Read Yamano Wɛ̀lɛ̀vèlésɔ̃̀ 2 Bible Online

Wɛ̀lɛ̀vèlésɔ̃̀ 2 - Yamano bible

Wɛ̀lɛ̀vèlésɔ̃̀ 2

¹“Wɔ̃́ e kéa bɛ̃̀ɛ̃ Wálà-mìà lɛ́ o Ɛ́fɔ́sɔ̀ɔ wà vɔ-mì píé. À bɛ̃̀ɛ̃ weeá kélɛ̀, “Mi lɛ́ è sĩ̀ã́ã̀ŋèlè sálápèèlɛɛ kũ e kɔ̀ yiè kɛ̀lɛ̀, lɛ́ è tàà nábò yàà-là-pɛ̀ sálápèèlɛ lɛ́ à kɛɛ̀ lɛ góò káa fĩ̀ã̀a, wɔ̃́ lɛ́ à gèea gɛ̃̀ e ké.

²Ḿm̀ i kɛ-wɔ̃̀ dɔ. Zi lɛ́ ɓaà yɛɓo kɛá gágà, ɛ̃́ɛ̃́ zi lɛ́ ɓaà i zò kṹ à ká tã́ã̀a, ḿm̀ à dɔ. Ḿm̀ yí dɔ kélɛ̀ zò-kũ̀-gé wá i kɛ̀lɛ̀ wɔ̃́ yɔɔ kɛ-mìà mɔ́ɔ̀ wɔ̃̀ mɔ̀. Ḿm̀ yí dɔ kélɛ̀ ɓaà mia lɛ́ ò o dìè si àpɔ́sɔ̀lɔ̀ vɔ̀ lɛ́ o wá mɔṹ àpɔ́sɔ̀lɔ̀ vɔ̀ káa, ɓaà o yí dã́. Ƃaà à yí dɔ gbaa kélɛ̀ o nɛ̀-mìà ká.

³Zò-kũ̀-tã́ã̀ lɛ i kɛ̀lɛ̀, ɛ̃́ɛ̃́ ɓaà wɔ̃́ nyɔ́ɔ̀ɔ gɛ̃̀ɛ̃ɛ̃̀ kṹ i zò ká m mɔ́ɔ̀ wɔ̃̀ mɔ̀, ɛ̃́ɛ̃́ i yí lɛ̀ɛ́ ga do à kɛɛ̀ mɔ̀.

⁴Kɛɛ wɔ̃́ lɛ́ m̀ḿ naa à ká i mɔ̀ɔ gɛ̃̀ e ké. M lɔ̀ wá i mɔ̀ gbaa lɛ̀ zí e kɛá i mɔ̀ bèĩzɛ̀ɛ lɛ́ ɓe.

⁵I zò è vùò lɛ̀ lɛ́ i gó yi lɛ́ i pèlèa ká. Ì i sɔ̃̀ɔ̃ mɛ́ vɔ̀ɔ, í wɔ̃́ lɛ́ i kɛ à kɛpìà líéa kɛ. Í gɔ̃̀á i sɔ̃̀ɔ̃ mɛ́ vɔ̀ɔɔ̀ɔ, ḿm̀ lo nuù i píé, tó m ɓà nábò yàà-là-pɛ̀ɛ ɓo e dɔ̀lɔ̀ mɔ̀.

⁶Kɛɛ i zì kɛ-wɔ̃̀ lɛ́ lɛ i mɔ̀, lɛ́ m̀ nàà à káa, ye gɛ̃̀ e ké. Wɔ̃́ lɛ́ Nikòlétà-mìà ò kɛ̀ɛ, wɔ̃́ ò kɛ̀ kília, à lɔ̀ wá i mɔ̀, lɛ̀ zí nɔ́ à lɔ̀ wá à ká m mɔ̀ɔ lɛ́ ɓe.

⁷“Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀. “Ḿm̀ lo yíkɛ̀ gáàa nɔɔ̀ mi lɛ́ à kɔ̀ aà die gèlè gɔ̃ɔ̀ yía lɛ̀ɛ, kɛ é kɛ̀ɓe-yìlì lɛ́ lɛ Pálédáà lɛ́ lɛ lɛ̀ lɛ́ Wálà lɛ yía mɔ̀ɔ ɓɛɛ ɓèlè.

