Read Yamano Wɛ̀lɛ̀vèlésɔ̃̀ 18 Bible Online

Wɛ̀lɛ̀vèlésɔ̃̀ 18 - Yamano bible

Wɛ̀lɛ̀vèlésɔ̃̀ 18

¹Lɛ̀ e kɛ kília, m Wálà là vɔ-mì doó gɛ̃̀ áà gò lɛ̀í, áà nù tã́ã̀. Yíkɛ̀ gáàa gbùò kpó-kpó e kɛ à kɛ̀lɛ̀. À zì ɓí-kɔ̀ɔ a kɛ kpóṹ là zèe lɛ̀ séĩ́ áà fɔ̀nɔ̀.

²E gbɛ́ɛ́ gbóó gágà ká áà gèè, “Aà pèlè. Bábɛ́lɔ́ũ̀-sɛ̀lɛ̀ gbùò ɓɛ aà pèlè. Aà kɛ gbaa pɛ yɔɔ vɔ̀ doò do zì pà ká gbaa. Mɔ̀ɔ̀ sùu gbɛɛ̀ gbɛɛ lilì kṹã̀a zɛ̀ ɛ̃́ɛ̃́ à sùu yé mia òó naa à káa nì, o yàlà kṹũ̀ lɛ gbaa à lɛ̀ mɔ̀.

³Ƃii sɛ́lɛ́ gbɛɛ̀ gbɛɛ yí-mìà séĩ́ waà là wã́ã́ĩ̀ gágàa mi. Wã́ã́ĩ̀a lɛ́ e sɔ̃̀ɔ̃ yɔɔ à kɛ̀ɛ káa. Ɛ́ɛ̃́ wà kpóṹ là zèe líé-sí-mìà waà sɔ̃̀ɔ̃ yɔɔ kɛ. Mia lɛ́ ò pɛ lɔ̀ɔ̀ dɔ kpóṹ là zèea, waà kɛ pɛ-mìà ká pɛ lɛ́ à lɔ̀ lɛ à kɛpìà lɛ́ à tèá-pìà wá ɓea, kolo là zàá.”

⁴M bɛ̀i, m wéé dò ma áà gò lɛ̀í weeá kélɛ̀, “M̀ mia nì kà gó à bà, yékɛ̀ ka dɔ̀lɔ̀ é kɛ là kɛ-wɔ̃̀ yɔɔ à kɛ̀ɛ mɔ̀, yékɛ̀ kà ye nì ká dɔ mia sã̀-dɔ-pɛ̀ lɛ́ è lo ɓɔɔ̀ à làa yí.

⁵Ƃii à zì kɛ-wɔ̃̀ yɔɔ à kɛ̀ɛ à tùnu aà dɔ, aà ló aà gbɛ̃̀ lɛ̀í mɔ̀. Wɔ̃́ yɔɔ lɛ́ à kɛ̀ɛ lɛ̀ɛ́ ni do Wálà ká.

⁶Kà wɔ̃́ kɛ à ká lɛ̀ zí aà wɔ̃́ kɛá ka káa lɛ́ ɓe. Pɛ lɛ́ aà kɛɛ, kà à zì kɛ à ká e kíe yí pèèlɛ. Pɛ lɛ́ a pɛ̀ kɛ ka lɛ̀ɛ ká mia, kà à zì kɔ́pòa pa mi-pɛ̀ e kília à mɛ́ gágà zɛ̀ ká.

⁷Sã̀-dɔ wà zò nyɔ́ɔ̀ɔ là lɛ́ lɛ ka mɔ̀ ká nɔ à lɛ̀ɛ, wà pɛ lɛ́ e e mɛ́ sí à ká, ɛ̃́ɛ̃́ lɛ́ e à zò-dà-pɛ̀ káa ò bɛ̀i e kíe ká. Ƃii láà gèe e dìè zò píé kélɛ̀, ‘Ma sɛ́lɛ́ líé-sí-lèè gɛ̃̀ m yàa ké. Ma wá gã̀ã ká. Zò yéĩ̀zɛ̀ lɛ̀ɛ́ ló kɛɛ̀ m gé gbɛɛ ɓo.’

