Read Yamano Wɛ̀lɛ̀vèlésɔ̃̀ 20 Bible Online

Wɛ̀lɛ̀vèlésɔ̃̀ 20 - Yamano bible

Wɛ̀lɛ̀vèlésɔ̃̀ 20

¹M bɛ̀i m Wálà là vɔ-mì doó gɛ̃̀, áà gò lɛ̀í. Gùlù lɛ́ à tèá-pìà wá ɓea à kíì e kɛ à kɛ̀lɛ̀, é kpɔ́á pɛ-kúlú ɓɛ̀lɛ̀ gbɔ̃̀ṹ dò mɔ̀.

²E dálágɔ̃̀ lɛ́ lɛ mɛ̀nɛ zii ɛ̃́ɛ̃́ Dɛ́ɓò, e bɛ̀i Sétɔ̃̀ káa kṹ, a yèlè kɛ é kɛ ɓɛ̀lɛ̀ yí kɛ̀ɛ̀ wáá doó píé.

³Wálà là vɔ-mì e kília e à dùò gùlù e kília yí. E gùlù e kília lé taa, ɛ̃́ɛ̃́ à lé dùò gbaa kpɛ̃ĩ le, yékɛ̀ é sɛ́lɛ́ gbɛɛ̀ gbɛɛ yí-mìà bèkɛ̀ ɓo gbaa, é tóá kíli kɛ̀ɛ̀ wáá doóa é nyɛ. Yé lúó e kília aà diea, laa mɔ̀ ó à ɓo gùlùa yí gbaa ɓéĩ́ ɓo.

⁴Yé e kɛ kília, m dɔ-táŋáná wà mia lɛ́ o kɛ yàá o làa gɛ̃̀. O yíkɛ̀ gáàa nɔ o lɛ̀ɛ kɛ ó mɛ̀ĩ́-sà ɓo à ká. Zéniía, m mia lɛ́ waà o wũ-kèlè kã́ o là o zì kélá-wè ɓoò Zízɛ̀ lɛ̀ɛ, ɛ̃́ɛ̃́ Wálà lé-wè mɔ́ɔ̀ wɔ̃̀ mɔ̀ɔ o gɛ̀ɛ̀ gɛ̃̀. Òó gbini do luú-wììa wà e bĩ́ o lɛ̀ɛ. Ɛ́ɛ̃́ òó luú-wììa là pɛ píéa sɔ̀lɔ̀ ɓo do o pelà, ɛ̃́ɛ̃́ o kɛ̀lɛ̀ɛ. O kɛ ɓe zeĩ́, wà Kɛ́lɛ̀ì nì wáà líé sì mia ká kɛ̀ɛ̀ wáá doó píé.

⁵Mia yé o tó lɛ́ o gaà lɛɛ, òó gbaa kɛ ɓe é tó à ká kíli kɛ̀ɛ̀ wáá doóa é die. Mia wɛ̀lɛ̀-ga-kɛ̀lɛ̀ bèĩzɛ̀ɛ ye lɛ́ ɓɛ.

⁶Mia lɛ́ o mia lɛ́ o wɛ̀lɛ̀ ga kɛ̀lɛ̀ e kéa bàa, zò géli lɛ o kɛ̀lɛ̀, ɛ̃́ɛ̃́ o Wálà là mia nì ká. Ga tò-ko-mɔ̀ zɛ̀ɛ là yíkɛ̀ gáàa wá o là. Óò lo kɛɛ̀ sálà-ɓò-Wálà-mɔ̀-mìà ká. Ɛ́ɛ̃́ óò lo kɛɛ̀ Wálà wà Kɛ́lɛ̀ì wà mia nì ká. Wà Kɛ́lɛ̀ì nì óò lo mia líé síì kɛ̀ɛ̀ wáá doó píé.

⁷Yé kɛ̀ɛ̀ wáá doó e kília aà diea, óò lo Sétɔ̃̀ ɓoò bĩ́-kɛ̀ì.