⁸“Wɔ̃́ e kéa bɛ̃̀ɛ̃ Wálà-mìà lɛ́ o Sámánàa wà vɔ-mì píé. À bɛ̃̀ɛ̃ weeá kélɛ̀, “Mi lɛ́ e mi bèĩzɛ̀ wà à léĩ́-tó-mɔ̀ ká, lɛ́ e ga ɛ̃́ɛ̃́ lɛ́ lɛ zeĩ́ ɓea, wɔ̃́ lɛ́ à gèea gɛ̃̀ e ké.

⁹Ḿm̀ wɔ̃́ nyɔ́ɔ̀ɔ nì lɛ́ ɓà gɛ̃̀ɛ dɔ. Ḿm̀ à yí dɔ kélɛ̀ pɛ wá i kɛ̀lɛ̀. Kɛɛ wánà kpó-kpó káa, i pɛ-mì ká. Ɛ́ɛ̃́ ḿm̀ wɔ̃́ yɔɔ̀ yɔɔ̀ lɛ́ míá ò o dìè si Zúù-mìàa ò gèe i gbĩ mɔ̀ɔ, ḿm̀ à dɔ. O wá Zúù-mìà ká. Mia kù o kília, o Sétɔ̃̀ là mia nì ká.

¹⁰Yékɛ̀ í túó wɔ̃́ nyɔ́ɔ̀ɔ nɔ́ɔ fé lɛ́ ì lo à gɛ̃̀ɛ̃̀ dɛɛ káa lɛ̀ɛ. Ì i tóó dɔ. Dɛ́ɓò lɛ à kɛpìà kɛ é ka dò dùò bĩ́-kɛ̀ì, kɛ ká yí-dã́ sɔ̀lɔ̀ ɓo. Káà lo wɔ̃́ nyɔ́ɔ̀ɔ e kília gɛ̃̀ɛ̃̀ lúó vũ̀ doó píé. Ì kɛ zò-dɔ̀à-mɔ̀ zɛ̀ yé bɛ̃̀ɛ̃ í gaa ká. Ḿm̀ lo kɛ̀ɓe-zòlò yàà i wĩĩ́.

¹¹“Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀. “Mi lɛ́ à kɔ̀ diè lɛ gèlè gɔ̃ɔ̀ yía, ga tò-ko-mɔ̀ zɛ̀ɛ lɛ̀ɛ́ ló à mɛ́ gĩ̀ĩĩ̀.

¹²“Wɔ̃́ e kéa bɛ̃̀ɛ̃ Wálà-mìà lɛ́ o Pógómàa wà vɔ-mì píé. À bɛ̃̀ɛ̃ weeá kélɛ̀, “Mi lɛ́ gèlè-gɔ̃-làà lé pèèlɛ líé zɛ̀ lɛ à kɛ̀lɛ̀ɛ, wɔ̃́ lɛ́ à gèea gɛ̃̀ e ké.

¹³Ḿm̀ i kɛpìà lɛ́ Sétɔ̃̀ zì dɔ-táŋáná gbɛ̃̀ɛ̃̀ lɛ yía dɔ. Íì m wɔ̃̀ kũ gágà. I zì zò-dɔ̀à-mɔ̀ lɛ́ lɛ i yí m mɔ́ɔ̀ wɔ̃̀ mɔ̀ɔ, ìí gbaa kã́ à mɔ̀, lúó lɛ́ bɛ̃̀ɛ̃ o Ã́típà zɛ à káa ká. O Ã́típà lɛ́ e kɛ m zì kélá zò-dɔ̀à-mɔ̀ zɛ̀ káa zɛ ka fĩ̀ã̀ yi, lɛ̀ lɛ́ Sétɔ̃̀ lɛ yía mɔ̀.