⁸Wɔ̃́ nì e kéa mɔ́ɔ̀ wɔ̃̀ mɔ̀ɔ, à zì sã̀-dɔ-pɛ̀ séĩ́ lɛ́ɛ̀ lo ɓɔɔ̀ à mɔ̀ lúó doó ká. À sã̀-dɔ-pɔ̀ɔ̀ e kília lɛ́ e kélɛ̀, yáá, zò yéĩ̀zɛ̀, e bɛ̀i lɔ̀ɔ káa. Tíé lɛ́ɛ̀ lo à gélè. Ƃii ko Dàa-mì Wálà lɛ́ è mɛ̀ĩ́-sà dɔ à mɔ̀ɔ à yí lɛ gágà.”

⁹Ɛ́ɛ̃́ sɛ́lɛ́ líé-sí-mìà lɛ́ o tã́ã̀ zèe lɛ́ wà ye nì o sɔ̃̀ɔ̃ yɔɔ kɛ, lɛ́ wà ye nì o dɔ à zì zò-dà-pɛ̀ yía, óò lo gbóó ɓoò, o nyìɛ-yíí áà kàà pɛ́lɛ gbùò e kília mɔ́ɔ̀ wɔ̃̀ mɔ̀, yé waà à gélé-tìè gbɛ̃́ĩ́ gɛ̃̀ áà wɛ̀lɛ̀ɛ ká.

¹⁰Óò lo dɔɔ̀ à ká gbèĩ, ɓii óò tùò à sã̀ lɛ́ è dɔɔ lɛ̀ɛ. Óò lo à gèeè kélɛ̀, “É ké nìé. É ké nìé. Sɛ́lɛ́ gbùò ɛ̃́ɛ̃́ yí gágà zɛ̀, lɛ́ e Bábɛ́lɔ́ũ̀ ká ɓɛ. I zì wɔ̃́ nyɔ́ɔ̀ɔ e ɓɔ i là áwà doó yí.”

¹¹Pɛ lɔ̀ɔ̀-dɔ-mìà lɛ́ o tã́ã̀ zèea óò gbóó ɓo, wáà yà yéĩ̀zɛ̀ à mɔ́ɔ̀ wɔ̃̀ mɔ̀, ɓii mi gbɛɛ wá gbaa ɓe kɛ é wà káágò lɛ́ ò nuáa lɔ́.

¹²Káágò e kília lɛ́ e kélɛ̀, góò, sévà, e bɛ̀i gɛ̀lɛ̀ sɔ̃̀ɔ̃́ gbùò zɛ̀, ɛ̃́ɛ̃́ pɛ ɓóŋóló-ɓóŋóló púlú púlú lɛ́ ò kpɛ̃ã̀ kɛ̀á, sɔ púlú wà sɔ zóló kɛ-kɔ̀ gbɛɛ̀ gbɛɛ zɛ̀, ɛ̃́ɛ̃́ sɔ yélé-yèlè, ɛ̃́ɛ̃́ zeĩ́ yílí gĩĩ yiè zɛ̀ doò do káa. E bɛ̀i, à dò lɛ́ zeĩ́ pɛ bĩ́ doò do lɛ́ à kɛɛ̀ lɛ bie sɔ̃́ɔ̃́ káa nì, ɛ̃́ɛ̃́ yílí sɔ̃̀ɔ̃́ gbùò zɛ̀ ká, e bɛ̀i pɛ-kúlú sùu gbɛɛ̀ gbɛɛ zɛ̀, ɛ̃́ɛ̃́ gɛ̀lɛ̀ yélé-yèlè dò káa káa.