⁸Lɛ́ɛ̀ lo lóò mia bèkɛ̀ ɓòá sí sɛ́lɛ́ kɔ̀ pɔ̃́ũ̀ yììsɛɛ là. Sɛ́lɛ́ e kília o tɔ́ lɛ́ Gɔ́ɔ̀ wà Mégɔ̀. Sétɔ̃̀ lɛ́ɛ̀ lo o páà o kíe mɔ̀ kɛ ó gèlè gɔ̃. Míá o kília o zì kù-kɛ̀-gbɔ́ù-kɔ̀ lɛ kélɛ̀ nyìɛ́-sɛ́lɛ́ lɛ́ ɓe mɛ̀ĩ́ kpóṹ là.

⁹O wɛ̃̀ĩ gbaa sɛ́lɛ́ yí píé wáà lò nìá sí lɛ̀ lɛ́ Wálà-mìà ò pa o kíe mɔ̀ yi, ɛ̃́ɛ̃́ pɛ́lɛ lɛ́ à lɔ̀ kpɔ́ɔ̀ lɛ Wálà mɔ̀ɔ mɔ̀ píé. Kɛɛ tíé e gó lɛ̀í e nu, e o yí sìè.

¹⁰Ɛ́ɛ̃́ Dɛ́ɓò lɛ́ e kɛ o bèkɛ̀ ɓopìàa, o à dùò tíé-pà lɛ̀ lɛ́ sɔ́fà lɛ yía mɔ̀. Luú-wììa wà mi lɛ́ è e dìè si dɔ̀-Wálà-lé-là-mì, lɛ́ ye wá mɔṹ à káa, o kɛ à lɛ̀ mɔ̀. O sã̀ lɛ́ɛ̀ lo dɔɔ̀ bĩ́á ɛ̃́ɛ̃́ nyɛ́nɛ́ĩ́, e bɛ̀i tòá kíli wɔ́lɔ́-wɔ́lɔ́ ká.

¹¹E bɛ̀i m dɔ-táŋáná púlú gbùò dò, ɛ̃́ɛ̃́ mi lɛ́ lɛ yàá làa gɛ̃̀. Tã́ã̀ zèe wà lɛ̀í o wàà o gó à wɛlɛ mɔ̀. Lɛ̀ gbɛɛ lɛ̀ɛ́ gbaa kɛ ɓe o lɛ̀ɛ gbaa.

¹²Ɛ́ɛ̃́ m mia lɛ́ waà ga, ó kɛ bɛ̃̀ɛ̃ kpànazɛ̀ ɛ̃́ɛ̃́ fĩ́ĩ́nyɛ zɛ̀ɛ gɛ̃̀. O kɛ dɔ̀á dɔ-táŋánáa wɛlɛ mɔ̀. Kii dò lé ɓoò e kɛá píé píé. Ɛ́ɛ̃́ kii dò lé e ɓo zeĩ́. Kíí e kília lɛ́ e kɛ̀ɓe-kii káa. Mia lɛ́ waà gaa, o mɛ̀ĩ́-sà dɔ o mɔ̀ wɔ̃́ lɛ́ waà kɛ, lɛ́ à bɛ̃̀ɛ̃ɛ̃̀ e kɛá kii làa ká.

¹³Lɛ̀ e kɛ kília, mɛ̀ĩ́ e mia lɛ́ waà ga à bàa ɓo e bà. Ga wà lɛ̀ lɛ́ mia yé o gaà lɛɛ o yía, o mia lɛ́ waà gaa o nɔ. O mɛ̀ĩ́-sà dɔ o séĩ́ o mɔ̀ wɔ̃́ lɛ́ waà kɛɛ ká.

¹⁴Lɛ̀ e kɛ kília, ga wà lɛ̀ lɛ́ mia yé o gaà lɛɛ o yía, o o dùò gbaa tíé-pà. (Tíé-pà e kília ye lɛ́ e ga kpolà pèèlɛ zɛ̀ɛ káa.)

¹⁵Mi lɛ́ à tɔ́ bɛ̃̀ɛ̃ɛ̃̀ lɛ̀ɛ́ gbaa kɛá kɛ̀ɓe-kiia yía o à dùò tíé-pà.