mɔ̀ doó doó. Tɔ́ yɔɔ̀ yɔɔ̀ bɛ̃̀ɛ̃ɛ̃̀ e kɛá à wũ-kèlè mɔ̀ déĩ́ le.

²Luú-wìì yé ma gɛ̃̀ɛ e kɛ lɛ̀ gɔ́ lɛ́ ɓe. À gã̀ e kɛ lɛ̀ tù-kɔ́ɛ́ì gã̀ lɛ́ ɓe. À lé e kɛ lɛ̀ wɔ̀ɔ́ù lé lɛ́ ɓe. Dálágɔ̃̀ɔ e là yíkɛ̀ gáàa ɛ̃́ɛ̃́ à zì dɔ-táŋáná, e bɛ̀i à zì kɛ̀-mia-là mɔ́ɔ̀ yíkɛ̀ gáàa nɔ luú-wìì e kília lɛ̀ɛ.

³Luú-wìì e kília wũ-kèlè doó-mì e kɛ lɛ̀ pɛ lɛ́ waà zɛ do. Kɛɛ ɓa lɛ́ e à zɛɛ aà ga. Kpóṹ là zèe mìà séĩ́ o lé paà e kɛá, wáà tò à ká luú-wììa píé.

⁴Mia séĩ́ o gbini gbaa dálágɔ̃̀ɔ lɛ̀ɛ, ɓii aà e zì yíkɛ̀ gáàa nɔ gbaa luú-wììa lɛ̀ɛ. Ɛ́ɛ̃́ zeĩ́a, o gbini luú-wììa lɛ̀ɛ nɔ́ kíli wáà gèè, “Dé e kélɛ̀ luú-wììa? Dé è bɛ̀i à mɔ̀ é gèlè gɔ̃ à ká?”

⁵À lé lɛ́ è lé-gbùò-là kɛ̀á, ɛ̃́ɛ̃́ lɛ́ è wɔ̃́ yɔɔ̀ yɔɔ̀ gèe à káa, à nɔɔ̀ e kɛá à lɛ̀ɛ. O yíkɛ̀ gáàa nɔ à lɛ̀ɛ é kɛá mia là mɛnɛ vũ̀ yììsɛ wɛ́lɛ́ pèèlɛ píé.

⁶E gbɛ̃̀ gbaa áà wɔ̃́ yɔɔ̀ yɔɔ̀ gèè Wálà wà à tɔ́, wà lɛ̀ lɛ́ à yàlà kṹũ̀ lɛ yía, ɛ̃́ɛ̃́ mia séĩ́ lɛ́ o yàlà kṹũ̀ lɛ lɛ̀ía gbĩ mɔ̀.

⁷O yíkɛ̀ gáàa nɔ à lɛ̀ɛ kɛ é gèlè gɔ̃ Wálà là mia nì ká, kɛ à kɔ̀ é die o là. O yíkɛ̀ gáàa nɔ zeĩ́ à lɛ̀ɛ kɛ é kɛá síí-sɛ̀lɛ̀ séĩ́ là mìà, ɛ̃́ɛ̃́ sɛ́lɛ́ gbɛɛ̀ gbɛɛ yí-mìà, e bɛ̀i zeĩ́ wè gbɛɛ̀ gbɛɛ gèe-mìà, ɛ̃́ɛ̃́ zeĩ́ mia kpóló kɛ-kɔ̀ gbɛɛ̀ gbɛɛ zɛ̀ là.

⁸Mia séĩ́ lɛ́ o yàlà kṹũ̀ lɛ kpóṹ là zèea, óò lo gbinì à lɛ̀ɛ. Mia lɛ́ ò lo gbinì à lɛ̀ɛ kília, o lɛ́ o kélɛ̀ mia séĩ́ lɛ́ o tɔ́ bɛ̃̀ɛ̃ɛ̃̀ wá nɛ́ kɛ̀ɓe-kiia yí kɛ bɛ̃̀ɛ̃ kpóṹ là zèe é tĩã́ kɛɛ̀ ɓea káa. Kɛ̀ɓe-kii e kília lɛ Ƃáá nyɔ̀nɔ́ lɛ́ o à zɛɛ là pɛ ká.

⁹“É kɛ̀á mi nɔ́ɔ fé tóó lɛ à wũ mɔ̀ɔ, è e tóó dɔ.

¹⁰É kɛ̀á lɛ mi dò mɔ̀ ó à kṹ gèlè námáná káa, óò lo à kṹũ̀ wánà kpó-kpó ká. Mi nɔ́ɔ fé lɛ́ è gèlè-gɔ̃-làà si kɛ é zɛ-ɓo kɛ à káa, óò lo à yee zɛɛ̀ wánà kpó-kpó ká gèlè-gɔ̃-làà ká. Wɔ̃́ e kéa yí lɛ́ e kélɛ̀, lɛ sɛ̀ Wálà là mia nì ó o zò kṹ tã́ã̀, ɛ̃́ɛ̃́ ó o zò dɔ Wálà mɔ̀ teele.”

