Read Yamano Wɛ̀lɛ̀vèlésɔ̃̀ 15 Bible Online

Wɛ̀lɛ̀vèlésɔ̃̀ 15 - Yamano bible

Wɛ̀lɛ̀vèlésɔ̃̀ 15

¹M bɛ̀i m lé-pa-wɔ̃̀ kpàlé-kpàlézɛ̀ dò gɛ̃̀ zeĩ́ lɛ̀í. Wálà là vɔ-mìà sálápèèlɛ o kɛ yí. Mia sã̀-dɔ-pɛ̀ sálápèèlɛ e kɛ o kɛ̀lɛ̀. Mia sã̀-dɔ-pɛ̀ o kília o lɛ́ o à líé-nyɛ-mɔ̀ káa. Ƃii yé waà kɛ waà nyɛ tã́ã̀a, kɛɛ Wálà zì wɔ̃́à wàaà aà nyɛ tã́ã̀.

²Zeĩ́a, m pɛ dò lɛ́ à ɓɔɔ̀ e kɛá mɛ̀ĩ́ lɛ́ à kɛɛ̀ e kɛá gálásì ká, lɛ́ à bɔ́nɔ̀ e kɛá tíé káa bàa gɛ̃̀. M bɛ̀i m mia lɛ́ o kɔ̀ aà die luú-wììa wà e bĩ́ là, ɛ̃́ɛ̃́ lɛ́ zeĩ́ à tɔ́ bɛ̃̀ɛ̃ɛ̃̀ lɛ nɔ́mà káa làa o gɛ̃̀. O kɛ dɔ̀á mɛ̀ĩ́ lɛ́ à kɛɛ̀ lɛ gálásì káa sɔ́nɔ́ kɔ̃̀níì lɛ́ Wálà aà nɔ o lɛ̀ɛ ká.

³O kɛ Móózè lɛ́ e kɛ Wálà là yɛɓo-kɛ-mì káa là tã́a ɓopìà. Ɛ́ɛ̃́ zeĩ́ wáà Ƃáá nyɔ̀nɔ́ɔ là tã́a ɓò. Ye lɛ́ e kélɛ̀, “Ko Dàa-mì Wálà lɛ́ yíkɛ̀ gáàa séĩ́ lɛ i kɛ̀lɛ̀ ɓɛ, zi sùu kpɛɛ̀ lɛ́ i zì kɛ-wɔ̃̀ lɛ à ká kpàlé-kpàlézɛ̀ ké. Ɛ́ɛ̃́ zeĩ́ sɛ́lɛ́ séĩ́ Líé-sí-mì, zi sùu kpɛɛ̀ lɛ́ i zì kɛ-kɔ̀ lɛ à ká kpeĩ ɛ̃́ɛ̃́ wánà zɛ̀ ké.

⁴Ko Dàa-mì, dé lɛ̀ɛ́ ló túò i lɛ̀ɛ? Dé lɛ̀ɛ́ ló i tɔ́ ɓɔɔ̀? I doó lɛ́ nɔ́ i mi púlú káa. Sɛ́lɛ́ séĩ́-séĩ́ lɛ́ɛ̀ lo nuù áà gbìnì i lɛ̀ɛ. Ƃii i zì wɔ̃́ kpeĩ kɛɛ̀ zɔ̃̀ɔ̃ɔ̃̀ lɛ wáà-là.”

⁵Lɛ̀ wɔ̃́ yé e kéa e nyɛɛ, m Wálà-kà lɛ́ e lɛ̀ía lé ɓoòa zɛ̀ gɛ̃̀. Sɔ-ká lɛ́ e kɛ Wálà zì kɛ̀-mia-píé kélá káa, e kɛ dɔ̀á à wì.

⁶Wálà là vɔ-mìà sálápèèlɛ lɛ́ mia sã̀-dɔ-pɛ̀ sálápèèlɛɛ e kɛ o kɛ̀lɛ̀ɛ, o gó Wálà là káa wì. O mɔ̀-sɔ̀ e kɛ sɔ púlú ɓɔɔ̀ɔ zɛ̀ lɛ́ pɛ píé gbɛɛ wá à mɔ̀ɔ ká. Góò-ɓɛ̀lɛ̀ diè e kɛá o zò là.

⁷Pɛ ɓéèe vɔ̀ yììsɛɛ o doó-mì e kɔ́ɓà sálápèèlɛ lɛ́ à kɛɛ̀ e kɛá góò káa, nɔ Wálà là vɔ-mìà sálápèèlɛɛ lɛ̀ɛ. Kɔ́ɓà e kília paà e kɛá Wálà lɛ́ lɛ ɓe tòá kíli wɔ́lɔ́ wɔ́lɔ́ káa, zì wɔ̃́à-wàa-kɔ̀ ká déĩ́ le.

⁸Wálà là ká e kília paà e kɛá tíé-gbɛ̃́ĩ́ lɛ́ e gó Wálà zì lɛ̀-fɔ̀nɔ-kɔ̀ ɛ̃́ɛ̃́ à zì yíkɛ̀ gáàa yí zàáa ká. Yékɛ̀ mi gbɛɛ é ló nɛ́ Wálà là káa wì, yé mia sã̀-dɔ-pɛ̀ sálápèèlɛ lɛ́ Wálà là vɔ-mìà sálápèèlɛ o nu à káa, lɛ̀ɛ́ nyɛ nɛ́ɛ ká.