¹³Káágòa dò lɛ́ zeĩ́ e kéa, pɛ gĩĩ yiè zɛ̀ lɛ́ ò si sínímɔ̀, ɛ̃́ɛ̃́ sápáà, e bɛ̀i zeĩ́ ĩ́sɛ̃̀, mɛ́ɛ̀ ɛ̃́ɛ̃́ fɛ́lɛ́ĩ́kĩsɛ̀. À dò lɛ́ zeĩ́ wã́ã́ĩ̀, nyɔ́nɔ́, fáláɓà-bĩ̀ĩ̀, ɓu, e bɛ̀i dìì ɛ̃́ɛ̃́ ɓáá, sòo vɔ̀, wà mia-yàà-yí-pɛ̀, ɛ̃́ɛ̃́ zeĩ́ lùò vɔ̀, e bɛ̀i mia zì kɛ̀ɓe nì káa.

¹⁴Óò gèe kélɛ̀, “Pɛ lɛ́ à kɛ̀-i-kɛ̀lɛ̀-lɔ̀ e kɛ i kɛpìàa, aà káá gbaa yíí ká. I zì kɛ̀-kpànazɛ̀-pɔ̀ɔ̀ wà i zì pɔɔ̀ yiè yiè lɛ́ e i kɛ̀lɛ̀ɛ nì séĩ́ ɓaà kɔ̃́ gbaa o yí ká. Ìí ló gbaa o gɛ̃̀ nɔ́ɔ fé dò ɓoò.”

¹⁵Pɛ lɔ̀ɔ̀-dɔ-mìà lɛ́ o kɛ kpànazɛ̀ pɛ́ wa lɔ̀ɔ̀ dɔɔ kolo là zàá sɛ́lɛ́ e kília yía, óò lo dɔɔ̀ à ká gbèĩ, ɓii óò tùò à sã̀ lɛ́ è dɔɔ lɛ̀ɛ. O nyìɛ-yíí lɛ́ɛ̀ lo diè tó wáà yéĩ̀ kũ̀,

¹⁶tó wáà gèè kélɛ̀, “É ké nìé. É ké nìé. Sɛ́lɛ́ gbùò ɓɛ wɔ̃̀ aà kɛ yéĩ̀zɛ̀ò. À mɔ̀-sɔ̀ e kɛ sɔ púlú wà sɔ zóló kɛ-kɔ̀ gbɛɛ̀ gbɛɛ zɛ̀ ká. E kɛ e mɛ́ sípìà góò, ɛ̃́ɛ̃́ gɛ̀lɛ̀ sɔ̃̀ɔ̃́ gbùò zɛ̀ wà pɛ ɓóŋóló-ɓóŋóló púlú púlú lɛ́ ò kpɛ̃ã̀ kɛ̀áa ká.

¹⁷À zì kɛ̀-kpànazɛ̀-pɔ̀ɔ̀ e kília séĩ́ yí aà sìè áwà doó yí.” Ɛ́ɛ̃́ gɔɔ táá-mìà wà mia lɛ́ o gɔ́ɔ́ e kília yía séĩ́, wà mia lɛ́ ò yɛɓo kɛ̀ gɔ́ɔ́ɔ yía, ɛ̃́ɛ̃́ mia séĩ́ lɛ́ ò dɔ o dìè là mɛ̀ĩ́ làa, o dɔ à ká gbèĩ,

¹⁸o gbóó ɓo lɛ̀ lɛ́ o à gélé-tìè gbɛ̃́ĩ́ gɛ̃̀ɛ ká weeá kélɛ̀, “Pɛ́lɛ kpɛɛ̀ lɛ́ wà pɛ́lɛ gbùò e kéa o bɛ̀iì lɛ?”

¹⁹O mùnú-sɛ́lɛ́ wɛ̃̀ĩ o wĩĩ́ píé. O nyìɛ-yíí e káá, ɛ̃́ɛ̃́ yà yéĩ̀zɛ̀ e kɛ o mɔ̀ wáà gèè kélɛ̀, “É ké nìé. É ké nìé. Sɛ́lɛ́ gbùò ɓɛ wɔ̃̀ aà kɛ yéĩ̀zɛ̀ò. À ye lɛ́ lɛ sɛ́lɛ́ lɛ́ mia séĩ́ lɛ́ gɔɔ lɛ o kɛ̀lɛ̀ mɛ̀ĩ́ làa, o kɛ kpànazɛ̀ à zì kɛ̀-kpànazɛ̀-kɔ̀ɔ mɔ̀ɔ. Kɛɛ à kɛ̀lɛ̀-pɛ̀ séĩ́ yí aà sìè áwà doó yí.”

²⁰Lɛ̀í, ì géli kɛ à mɔ́ɔ̀ wɔ̃̀ mɔ̀. Mia lɛ́ ka Wálà là mia nì, ɛ̃́ɛ̃́ àpɔ́sɔ̀lɔ̀ vɔ̀ wà dɔ̀-Wálà-lé-là-mìà káa, ka gé è li. Ƃii Wálà aà mɛ̀ĩ́-sà dɔ à mɔ̀ wɔ̃́ lɛ́ a kɛ ka káa mɔ́ɔ̀ wɔ̃̀ mɔ̀.

²¹Lɛ̀ e kɛ kília, Wálà là vɔ-mì yí gágà zɛ̀ɛ e gɛ̀lɛ̀-kpo lɛ́ à kɛɛ̀ e kɛá kélɛ̀ wéĩ́ lɛ́ ɓea sí áà dùò mɛ̀ĩ́ bà weeá kélɛ̀, “Zi lɛ́ Bábɛ́lɔ́ũ̀-sɛ̀lɛ̀ gbùòa è lo dàá tã́ã̀ mɛ́ gágà zɛ̀ɛ ye lɛ́ ɓɛ. Òó ló à gɛ̃̀ɛ̃̀ gbɛɛ ɓoò gbaa.

²²Kɔ̃̀níì zɛ-vĩ̀, wà wéé-pɛ̀ kɛ-mìà vĩ, ɓɔ̀ɔ̀-pìè-mìà vĩ, ɛ̃́ɛ̃́ túlú-pìè vĩ̀, òó ló gbaa dɔɔ̀ i yí gbaa. Mi lɛ́ è dã́-yɛ̀ɓo nɔ́ɔ fé kɛ̀ɛ, òó ló gbaa gɛ̃̀ɛ̃̀ i yí. Yɛɓo kɛ̀ gɛ̀lɛ̀-wéĩ́a ká vĩ̀ lɛ̀ɛ́ ló gbaa dɔɔ̀.

²³Òó ló nábò dɔɔ̀ɔ zɛ̀ zì lɛ̀-fɔ̀nɔ-kɔ̀ɔ gɛ̃̀ɛ̃̀ gbaa i yí. Òó ló lee-sí-gɔ̃̀ wà gɔ̃-sí-lèè o wéè maà gbaa i yí. I zì pɛ lɔ̀ɔ̀-dɔ-mìà lɛ́ o kɛ mia kpànazɛ̀ ká sɛ́lɛ́ séĩ́ làa. I zì nyìɛ̀ yɔɔ̀ yɔɔ̀ kɛɛ̀ yía, ɓaà sɛ́lɛ́ séĩ́ là mìà bèkɛ̀ ɓo à ká.”

²⁴O Wálà là mia nì, ɛ̃́ɛ̃́ là dɔ̀-à-lé-là-mìà léà gɛ̃̀ sɛ́lɛ́ɛ yí. Ɛ́ɛ̃́ o mia séĩ́ lɛ́ o zɛɛ̀ e kɛá kpóṹ là zèea léà gɛ̃̀ à yí.