¹¹E bɛ̀i m luú-wìì dò gɛ̃̀ zeĩ́ áà gò gìè. À ɓé e kɛ pèèlɛ. Ɛ́ɛ̃́ à ɓé e kília ɓɔɔ̀ e kɛá ɓáá nyɔ̀nɔ́ ɓé bà. E wéé lɛ̀ dálágɔ̃̀ lɛ́ è wèè.

¹²E kɛ yɛɓo kɛpìà luú-wìì bèĩzɛ̀ɛ zì yíkɛ̀ gáàa séĩ́ ká à wɛlɛ mɔ̀. E kpóṹ là zèe wà mia séĩ́ lɛ́ o pà lɛ yía kṹ gágà kɛ ó gbini luú-wìì bèĩzɛ̀ lɛ́ ɓa a wũ-kèlè doó-mì zɛ, lɛ́ ɓá e kília aà gaa lɛ̀ɛ.

¹³Luú-wìì tò-ko-mɔ̀ pèèlɛ zɛ̀ e kéa, e wɔ̃́ kpàlé-kpàlézɛ̀ kɛ. A kɛ tó tíé áà gò lɛ̀í, áà bã̀ tã́ã̀ mia nyìɛ́.

¹⁴Wɔ̃́ kpàlézɛ̀ lɛ́ o wéé à mɔ̀ é à kɛ luú-wìì bèĩzɛ̀ɛ nyìɛ mɔ̀ɔ, e kɛ mia séĩ́ lɛ́ o pà e kɛá tã́ã̀ zèea bèkɛ̀ ɓopìà à ká. A gèe mia séĩ́ lɛ̀ɛ ó luú-wìì bèĩzɛ̀ɛ bĩ́ sí kɛ é kɛ ɓɛ̀lɛyà ká, wáà nɔ̀á luú-wìì lɛ́ à gĩ̀ĩĩ̀ e kɛá gèlè-gɔ̃-làà ká, ɛ̃́ɛ̃́ lɛ́ lɛ ɓe tĩã́a à lɛ̀ɛ.

¹⁵O wéé à mɔ̀ kɛɛ luú-wìì tò-ko-mɔ̀ pèèlɛ zɛ̀ɛ é à kɛ kɛɛ luú-wìì bèĩzɛ̀ɛ bĩ́ wa sía é à kɛ é tɛ́lɛ́, kɛ bɛ̀i é kɛ à mɔ̀ é wéé, ɛ̃́ɛ̃́ kɛ á kɛ kɛɛ mia lɛ́ òó gbaa wéé à mɔ̀ kɛ ó gbini pɛ bĩ́ e kília lɛ̀ɛ, kɛ ó o zɛ.

¹⁶Luú-wììa a kɛ kɛɛ mia séĩ́ ó kɛ̀á fĩ́ĩ́nyɛ zɛ̀, ɛ̃́ɛ̃́ kpànazɛ̀ò, ɛ̃́ɛ̃́ ó kɛ bɛ̃̀ɛ̃ pɛ-mìà ká, ɛ̃́ɛ̃́ mia lɛ́ pɛ wá o kɛ̀lɛ̀ɛ káò, é kɛ bɛ̃̀ɛ̃ lùò ká, ɛ̃́ɛ̃́ mia yé o ɓoò lɛ lùò-là yía káò, kɛɛ pɛ píé kɛɛ̀ é kɛá o kɔ̀ yiè mɔ̀ ɛ̃́ɛ̃́ o pelà.

¹⁷Lɛ̀ɛ́ gbaa kɛ mi nɔ́ɔ fé mɔ̀ kɛ é pɛ lɔ́, ɛ̃́ɛ̃́ é pɛ lɔ̀ɔ̀ dɔ, yé pɛ píéa wá à mɔ̀ɔ ká. Pɛ píé e kília lɛ luú-wìì e kília tɔ́ ká, ɛ̃́ɛ̃́ à tɔ́ e kília mɔ́ɔ̀ nɔ́mà ká.

¹⁸Gíkã́-wɔ̃̀ kpó-kpó lɛ́ e kéa. Mi lɛ́ à wũ lɛ à mɔ̀ɔ lɛ́ɛ̀ bɛ̀i à mɔ̀ é zi lɛ́ luú-wììa là nɔ́mà lɛ à káa yí-ɓo-zì dɔ, ɓii nɔ́mà e kília à kɛɛ̀ lɛ gɔ̃ tɔ́ wɛ̃́ĩ̀. Nɔ́mà e kília lɛ́ e wũ sáláádo là vũ̀ sáláádo wɛ́lɛ́ sáláádo káa.