¹⁴Kɛɛ wɔ̃́ zààle lɛ́ m̀ḿ naa à ká i mɔ̀ɔ gɛ̃̀ e ké. Mia gbṹũ̀ o ka bà wáà tò Bélàũ̀ zì pɛ-zɔ̃̀ɔ̃̀-kɔ̀ píé. Bélàũ̀ e kília, e zi lɛ́ è bɛ̀i à mɔ̀ é à kɛ Éézɛ̀lɛ̀-mìà ó kɛ-wɔ̃̀ yɔɔ kɛɛ zɔ̃̀ɔ̃̀ Bélà lɛ̀ɛ. Zí e kília lɛ́ e kélɛ̀, ó léɓèlè lɛ́ à kóná ɓoò lɛ kɛ̀ɛ̀-wɛ́lɛ́ mɔ̀ɔ ó à ɓèlè, ɛ̃́ɛ̃́ kɛ ó sɔ̃̀ɔ̃ yɔɔ kɛɛ.

¹⁵Zí nɔ́ doóa káa, mia gbṹũ̀ lɛ́ ò to Nikòlétà-mìà zì pɛ-zɔ̃̀ɔ̃̀-kɔ̀ píéa, o à ká ka bà.

¹⁶À mɔ́ɔ̀ wɔ̃̀ mɔ̀ɔ, ì i sɔ̃̀ɔ̃ mɛ́ vɔ̀ɔ. Í gɔ̃̀á kɛɛ̀ kília, kɛɛ maà nu i píé dɛɛ ká, máà gèlè gɔ̃̀ míá o kília ká gèlè-gɔ̃-làà lɛ́ à dɔɔ̀ lɛ m léa ká.

¹⁷“Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀. “Ḿm̀ lo belè lɛ́ ò si mánà lɛ́ à bĩ̀ĩĩ̀ lɛɛ dò nɔɔ̀ mi lɛ́ à kɔ̀ aà die gèlè gɔ̃ɔ̀ yía lɛ̀ɛ. Ɛ́ɛ̃́ ḿm̀ lo gɛ̀lɛ̀ púlú lɛ́ tɔ́ dɛɛ bɛ̃̀ɛ̃ɛ̃̀ lɛ à làa nɔɔ̀ à lɛ̀ɛ. Mi gbɛɛ lɛ̀ɛ́ tɔ́ e kília dɔ. Mí nɔ́ à sɔ̀lɔ̀ ɓoa lɛ́ nɔ́ è à dɔɔ.

¹⁸“Wɔ̃́ e kéa bɛ̃̀ɛ̃ Wálà-mìà lɛ́ o Táyàtélàa wà vɔ-mì píé. À bɛ̃̀ɛ̃ weeá kélɛ̀, “Wɔ̃́ lɛ́ Wálà Gbe lɛ́ à nyìɛ-wɛ̀lɛ̀ lɛ kélɛ̀ tíé kṹàa lɛ́ ɓe, ɛ̃́ɛ̃́ lɛ́ zeĩ́ à gã̀ mɛ́ è ɓɔ lɛ̀ pɛ-kúlú lɛ́ o à kɛ à mɛ́ áà ɓɔ̀ɔ lɛ́ ɓea, wɔ̃́ lɛ́ à gèea gɛ̃̀ e ké.

¹⁹Ḿm̀ i kɛ-wɔ̃̀ dɔ. I zì lɔ̀-kɛ̀à-mɔ̀, e bɛ̀i i zì zò-dɔ̀à-mɔ̀, ɛ̃́ɛ̃́ i zì yɛɓo ɛ̃́ɛ̃́ i zì zò-kũ̀-tã́ã̀a, ḿm̀ à dɔ. Ḿm̀ à yí dɔ i wɔ̃́ kɛpìà gbùò gbaa é diá wɔ̃́ ɓa kɛ bèĩzɛ̀ɛ là.

²⁰Kɛɛ wɔ̃́ lɛ́ m̀ḿ naa à ká i mɔ̀ɔ gɛ̃̀ e ké. Íì wèè à mɔ̀ tó lee lɛ́ ò si Zɛ́zébɛ̀, lɛ́ è e dìè si dɔ̀-Wálà-lé-là-mìa, tó áà kɛ̀ ka bà. Lɛ́ɛ̀ pɛ zɔ̃̀ɔ̃̀ tó áà zi yɔɔ zɔ̃̀ɔ̃̀ m̀ yɛɓo-kɛ-mìà lɛ̀ɛ. Láà kɛ̀ tó wáà sɔ̃̀ɔ̃ yɔɔ kɛ̀, ɛ̃́ɛ̃́ tó wáà léɓèlè lɛ́ à kóná ɓoò lɛ kɛ̀ɛ̀-wɛ́lɛ́ mɔ̀ɔ ɓèlè.

²¹Maà lúó nɔ à lɛ̀ɛ é e sɔ̃̀ɔ̃ yɔɔ mɛ́ vɔ̀ɔ. Kɛɛ lɛ̀ɛ́ wéé à mɔ̀ kɛ é kã́ sɔ̃̀ɔ̃ yɔɔ à kɛ̀ɛ mɔ̀.

²²Yé lɛ kília, ɛ̀ɛ̀, ḿm̀ lo à dàà béè là. Ɛ́ɛ̃́ wà gɔ̃à nì lɛ́ ò kɛ-wɔ̃̀ yɔɔ kɛ̀ɛ, óò lo wàa ɓèlè yí gágà zɛ̀. Ḿm̀ lo à kɛɛ̀ kíli, yé òó o sɔ̃̀ɔ̃ yɔɔ lɛ́ wà ye nì o kɛ à kɛpìàa mɛ́ vɔ̀ɔ nɛ́ɛ ká.

²³Ḿm̀ lo là nɔ́ɔ̀ nì zɛɛ̀. Wálà-mìà lɛ́ o lɛ̀ séĩ́ mɔ̀ɔ óò lo à yí dɔɔ̀ kélɛ̀ ma lɛ́ m̀ mia séĩ́ yɛ́lɛ́-tàà-yí-wɔ̃̀, ɛ̃́ɛ̃́ o zì zò-píé-wɔ̃̀ mɛ́ nyɛɛ. Ɛ́ɛ̃́ ḿm̀ lo ka séĩ́ ka fɔ́nɔ́ ɓoò síì doó doó yɛɓo kaà kɛɛ mɔ̀.

²⁴“Kɛɛ mia yé ka tó lɛ́ ka Táyàtélàa, kàá tó do pɛ-zɔ̃̀ɔ̃̀-kɔ̀ e kília píé. Kàá wɔ̃́ lɛ́ mia yé o tóa ò si Sétɔ̃̀ zò-wì-wɔ̃̀ɔ dã́ nɛ́. Ḿm̀ gèe ka lɛ̀ɛ, m̀ḿ ló vũ gbɛɛ yàà ka wĩĩ́.

²⁵Kɛɛ kà ka kɔ̀ kɛ pɛ́ yé lɛ ka kɛ̀lɛ̀ɛ mɔ̀ gágà, é tóá kíli m nu-lùò é ɓɔ.

²⁶Mi lɛ́ à kɔ̀ diè lɛ gèlè gɔ̃ɔ̀ yí, ɛ̃́ɛ̃́ lɛ́ lɛ wɔ̃́ lɛ́ m̀ nàà à káa kɛpìà é tóá kíli é ɓɔá wɔ̃́ líé-nyɛpìàa, ḿm̀ lo yíkɛ̀ gáàa nɔ́ doó ma gɛ̃̀ m Dàa kɛ̀lɛ̀ɛ nɔɔ̀ à lɛ̀ɛ. Ḿm̀ lo yíkɛ̀ gáàa nɔɔ̀ à lɛ̀ɛ é kɛá sɛ́lɛ́ gbɛɛ̀ gbɛɛ là, kɛ é líé sí o ká kpó-kpó ɓo lɛ̀ mi lɛ́ pɛ-kúlú kpuú lɛ à kɛ̀lɛ̀ɛ lɛ́ ɓe. Ɛ́ɛ̃́ lɛ́ɛ̀ lo mia wíì féfé lɛ̀ zí ò beì-gbɔɔ wiáa lɛ́ ɓe. Ɛ́ɛ̃́ ḿm̀ lo làapíé sĩ̀ã́ã̀ŋèlè nɔɔ̀ à lɛ̀ɛ.

²⁹“Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀.